មន្ត្រីជាន់ខ្ពស់គណបក្សសង្គ្រោះជាតិលើកទឹកចិត្តដល់សកម្មជនរបស់ខ្លួនកុំឱ្យបាក់ទឹកចិត្តក្រោយពីរបបក្រុងភ្នំពេញកំពុងប្រើប្រាស់យុទ្ធនាការបង្ក្រាបគាស់រំលើងឫសគល់បក្សប្រឆាំងនៅកម្ពុជា តាមរយៈការប្រើប្រាស់ ប្រព័ន្ធយុត្តិធម៌ធ្វើទុក្ខបុកម្នេញសកម្មជនបក្សប្រឆាំង។
អ្នកតំណាងរាស្ត្រគណបក្សសង្គ្រោះជាតិ ដែលកំពុងភៀសខ្លួន មករស់នៅសហរដ្ឋអាមេរិក លោក ឡុង រី កាលពីថ្ងៃទី៧ មីនា បានលើកទឹកចិត្តដល់សកម្មជនគណបក្សសង្គ្រោះជាតិនៅទូទាំងប្រទេសឱ្យបន្តបេសកកម្មរបស់ខ្លួនបន្តទៀត ដើម្បីរង់ចាំដំណើរវិលត្រឡប់របស់លោក សម រង្ស៊ី មេដឹកនាំស្ដីទី គណបក្សប្រឆាំងដែលគ្រោងវិលចូលមកកាន់ប្រទេសកម្ពុជាវិញ នៅឆ្នាំ២០១៩នេះដើម្បីចាប់ខ្លួនលោក ហ៊ុន សែន។
លោកបញ្ជាក់ថា ដើម្បីឱ្យមានការផ្លាស់ប្ដូរជាវិជ្ជាមានតែលោក សម រង្ស៊ី និងប្រធានគណបក្សសង្គ្រោះជាតិលោក កឹម សុខា ទេ ទើបអាចសង្គ្រោះកម្ពុជាកំពុងមានវិបត្តិ៖ «បងប្អូនត្រូវតែបន្តបេសកកម្មនេះ ពង្រីក ពង្រឹងសកម្មជននៅតាមមូលដ្ឋានដែលមាន រង់ចាំការវិលត្រឡប់នេះជាស្ថាពរ ទើបយើងអស់មន្ទិល អស់ភ័យអស់ខ្លាច។ សូមឱ្យជឿថា យើងនឹងធ្វើបានក្នុងរយៈពេលដ៏ខ្លីខាងមុខនេះ»។
ការអំពាវនាវរបស់មន្ត្រីជាន់ខ្ពស់គណបក្សសង្គ្រោះជាតិនេះ បានកើតមានឡើងក្រោយពីសកម្មជនគណបក្សសង្គ្រោះជាតិ ចំនួន ៦នាក់បានចាកចេញពីប្រទេសកម្ពុជាទៅរកកន្លែងមានសុវត្ថិភាព ក្រោយពីរបបក្រុងភ្នំពេញបានចេញដីកាបង្គាប់ឱ្យចូលខ្លួនទាក់ទងនឹងការជួបជុំទទួលទាននំបញ្ចុកនៅក្នុងខេត្តកំពង់ស្ពឺ ដើម្បីរៀបចំគម្រោងស្វាគមន៍លោក សម រង្ស៊ី។
សាលាដំបូងខេត្តកំពង់ស្ពឺ បានចេញដីកាកោះជាលើកទី២ កាលពីថ្ងៃទី២៨ កុម្ភៈ ចំពោះសកម្មជនគណបក្សសង្គ្រោះជាតិចំនួន ៦នាក់ឱ្យចូលបំភ្លឺនៅថ្ងៃទី១៩ ខែមិនា ខាងមុខនេះ ពីបទសង្ស័យថា «ញុះញង់ឱ្យប្រព្រឹត្តបទឧក្រិដ្ឋជាអាទិ៍» ទាក់ទិនទៅនឹងក្រុមសកម្មជនទាំងនោះ បានប្រមូលផ្ដុំគ្នាថ្លែងសារកាលពីខែធ្នូឆ្នាំ ២០១៨ និងពាក់កណ្តាលខែមករា ឆ្នាំ២០១៩ ដើម្បីគាំទ្រលោក សម រង្ស៊ី។សកម្មជនគណបក្សប្រឆាំងទាំង ៦ នាក់ដែលតុលាការកោះហៅរួមមាន អតីតសមាជិកក្រុមប្រឹក្សាជាប់ឆ្នោត និងនាយកប្រតិបត្តិកំពង់ស្ពឺលោក ទៀង ស៊ាន