សកម្មជនបក្សប្រឆាំង ដែលស្និទ្ធនឹងលោក កឹម សុខា គឺលោក ហ៊ុន កុសល ដែលកំពុងជាប់ឃុំក្នុងសំណុំរឿងប្រមាថព្រះមហាក្សត្រ និងបទញុះញង់សម្រេចពឹងមេធាវីជួយការពារក្ដីលោកហើយ ក្រោយជាប់ឃុំនៅពន្ធនាគារអស់រយៈពេល ១៤ថ្ងៃ។ មន្ត្រីសង្គមស៊ីវិលសង្កេតឃើញថា អ្វីដែលលោក ហ៊ុន កុសល លើកឡើងជាសេរីភាពបញ្ចេញមតិ តែទំនងតុលាការ នៅតែបន្តនីតិវិធីដដែល បើគ្មានការអន្តរាគមន៍ពីលោកនាយករដ្ឋមន្ត្រី ហ៊ុន សែនទេនោះ។
បើទោះបីជាលោក ហ៊ុន កុសល ជាសកម្មជនបក្សប្រឆាំង និងជាប់ឃុំក្នុងសំណុំរឿងដូចគ្នាជាមួយលោក យឹម ស៊ីណន ក៏ដោយ ក៏លោកមិនទាន់ទទួលបានការសន្ដោសប្រណីពីលោកនាយករដ្ឋមន្ត្រី ហ៊ុន សែន ដូចសម្លាញ់របស់លោក គឺលោក យឹម ស៊ីណន នៅឡើយ។
មេធាវីការពារក្ដីរបស់លោក ហ៊ុន កុសល គឺលោកមេធាវី សឺន ជុំជួន ឱ្យវិទ្យុអាស៊ីសេរីដឹងនៅថ្ងៃទី៤ ខែមេសាថា ពេលនេះលោកទទួលការពារក្ដីឱ្យលោក ហ៊ុន កុសល ជាផ្លូវការ និងបានទៅជួបកូនក្ដីរបស់លោកនៅពន្ធនាគាររួច ហើយដែរនៅថ្ងៃដដែលនេះ។ លោកមេធាវី ប្រាប់ទៀតថា កូនក្ដីរបស់មានសុខភាពល្អធម្មតា និងមានជំហររឹងមាំដដែល។ លោក សឺន ជុំជួន ថ្លែងទៀតថា លោក ហ៊ុន កុសល នៅតែរក្សាជំហរមិនសុំទោស ដើម្បីអាចរួចផុតការចោទប្រកាន់ឡើយ ព្រោះអ្វីដែលលោកបានលើកឡើងតាមហ្វេសប៊ុកកន្លងមកនោះ មិនមែនការប្រមាថព្រះមហាក្សត្រ និងបង្កភាពញុះញង់ តែជាសេរីភាពបញ្ចេញមតិ។
លោកមេធាវី៖«សំណុំរឿងយើងនឹងសិក្សាសិន ហើយយើងនឹងទៅសិក្សាបន្តតើមានធាតុផ្សំគ្រប់គ្រាន់អត់ទាក់ទងបទចោទហ្នឹងណាឥឡូវនេះគ្រាន់តែជាសិទ្ធិរបស់គាត់(លោក ហ៊ុន កុសល)ក្នុងការមិនទទួលស្គាល់កំហុសអីជាដើមនេះជាសិទ្ធិរបស់ជនត្រូវចោទណា»។
លោកមេធាវី សឺន ជុំជួន ឱ្យដឹងទៀតថា មូលហេតុដែលកូនក្ដីរបស់ជាប់ឃុំរយៈ ១៤ថ្ងៃ ហើយតែទើបទទួលបានមេធាវីការពារនៅពេលនេះ ព្រោះកូនក្ដីរបស់លោកគ្មានសាច់ញាតិជួយរកមេធាវីទេ ចំណែកមេធាវីមួយចំនួនដែលស្ម័គ្រចិត្តជួយការពារក្ដីជាមេធាវីដែលលោក ហ៊ុន កុសលមិនស្គាល់និងមិនទុកចិត្ត។ លោកមេធាវី សឺន ជុំជួន បញ្ជាក់ថា នៅរយៈពេលចុងក្រោយនេះសកម្មជនបក្សប្រឆាំងលោក មាជ សុវណ្ណារ៉ា ដែលអះអាងថា ជាបងធម៌របស់លោក ហ៊ុន កុសល បានមកពឹងលោកឱ្យជួយការពារក្ដីលោក ហ៊ុន កុសល។
ទាក់ទងរឿងនេះ អ្នកនាំពាក្យគណបក្សប្រជាជនកម្ពុជាលោក សុខ ឥសាន ថ្លែងថា លោកស្វាគមន៍ជំហររបស់លោក ហ៊ុន កុសល ដែលចង់រកឈ្នះចាញ់តាមផ្លូវតុលាការ។
លោក សុខ ឥសាន៖«អូហ្នឹងជារឿងគាត់(លោក ហ៊ុន កុសល)ជាការសម្រេចចិត្តរបស់គាត់ដោយឯករាជ្យគាត់ចង់បន្តក្ដីជាការល្អហើយយើងចង់បានទេតើ ហ្នឹងជានីតិវិធីដែលតុលាការគេបានដំណើរការរួចហើយបើគេចោទប្រកាន់ ហើយជារឿងរបស់តុលាការយើងមិនអាចនិយាយបានទេព្រោះរឿងហ្នឹងចូលដល់តុលាការហើយ»។
លោក ហ៊ុន កុសល ប្រឈមជាប់ពន្ធនាគារ រយៈពេល ៥ឆ្នាំ ដោយសកម្មជនគណបក្សសង្គ្រោះជាតិរូបនេះ ត្រូវបានតុលាការក្រុងភ្នំពេញចោទប្រកាន់ពីបទប្រមាថ ចំពោះអង្គព្រះមហាក្សត្រ តាមក្រមព្រហ្មទណ្ឌ មាត្រា ៤៣៧ (ស្ទួន) និងបទញុះញង់ឱ្យប្រព្រឹត្តបទឧក្រិដ្ឋ ជាអាទិ៍ តាមក្រមព្រហ្មទណ្ឌ មាត្រា ៤៩៤ ៤៩៥។ សមត្ថកិច្ចបានចាប់ខ្លួនសកម្មជនបក្សប្រឆាំងនិយមលោក កឹម សុខា រូបនេះ កាលពីថ្ងៃទី២១ ខែមីនា ក្រោយពេលលោកបង្ហោះសារលើហ្វេសប៊ុករបស់លោកទាក់ទងនឹងព្រះមហាក្សត្រ។ សំណេររបស់លោក ហ៊ុន កុសល លើកឡើងថា « ឃើញពួកគេធ្វើបាបព្រះទ័យ នឹងបន្ទាបព្រះចេស្ដាព្រះមហាក្សត្រខ្មែរគ្រប់ច្រកបែបនេះ។ ទូលបង្គំជាអ្នកនយោបាយជំនាន់ក្រោយប្ដេជ្ញានឹងប្រើសមត្ថភាព ដែលមានទាំងប៉ុន្មានចូលរួមពូនផ្ដុំជាមួយលោកប្រធាន កឹម សុខា ការពារព្រះចេស្ដាក្សត្រ និងព្រះរាជបល្ល័ង្កដែលប្រជារាស្ត្រខ្មែរមិនអាចខ្វះបាន»។
សាររបស់លោកបែបនេះ ធ្វើឱ្យលោក ហ៊ុន សែន ផ្ទុះកំហឹង និងបញ្ជាឱ្យសមត្ថកិច្ចចាប់ខ្លួនលោក ហ៊ុន កុសល និងដៃគូរបស់លោកម្នាក់ទៀត គឺលោក យឹម ស៊ីណន ពាក់ព័ន្ធនឹងរូបភាព ដែលចោទថា លោក ហ៊ុន សែន មានអំណាចជាងព្រះមហាក្សត្រ ក្នុងពេលចូលរួមព្រះរាជពិធីប្រទានព្រះអគ្គីជ័យកីឡា នៅខេត្តសៀមរាប។ បើទោះជាលោក ហ៊ុន កុសល និងលោក យឹម ស៊ីណន ជាប់ឃុំនិងរងបទចោទដូចគ្នាក្ដី លោក យឹម ស៊ីណន ត្រូវបានលោក ហ៊ុន សែន អន្តរាគមន៍ឱ្យនៅក្រៅឃុំវិញ ក្រោយសកម្មជនរូបនេះបង្ហោះវីដេអូចេញពីពន្ធនាគារ សុំព្រះរាជទានទោសពីព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រ និងសុំទោសលោកហ៊ុន សែន។
ជុំវិញរឿងនេះ ប្រធានអង្គការសម្ព័ន្ធភាពការពារសិទ្ធិមនុស្សកម្ពុជា ហៅកាត់ថា ច្រាក់ (CHRAC) លោក រស់ សុដ្ឋា យល់ថា ការលើកឡើងរបស់លោក ហ៊ុន កុសល ជាសេរីភាពបញ្ចេញមតិ ព្រោះការលើកឡើងនោះមិនបានបង្ហាញសារហិង្សាណាមួយនោះទេ។ លោកបន្តថា ចំពោះការពឹងពាក់មេធាវីនៅពេលនេះ វាជាសិទ្ធិរបស់លោក ហ៊ុន កុសល តែលោកមិនសូវសង្ឃឹមថា លោក ហ៊ុន កុសល អាចទទួលបានលទ្ធផលដូចការរំពឹងទុកនោះទេ ព្រោះកន្លងមកនៅពេលតុលាការចោទប្រកាន់បែបណាហើយលទ្ធផលចុងក្រោយគឺបែបនោះឯង។
លោក រស់ សុដ្ឋា៖«បើយើងមើលជារួមជាទូទៅដូចគាត់(លោក ហ៊ុន កុសល)មានប្រសាសន៍ជាភាពក្លាហានមួយហើយដែលគាត់ហ៊ានការពារសិទ្ធិបញ្ចេញមតិរបស់គាត់ហើយជាទូទៅការសម្ដែងមតិបែបហ្នឹងចាត់ទុកជាសិទ្ធិនយោបាយនិងសិទ្ធិបញ្ចេញមតិ»។
លោក ហ៊ុន កុសល ជាសកម្មជនគណបក្សម្នាក់ក្នុងចំណោមអ្នកជាប់ឃុំជាង ៧០នាក់ផ្សេងទៀត ដែលពួកគាត់ជាមេបក្សប្រឆាំង សកម្មជននយោបាយ អ្នកការពារសិទ្ធិមនុស្ស អ្នកធ្វើការងារសង្គម និងសកម្មជនដីធ្លីជាដើម ដែលត្រូវបានសមត្ថកិច្ចរបស់រដ្ឋាភិបាល លោក ហ៊ុន សែន ចាប់ដាក់ពន្ធនាគារ ព្រោះការអនុវត្តសិទ្ធិសេរីភាពរបស់ពួកគេ។ អ្នកជាប់ឃុំជាង ៧០នាក់នោះ ភាគច្រើនរងការចោទប្រកាន់ពីបទញុះញង់ ប្រមាថព្រះមហាក្សត្រ រួមគំនិតក្បត់ និងបទក្បត់ជាតិជាដើម៕