អ្នកនយោបាយនៃគណបក្សប្រឆាំង និងអ្នកនយោបាយនៃគណបក្សកាន់អំណាចយល់ឃើញផ្សេងគ្នា ចំពោះការប្រកាសដកខ្លួនរបស់ប្រធានាធិបតីអាមេរិក លោក ចូ បៃដិន (Joe Biden) ដែលនឹងមិនបន្តប្រកួតប្រជែងតំណែងប្រធានាធិបតី នៃសហរដ្ឋអាមេរិកនៅចុងឆ្នាំនេះ។
ទីប្រឹក្សាគណបក្សកម្លាំងជាតិ លោក រ៉ុង ឈុន កោតសរសើរលោក ចូ បៃដិន និង ហៅការសម្រេចចិត្តដកខ្លួនចេញរបស់ប្រធានាធិបតីអាមេរិកថា ជាគំរូមេដឹកនាំល្អ ដែលចេះស្ដាប់សំឡេងផ្ទៃក្នុងគណបក្សរបស់លោក ដោយតម្កល់ផលប្រយោជន៍ ជាតិនិងប្រជាពលរដ្ឋអាមេរិកជាធំ។
លោក រ៉ុង ឈុន ប្រាប់វិទ្យុអាស៊ីសេរីនៅថ្ងៃទី២២ ខែកក្កដា ថា ស្ថានភាពជាតិ កម្ពុជា ដែលកំពុងប្រឈមនឹងរិះគន់ ទាក់ទងការធ្លាក់ចុះប្រជាធិបតេយ្យ បញ្ហា គោរពសិទ្ធិមនុស្ស និងអំពើពុករលួយ ដែលជាឧបសគ្គដ៏ធំ ដល់ការទាក់ទាញអ្នក វិនិយោគជាដើម ទាមទារឱ្យអ្នកនយោបាយដឹកនាំប្រទេស ចេះបើកចិត្តទូលាយ ទទួលយកមតិផ្ទុយ ដូចគំរូរបស់លោក ចូ បៃដិន ដែរ។
លោក រ៉ុង ឈុន៖ «យើងគួរតែរៀនសូត្រទៅតាមប្រធានាធិបតីលោក ចូ បៃដិន គួរតែរៀនសូត្រ យកគំរូតាម។ យើងមិនទាមទារឱ្យចុះចេញអីទេ ចំពោះកម្ពុជា ប៉ុន្តែ គ្រាន់តែទាមទារថា យើងត្រូវតែបើកលំហសេរីភាពដល់អ្នកនយោបាយដល់គណបក្សនយោបាយ ក៏ដូចជា អង្គការសង្គមស៊ីវិលឱ្យមានសេរីភាពពេញលេញ ហើយឱ្យគណបក្សចូលរួមការប្រកួតប្រជែងស្មើមុខស្មើមាត់គ្នា ហើយអ្នកដែលចាញ់គឺចុះចេញ អ្នកដែលឈ្នះឡើងដឹកនាំ អ្នកចាញ់ធ្វើបក្សប្រឆាំង»។
ប្រធានាធិបតីសហរដ្ឋអាមេរិកលោក ចូ បៃដិន (Joe Biden) កាលពីថ្ងៃទី២១ ខែកក្កដា បានប្រកាសដកខ្លួនពីការប្រកួតប្រជែងតំណែងប្រធានាធិបតីឡើងវិញ និងគាំទ្រអ្នកស្រី កាមាឡា ហារីស៍ (Kamala Harris) ឱ្យឈរឈ្មោះជាបេក្ខជន ប្រកួតប្រជែងប្រធានាធិបតីជំនួសលោក។
លោក ចូ បៃដិន ជឿជាក់ថា គឺជាផលប្រយោជន៍ដ៏ល្អបំផុត សម្រាប់គណបក្ស ប្រជាធិបតេយ្យ និងប្រទេសជាតិ ដែលលោកត្រូវដកខ្លួនចេញ ហើយផ្ដោតទៅការបំពេញភារកិច្ចរបស់លោក ជាប្រធានាធិបតីសហរដ្ឋអាមេរិក សម្រាប់រយៈពេល ដែលនៅសល់។ លោកអះអាងថា គឺជាកិត្តិយសដ៏អស្ចារ្យបំផុតក្នុងជីវិតរបស់លោក ដែលបានធ្វើប្រធានាធិបតីរបស់ពលរដ្ឋអាមេរិក។
លោក ចូ បៃដិន គាំទ្រអនុប្រធានាធិបតី អ្នកស្រី កាមាឡា ហារីស៍ ឱ្យក្លាយជាបេក្ខភាពប្រធានាធិបតីរបស់គណបក្សប្រជាធិបតេយ្យ ដើម្បីប្រកួតតទល់នឹងលោក ដូណាស់ ត្រាំ (Donald Trump) ដែលជាបេក្ខភាពប្រធានាធិបតី នៃគណបក្សសាធារណរដ្ឋ នៅក្នុងការបោះឆ្នោតតំណែងប្រធានាធិបតីនៅខែវិច្ឆិកាខាងមុខនេះ។
ចំពោះការសម្រេចចិត្តដកខ្លួនចេញរបស់លោក ចូ បៃដិន នេះ មានការយល់ឃើញផ្សេងគ្នាក្នុងចំណោមអ្នកនយោបាយគណបក្សកាន់អំណាច និងអ្នកនយោបាយ នៃគណបក្សប្រឆាំងនៅប្រទេសកម្ពុជា។