អតីតក្រុមប្រឹក្សាជាប់ឆ្នោតក្រុងច្បារមន អ្នកស្រី គុណ ម៉ាច អតីតប្រធានប្រតិបត្តិក្រុងច្បារមន លោក ស្រី ជុំ សោភ័ណ្ឌ អតីតមេឃុំជាប់ឆ្នោតខាងគណបក្សសង្គ្រោះជាតិ ឃុំត្រែងត្រយឹង កញ្ញា កឹម តុលា ប្រធានចលនាស្ត្រីស្រុកភ្នំស្រួច លោកស្រី ហែម ចន្នី អតីតសមាជិកអចិន្ត្រៃយ៍គណបក្សខេត្ត លោក ហុង ថេង និងអតីតសមាជិកក្រុមប្រឹក្សាខេត្តអ្នកស្រី ឌុច នូសេរី។
អតីតសមាជិកក្រុមប្រឹក្សាខេត្តកំពង់ស្ពឺ អ្នកស្រី ឌុច នូសេរី ប្រាប់អាស៊ីសេរី កាលពីថ្ងៃទី៧ មិនា ពីកន្លែងលាក់ខ្លួនមកថា ពួកគេមកដល់ទីតាំងមានសុវត្ថិភាពមែន តែនៅបារម្ភពីសុវត្ថិភាពនៅឡើយ៖ «នាងខ្ញុំមានការព្រួយបារម្ភពីសុវត្ថិភាពនាងខ្ញុំផ្ទាល់ អ៊ីចឹងបានជានាងខ្ញុំ ចាកចេញពីលំនៅឋានរបស់ខ្ញុំដោយខ្ញុំមិនជឿទៅលើយុត្តិធម៌របស់ប្រទេសកម្ពុជាយើងទេពីព្រោះវាមិនសុក្រឹតមិនមែនការពារផលប្រយោជន៍ពិតប្រាកដ»។
ចំណែកអតីតក្រុមប្រឹក្សាជាប់ឆ្នោតក្រុងច្បារមន អ្នកស្រី គុណ ម៉ាច វិញទទូចដល់អង្គការឃ្លាំមើលការរំលោភសិទ្ធិមនុស្សឱ្យជួយតាមដានឃ្លាំមើលសុវត្ថិភាព ក្រោយពីពួកគេបានទៅដល់ទីតាំងមានសុវត្ថិភាពនោះ៖ « ខ្ញុំសំណូមពរឱ្យអ្នកយកព័ត៌មានជាតិ និងអន្តរជាតិជួយឃ្លាំមើលពីសុវត្ថិភាពក្រុមពួកខ្ញុំទាំង ៦នាក់នេះ។ សំណូមពរឱ្យខាងអង្គការ ឬក៏ស្នងការ សហប្រជាជាតិជួយផ្តល់សិទ្ធិជ្រកកោនឱ្យពួកខ្ញុំទាំងអស់គ្នាផង»។
មន្ត្រីនាំពាក្យរដ្ឋាភិបាលក្រុងភ្នំពេញ លោក ផៃ ស៊ីផាន បានហៅការចាកចេញរបស់មន្ត្រីគណបក្សប្រឆាំងថា គ្រាន់តែចង់បានសិទ្ធិជ្រកកោនប្រទេសទី៣ និងធ្វើសកម្មភាពប្រឆាំងរដ្ឋាភិបាលពីក្រៅប្រទេស៖ «ចេញទីដើម្បីប្រមូលគ្នីគ្នានៅក្រៅប្រទេស ដែលយើងមើលឃើញ ជាយុទ្ធសាស្ត្រ របៀបរៀបចំឱ្យមានឧទ្ទាមខាងក្រៅ ក្នុងការធ្វើយុទ្ធនាការប្រឆាំងមករដ្ឋាភិបាលវិញ»។
គិតមកទល់ពេលនេះ មានសកម្មជនគណបក្សសង្គ្រោះជាតិជិត ១០០នាក់ហើយ បានគេចខ្លួនទៅក្រៅប្រទេស ដើម្បីគេចពីការធ្វើទុក្ខបុកម្នេញរបស់របបលោក ហ៊ុន សែន ក្រោយបក្សប្រឆាំងដ៏ធំជាងគេក្នុងប្រទេសកម្ពុជាត្រូវបានរបបនេះ រំលាយទាំងខុសច្បាប់កាលពីខែវិច្ឆិកា ឆ្នាំ២០១៧មក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។