អ្នក​ភៀស​ខ្លួន​នយោបាយ​និង​ពលករ​ខ្មែរ​នៅ​​ថៃ​សំងំ​ក្នុង​បន្ទប់​ជួល​ក្នុង​ពេល​ចូលឆ្នាំ ដើម្បី​កុំ​ឱ្យ​ល្មើស​បម្រាម​របស់​ថៃ

ដោយ សន ចាន់រដ្ឋា
2021-04-15
Share
អ្នក​ភៀស​ខ្លួន​នយោបាយ​និង​ពលករ​ខ្មែរ​នៅ​​ថៃ​សំងំ​ក្នុង​បន្ទប់​ជួល​ក្នុង​ពេល​ចូលឆ្នាំ ដើម្បី​កុំ​ឱ្យ​ល្មើស​បម្រាម​របស់​ថៃ ពលករ​ខ្មែរ​ធ្វើ​ការ​សំណង់​នៅ​ប្រទេស​ថៃ។
Photo: RFA

នៅ​ក្នុង​ឱកាស​ពិធីបុណ្យ​ចូលឆ្នាំ​ប្រពៃណី​ជាតិ​ថ្ងៃ​ដំបូង​នេះ ពលករ​ខ្មែរ​និង​សកម្មជន​គណបក្ស​សង្គ្រោះ​ជាតិ​ដែល​ភៀសខ្លួន និង​ធ្វើការ​នៅ​ប្រទេស​ថៃ មិនបាន​ទៅ​ដើរលេង​កម្សាន្ត​ដូច​ឆ្នាំមុនៗ​ឡើយ ដោយសារ​ការ​រាតត្បាត​ជំងឺ​កូវីដ១៩។ ពួកគាត់​ភាគ​ច្រើន​នាំគ្នា​សម្ងំ​នៅក្នុង​បន្ទប់​ជួល និង​ធ្វើ​ពិធីជប់លៀង​ជុំគ្នា​បន្តិចបន្តួច​នៅ​កន្លែង​ស្នាក់នៅ។

ក្រុម​ពលករ​ខ្មែរ​នៅ​ប្រទេស​ថៃ​ថ្លែង​ថា ពួកគេ​នឹក​ស្រុកកំណើត​និង​ចង់ទៅ​ជួបជុំ​បងប្អូន​ក្នុង​ឱកាស​បុណ្យ​ចូល​ចូលឆ្នាំ​ខ្មែរ​ដែរ ប៉ុន្តែ​មិនអាច​ទៅ​បាន​ដោយសារ​អាជ្ញាធរ​កម្ពុជា និង​ថៃ​បិទ​ព្រំដែន​ប្រទេស​ទាំងពីរ​និង​គ្មាន​ប្រាក់​ធ្វើដំណើរ​។ ចំណែក​សកម្មជន​បក្ស​ប្រឆាំង​ដែល​កំពុង​ភៀសខ្លួន​វិញ ពួកគាត់​ត្រឡប់​ទៅវិញ​មិនបាន ដោយសារ​ការ​ធ្វើទុក្ខបុកម្នេញ​ពី​របប​លោក ហ៊ុន សែន។

