ប្រព័ន្ធផ្សព្វផ្សាយលោក ហ៊ុន សែន ថា លោក សម រង្ស៊ី ត្រូវបានបណ្ដេញចេញពីម៉ាឡេស៊ី គឺជាការប្រឌិត
2023.06.01
លោក សម រង្ស៊ី ប្រធានស្ដីទីគណបក្សសង្គ្រោះជាតិ និងថ្នាក់ដឹកនាំគណបក្ស ក្នុងជំនួបជាមួយតំណាងរាស្ត្រនៃគណបក្សកាន់អំណាចរបស់ម៉ាឡេស៊ី កាលពីថ្ងៃទី៣១ ឧសភា ២០២៣។
រូប៖ ពលរដ្ឋផ្ដល់ឱ្យ
មន្ត្រីគណបក្សប្រឆាំងថា ព័ត៌មានដែលថា លោក សម រង្ស៊ី ត្រូវបានគេបណ្តេញពីប្រទេសម៉ាឡេស៊ី ជាព័ត៌មានក្លែងប្រឌិតដោយក្រុមគាំទ្រលោកនាយករដ្ឋមន្ត្រី ហ៊ុន សែន។ ពួកគេថា លោក សម រង្ស៊ី ដែលបានចូលទឹកដីប្រទេសម៉ាឡេស៊ីជាថ្មី មិនមែនកើតឡើងដោយចៃដន្យ ឬក្នុងនាមជាអ្នកដំណើរធម្មតា ដូចការលើកឡើងរបស់លោក ហ៊ុន សែន ឡើយ។
ការអនុញ្ញាតរបស់ប្រទេសម៉ាឡេស៊ីឱ្យប្រធានស្ដីទីគណបក្សសង្គ្រោះជាតិលោក សម រង្ស៊ី ជាន់ទឹកដីរបស់ខ្លួនជាលើកទី២ កាលពីថ្ងៃទី៣០ ខែឧសភា ត្រូវបានមន្ត្រីបក្សប្រឆាំងចាត់ទុកថា ជារឿងមួយដែលធ្វើឱ្យលោក ហ៊ុន សែន អាម៉ាស់មុខ ព្រោះលោកធ្លាប់ថ្លែងអួតអាងជាសាធារណៈថា រដ្ឋាភិបាលម៉ាឡេស៊ីនឹងមិនស្វាគមន៍លោក សម រង្ស៊ី ទៀតឡើយ។
ប្រធានគណៈកម្មាធិការប្រតិបត្តិបក្សសង្គ្រោះជាតិ រាជធានីភ្នំពេញ និងបច្ចុប្បន្នកំពុងភៀសខ្លួននៅប្រទេសម៉ាឡេស៊ីលោក ម៉ម ផល្លា ប្រាប់អាស៊ីសេរី នៅថ្ងៃទី៣១ ខែឧសភា ថា លោក សម រង្ស៊ី បានធ្វើដំណើរចូលប្រទេសម៉ាឡេស៊ីជាថ្មី គឺធ្វើឡើងក្នុងក្របខណ្ឌអ្នកនយោបាយប្រជាធិបតេយ្យ និងមិនមែនមកដោយលួចលាក់ ដូចការចោទរបស់លោក ហ៊ុន សែន ឡើយ។ លោកបញ្ជាក់ថា ក្រៅពីជួបសហការីរស់នៅក្នុងប្រទេសម៉ាឡេស៊ី លោក សម រង្ស៊ី ក៏បានជួបពិភាក្សាជាមួយក្រុមតំណាងរាស្ត្រមកពីគណបក្សកាន់អំណាចរបស់លោកនាយករដ្ឋមន្ត្រី អាន់វ៉ា អ៊ីប្រាហ៊ីម (Anwar Ibrahim) ដែរ។
លោក ម៉ម ផល្លា៖ «រឿងអញ្ជើញ ឬមិនអញ្ជើញ(មន្ត្រីម៉ាឡេស៊ីអញ្ជើញលោក សម រង្ស៊ី) ខ្ញុំសុំមិនធ្វើអត្ថាធិប្បាយទេ តែគ្រាន់តែដឹងច្បាស់ថា លោកប្រធាន សម រង្ស៊ី គាត់អញ្ជើញមកនេះ មិនមែនជាការមកដើរលេងនោះទេ គឺគាត់មកក្នុងក្របខណ្ឌជាអ្នកធ្វើការងារ។ ហើយដូច្នេះហើយ អ្នកប្រជាធិបតេយ្យដូចគ្នា គេដឹង គេចេះ របៀបធ្វើការក្នុងក្របខណ្ឌអ្នកនយោបាយដែលធ្វើការយូរឆ្នាំមកហើយ»។
