ការសម្ដែងក្ដីបារម្ភនេះ បន្ទាប់ពី គ.ជ.ប បានប្រកាសជូនដំណឹងកាលពីចុងខែមីនា ឲ្យគណបក្សនយោបាយដែលមានបំណងចូលរួមឈរបោះឆ្នោតសម្រាប់ជ្រើសតាំងតំណាងរាស្ត្រនីតិកាលទី៥ នាខែកក្កដា ខាងមុខ ឲ្យតម្កល់ប្រាក់ចំនួន ១៥លានរៀល។
នាយកគណៈកម្មាធិការអព្យាក្រឹតនិងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា ហៅកាត់ថា និកហ្វិច (NICFEC) លោក ហង្ស ពុទ្ធា បានហៅបទបញ្ញត្តិរបស់ គ.ជ.ប ថាកំពុងក្លាយជាឧបសគ្គ និងកាត់បន្ថយសិទ្ធិចូលរួមក្នុងការប្រកួតប្រជែងរបស់គណបក្សនយោបាយ។ ជាក់ស្ដែងមានគណបក្សនយោបាយចុះឈ្មោះនៅឯក្រសួងមហាផ្ទៃ មានជាង ៤០គណបក្ស ប៉ុន្តែមានតែជាង ១០គណបក្សប៉ុណ្ណោះ ដែលឈរឈ្មោះបោះឆ្នោតនៅពេលកន្លងមក។
លោក ហង្ស ពុទ្ធា៖ «ការកំណត់ខ្ពស់ពេក ហាក់ដូចជាធ្វើឲ្យរាំងស្ទះ ហាក់ដូចជាបានកាត់បន្ថយនូវសិទ្ធិចូលរួមក្នុងការធ្វើសកម្មភាពនយោបាយជាគណបក្សប្រកួតប្រជែង»។
ការដាក់កំហិតឲ្យគណបក្សបង់ប្រាក់កក់ជាមុននេះ ត្រូវបានមន្ត្រីជាន់ខ្ពស់ គ.ជ.ប ពន្យល់ថា ធ្វើឡើងដោយយោងតាមច្បាប់បោះឆ្នោតជ្រើសតាំងអ្នកតំណាងរាស្ត្រ។
ក្នុងលិខិតជូនដំណឹងថ្មីរបស់ គ.ជ.ប បញ្ជាក់ថា ប្រាក់តម្កល់ ១៥លានរៀល នឹងត្រូវបង្វិលជូនទៅកាន់គណបក្សសាម៉ីវិញ ក្នុងករណីដែលគណបក្សនោះដណ្តើមបានការគាំទ្រយ៉ាងតិច ៣% នៃសំឡេងឆ្នោតសរុប ឬបានទទួលកៅអីយ៉ាងតិចមួយអាសនៈនៅក្នុងរដ្ឋសភា។ ប្រសិនបើគណបក្សនយោបាយណាមួយមិនទទួលបានសំឡេងគាំទ្រគ្រប់ ឬកៅអីក្នុងរដ្ឋសភាទេនោះ ប្រាក់តម្កល់នឹងមិនត្រូវបង្វិលឲ្យវិញទេ។
ជុំវិញបញ្ហានេះដែរ អគ្គលេខាធិការ គ.ជ.ប លោក ទេព នីថា ពន្យល់ថា គ.ជ.ប មិនបានកំណត់ប្រាក់តម្កល់នោះទេ។ ប៉ុន្តែច្បាប់បោះឆ្នោតបានកំណត់ឲ្យគណបក្សនយោបាយដែលឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោត ត្រូវតម្កល់ប្រាក់ជាចាំបាច់។
លោក ទេព នីថា៖ «ពេលចុះបញ្ជីគណបក្សនយោបាយ បេក្ខជនឈរឈ្មោះ លក្ខខណ្ឌគឺត្រូវបង់ប្រាក់តម្កល់ ១៥លានរៀល។ ១៥លានរៀល គាត់នឹងអាចទទួលយកវិញបាននៅពេលដែលគាត់បាន ៣ភាគរយ ឬក៏គាត់បានទទួលអាសនៈមួយតែក្នុងករណីគាត់មិនទទួលបានសំឡេងឆ្នោតមិនបាន ៣ភាគរយ ឬអាសនៈមួយទៀតប្រាក់នឹងទៅជាប្រាក់របស់រដ្ឋ»។
លោក ទេព នីថា សង្ឃឹមថា អាចនឹងមានគណបក្សនយោបាយយ៉ាងតិច ១០ នឹងឈរឈ្មោះបោះឆ្នោតជ្រើសរើសតំណាងរាស្ត្រអាណត្តិទី៥ ដែលប្រព្រឹត្តទៅនៅថ្ងៃទី២៨ ខែកក្កដា។
តាមប្រតិទិនរបស់ គ.ជ.ប ការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជន គឺចាប់ផ្ដើមពីថ្ងៃទី២៩ មេសា ដល់ថ្ងៃទី១០ ឧសភា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។