ពលករ​មាន​ស្រុកកំណើត​នៅ​ខេត្ត​កោះកុង លោកស្រី ពិន ស្រីលីន ប្រាប់​អាស៊ីសេរី​នៅ​ព្រឹក​ថ្ងៃទី​១៤​មេសា​ថា បុណ្យចូលឆ្នាំ​ខ្មែរ​ថ្ងៃ​ដំបូង មាន​សភាព​សោះកក្រោះ ពោល​គឺ​ប្រៀប​ដូច​ថ្ងៃ​ធម្មតា​ដែល​គ្មាន​បុណ្យទាន​ដែរ។ ស្ត្រី​វ័យ​៣០​ឆ្នាំ​ប្លាយ​រូប​នេះ​បន្ត​ថា នៅ​កន្លែងធ្វើការ​របស់​លោក​ស្រី មាន​ពលករ​ខ្មែរ​ប្រមាណ​៥០០​នាក់ ហើយ​ពួកគេ​មិនបាន​ទៅ​ធ្វើ​បុណ្យ​នៅ​ទី​វត្ត​អារាម ឬ​ទៅ​ដើរលេង​កម្សាន្ត​នោះ​ទេ ដោយសារ​ខ្លាច​ឆ្លង​ជំងឺ​កូវីដ១៩។ លោកស្រី​បញ្ជាក់​ទៀត​ថា ពលករ​ភាគច្រើន​ស្នាក់​នៅក្នុង​បន្ទប់​ជួល ហើយ​នាំគ្នា​តាមដាន​ព័ត៌មាន​តាម​បណ្ដាញ​សង្គម​ហ្វេសប៊ុក (Facebook)​ដើម្បី​កាត់បន្ថយ​ការ​នឹករលឹក​ស្រុក​កំណើត៖ «ចង់​ទៅលេង​បាងកក​ទៅ​ជួប​មិត្តភ័ក្ដិ​ក៏​អត់ ចង់​ទៅលេង​ស្រុក​ក៏​ទៅ​មិនកើត ឆ្លង​ដែន​គេ​កាក់​ខ្លួន​២០​ថ្ងៃ​ត្រឡប់​មកវិញ​ក៏​ពិបាក មានតែ​ទ្រាំ​នៅ​រកស៊ី​ផ្ញើ​លុយ​ផ្ញើ​កាក់​ទៅផ្ទះ​តិចតួច​ទៅ គ្រាន់បើ​ជាង​យើង​ទៅផ្ទះ​ឱ្យ​គេ​គាបសង្កត់​គ្រប់​បែប​យ៉ាង​។ ស្ដាប់ៗ​ទៅ​បងប្អូន​ខ្ញុំ​ប្រាប់​មក​ថា លំបាក​ណាស់​នៅ​ស្រុក​នោះ ដល់​អីចឹង​ខ្ញុំ​សុខចិត្ត​ទ្រាំ​នៅ​បែក​បងប្អូន​បែក​កូន​បែក​ចៅ​នៅ​ស្រុក​គេ​។ ពេលខ្លះ​ខ្ញុំ​នៅក្នុង​បន្ទប់​សម្ងំ​ស្ងាត់​តែឯង អីចឹង​មើល​ទូរស័ព្ទ​ឃើញ​អីចឹង​តុកស៊ិក​មួម៉ៅ​ដែរ តែ​មិនដឹង​ធ្វើ​ម៉េច​មាន​តែ​ទ្រាំ»

ចំណែក​សកម្មជន​គណ​បក្ស​ប្រឆាំង​វិញ ពួកគេ​ក៏​មិន​បាន​ទៅ​ដើរ​លេង​កម្សាន្ត​នៅ​ក្នុង​ឱកាស​បុណ្យចូលឆ្នាំ​ដែរ ប៉ុន្តែ​ពួកគេ​នាំគ្នា​ធ្វើ​ពិធី​ជប់លៀង​ហូប​នំ​បញ្ចុក​ជុំគ្នា​នៅ​ទីក្រុង​បាងកក​បន្តិចបន្តួច ដើម្បី​បង្កើន​ភាព​ស្និទ្ធស្នាល​ក្នុង​ពេល​ភៀស​ខ្លួន​នៅ​ប្រទេស​ថៃ។

