នេះជាការចាប់ផ្ដើមលើកដំបូង ដោយប្រាប់អំពីពេលវេលាបោះឆ្នោត ថ្ងៃ ខែបោះឆ្នោត និងលក្ខខណ្ឌសម្រាប់ការបោះឆ្នោតសកល នៅថ្ងៃទី២៨ ខែកក្កដា ខាងមុខនេះ។
ប្រជាពលរដ្ឋអ្នកបោះឆ្នោតចំនួនជាង ៩លាន ៦សែននាក់ អាចស្តាប់សារជាសំឡេងនៅតាមទូរស័ព្ទដៃពីគ្រប់ប្រព័ន្ធ ដោយមិនគិតថ្លៃ គឺគ្រាន់តែចុចលេខពិសេស ១២៨៥ ដើម្បីទទួលការណែនាំ និងទទួលព័ត៌មានខ្លីៗជុំវិញនីតិវិធីបោះឆ្នោត និងឈ្មោះអ្នកបោះឆ្នោតនៅក្នុងបញ្ជីអ្នកបោះឆ្នោត នៅថ្ងៃទី២៨ ខែកក្កដា ខាងមុខនេះ។
សេវាផ្តល់ព័ត៌មានចូលតាមទូរស័ព្ទដៃនេះ គឺចាប់ផ្ដើមពីពេលនេះរហូតដល់ខែកញ្ញា ឆ្នាំ២០១៣ ក្រោយការបោះឆ្នោតសកល។ ក្រៅពីនេះ គ.ជ.ប និងបង្កើតឲ្យមានប្រព័ន្ធទូរស័ព្ទហៅបន្ទាន់ចំនួន ៥ខ្សែ (Hotline) នៅខែមិថុនា ខាងមុខនេះ ដើម្បីផ្តល់ព័ត៌មាននានាជូនអ្នកបោះឆ្នោតអំពីឈ្មោះ និងបញ្ជីអ្នកបោះឆ្នោត និងការិយាល័យបោះឆ្នោតជាដើម។
ប្រធានគណៈកម្មាធិការជាតិរៀបចំការបោះឆ្នោត លោក អ៊ឹម សួស្តី បានមានប្រសាសន៍ថា ការបោះឆ្នោតសកលខាងមុខនេះ គឺដំណើរការដោយសេរី និងតម្លាភាព ស្របតាមលទ្ធិប្រជាធិបតេយ្យ៖ «លទ្ធិប្រជាធិបតេយ្យ គឺជាដំណើរការដែលមានការចូលរួមជាប្រចាំ។ ការបោះឆ្នោត គឺជាមូលដ្ឋានគ្រឹះដែលមិនអាចខ្វះបាននៅក្នុងលទ្ធិប្រជាធិបតេយ្យ ហើយការបោះឆ្នោតនេះទៀតសោត ក៏ត្រូវចូលរួមពីគ្រប់ភាគីពាក់ព័ន្ធ»។
ប្រតិកម្មទៅនឹងការរៀបចំការបោះឆ្នោតខាងមុខនេះ អ្នកនាំពាក្យគណបក្សសង្គ្រោះជាតិ លោក យឹម សុវណ្ណ និងជាតំណាងរាស្ត្រគណបក្ស សម រង្ស៊ី បានមានប្រសាសន៍ថា គណបក្សសង្គ្រោះជាតិ និងគណបក្ស សម រង្ស៊ី កំពុងតែពិចារណាមិនទទួលយកលទ្ធផលនៃការបោះឆ្នោតខាងមុខនេះ ដរាបណាលោក សម រង្ស៊ី មិនអាចមកចូលរួមក្នុងការបោះឆ្នោត និងគ្មានការកែទម្រង់ គ.ជ.ប ទេនោះ៖ «គ.ជ.ប មិនកែទម្រង់តាមអនុសាសន៍របស់លោក សុរិយា ស៊ូប៊ែឌី (Surya Surbedi)ទេ គឺការបោះឆ្នោតពុំមានសេរី និងយុត្តិធម៌ទេ ហើយជាពិសេស នៅក្នុងអនុសាសន៍នោះ អង្គការសហប្រជាជាតិហើយរួមទាំងអនុសាសន៍របស់មេដឹកនាំរបស់ប្រទេសមហាអំណាចមួយចំនួនធំ មានសហភាពអឺរ៉ុប សូម្បីតែប្រទេសនៅអាស៊ាន ក៏គេចង់ឲ្យមានលោកប្រធាន ឯកឧត្តមប្រធាន សម រង្ស៊ី មានវត្តមានចូលរួមក្នុងការបោះឆ្នោតដែរ»។