ការលើកឡើងពីមន្ត្រីបក្សប្រឆាំងនេះ ស្របពេលលោក ហ៊ុន សែន បានថ្លែងនៅក្នុងពិធីសម្ពោធដាក់ឱ្យប្រើប្រាស់ស្ពានឆ្លងទន្លេ និងស្ពានអាកាសឫស្សីកែវក្នុងរាជធានីភ្នំពេញនៅថ្ងៃជាមួយគ្នាថា ដំណើររបស់លោក សម រង្ស៊ី ចូលប្រទេសម៉ាឡេស៊ីជាថ្មីនេះ គឺលោកនាយករដ្ឋមន្ត្រីម៉ាឡេស៊ីលោក អាន់វ៉ា អ៊ីប្រាហ៊ីម មិនបានដឹងមុនឡើយ។ លោក ហ៊ុន សែន អះអាងថា លោក សម រង្ស៊ី ចូលតាមរយៈក្រុមហ៊ុនវិស័យឯកជន និងប្រើប្រាស់លិខិតឆ្លងដែនបារាំង ដោយលោកសំអាងថា ពីព្រោះលោកនាយករដ្ឋមន្ត្រី អាន់វ៉ា អ៊ីប្រាហ៊ីម ធ្លាប់បានសន្យាជាមួយលោកចំនួន៤ដង ថា នឹងមិនអនុញ្ញាតឱ្យលោក សម រង្ស៊ី ជាន់ទឹកដីម៉ាឡេស៊ីនោះទេ។
លោក ហ៊ុន សែន៖ «គោលនយោបាយមិនជ្រៀតជ្រែកកិច្ចការផ្ទៃក្នុង។ ឯកឧត្តម អ៊ីប្រាហ៊ីម អាន់វ៉ា បាននិយាយជាមួយខ្ញុំច្បាស់ថា មិនឱ្យមកទេ ហើយខ្ញុំក៏បាននិយាយថា បើសិនជាឱ្យ(លោក សម រង្ស៊ី) មកគឺថា រដ្ឋាភិបាលយើងមើលមុខគ្នាអត់ត្រង់។ ហើយគេបាន(ចូលប្រទេសម៉ាឡេស៊ី) ប៉ុណ្ណឹងហើយ អួតនោះអួត មិនត្រឹមតែអួតបានមកជាន់ទឹកដីម៉ាឡេស៊ីទេ អួតបានមកជាន់ទឹកដីថៃទៀត ចាំមើលៗ ចាំមើលវាអួតដល់ណាទៀត»។
ទោះបីជាលោក ហ៊ុន សែន ថ្លែងដូច្នោះក្តី ប៉ុន្តែលោក សម រង្ស៊ី រួមទាំងភរិយា និងមន្ត្រីគណបក្សសង្គ្រោះជាតិផ្សេងទៀត បន្ទាប់ពីបានបញ្ចប់បេសកកម្មជួបជាមួយសកម្មជន និងក្រុមតំណាងរាស្ដ្រម៉ាឡេស៊ីរួច ពួកលោកក៏បានដើរកម្សាន្តនៅក្នុងទីក្រុងកូឡាឡាំពួរ។ លើសពីនេះ លោក សម រង្ស៊ី និងគណៈប្រតិភូបានចាកចេញពីប្រទេសម៉ាឡេស៊ី ដោយមានក្រុមសកម្មជន ជូនដំណើរដល់ព្រលានយន្តហោះ និងគ្មានអាជ្ញាធរ ឬប៉ូលិសម៉ាឡេស៊ី ទៅចាប់បង្ខំឱ្យលោកចាកចេញដូចការអះអាងរបស់ព័ត៌មានគាំទ្រលោក ហ៊ុន សែន ឡើយ។
លោក សម រង្ស៊ី និងគណៈប្រតិភូ បានទៅដល់ប្រទេសម៉ាឡេស៊ី កាលពីថ្ងៃទី២៩ ឧសភា និងបានជួបតំណាងរាស្ត្រ និងមន្ត្រីរដ្ឋាភិបាលម៉ាឡេស៊ីមួយចំនួន ជជែកអំពីបញ្ហាលំហសេរីភាព និងប្រជាធិបតេយ្យនៅកម្ពុជា ដែលរបបលោក ហ៊ុន សែន កំពុងតែបំផ្លាញចោល ថ្វីត្បិតមន្ត្រីទូតខ្មែរប្រចាំនៅប្រទេសម៉ាឡេស៊ី បានព្យាយាមទៅរារាំង និងសុំឲ្យមន្ត្រីការបរទេសម៉ាឡេស៊ី កុំឱ្យលោក សម រង្ស៊ី បន្តនៅម៉ាឡេស៊ីក្ដី។
