គណបក្សកម្លាំងជាតិបោះឆ្នោតជ្រើសតាំងលោក ជា មុនី ធ្វើជាប្រធានបក្ស
2024.09.15
លោក ជា មុនី (ឈរលើកដៃសំពះ) នៅថ្ងៃដែលសមាជគណបក្សកម្លាំងជាតិ ជ្រើសតាំងជាប្រធានគណបក្ស នៅថ្ងៃទី១៥ កញ្ញា ២០២៤។
រូប៖ ពលរដ្ឋផ្ដល់ឱ្យ
គណបក្សកម្លាំងជាតិធ្វើសមាជវិសាមញ្ញកែសម្រួល និងជ្រើសតាំងថ្នាក់ដឹកនាំគណបក្សបន្ថែមទៀតទៅតាមលក្ខន្តិកៈ និងបទបញ្ជាផ្ទៃក្នុងរបស់គណបក្ស ក្រោយពេលថ្នាក់ដឹកនាំសំខាន់ៗត្រូវអាជ្ញាធររដ្ឋាភិបាលក្រុងភ្នំពេញចាប់ខ្លួនដាក់ពន្ធនាគារ។ មេដឹកនាំបក្សនេះក៏អំពាវនាវឱ្យរដ្ឋាភិបាលបក្សកាន់អំណាចបញ្ឈប់ការធ្វើទុក្ខបុកម្នេញសំឡេងប្រឆាំង ហើយងាកទៅបើកលំហលទ្ធិប្រជាធិបតេយ្យ និងរៀបចំការបោះឆ្នោតដោយសេរី ត្រឹមត្រូវ និងយុត្តិធម៌ឡើងវិញ។ មន្រ្តីបក្សកាន់អំណាចអះអាងថា គណបក្សនយោបាយប្រកួតប្រជែងនៅកម្ពុជាកន្លងមកធ្វើឡើងដោយស្មើភាពគ្នា។
ដូចការគ្រោងទុក គណបក្សកម្លាំងជាតិបានធ្វើសមាជវិសាមញ្ញនៅថ្ងៃទី១៥ ខែកញ្ញា នៅទីស្នាក់ការគណបក្សស្ថិតក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ដែលមានអ្នកចូលរួមប្រមាណ២០០នាក់ ដែលភាគច្រើនជាសកម្មជន និងសមាជិកបក្សមកពីបណ្តាខេត្តទូទាំងប្រទេស។
សំឡេង « ជយោ! គណបក្សកម្លាំងជាតិ ជយោ! ជយោ! លទ្ធិប្រជាធិបតេយ្យនៅប្រទេសកម្ពុជា ជយោ! »។
គណបក្សកម្លាំងជាតិជួបជុំនៅគ្នាប្រារព្ធសមាជវិសាមញ្ញនេះ ដើម្បីបោះឆ្នោតផ្តល់សេចក្តីទុកចិត្ត ចំពោះក្បាលម៉ាស៊ីនដឹកនាំសំខាន់ៗរបស់គណបក្ស ទៅតាមលក្ខន្តិកៈ និងបទបញ្ជាផ្ទៃក្នុងរបស់គណបក្សដែលបានទទួលស្គាល់ដោយក្រសួងមហាផ្ទៃ បន្ទាប់ពីប្រធានគណបក្ស គឺលោក ស៊ុន ចន្ធី រួមជាមួយថ្នាក់ដឹកនាំពីររូបទៀត រួមមានលោក អ៊ុំ វីរៈរដ្ឋ និងលោក ជិន ប៉ុណ្ណារ័ត្ន ត្រូវអាជ្ញាធររដ្ឋាភិបាលចាប់ខ្លួនដាក់ពន្ធនាគារជាបន្តបន្ទាប់ ពីបទញុះញង់ និងរួមគំនិតក្បត់ កន្លងទៅ។
ក្រោយថ្នាក់ដឹកនាំបក្សថ្លែងសារនយោបាយ និងបញ្ជាក់ជំហរនយោបាយហើយនោះ គណបក្សកម្លាំងជាតិបានសម្រេចជ្រើសតាំងបំពេញបន្ថែម សមាជិកគណៈកម្មាធិការនាយកចំនួន៣១រូប ក្នុងចំណោមសមាជិកសរុប៥១រូប និងបន្ថែមសមាជិកគណៈកម្មាធិការអចិន្ត្រៃយ៍ថ្មីចំនួន ៤រូបក្នុងចំណោមសមាជិកសរុប ១០រូប។
អង្គសមាជក៏បានជ្រើសតាំងអតីតមេសហជីពគឺលោក ជា មុនី ជាប្រធានគណបក្ស និងលោក សុខ គឹមសេង ជាអនុប្រធាន ព្រមទាំងជ្រើសតាំងលោកមេធាវី ជូង ជូងី ជាប្រធានគណៈកម្មាធិការនាយក លោក មុត មល្លា ជាអនុប្រធានគណៈកម្មាធិការនាយក ចំណែកអ្នកស្រី យាន ស្រីយ៉ាន ត្រូវបានជ្រើសតាំងជាអនុប្រធានគណៈកម្មាធិការប្រតិបត្តិ អ្នកស្រី ឡឹក រដ្ឋា ជាអនុប្រធានគណៈកម្មាធិការវិន័យ និងលោក នួន វណ្ណៈ ជាអគ្គនាយកហិរញ្ញវត្ថុ។ រីឯលោក រ៉ុង ឈុន វិញត្រូវបានតែងតាំងជាទីប្រឹក្សាគណបក្សដដែល។
