គណបក្ស​កម្លាំង​ជាតិ​នឹង​ដឹកនាំ​សកម្មជន​ប្រមាណ ១​រយ​នាក់ តវ៉ា​ទាមទារ​ឱ្យ​រដ្ឋាភិបាល​ដោះលែង​អ្នក​ទោស​នយោបាយ

ដោយ សេក បណ្ឌិត
2024.04.19
គណបក្ស​កម្លាំង​ជាតិ​នឹង​ដឹកនាំ​សកម្មជន​ប្រមាណ ១​រយ​នាក់ តវ៉ា​ទាមទារ​ឱ្យ​រដ្ឋាភិបាល​ដោះលែង​អ្នក​ទោស​នយោបាយ ទីប្រឹក្សាគណបក្សកម្លាំងជាតិ លោក រ៉ុង ឈុន ថ្លែងក្នុង​កិច្ចប្រជុំគណបក្សកម្លាំងជាតិ។
រូប​៖ ពលរដ្ឋ​ផ្តល់ឱ្យ

គណបក្ស​កម្លាំង​ជាតិ​នឹង​ដឹកនាំ​សកម្មជន​​ប្រមាណ ១​រយ​នាក់ ដើម្បី​តស៊ូ​មតិ​ទាមទារ​ឱ្យ​រដ្ឋាភិបាល​ដោះលែង​អ្នក​ទោស​នយោបាយ នៅ​ទីស្នាក់ការ​បក្ស​កម្លាំង​ជាតិ ក្រោយពី​សាលាក្រុង​ភ្នំពេញ​ហាមឃាត់​មិន​ឱ្យ​សម្ដែង​មតិ​នៅ​ទីលាន​ប្រជាធិបតេយ្យ កាល​ពី​ថ្ងៃ​ទី​០៨ មេសា កន្លងទៅ​។ មន្ត្រី​សង្គម​ស៊ីវិល​ថា ការ​ហាមឃាត់​មិន​ឱ្យ​ពលរដ្ឋ និង​គណបក្ស​នយោបាយ​សម្ដែង​មតិ​ដោយ​សន្តិវិធី​នៅ​ទីលាន​ប្រជាធិបតេយ្យ​នេះ​គឺ​ជា​ការ​អនុវត្ត​ផ្ទុយ​ពី​ច្បាប់។

គណបក្ស​កម្លាំង​ជាតិ​នៅ​ថ្ងៃទី១៨ ខែ​មីនា បាន​ឱ្យ​ដឹង​ថា គណបក្ស​កម្លាំង​ជាតិ​សម្រេច​ជួបជុំ​សម្ដែង​មតិ​ដោយ​សន្តិវិធី​ដើម្បី​ទាមទារ​ដោះលែង​សមាជិក​បក្ស និង​អ្នកទោស​មនសិការ​ផ្សេងទៀត​នៅ​ទីស្នាក់ការ​គណបក្ស​នៅ​ថ្ងៃទី​២២ ដល់ ២៤ ខែ​មេសា ខាងមុខ។

ទីប្រឹក្សា​គណបក្ស​កម្លាំង​ជាតិ លោក រ៉ុង ឈុន បាន​ឱ្យ​ដឹង​ថា ថ្នាក់ដឹកនាំ សមាជិក និង​អ្នកគាំទ្រ​គណបក្ស​កម្លាំង​ជាតិប្រមាណ​១​រយ​នាក់​នឹង​ធ្វើ​ការសម្ដែង​មតិ​ទាមទារ​ឱ្យ​រដ្ឋាភិបាល​ដោះលែង​សមាជិក​បក្ស គឺ​លោក អ៊ំ វីរៈរដ្ឋ និង លោក គា វិសាល ដែល​ត្រូវ​បាន​អាជ្ញាធរ​ឃាត់ខ្លួន​ដាក់​ពន្ធនាគារ​ពី​បទ «​ញុះញង់​» និង «​រួមគំនិត​ក្បត់​» និង​ទោស​មនសិការ​ផ្សេងទៀត ព្រោះ​គណបក្ស​កម្លាំង​ជាតិ​យល់​ថា សកម្មភាព​របស់​ពួកគាត់​មិន​បាន​ប្រព្រឹត្ត​ខុសច្បាប់​នោះ​ទេ។

លោក រ៉ុង ឈុន៖ «មិន​ដូច​ការចោទប្រកាន់​របស់​អាជ្ញាធរ​ក៏​ដូច​តុលាការ​នោះ​ទេ ពីព្រោះ​រឿង​ទាំងអស់​នេះ​នរណា​ក៏​គេ​មើលឃើញ​ដែរ​ថា ជា​រឿង​នយោបាយ ហើយ​នៅ​ក្នុង​ការ​សម្ដែង​មតិ​ទាមទារ​ហ្នឹង​ក៏​យើង​សុំ​ឱ្យ​មានការ​ដោះលែង​លោក​ប្អូន កើត សារ៉ាយ ផង​ដែរ យើង​ដឹង​ហើយ គាត់​គ្រាន់តែ​ស្វែងរក​ដំណោះស្រាយ​ជូន​ប្រជាពលរដ្ឋ​តែប៉ុណ្ណោះ»