ស្របពេលម៉ាឡេស៊ីនៅតែទទួលស្វាគមន៍លោក សម រង្ស៊ី ប៉ុន្តែលោក ហ៊ុន សែន នៅតែសង្ឃឹមថា ប្រទេសថៃដែលនឹងមានរដ្ឋាភិបាលថ្មី កើតចេញពីការបោះឆ្នោតតាមបែបលទ្ធិប្រជាធិបតេយ្យ នឹងមិនអនុញ្ញាតឱ្យលោក សម រង្ស៊ី ចូលទឹកដីរបស់ខ្លួន ដូចជាម៉ាឡេស៊ីឡើយ។ លោក ហ៊ុន សែន ព្រមានជាមុនថា លោកនឹងឱ្យគេប្រើកាំភ្លើងធំ ឬគ្រាប់បេ ប៊ី.អឹម២១ ដើម្បីបាញ់កម្ទេច ប្រសិនបើលោក សម រង្ស៊ី ដឹកនាំក្រុមអ្នកគាំទ្រឆ្លងដែនប្រទេសថៃ ដើម្បីវិលចូលកម្ពុជាវិញ។
អ្នកវិភាគនយោបាយលោក គឹម សុខ យល់ឃើញថា មេដឹកនាំម៉ាឡេស៊ីលោកលោក អាន់វ៉ា អ៊ីប្រាហ៊ីម មិនអាចមិនដឹងជាមុនថា លោក សម រង្ស៊ី ធ្វើដំណើរចូលប្រទេសម៉ាឡេស៊ីនោះទេ។ លោកបន្តថា ជម្លោះនយោបាយរវាងលោក ហ៊ុន សែន និងលោក សម រង្ស៊ី កំពុងល្បីល្បាញនៅទូទាំងពិភពលោក ដូច្នេះ ដំណើរទស្សនកិច្ចរបស់លោក សម រង្ស៊ី ជាអ្នកនយោបាយកម្រិតខ្ពស់មួយរូប ដែលមានការតស៊ូក្នុងនយោបាយដើម្បីលទ្ធិប្រជាធិបតេយ្យនៅកម្ពុជា គឺធ្វើដំណើរទៅកាន់ប្រទេសណាមួយ រដ្ឋាភិបាលនិងមេដឹកនាំប្រទេសនោះ ប្រាកដជាដឹងមុនមិនខាន។
លោក គឹម សុខ៖ «ពីព្រោះជាដំណើរមួយ ដែលវាមានលក្ខណៈជានយោបាយកម្រិតខ្ពស់។ កម្រិតខ្ពស់ហ្នឹង ទី១ ការតស៊ូនយោបាយរបស់លោក សម រង្ស៊ី ដើម្បីប្រជាធិបតេយ្យ ហើយកម្រិតខ្ពស់មួយទៀត វាមានលក្ខខណ្ឌនៃទំនាក់ទំនងរវាងរដ្ឋាភិបាល ជាមួយនឹងរដ្ឋាភិបាលរបស់លោកនាយករដ្ឋមន្ត្រី ហ៊ុន សែន។ ដូច្នេះ ដំណើររបស់លោក សម រង្ស៊ី ប្រាកដណាស់ មេដឹកនាំរដ្ឋាភិបាលនៃប្រទេសនីមួយៗ ដែលលោក សម រង្ស៊ី ទៅដល់ណុង ប្រាកដជាដឹង មិនមែនមិនដឹងទេ»។
លោក គឹម សុខ បន្តទៀតថា ទោះគណបក្សសង្គ្រោះជាតិត្រូវបានរំលាយ ហើយគណបក្សភ្លើងទៀន កំពុងរងការខ្ទប់មិនឱ្យចូលរួមការបោះឆ្នោត ប៉ុន្តែស្មារតីចង់បានប្រជាធិបតេយ្យរបស់ពលរដ្ឋទាំងក្នុងនិងក្រៅប្រទេស មិនអាចបិទខ្ទប់បានឡើយ។ លោកលើកឡើងទៀតថា លោក សម រង្ស៊ី ដែលជាមេដឹកនាំចលនាប្រជាធិបតេយ្យដ៏មានឥទ្ធិពលម្នាក់ នៅពេលកាន់តែហ៊ានធ្វើសកម្មភាពកៀកសមរភូមិនយោបាយនៅកម្ពុជា នឹងអាចលើកទឹកចិត្តឱ្យពលរដ្ឋ ហ៊ានប្រើសិទ្ធិរបស់ខ្លួនដើម្បីទាមទារឱ្យប្រទេសមានលទ្ធិប្រជាធិបតេយ្យពិតប្រាកដ ដូច្នេះហើយតែងធ្វើឱ្យមេដឹកនាំផ្ដាច់ការដូចលោក ហ៊ុន សែន ព្រួយបារម្ភ។