ប្រមុខរដ្ឋាភិបាល លោក ហ៊ុន សែន បានមានប្រសាសន៍កាលពីថ្ងៃទី១៤ ខែមីនា ថ្មីៗនេះថា លោកមិនបានបណ្ដេញលោក សម រង្ស៊ី ទៅក្រៅប្រទេសកម្ពុជា ទេ ហើយលោកក៏មិនបានរារាំងមិនឲ្យលោក សម រង្ស៊ី វិលចូលកម្ពុជា ដែរ ប៉ុន្តែលោក សម រង្ស៊ី មិនហ៊ានប្រឈមមុខនឹងការជាប់ទោសដូចអ្នកស្រី អ៊ុងសាន ស៊ូជី (Aung San Suu Kyi) មេដឹកនាំប្រជាធិបតេយ្យនៅភូមា (មីយ៉ាន់ម៉ា)។
ទាក់ទងនឹងការបោះឆ្នោតនេះ អគ្គលេខាធិការគណៈកម្មាធិការជាតិរៀបចំការបោះឆ្នោត លោក ទេព នីថា បានមានប្រសាសន៍ថា គ.ជ.ប ធ្វើអ្វីៗទៅតាមច្បាប់បោះឆ្នោត និងនីតិវិធីបោះឆ្នោតទូទៅខាងមុខនេះ៖ «ហើយយើងផ្តល់ឱកាសស្មើគ្នាដល់គណបក្សនយោបាយទាំងអស់។ អីចឹងការចូលរួម ឬការមិនចូលរួមរបស់គណបក្សនយោបាយណាមួយ គឺជាសិទ្ធិរបស់គាត់ ហើយទោះបីមានការចូលរួម ឬមិនចូលរួមពីគណបក្សណាក៏ដោយ ខ្ញុំមិនសំដៅលើគណបក្សណាទេ គឺថាយើងមានប៉ុន្មាន អនុវត្តប៉ុណ្ណឹង ព្រោះថា យើងអនុវត្តតាមច្បាប់ដែលតម្រូវឲ្យ គ.ជ.ប អនុវត្តទៅតាមពេលវេលា និងការកំណត់នៃច្បាប់បាទ»។
សេចក្តីរាយការណ៍របស់មន្ត្រីជាន់ខ្ពស់ គ.ជ.ប បានឲ្យដឹងថា រហូតដល់ពេលនេះ អង្គការជាតិចំនួន ១៤ បានមកចុះឈ្មោះត្រៀមសង្កេតការណ៍ក្នុងការបោះឆ្នោតខាងមុខនេះ គឺស្មើនឹងអ្នកសង្កេតការណ៍ចំនួនជាង ២ពាន់នាក់ និងអង្គការអន្តរជាតិចំនួន៣ ដែលមានអ្នកសង្កេតការណ៍ចំនួនជាង ២០នាក់។
មន្ត្រីជាន់ខ្ពស់ គ.ជ.ប រំពឹងថា គណបក្សនយោបាយសរុបចំនួន ១០ នឹងចុះឈ្មោះដើម្បីចូលរួមក្នុងការបោះឆ្នោតខាងមុខនេះ ហើយប្រជាពលរដ្ឋអ្នកបោះឆ្នោតចំនួនជាង ៩លាន ៦សែននាក់ នឹងទៅបោះឆ្នោតនៅថ្ងៃទី២៨ ខែកក្កដា នៅមណ្ឌលបោះឆ្នោតចំនួន ២៤ខេត្ត-ក្រុង និងការិយាល័យបោះឆ្នោតចំនួន ១៩ពាន់ និង៩ការិយាល័យ នៅទូទាំងប្រទេសកម្ពុជា។
ជាមួយគ្នានេះ គ.ជ.ប គ្រោងចំណាយថវិកាចំនួនជាង ២០លានដុល្លារអាមេរិក សម្រាប់ការបោះឆ្នោតជ្រើសរើសតំណាងរាស្ត្រនាពេលខាងមុខនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។