ប្រធានគណបក្សកម្លាំងជាតិលោក ជា មុនី ប្រាប់វិទ្យុអាស៊ីសេរីថា កាលពីសមាជដំបូងរបស់គណបក្សកម្លាំងជាតិមានសមាជិកគណៈកម្មាធិការនាយក២៧រូប គណៈកម្មាធិការអចិន្ត្រៃយ៍៩រូប ប៉ុន្តែអាជ្ញាធរចាប់ខ្លួនថ្នាក់ដឹកនាំ៣រូបដែលជាក្បាលម៉ាស៊ីនដាក់ពន្ធនាគារ ដូច្នេះការកែសម្រួលសមាសភាពថ្នាក់ដឹកនាំ គឺអនុលោមតាមលក្ខន្តិកៈរបស់បក្សដែលតម្កល់នៅក្រសួងមហាផ្ទៃ។ ម្យ៉ាងទៀតលោកឱ្យដឹងថា សមាជនេះក៏ជាពេលសមស្របក្នុងការបញ្ជូលថ្នាក់ដឹកនាំបន្ថែម ដើម្បីពង្រីកសកម្មភាពការងារឱ្យកាន់តែមានប្រសិទ្ធភាពសម្រាប់ចូលរួមការបោះឆ្នោតឆ្នាំ២០២៧ និង២០២៨ ខាងមុខ ។
លោក ជា មុនី៖ «បើកចំហអង្គការសង្គមស៊ីវិល នានា បើមានឆន្ទៈ ទស្សនៈ គោលនយោបាយចង់ចូលរួមជាមួយគណបក្សកម្លាំងជាតិ សូមស្វាគមន៍គ្រាប់និន្នាការគណបក្សនយោបាយ »។
ចំណែកទីប្រឹក្សាគណបក្សកម្លាំងជាតិលោក រ៉ុង ឈុន ថ្លែងថា លោកចង់ឃើញកម្ពុជាបើកលំហសេរីភាពដល់គណបក្សប្រឆាំងនិងសង្គមស៊ីវិល ដោះលែងអ្នកជាប់ឃុំក្រោមហេតុនយោបាយទាំងអស់ឱ្យមានសេរីភាពឡើងវិញ ព្រមទាំងរៀបចំការបោះឆ្នោតដោយសេរី ត្រឹមត្រូវ និងយុត្តិធម៌។ លោកបញ្ជាក់ថា គណបក្សកម្លាំងជាតិកំពុងដើរលើបន្ទាត់នយោបាយដ៏ត្រឹមត្រូវ ស្របតាមរដ្ឋធម្មនុញ្ញ ហើយលោកក៏អំពាវនាវដល់សមាជិកបក្សទាំងអស់ថា បើទោះបីស្ថិតក្នុងកាលៈទេសៈព្យុះភ្លៀងយ៉ាងណា ត្រូវតាំងចិត្តតម្កល់ផលប្រយោជន៍ជាតិឱ្យខ្ពស់ ដើម្បីធ្វើដំណើរឆ្ពោះទៅគ្រប់គ្រងអំណាចដឹកនាំប្រទេស តាមរយៈការបោះឆ្នោតនៅពេលខាងមុខដែលជាក្តីសង្ឃឹមដល់ពលរដ្ឋខ្មែរ។
លោក រ៉ុង ឈុន៖ «យើងដឹងហើយជំហរគណបក្សកម្លាំងជាតិបង្កើតឡើងនេះគឺបន្ត ជំនួសឱ្យគណបក្សភ្លើងទៀន និងជំនួសឱ្យគណបក្សសង្គ្រោះជាតិ ឆ្ពោះទៅគោលដៅឆ្នាំ២០១៧ ២០២៨ បងប្អូន»។
ទាក់ទងនឹងបញ្ហានេះ អ្នកនាំពាក្យគណបក្សកាន់អំណាច លោក សុខ ឥសាន ប្រាប់វិទ្យុអាស៊ីសេរីថា គណបក្សប្រជាជនកម្ពុជាស្វាគមន៍ចំពោះការរៀបចំក្បាលម៉ាស៊ីនដឹកនាំរបស់កណក្សកម្លាំងជាតិ ត្រៀមកម្លាំងប្រកួតប្រជែងជាមួយគណបក្សកាន់អំណាចខាងមុខ។ លោកអះអាងថា លំហសេរីភាពនៅកម្ពុជាបានបើកទូលំទូលាយដល់គណបក្សនយោបាយទាំងអស់ ដោយគណបក្សប្រជាជនកម្ពុជាមិនបានបិទសិទ្ធិលើគូប្រកួតណាមួយទេ។ លោក សុខ ឥសាន អះអាងទៀតថា វិធានការលើថ្នាក់ដឹកនាំ និងសកម្មជនបក្សប្រឆាំងកន្លងមកជាការអនុវត្តច្បាប់។
