គណបក្សសង្គ្រោះជាតិបានចាត់ទុកការស្លាប់របស់លោក ទិត រ៉ន កូនសកម្មជនគណបក្សនៅក្នុងពន្ធនាគារខេត្តកំពង់ចាម ថាជាឃាតកម្មនយោបាយតាមរូបភាពថ្មីមួយទៀតដែលធ្វើឡើងដោយរបបក្រុងភ្នំពេញ។ ការលើកឡើងនេះបានកើតមានឡើងក្នុងខណៈក្រុមសមត្ថកិច្ចបានប្រញាប់ប្រញាល់បិទការស៊ើបអង្កេតករណីនេះដោយធ្វើការសន្និដ្ឋានថាជនជាប់ចោទបានដួលស្លាប់ក្នុងបន្ទប់ទឹកក្នុងពន្ធនាគារខេត្តដោយសារញៀនស្រា។
គណបក្សប្រឆាំងដ៏ធំជាងគេនៅកម្ពុជាបានទាមទារឱ្យអង្គការសិទ្ធិមនុស្សជាតិ អន្តរជាតិ និង សហគមន៍អន្តរជាតិ ជួយតាមដានឃ្លាំមើលករណីនៃការស្លាប់លោក ទិត រ៉ន កូនសកម្មជនគណបក្សនៅក្នុងពន្ធនាគារខេត្តកំពង់ចាម និងទាមទាររកយុត្តិធម៌ដល់ជនរងគ្រោះ ដើម្បីបញ្ឈប់នូវការធ្វើទុក្ខបុកម្នេញគ្រប់រូបភាពមកលើគណបក្សសង្គ្រោះជាតិ។
សេចក្ដីថ្លែងការណ៍របស់គណបក្សសង្គ្រោះជាតិនៅថ្ងៃទី៦ ឧសភានេះបានចាត់ទុកការស្លាប់កូនសកម្មជនគណបក្សលោក ទិត រ៉ន ថា ជាឃាតកម្មនយោបាយតាមរូបភាពថ្មីមួយទៀតដែលធ្វើឡើងដោយរបបលោក ហ៊ុន សែន និងទាមទារឱ្យរបបនេះទទួលខុសត្រូវចំពោះការស្លាប់នេះ និងត្រូវរកឱឃើញនូវអ្នកនៅពីក្រោយខ្នងដើម្បីនាំខ្លួនយកមកផ្ដន្ទាទោសតាមច្បាប់។
លោក ទិត រ៉ន បានស្លាប់នៅក្នុងពន្ធនាគារខេត្តកំពង់ចាម កាលពីថ្ងៃទី១៨ មេសា កន្លងទៅបន្ទាប់ពីបានជាប់នៅក្នុងមន្ទីរឃុំឃាំងអស់ដើម្បីរង់ចាំជំនុំជម្រះទោសពីបទចោទថា បានប្រើប្រាស់អំពើហិង្សាដោយចេតនាមានស្ថានទម្ងន់ទោស។
អ្នកនាំពាក្យអគ្គស្នងការនគរបាលជាតិ លោក ឆាយ គឹមឃឿន បញ្ជាក់ថា សមត្ថកិច្ចបានបិទបញ្ចប់ការស៊ើបអង្កេតរបស់ខ្លួនហើយដោយចាត់ទុកថាជនរងគ្រោះលោក ទិត រ៉ន បានដួលស្លាប់ដោយខ្លួនឯងនៅក្នុងបន្ទប់ទឹកក្នុងមន្ទីរឃុំឃាំងដោយសារញៀន ស្រា។
លោកបានច្រានចោលការចោទប្រកាន់នេះថា មិនជាប់ពាក់ព័ន្ធនឹងឃាតកម្មនយោបាយដូចការលើកឡើងរបស់គណបក្សសង្គ្រោះជាតិទេ៖ «គណបក្សហ្នឹងគាត់បានដើរចោទគេគ្រប់គ្នាអ៊ីចឹង។យើងបានបំភ្លឺរួចហើយតើ ស្នងការខេត្តកំពង់ចាមក៏បំភ្លឺ ព្រះរាជអាជ្ញាខេត្តក៏បំភ្លឺ គេបានសន្និសីទសារព័ត៌មានរួចហើយមូលហេតុនៃការស្លាប់គាត់ដួលគាត់អីហ្នឹង » ។
ព្រះរាជអាជ្ញាខេត្តកំពង់ចាមលោក ហួត វុទ្ធី បានបញ្ជាក់នៅក្នុងអង្គសន្និសីទកាសែតកាលពីថ្ងៃទី០១ ឧសភា ថា ជនជាប់ចោទឈ្មោះ ទិត រ៉ន ស្លាប់ដោយសារដួលក្នុងបន្ទប់ទឹកក្នុងមន្ទីរឃុំឃាំងមិនជាប់ពាក់ព័ន្ធនឹងការធ្វើទារុណកម្មជនរងគ្រោះរហូតដល់ស្លាប់ទេ។