អ្នកវិភាគនយោបាយរូបនេះមើលឃើញទៀតថា លោក សម រង្ស៊ី អាចចូលទៅដល់ទឹកដីប្រទេសថៃឬអត់ គឺអាស្រ័យលើនយោបាយការទូតរបស់លោក សម រង្ស៊ី ផ្ទាល់ ធ្វើយ៉ាងណាឱ្យមានលក្ខណៈស្របរដ្ឋធម្មនុញ្ញរបស់អង្គការសហប្រជាជាតិ និងតាមស្មារតីរបស់សហគមន៍អន្តរជាតិ ដើម្បីទាមទារឱ្យមានការផ្សះផ្សាជាតិ រកដំណោះស្រាយសម្រាប់បញ្ហានយោបាយនៅកម្ពុជា និងលើកទឹកចិត្តឱ្យពលរដ្ឋហ៊ានប្រើសិទ្ធិទាមទារយុត្តិធម៌ និងលទ្ធិប្រជាធិបតេយ្យ ដូច្នេះលោក សម រង្ស៊ី នឹងមានឱកាសធំអាចជាន់ទឹកដីប្រទេសថៃបាន។ លោក គឹម សុខ បញ្ជាក់ថា ពីព្រោះប្រទេសថៃនិងប្រទេសម៉ាឡេស៊ី សុទ្ធតែជាសមាជិកអង្គការសហប្រជាជាតិ និងមានគោលការណ៍ដឹកនាំប្រទេសតាមគន្លងប្រជាធិបតេយ្យដូចគ្នា ហើយប្រទេសទាំងនោះ នឹងមិនខ្វល់ខ្វាយជុំវិញប្រតិកម្មរបស់លោក ហ៊ុន សែន ឡើយ៕
កំណត់ចំណាំចំពោះអ្នកបញ្ចេញមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិ ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មន្ត្រីធនាគារបង្ខំឲ្យកូនបំណុលលក់ទ្រព្យសម្បត្តិសងលុយទៅធនាគារខ្លួន
- កម្ពុជាគួរបង្ហាញតម្លាភាពនៅកំពង់ផែរាមជាជាងប្រកាសប្រាប់អន្តរជាតិថា កម្ពុជាគ្មានវត្តមានមូលដ្ឋានយោធាបរទេស
- តំណាងរាស្ត្រនិងទីប្រឹក្សាបក្សប្រជាជនប្រតិកម្មលើការប្រមូលពន្ធថា គាបសង្កត់ពលរដ្ឋក្នុងគ្រាលំបាក
- អាជ្ញាធរបញ្ជូនកញ្ញា សេង ធារី ទៅឃុំខ្លួននៅពន្ធនាគារព្រៃសវិញ ក្រោយពេលមន្ត្រីអាមេរិកជួបលោក ហ៊ុន ម៉ាណែត ផ្ទួនៗ គ្នា
- អ្នកវិភាគថា គណបក្សភ្លើងទៀនអាចពិបាករកដៃគូនយោបាយ
អត្ថបទពេញនិយម
នយោបាយ
- អាមេរិកផ្ដល់ជំនួយ ១៨លានដុល្លារមកកម្ពុជាវិញ តែមិនបានទទួលស្គាល់ថា ការបោះឆ្នោតត្រឹមត្រូវទេ
- អ្នកវិភាគថា អាមេរិកផ្ដល់ជំនួយឲ្យកម្ពុជាឡើងវិញ ដើម្បីទប់ទល់នឹងឥទ្ធិពលចិន
- សម្ភាសមន្ត្រីជាន់ខ្ពស់បក្សសង្រ្គោះជាតិជុំវិញបាតុកម្មប្រឆាំងលោក ហ៊ុន ម៉ាណែត នៅអាមេរិក
- លោក សម រង្ស៊ី ជួបសមាជិកសភាអាមេរិកដើម្បីជំរុញឱ្យកម្ពុជាមានប្រជាធិបតេយ្យពិតប្រាកដ
- ទោះបីមានវីដេអូជាភស្តុតាង ក៏កម្លាំងសមត្ថកិច្ចនៅតែមិនទាន់អាចវែកមុខជនដៃដល់ ដែលវាយអ្នកជំនាញកសិកម្ម លោក នីណាក់