មន្ត្រី​គណបក្ស​សង្គ្រោះ​ជាតិ​រាជធានី​ភ្នំពេញ ដែល​កំពុង​ភៀសខ្លួន​នៅ​ប្រទេស​ថៃ លោក ទុំ ប៊ុនថន មាន​ប្រសាសន៍​ថា លោក​គ្មាន​អារម្មណ៍​លេង​សប្បាយ​ក្នុង​ពេល​ចូលឆ្នាំ​ខ្មែរ​នោះ​ទេ ដោយសារ​លោក​ឈឺចាប់​នៅ​ពេល​ឃើញ​ប្រជាពលរដ្ឋ​ខ្មែរ​ក្រីក្រ​លំបាក ជាច្រើន​នាក់ ជាពិសេស​សហការី​ដែល​កំពុង​ជាប់ឃុំ​នៅ​ពន្ធនាគារ​មិន​បាន​ជួបជុំ​សាច់ញាតិ​។ លោក​បញ្ជាក់​ទៀត​ថា កាលៈទេសៈ​បែបនេះ​បាន​ធ្វើ​ឱ្យ​លោក​មាន​ទឹកចិត្ត​តស៊ូ​ទៅ​មុខ​ទៀត ដើម្បី​ទាមទារ​ប្រទេសជាតិ​មាន​ប្រជាធិបតេយ្យ​ពេញលេញ៖ «ខ្ញុំ​មិន​ត្រឹមតែ​មិនបាន​ជួបជុំ​បងប្អូន​ទេ ក៏​ព្រាត់ប្រាស​ដូច​ពួកគាត់​ដែរ អីចឹង​អារម្មណ៍​ខ្ញុំ​យល់​ពី​ការ​ព្រាត់ប្រាស​គ្នា​នេះ​ជា​រឿង​មួយ​ដែល​ឈឺចាប់​ដែល​យើង​មិនអាច​បំភ្លេច​បាន​ទេ ជាពិសេស​យើង​បង្កើត​ការ​ឈឺចាប់​ហ្នឹង​ទៅជា​ការ​តស៊ូ ដើម្បី​ផ្លាស់​របប​លោក​ហ៊ុន សែន​ជាពិសេស​ដើម្បី​ឱ្យ​ប្រជាពលរដ្ឋ​ខ្មែរ​អាច​ជួបជុំគ្នា​ឡើងវិញ»

ទាក់ទង​នឹង​ពិធីបុណ្យ​ចូលឆ្នាំ​នៅ​ប្រទេស​ថៃ​នេះ ស្ថានទូត​ខ្មែរ​នៅ​ទីក្រុង​បាងកក​បាន​បង្ហោះ​សារ​នៅ​ក្នុង​ហ្វេសប៊ុក អំពាវនាវ​ឱ្យ​ពលករ​ខ្មែរ​ដែល​រស់នៅ​ប្រទេស​ថៃ​ទាំងអស់​ឱ្យ​បង្កើន​ការ​ប្រុងប្រយ័ត្ន​អំឡុង​ពេល​ឈប់​សម្រាក​នេះ ដើម្បី​ចូលរួម​ទប់ស្កាត់​ការ​រាតត្បាត​ជំងឺ​កូវីដ១៩។ បន្ថែម​ពី​នេះ ស្ថានទូត​ក៏​ស្នើ​ដល់​ពលករ​ឱ្យ​គោរព​តាម​ការណែនាំ​របស់​រដ្ឋាភិបាល​ថៃ​ឱ្យ​បាន​ខ្ជាប់ខ្ជួន​ផង​ដែរ។ជាមួយ​គ្នា​នេះ​រដ្ឋាភិបាល​ថៃ​បាន​បន្ត​ដាក់​ប្រទេស​នៅក្នុង​គ្រា​មាន​អាសន្ន​រហូតដល់​ថ្ងៃទី​៣១ ឧសភា ដើម្បី​ទប់ស្កាត់​ការ​រាតត្បាត​ជំងឺ​កូវីដ១៩។ វិធានការ​នេះ​អាជ្ញាធរ​ថៃ​បាន​ហាម​ឃាត​មិន​ឱ្យ​ប្រជា​ពលរដ្ឋ​ថៃ និង​ជនបរទេស ប្រមូល​ផ្តុំគ្នា​ជាច្រើន​នាក់​ឡើយ ហើយ​ប្រសិនបើ​ជន​ណា​ល្មើស​នឹង​បម្រាម​នេះ ពួកគេ​ប្រឈម​នឹង​មាន​ទោស​ជាប់ពន្ធនាគារ ២​ឆ្នាំ និង​ពិន័យ​ជា​ប្រាក់​ប្រមាណ​៤​ម៉ឺន​បាត ឬ​ប្រហែល ១​ពាន់ ៣០០​ដុល្លារ។