លោក រ៉ុង ឈុន ក៏​សម្ដែង​ការ​សោកស្ដាយ​ដែល​សាលាក្រុង​ភ្នំពេញ​មិន​ឱ្យ​គណបក្ស​រៀបចំ​ការ​តស៊ូ​មតិ​នេះ​នៅ​ទីលាន​ប្រជាធិបតេយ្យ ហើយ​លោក​ចាត់ទុកថា ការ​ហាមឃាត់​នេះ​គឺ​ផ្ទុយ​ពី​ច្បាប់​នៃ​ការ​ធ្វើ​បាតុកម្ម​ដោយ​សន្តិវិធី​ដែល​ពលរដ្ឋ​មាន​សិទ្ធិ​ធ្វើបាតុកម្ម​ដោយ​តម្រូវ​ឱ្យ​ជូនដំណឹង​ទៅ​អាជ្ញាធរ។

លោក រ៉ុង ឈុន៖ «​យើង​មានការ​សោកស្ដាយ​ចំពោះ​ករណីនេះ​ព្រោះ​ការ​បង្កើត​ទីលាន​ប្រជាធិបតេយ្យ​ជា​កន្លែង​ឱ្យ​សាធារណជន ប្រជាពលរដ្ឋ​ធ្វើ​សម្ដែង​មតិ​ពេល​ដែល​មិន​សប្បាយចិត្ត មិន​ពេញចិត្ត​ត្រង់​ចំណុច​ណាមួយ ប៉ុន្តែ​នៅ​ពេល​ដែល​យើង​ជូនដំណឹង​បែរ​ជា​អាជ្ញាធរ​រាជធានី​ភ្នំពេញ​មិន​យល់ព្រម​ទៅវិញ»

វិទ្យុ​អាស៊ីសេរី​មិនទាន់​អាច​សុំ​ការ​ឆ្លើយ​តប​រឿង​នេះ​ពី​អ្នកនាំពាក្យ​សាលារាជធានី​ភ្នំពេញ លោក មាន ចាន់យ៉ាដា បាន​ទេ នៅ​ថ្ងៃទី១៨ ខែ​មេសា។

មន្ត្រី​សមាគម​ការពារ​សិទ្ធិមនុស្ស​អាដហុក (Adhoc) លោក យី សុខសាន្ត លើកឡើង​ថា ការ​ហាមឃាត់​មិន​ឱ្យ​គណបក្ស​កម្លាំង​ជាតិ​សម្ដែង​មតិ​ដោយ​អហិង្សា​នេះ គឺ​ផ្ទុយ​នឹង​ច្បាប់​ដែល​បាន​ចែង។ លោក​ថា ពលរដ្ឋ​រាប់​ម៉ឺន​នាក់​អាច​ធ្វើ​ដំណើរ​កម្សាន្ត​ក្នុង​ពិធី​ចូលឆ្នាំ​គឺ​មិន​មាន​ប៉ះពាល់​ដល់​សណ្ដាប់ធ្នាប់​អ្វី​នោះ​ទេ ដូច្នេះ​លោក​ថា ការ​តស៊ូ​មតិ​អហិង្សា​ក៏​មិន​មាន​ប៉ះពាល់​ដល់​សណ្ដាប់ធ្នាប់​សាធារណៈ​ដូចគ្នា។

លោក យី សុខសាន្ត៖ «យើង​មើលៗ ពិធីបុណ្យ​ចូលឆ្នាំ​មនុស្ស​រាប់​ម៉ឺន​នាក់​មក​ចូលរួម​បាន ហើយ​គណបក្ស​នយោបាយ​មាន​គ្នា​ប៉ុន្មាន​នាក់​ពេលខ្លះ យើង​ការពារ​ជូន​គាត់​ទៅ​បើ​យើង​ចាត់ទុកថា​គាត់​ស្នើសុំ​ដោយ​ស្របច្បាប់ យើង​ការពារ​ជូន​គាត់​ឱ្យ​ស្រប​ច្បាប់​ទៅ​គាត់​ធ្វើ​ប៉ុន្មាន​ម៉ោង ប៉ុន្មាន​នាទី​នៅ​ទីលាន​ប្រជាធិបតេយ្យ​ដើម្បី​សម្ដែង​មតិ»

គិត​ត្រឹម​ខែមេសា​នេះ អ្នកទោស​មនសិការ​បា​ន​កើនឡើង​ប្រមាណ ៥០​នាក់​វិញ​ហើយ ក្រោយពី​អាជ្ញាធរ​បាន​បន្ត​បង្ក្រាប និង​ចាប់​មន្ត្រី​បក្ស​ប្រឆាំង អ្នក​រិះគន់ និង​មន្ត្រី​អង្គការ​សង្គម​ស៊ីវិល រួម​ទាំង​ប្រធាន​សមាគម​សម្ព័ន្ធ​និស្សិត​បញ្ញវន្ត​ខ្មែរ លោក កើត សារ៉ាយ ដែល​ត្រូវ​បាន​អង្គការ​ជាតិ និង​អន្តរជាតិ​ចាត់ទុក​ថា លោក​មិនបាន​ប្រព្រឹត្ត​ខុសច្បាប់​ដូច​ការចោទប្រកាន់​របស់​អាជ្ញាធរ​នោះ​ទេ។ ចំណែក​អ្នកទោស​នៅក្នុង​ពន្ធនាគារ​មួយចំនួន​បាន​ធ្លាក់ខ្លួន​ឈឺ និង​ជួប​ការ​លំបាក​ទ្វេដង អំឡុង​ពេល​ដែល​អាកាសធាតុ​ឡើង​កម្ដៅ​ខ្លាំង រហូតដល់​ថ្ងៃ​ខ្លះ​កើន​ឡើង​ដល់​ជាង ៤០​អង្សា​សេ​ចាប់តាំងពី​ដើមខែ​មេសា​មក។ នេះ​បើ​តាម​ការ​រៀបរាប់​របស់​គ្រួសារ​អ្នក​ទោស​នយោបាយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។