បើទោះបីជាមានការអះអាងបែបនេះក្ដីក៏លោកប្រធានគណៈកម្មាធិការប្រតិបត្តិគណបក្សសង្គ្រោះជាតិ ឃុំទួលព្រះឃ្លាំង លោក អៀម ទិត ត្រូវជាឪពុកជនរងគ្រោះប្រាប់អាស៊ីសេរីថាកូនប្រុសរបស់លោកស្លាប់ដោយមានស្នាមវាយដំជាច្រើនកន្លែងជាប់ពេញខ្លួន និងមានស្នាមវាយបាក់កញ្ចឹងក។ លោកចោទប្រកាន់ថា កូនរបស់លោកបានទទួលរងនូវការធ្វើទារុណកម្មយ៉ាងធ្ងន់ធ្ងរមុនពេលស្លាប់៖ «ដល់ពេលគេយកឡានមកដាក់សពមកដល់ផ្ទះបានបងប្អូន កូនក្មួយកូនចៅគេវែកមុខមាត់មើលឃើញរបួសលើភ្នែក បែកភ្នែក កបាក់រលេះ ស្មាជាំ ក្លៀកជាំ ឆ្អឹងជំនីជាំ ខ្នងជាំទាំងអស់។កូនខ្ញុំទៅពីផ្ទះគេហៅទៅហ្នឹង អត់មានរបួសស្នាមអត់មានគ្រុនអត់មានឈឺអ្វីទេ កូនខ្ញុំបង់សំណាញ់រាល់ថ្ងៃ »។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការ លីកាដូ (LICADHO) លោក អំ សំអាត បញ្ជាក់ថា មានចំណុចសង្ស័យជាច្រើនបានកើតមានឡើងទៅលើ ជន រង គ្រោះ។លោកមានប្រសាសន៍ថាយើងនឹងបន្តស៊ើបអង្កេតករណីនេះបន្តទៀត ដើម្បីរកឱ្យឃើញមូលហេតុពិតប្រាកដនៃការស្លាប់នេះ៖ «ឥឡូវហ្នឹងយើងកំពុងចាប់ផ្តើមស្រាវជ្រាវពីដំណាក់កាលនៃការចាប់ខ្លួនលោក ទិត រ៉ន រហូតដល់រហូតទៅដល់ពេលស្លាប់អញ្ចឹងក្នុងដំណាក់កាលនីមួយៗ ហ្នឹង តើវាមានរឿងអ្វីកើតឡើងចំពោះលោក ទិត រ៉ន ខ្លះនៅក្នុងដំណាក់កាលទាំងអស់ហ្នឹង » ។
អាជ្ញាធរខេត្តកំពង់ចាមកាលពីថ្ងៃទី១៥ មេសា បានចាប់ខ្លួនលោក ទិត រ៉ន កូនប្រុសសកម្មជនគណបក្សសង្គ្រោះជាតិក្រោយពីមានពាក្យបណ្ដឹងពីប្រជាពលរដ្ឋនៅក្នុងមូលដ្ឋានដោយចោទប្រកាន់សង្ស័យថាជាប់ពាក់ព័ន្ធនឹងការប្រើប្រាស់អំពើហិង្សាមួយនៅក្នុងខេត្តកំពង់ចាម កាលពី ១៣ឆ្នាំ កន្លងទៅ។
ក្រោយពីមានជម្លោះនៅក្នុងភូមិកាលពីជាង ១០ឆ្នាំមក លោក ទិត រ៉ន បានរត់ភៀសខ្លួនរហូតដល់ត្រឡប់មកដល់ក្នុងភូមិវិញ បានជាង ១ឆ្នាំទើបសមត្ថកិច្ចសម្រេចចាប់ខ្លួនយកទៅដាក់ក្នុងមន្ទីរឃុំឃាំងខេត្តកំពង់ចាម។
នៅក្នុងសេចក្ដីថ្លែងការណ៍គណបក្សសង្គ្រោះជាតិបានហៅការស្លាប់របស់លោក ទិត រ៉ន មិនឆ្លុះបញ្ចាំងពីហេតុការណ៍ពិត និងព្យាយាមគេចចេញពីការទទួលខុសត្រូវ ក្នុងគោលបំណងបិទបាំងការពិតនូវទង្វើដ៏ឃោរឃៅរបស់របបក្រុងភ្នំពេញទៅលើជនរងគ្រោះ។
គណបក្សប្រឆាំងបានទាមទារឱ្យរបបលោក ហ៊ុន សែន ត្រូវតែស្ដារការគោរពសិទ្ធិមនុស្សនិងលទ្ធិប្រជាធិបតេយ្យឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។