លោក សុខ ឥសាន៖ «ខ្ញុំយល់ថាស្ថានភាពនយោបាយនៅកម្ពុជាអត់មានបញ្ហាអ្វីស្មុគស្មាញទេ អត់ជាប់ពាក់ព័ន្ធអ្វីជាមួយគណបក្សនយោបាយដែលមានអាទិភាពនៅក្នុងសង្គមកម្ពុជាទេ អស់លោកគណបក្សនយោបាយនានាធ្វើសកម្មភាពបានដោយសេរី ស្របទៅតាមលក្ខន្តិកៈ ឃោសនាអ្វីឃោសនាទៅ»។
ទោះបីជាលោក សុខ ឥសាន លើកឡើងបែបនេះក្តី អាជ្ញាធររដ្ឋាភិបាលលោក ហ៊ុន ម៉ាណែត ធ្វើទុក្ខបុកម្នេញ និងចាប់ចងថ្នាក់ដឹកនាំគណបក្សប្រឆាំងឥតឈប់ឈរ។ ចំណែកអ្នកនយោបាយខ្លះទៀតត្រូវរងការគំរាមកំហែង តាមដានពីដំណាក់អាជ្ញាធរនៅរយៈពេលចុងក្រោយថែមទៀត។ អ្នកឃ្លាំមើល និងមន្ត្រីសិទ្ធិមនុស្សថា ការរឹតត្បិតសិទ្ធិសេរីភាពផ្នែកនយោបាយ ការចាប់អ្នកនយោបាយដាក់ពន្ធនាគារកន្លងមកមិនមែនជាការអនុវត្តច្បាប់នោះទេ ប៉ុន្តែអ្នកកាន់អំណាចប្រើប្រព័ន្ធតុលាការធ្វើទុក្ខបុកម្នេញលើសំឡេងប្រឆាំង និងបំបិទមាត់អ្នករិះគន់រដ្ឋាភិបាល។
គណបក្សកម្លាំងជាតិបានបង្កើតឡើងដោយអតីតមន្ត្រីជាន់ខ្ពស់គណបក្សភ្លើងទៀន កាលពីខែវិច្ឆិកា ឆ្នាំ២០២៣ បន្ទាប់ពីអតីតរដ្ឋាភិបាលលោក ហ៊ុន សែន មិនឲ្យបក្សភ្លើងទៀនចូលរួមការបោះឆ្នោត។ ទោះជាយ៉ាងណាក្ដី មន្ត្រីជាន់ខ្ពស់គណបក្សភ្លើងទៀនមួយចំនួនទៀត ក៏ងាកទៅចងសម្ពន្ធភាពជាមួយគណបក្សក្រៅរដ្ឋាភិបាលចំនួន៤ទៀត។ រីឯមន្រ្តីជាន់ខ្ពស់គណបក្សនេះ មួយចំនួនទៀត ក៏បានចាកចេញពីគណបក្សទៅធ្វើនយោបាយជាមួយគណបក្សកម្លាំងជាតិ ដែលជាគណបក្សទើបតែបង្កើតថ្មីនេះដែរ។
ទាក់ទងរឿងនេះ អ្នកឃ្លាំមើលលើកឡើងថា ដើម្បីប្រកួតប្រជែងជាមួយគណបក្សកាន់អំណាចបាន លុះត្រាតែក្រុមអ្នកនយោបាយបក្សប្រឆាំងតម្កល់ផលប្រយោជន៍ជាតិជាធំ ដោយឈរលើគោលការណ៍ប្រជាធិបតេយ្យ ទើបអាចទាក់ទាញ ការគាំទ្រពីមហាជនបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- សារលោក ហ៊ុន សែន បញ្ជាឲ្យកម្ទេចអ្នករិះគន់ «ជាភស្តុតាងអាចប្តឹងទៅតុលាការ ICC»
អត្ថបទពេញនិយម
នយោបាយ
- លោក ស៊ុន ចាន់ថុល អះអាងថា ក្រុមហ៊ុនអាមេរិកាំងច្រើនចាប់អារម្មណ៍ចង់មកវិនិយោគនៅកម្ពុជា
- សមត្ថកិច្ចម៉ាឡេស៊ីចាប់ពលករខ្មែរម្នាក់ពាក់ព័ន្ធរិះគន់រដ្ឋាភិបាលកម្ពុជា
- ពលរដ្ឋខ្មែរនៅអូស្ត្រាលីធ្វើបាតុកម្មទាមទារឱ្យរដ្ឋាភិបាលកម្ពុជាដកគម្រោង CLV ទាំងស្រុង
- ពលរដ្ឋខ្មែរនៅប្រទេសនូវែលហ្សេឡង់ធ្វើបាតុកម្មប្រឆាំងគម្រោង CLV-DTA និងទាមទារស្ដារប្រជាធិបតេយ្យ