អ្នកនាំពាក្យនៃគណបក្សប្រជាជនកម្ពុជា លោក សុខ ឥសាន លើកឡើងថា ការសម្រេចចិត្តដកខ្លួនចេញរបស់លោក ចូ បៃដិន គឺជាសិទ្ធិនយោបាយរបស់លោក ដោយផ្អែកលើកត្តាអាយុច្រើន សុខភាពមិនសូវល្អ និងមានមតិផ្ទៃក្នុងបក្សមិនចង់ឱ្យលោកបន្តឈរឈ្មោះទៀត។
ចំពោះគណបក្សប្រជាជនកម្ពុជា លោក សុខ ឥសាន ប្រាប់វិទ្យុអាស៊ីសេរីនៅថ្ងៃទី២២ ខែកក្កដាថា គ្មានការចាំបាច់យកគំរូតាមលោក ចូ បៃដិន ឡើយ គឺអាស្រ័យទៅលើការភ្ញាក់រឭករបស់លោក ហ៊ុន សែន ដែលជាប្រធានគណបក្សនិងការសម្រេចរបស់គណបក្ស។
លោកអះអាងដោយអំនួតថា គណបក្សកាន់អំណាចរបស់លោក ធ្វើគំរូល្អជាងនៅអាមេរិកទៅទៀត ដោយលោកលើកហេតុផលថា លោក ហ៊ុន សែន បានចូលនិវត្តន៍ពីការប្រកួតតំណែងនាយករដ្ឋមន្ត្រីតាំងពីអាយុ ៧០ឆ្នាំប្លាយ មិនដូចលោក ចូ បៃដិន ដែលប្រកាសឈប់បន្តប្រកួតនៅអាយុជាង ៨០ ឆ្នាំទៅហើយនោះទេ។
លោក សុខ ឥសាន៖ «គណបក្សប្រជាជនកម្ពុជាធ្វើគំរូល្អជាងនៅអាមេរិក ទៅទៀត ពីព្រោះសម្ដេចតេជោ ហ៊ុន សែន លោកទើបតែអាយុ ៧០ប្លាយឆ្នាំទេ ហើយលោកមិនឈរឈ្មោះជានាយករដ្ឋមន្ត្រីណា ទោះបីជាគាត់មានជាប់ឈ្នះ គាត់ផ្ទេរអំណាចទៅជាបេក្ខភាពនាយករដ្ឋមន្ត្រី សម្រាប់អនាគតជូនសម្ដេច ហ៊ុន ម៉ាណែត ហើយ។ អ៊ីចឹង បានសេចក្ដីថា សម្ដេច ហ៊ុន សែន លោកដូចជា យើងអាចនិយាយថា ចូលនិវត្តន៍ពីនាយករដ្ឋមន្ត្រីនីតិកាលទី៦ ចូលដល់ទី៧ គាត់មិនធ្វើទៀតទេ។ អ៊ីចឹងគាត់ឱ្យក្មេងជំនាន់ក្រោយ ដើម្បីបន្តវេន»។
ប៉ុន្តែអ្វីដែលខុសប្លែកគ្នារវាងលោក ហ៊ុន សែន និងលោក ចូ បៃដិន នោះ គឺលោក ហ៊ុន សែន បានក្រាញអំណាចជាមេដឹកនាំកម្ពុជាជិត៤០ឆ្នាំ រីឯលោក ចូ បៃដិន ដែលបាន ឡើងតាមការបោះឆ្នោតត្រឹមត្រូវ និងកំពុងដឹកនាំសហរដ្ឋអាមេរិក ជាប្រធានាធិបតី ត្រឹមមួយអាណត្តិដែលមានរយៈពេល ៤ឆ្នាំប៉ុណ្ណោះ។ តំណែងប្រធានាធិបតីរបស់លោកនឹងផុតនៅខែមករា ឆ្នាំ២០២៥ខាងមុខ ហើយបើទោះជាលោកមានសិទ្ធិឈ្មោះម្ដងទៀតក៏ដោយចុះ ក៏លោកសម្រេចចិត្តមិនឈរឈ្មោះទៀតទេ។
ប្រធានាធិបតីនៃសហរដ្ឋអាមេរិកនិយាយថា សមិទ្ធផលសម្រាប់សហរដ្ឋអាមេរិក ក្រោមអាណត្តិរបស់លោក មិនអាចសម្រេចបាន ដោយគ្មានការចូលរួមពី ប្រជាពលរដ្ឋអាមេរិកនោះទេ។ ប៉ុន្តែលោក ហ៊ុន សែន វិញ ជារឿយៗ តែងចាត់ទុកសមិទ្ធផលនានា នៅកម្ពុជាជាស្នាដៃផ្ដាច់មុខរបស់លោក ហើយទាមទារឱ្យប្រជាពលរដ្ឋខ្មែរដឹងគុណលោក។
លោក ចូ បៃដិន និយាយថា គ្មានអ្វីដែលអាមេរិកធ្វើមិនបាននោះទេ នៅពេលដែលយើងធ្វើវាជាមួយគ្នា ប៉ុន្តែលោក ហ៊ុន សែន ប្រកាសកម្ចាត់អ្នក ដែលមានមតិផ្ទុយ និងគូប្រជែងឱ្យអស់ពីកម្ពុជាទៅវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។