ចាប់ពី​ថ្ងៃទី​១ មេសា មក​ដល់​ថ្ងៃ​ទី​១៤ មេសា ក្រសួងសុខាភិបាល​ថៃ​រក​ឃើញ​អ្នក​ឆ្លង​ជំងឺ​កូវីដ​១៩​ចូលក្នុង​សហគមន៍​លើក​ទី​៣ ជាង​៧​ពាន់​នាក់ ហើយ​ក្នុង​នោះ​នៅ​ទីក្រុង​បាងកក​ច្រើន​ជាងគេ។

ព្រះសង្ឃ​ខ្មែរ​គង់នៅ​ទីក្រុង​បាងកក ព្រះតេជព្រះគុណ វ័ន្ត សំបាន់ មាន​ថេរដីកា​ថា អំឡុង​ពេល​បុណ្យចូលឆ្នាំ​ខ្មែរ​នេះ នៅក្នុង​វត្ត​របស់​ព្រះអង្គ​មិន​សូវ​មាន​ពលករ​ខ្មែរ​ធ្វើបុណ្យ​ដូច​ឆ្នាំមុនៗ​នោះ​ទេ ដោយសារ​ពួកគេ​ខ្លាច​ខុស​នឹង​បម្រាម​របស់​អាជ្ញាធរ​ថៃ​។​ព្រះ​ភិក្ខុ វ័ន្ត សំបាន់ មាន​ថេរ​ដីកា​បញ្ជាក់​ថា ស្ថានការណ៍​បែបនេះ ក្រុម​ពលករ​គួរតែ​សម្រាក​នៅក្នុង​បន្ទប់​ជួល​មួយ​រយៈ ហើយ​ត្រូវ​តាមដាន​ព័ត៌មាន​នៅក្នុង​ប្រទេស​ថៃ​ឱ្យ​បាន​ជាប្រចាំ ដើម្បី​អនុវត្ត​ទាន់​ស្ថានការណ៍៖ «តាមដាន​ឱ្យ​បាន​ជាប់លាប់​ឱ្យ​បាន​ត្រឹមត្រូវ​ដើម្បី​ការពារ​សុវត្ថិភាព​ផង ការពារ​កុំឱ្យ​កើតរឿង​រាវ​នៅក្នុង​សង្គម​គេ​ផង ដើម្បី​ជាការ​លើកកម្ពស់​ជីវភាព និង​សីលធម៌ ដើម្បី​បង្ហាញ​ឱ្យ​គេ​ដឹង​ថា យើង​ជា​ជនជាតិ​ខ្មែរ​មាន​ទំនៀម​ទំលាប់​ប្រពៃណី​ល្អ​ស្អាត។ អីចឹង​សូម​ញាតិ​ញោម​អនុវត្ត​ច្បាប់ ឬ​អនុវត្ត​តាម​ទំនៀម​ទំលាប់​ឱ្យ​បាន​ល្អ​ដើម្បី​លើក​កំពស់​ផង ដើម្បី​សុវត្ថិភាព​ផង ដើម្បី​បាន​ទទួល​បុណ្យ​កុសល​មកពី​ការ​ធ្វើ​បុណ្យ​នេះ​ផង​ដែរ»

របាយការណ៍​អង្គការ​សង់ត្រាល់​ឱ្យ​ដឹង​ថា បច្ចុប្បន្ន​មាន​ពលករ​ខ្មែរ​ធ្វើ​ការងារ​ស្របច្បាប់ និង​មិន​ស្របច្បាប់​ប្រមាណ ១​លាន ៨​សែន​នាក់​(.៨០០.០០០)​ធ្វើ​ការ​នៅ​ប្រទេស​ថៃ​។ ចំណែក​សកម្មជន​គណ​បក្ស​ប្រឆាំង​ដែល​កំពុង​ភៀសខ្លួន​នៅ​ប្រទេស​ថៃ​វិញ មាន​ប្រហែល ៧០នាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល