កូន​សកម្មជន​បក្ស​ប្រឆាំង លោក សុខ ចន្ថា ប្រឈម​ជីវភាព​លំបាក​ក្រោយ​ពី​ម្ដាយ​ស្លាប់ ខណៈឪពុក​កំពុង​ជាប់​ពន្ធនាគារ

ដោយ ម៉ៅ សុធានី
2022.12.21
កូន​សកម្មជន​បក្ស​ប្រឆាំង លោក សុខ ចន្ថា ប្រឈម​ជីវភាព​លំបាក​ក្រោយ​ពី​ម្ដាយ​ស្លាប់ ខណៈឪពុក​កំពុង​ជាប់​ពន្ធនាគារ បុណ្យសពលោកស្រី សោម ចន្ធូ ប្រពន្ធ លោក សុខ ចន្ថា សកម្មជនបក្សប្រឆាំងដែលកំពុងជាប់ឃុំនៅពន្ធនាគារ។
រូប៖ ពលរដ្ឋ​ផ្ដល់​ឲ្យ

គ្រួសារ​សកម្មជន​បក្ស​ប្រឆាំង​លោក សុខ ចន្ថា ដែល​ជាប់ឃុំ​ក្នុង​ពន្ធនាគារ ប្រឈម​ជីវភាព​លំបាក ក្រោយ​ពី​ម្ដាយ​ស្លាប់ ខណៈឪពុក​កំពុង​ជាប់​ឃុំ​ក្នុង​ពន្ធនាគារ ហើយ​បន្សល់​កូន​៣​នាក់​នៅ​កំព្រាមន្ត្រីសង្គមស៊ីវិល​យល់​ថា តុលាការ គួរបន្ធូរបន្ថយទោស និង​ដោះលែង​គ្រួសារ​អ្នក​ជាប់​ឃុំ​នយោបាយ ដើម្បី​អោយ​ពួកគាត់​បាន​ជួបជុំ​គ្រួសារ​ឡើង​វិញ

កូន​របស់​សកម្មជន​បក្ស​ប្រឆាំង លោក សុខ ចន្ថា កំពុង​រៀបចំ​បុណ្យ​អោយ​ម្ដាយ អ្នកស្រី សោម ចន្ធូ ដែល​បាន​ស្លាប់​ដោយ​សារ​ជំងឺ​ប្រចាំកាយ​កាលថ្ងៃទី២០ ខែធ្នូ។ ពួកគាត់​ឱ្យដឹង​ថា បន្ទាប់​ពី​ម្ដាយ​ស្លាប់​ទៅ​ ជីវភាព​គ្រួសារ​ជួប​លំបាក ព្រោះ​គ្មាន​អ្នក​រក​ប្រាក់​ផ្គត់ផ្គង់​គ្រួសារ ដោយសារ​ឳពុក​ក៏​ជាប់​ពន្ធនាគារ ហើយ​ក្លាយ​ជាកូន​កំព្រា​គ្មាន​ទីពឹង ម្យ៉ាង​ប្អូន​​ខ្វះ​ភាព​កក់​ក្ដៅពួកគេ​បារម្ភ​ជីវភាព​នា​ថ្ងៃ​ខាង​មុខ និង​សង្ឃឹម​ថា តុលាការ​នឹង​ដោះលែង លោក​ឳពុក​ឆាប់ៗ ដើម្បី​មក​រស់​នៅ​ជុំគ្រួសារ​ និង​មើល​ថែ​កូនៗ។ កូន​អ្នកស្រី សោម ចន្ធូ សោក​ស្ដាយ ដែល​ថ្ងៃជូន​ដំណើរ​ម្ដាយ​ជា​លើក​ចុង​ក្រោយ តែ​គ្មាន​វត្តមាន​លោក​ឳពុក

ពិធីបុណ្យ​សព អ្នកស្រី សោម ចន្ធូ មាន​សាច់​ញាតិ និង​ប្រជាពលរដ្ឋ​ចូលរួម​ជាង​១រយនាក់ (១៤០) សព​ត្រូវ​បាន​ដង្ហែ​ទៅបូជា​នៅ​វត្តទួលសមាធិ ក្នុងភូមិ៥ ឃុំព្រែកសាយខ ស្រុកពាមរ ខេត្តព្រៃវែង។

កូនប្រុស​សកម្មជន​បក្ស​ប្រឆាំង​ជាប់​ឃុំ លោក សុខ ចន្ថា គឺ​លោក សុខ ចំរើន ប្រាប់​វិទ្យុអាស៊ីសេរី ថ្ងៃទី២១ ខែធ្នូ ថា លោក​ឈឺ​ចាប់​ដែល​ឳពុក​ត្រូវ​បាន​ចាប់​ដាក់​ពន្ធនាគារ ហើយ​ម្ដាយ​ក៏​ស្លាប់​ចោល​លោក និង​ប្អូនៗ។ លោកបន្ត​ថា លោក និង​ម្ដាយ​តែងនាំ​គ្នា​ដើរ​លក់​សណ្ដែក​ដី​ស្ងោរ ដើម្បី​សន្សំ​ប្រាក់​ទិញ​អង្ករ និង​សម្ភារៈ​មួយ​ចំនួន​យក​ទៅ​សួរសុខទុក្ខ​ឳពុក​នៅ​ពន្ធនាគារ​ត្រពាំងផ្លុង។ លោក​បន្ថែម​ថា អ្នកម្ដាយ​របស់​លោក រាល់​ថ្ងៃ​សុក្រ តែង​នាំ​ទៅ​ស្រែក​ទាមទារ​អោយ​ដោះលែង​លោក​ឳពុក ដើម្បី​ឱ្យ​មក​រស់​នៅ​ជុំ​គ្រួសារ​វិញ។ លោក សុខ ចំរើន ថាការចោទ​ប្រកាន់​ឳពុករបស់​លោកថា ក្បត់​ជាតិ ជា​រឿង​អយុត្តិធម៌។ លោក​បញ្ជាក់​ថា ក្រោយ​ពី​រៀបចំ​បុណ្យសព​ម្ដាយ​រួច លោក​នៅ​តែ​បន្ត​ទៅ​ទាមទារ​អោយ​តុលាការ​ដោះលែង​ឳពុក​របស់​លោក​ចេញ​ពី​ពន្ធនាគារ ដូច​ដែល​ម្ដាយ​ធ្លាប់​ធ្វើ​កន្លង​មក៖

«ប៉ានៅ​ក្នុង​គុក ហើយ​ម៉ែ​នៅ​ខាង​ក្រៅ ហើយ​មិន​ទាន់​ដឹង​អ្វី​ផង ម៉ែគាត់​លាចាកលោក​ពី​កូន​បាត់​ទៅ​ហើយ។ រាល់ថ្ងៃនេះ​ខ្ញុំ​នៅ​ក្នុង​ផ្ទះ​នៅ​តែ​៣​នាក់​បងប្អូន​មីងម៉ាងៗ មើលហៃគាត់​ផ្ដែផ្ដាំ​អោយ​ខ្ញុំ​មើល​បង​ប្អូនហើយនិយាយ​ពី​ការ​ឈឺចាប់ៗ​បង​វា​លើស​ពី​ការ​គិត​ទៀត​ណាបង គាត់​វា​លឿន​ពេកខ្ញុំខំ​ប្រាប់​គាត់​អោយ​តស៊ូ ម៉ែៗ​តស៊ូឡើង​ណាម៉ែ​ណា ប៉ាមិន​ទាន់​ចេញ​ពី​គុក​ទេ​ម៉ែ ខំប្រឹង​ឡើង​ម៉ែ តិច​ទៀត​ប៉ានិង​បាន​ចេញ​ហើយ។ ដល់ពេល​គាត់​ឆ្លើយតប​ខ្ញុំ​វិញ គាត់​ថា ម៉ែ​ទៅ​លែង​រួច​ហើយ​កូន ម៉ែ​ហត់​ណាស់ៗ ម៉ែ​ដើរ​ស្រែកតវ៉ា​សុំអោយ​គេជួយ គាត់​ថា​គាត់​ហត់​គាត់ គាត់​ទៅ​លែង​រួច ដល់​ពេល​ហើយ​បេះដូង​គាត់​លែង​ដំណើរ​ការ»

លោក សុខ ចន្ថា និង​លោកស្រី សោម ចន្ធូ មាន​កូន​៣នាក់​ប្រុស​២​នាក់ និង​ស្រី​ម្នាក់ ដែល​រស់​នៅ​ជុំគ្នា​ក្នុង​ផ្ទះ​ក្បែរ​ស្ពាន​អ្នក​លឿង នៅ​ខេត្ត​ព្រៃវែង។

ក្រោយពី​អត់មាន​ឳពុក​ម្ដាយ ជីវភាព​ពួកគាត់​កាន់តែ​លំបាក​ព្រោះ​ប្រាក់​ព្យាបាល​ជំងឺ​អ្នក​ម្ដាយ​អស់ និង​ត្រូវ​រក​ប្រាក់​មក​ចំណាយ​បុណ្យ​សព​ម្ដាយ និងត្រៀម​សម្រាប់​បុណ្យ​ខួប​៧ថ្ងៃនា​ពេល​ខាង​មុខ​បន្ថែម​ទៀត

ចំណែកក្រុម​ស្ត្រីថ្ងៃសុក្រ​ម្នាក់ កញ្ញា ហេង បូរី ថ្លែង​ថា ជារឿង​សង្វេគ និង​រន្ធត់​ចិត្ត​បំផុត ដែល​ទទួល​ដំណឹង​បាត់​បង់​លោកស្រី សោម ចន្ធូ។ កញ្ញាថា លោកស្រីជាមនុស្ស​ល្អ ទោះបីគាត់​ជាស្ត្រីម្នាក់​មិន​សូវ​មាន​ចំណេះដឹង​ខ្ពង់ខ្ពស់ ប៉ុន្តែ​គាត់​មាន​ឆន្ទៈ និង​មនសិការ​ហ៊ាន​លះបង់ ដើម្បី​គ្រួសារ និង​យុត្តិធម៌​សង្គមកញ្ញា​បន្ត​ថា គាត់​តែង​ចែក​រំលែក និង​យក​អាសា​អ្នក​ជុំវិញ​ខ្លួន ហើយមិន​ដែល​ទុក​អ្នក​ដទៃ​ចោល​ឡើយ ក្នុងពេល​ដែល​អាជ្ញាធរ​បង្ក្រាប​ម្ដងៗ៖

«ពួកខ្ញុំពិត​ជា​មាន​ការ​រន្ធត់​យ៉ាង​ខ្លាំង វា​ហាក់​ដូចជា​លឿន​ពេក ដែល​ត្រូវ​បាត់បង់​រូបគាត់​ទៅ ទាំង​ដែល​ពួក​យើង​ខំតស៊ូ​ជា​មួយ​គ្នា​រយៈពេល​ជិត​៣​ឆ្នាំ​មក​ហើយហើយគាត់​ទៅបាត់​ទាំងដែល​គាត់​មិន​ទាន់​ទទួល​បាន​យុត្តិធម៌​នៅ​ឡើយហើយ​ខ្ញុំយល់ថា រដ្ឋាភិបាល​គួរតែ​ដោះលែង​ប្ដី​របស់​គាត់ ដូច​ជា​អ្នក​ទោស​មនសិការ​ទាំងអស់​អោយ​មាន​សេរីភាព​មក​វិញ ពីព្រោះ​ពួកគាត់​សុទ្ធតែ​ជា​បុគ្គល​ស្អាត​ស្អំ មិន​មាន​ទោស​កំហុស​ដូច ដែល​តុលាការ​បាន​ចោទ​ប្រកាន់​នោះទេ»

វិទ្យុអាស៊ីសេរី មិនអាច​ទាក់ទង​អ្នកនាំពាក្យ​សាលាឧទ្ធរណ៍​រាជធានី​ភ្នំពេញ លោក ប្លង់ សំណាង និង​អ្នកស្រី ស្រេង សូយ៉េត ដើម្បី​ឆ្លើយតប​ជុំវិញ​រឿង​នេះ​បាន​ទេ​ថ្ងៃទី២១ ខែធ្នូ។ ប៉ុន្តែ អ្នក​នាំពាក្យ​គណបក្ស​ប្រជាជនកម្ពុជា លោក សុខ ឥសាន ឱ្យដឹងថា ទិដ្ឋភាព​នយោបាយ និង​ផ្លូវ​ច្បាប់ គឺ​ដាច់​ដោយ​ឡែកពី​គ្នា ព្រោះ​តុលាការ​អនុវត្ត​ទៅ​តាម​ច្បាប់។ លោកថា ការយល់ឃើញថា ករណី​ទាំង​នេះ​ជា​រឿង​នយោបាយ គឺ​ជាការ​យល់​ឃើញ ប៉ុន្តែមិនមែន​ជា​ការ​អនុវត្តច្បាប់៖

«បើ​យើង​និយាយ​អ៊ីចឹង វា​ហាក់​ដូចជា​ការ​ដែល​គាត់​ដាក់​លក្ខខណ្ឌ​មក​លើ​រដ្ឋាភិបាល ឬ​មក​លើ​តុលាការ បើ​មិន​ដោះលែង​ទេ គាត់​តវ៉ា​តទៅ​ទៀត។ មាន​អ្នកណា​បិទ​សិទ្ធិ​គាត់ អាហ្នឹង​ជា​សិទ្ធិ​នយោបាយ​របស់​គាត់​ទេ បើគាត់​តវ៉ា គាត់​តវ៉ាទៅ​អោយ​តែ​តវ៉ា​ត្រូវ​ច្បាប់ តែ​បើតវ៉ា​មិន​ត្រូវ​ច្បាប់​រឿង​តែ​ប៉ុណ្ណឹង»

ជុំវិញ​រឿងនេះ នាយកទទួលបន្ទុក​កិច្ចការ​ទូទៅ នៃ​អង្គការ​លីកាដូ (LICADHO) លោក អំ សំអាត មាន​ប្រសាសន៍​ថា ករណី​នេះគួរ​អោយ​អាណិត​អាសូរ ចំពោះ​ក្រុម​គ្រួសារ​លោក សុខ ចន្ថា ដែល​បាត់​បង់​ប្រពន្ធ។ លោកថា លោកស្រី សោម ចន្ធូ ជួប​ការ​លំបាក​ច្រើន ដោយ​ត្រូវ​ចិញ្ចឹម​កូន និង​ធ្វើ​ដំណើរ​ទៅ​សួរសុខទុក្ខ​ប្ដី​នៅ​ឯពន្ធនាគារ​ផ្លូវ​ឆ្ងាយ ខណៈខ្លួន​មាន​ជំងឺ​ប្រចាំកាយ​ទៀតលោក​បន្ត​ថា រដ្ឋាភិបាល និង​តុលាការ​គួរ​បន្ធូរបន្ថយទោស និង​ដោះលែង​ពួក​គាត់ ដើម្បី​បាន​ជួប​ជុំ​គ្រួសារ​ និង​ធ្វើ​ការងារ​រក​ប្រាក់​ចំណូល​ចិញ្ចឹម​កូនៗ។

«ខ្ញុំយល់ថា ដើម្បី​បញ្ចប់​វិបត្តិ​នយោបាយ ក៏ដូចជា​ភាព​រងគ្រោះ នៃ​សកម្មជន​នយោបាយ​តទៅ​ទៀត ​វា​មាន​តែអ្នក​នយោបាយ​ខ្មែរ​ទាំង​អស់ ត្រូវ​តែ​មាន​ការ​ជជែក​គ្នា តាម​ការ​បន្ត​នៃ​វប្បធម៌​សន្ទនា ឬ​ក៏​ការ​ជជែក​គ្នា​ដោយ​ការ​គោរព​គ្នាទៅវិញ​ទៅ​មក ការ​ប្រកាន់​នូវ​ឧត្ដមគតិ​របស់​ខ្លួន ដោយ​តម្កល់​នូវ​ឧត្ដម​ប្រយោជន៍​ជាតិ ឧត្ដម​ប្រយោជន៍​ប្រជាពលរដ្ឋ​ជា​ធំ ដើម្បី​បញ្ចប់​នូវ​វិបត្តិ​ដែល​សេសសល់​ហ្នឹង​ ក៏ដូចជា​បំបាត់​នូវ​វប្បធម៌ នៃ​ការ​រងទុក្ខ នៃ​សកម្មជន​នយោបាយ​តទៅ​ទៀត»

កន្លង​មក សមាជិក​ប្រតិបត្តិ​គណបក្ស​សង្គ្រោះជាតិ​ខេត្តព្រៃវែង លោក សុខ ចន្ថា ត្រូវ​សមត្ថកិច្ច​ឡោម​ព័ទ្ធ​ចាប់​ខ្លួន នៅ​ផ្ទះ​របស់​លោក​កាល​ពី​ថ្ងៃទី២០ ខែមេសា ឆ្នាំ២០២០ ដោយ​ចោទ​ពី​បទ «ញុះញង់​ឱ្យ​ប្រព្រឹត្ត​បទឧក្រិដ្ឋ​ជា​អាទិ៍ និង​រួមគំនិត​ក្បត់» តុលាការ​បាន​ផ្ដន្ទាទោស​ដាក់​ពន្ធនាគារ​ ៥ឆ្នាំ ជា​មួយ​សកម្មជន​បក្ស​ប្រឆាំង​ចំនួន​១៣​នាក់​ផ្សេង​ទៀត ប៉ុន្តែ​ទោស​នេះ ត្រូវ​អនុវត្ត​ក្នុង​ពន្ធនាគារ​ចំនួន​៣​ឆ្នាំ៨ខែ ហើយទោស​នៅ​សល់​ត្រូវ​បានព្យួរ

សាច់ញាតិ និង​សង្គមស៊ីវិល​សិទ្ធិមនុស្ស​ជំរុញ​ឱ្យ​រដ្ឋាភិបាល និង​អ្នក​នយោបាយ​ខ្មែរ​ ពន្លឿន​បញ្ចប់​វិបត្តិ​នយោបាយ កុំអោយ​សកម្មជន និង​អ្នកពាក់ព័ន្ធ​រងគ្រោះ​កាន់​តែ​ច្រើន និង​ទាមទារ​អោយ​ដោះលែង​អ្នកទោស​មនសិការ ដែល​ជាប់ឃុំ​ដោយ​អយុត្តិធម៌​នៅ​ពន្ធនាគារ ដើម្បី​ស្តា​មុខ​មាត់​កម្ពុជា​លើ​ឆាក​អន្តរជាតិ​ឡើង​វិញ

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។