មន្ត្រីបក្សប្រឆាំង និងពលរដ្ឋថា លោក ហ៊ុន សែន កំពុងភ័យស្លន់ស្លោខ្លាចបាត់អំណាចដោយសារគម្រោង CLV
2024.08.12
លោក ហ៊ុន សែន ប្រធានព្រឹទ្ធសភា
រូប៖ ហ្វេសប៊ុកលោក ហ៊ុន សែន
មន្ត្រីគណបក្សប្រឆាំង និងពលរដ្ឋមើលឃើញថា លោក ហ៊ុន សែន ដែលឪពុករបស់លោកនាយករដ្ឋមន្ត្រី ហ៊ុន ម៉ាណែត កំពុងភ័យស្លន់ស្លោខ្លាចបាត់បង់អំណាចដោយសារកម្លាំងពលរដ្ឋទាំងក្នុង និងក្រៅប្រទេសងើបប្រឆាំង។ ការលើកឡើងនេះ បន្ទាប់ពីលោក ហ៊ុន សែន ព្រមានថា ជាថ្មីថា លោកនឹងបង្ក្រាបលើពលរដ្ឋណា ដែលចេញតវ៉ាប្រឆាំងរដ្ឋាភិបាលដូចប្រទេសបង់ក្លាដេស្ហ (Bangladesh)។
មន្ត្រីបក្សប្រឆាំងលើកឡើងថា ចរន្តមហាជនងើបតវ៉ាប្រឆាំងគម្រោងតំបន់ត្រីកោណពិសេសដូចទឹកបាក់ទំនប់បានវាយផ្ទប់លើរដ្ឋាភិបាលលោក ហ៊ុន ម៉ាណែត កំពុងធ្វើឱ្យលោក ហ៊ុន សែន រសាប់រសល់ក្នុងចិត្ត ដោយខ្លាចកម្លាំងមហាជនងើបតវ៉ាប្រឆាំងមេដឹកនាំផ្ដាច់ការដូចប្រទេសបង់ក្លាដេស្ហ ដែលហានិភ័យដល់អំណាចគ្រួសារត្រកូល ហ៊ុន។
មន្រ្តីជាន់ខ្ពស់គណបក្សសង្គ្រោះជាតិ លោក អ៊ំ សំអាន មើលឃើញថា ស្ថានការណ៍នៅកម្ពុជាបច្ចុប្បន្ន ទោះបីជាលោក ហ៊ុន សែន ព្យាយាមបកស្រាយថា កិច្ចសហប្រតិបត្តិការតំបន់អភិវឌ្ឍន៍ត្រីកោណពិសេស (CLV) នឹងមិនធ្វើឲ្យបាត់បង់ទឹកដីខ្មែរទៅវៀតណាមយ៉ាងក្តី ក៏ប្រជាពលរដ្ឋគ្រប់និន្នាការមិនជឿជាក់លើការបកស្រាយនោះដែរ។ លោកបញ្ជាក់ថា មូលហេតុ ដែលពលរដ្ឋលែងទុកចិត្ត ដោយសារទង្វើរបស់លោក ហ៊ុន សែន ជាមួយប្រទេសវៀតណាមកន្លងមក ដូចជា លោក ហ៊ុន សែន អនុវត្តនយោបាយដឹងគុណវៀតណាម ដែលជាអ្នកលើកបន្តុបគាត់ឱ្យបានដឹកនាំកម្ពុជា តាំងពីទសវត្សរ៍ឆ្នាំ១៩៨០។ លោក ហ៊ុន សែន បានគំរាមព្រះមហាក្សត្រឱ្យឡាយព្រះហស្តលេខាលើសន្ធិសញ្ញាបំពេញបន្ថែម កាលពីឆ្នាំ២០០៥ ដែលលោក អ៊ំ សំអាន យល់ឃើញថា សន្ធិសញ្ញានេះធ្វើឱ្យកម្ពុជាបង់ទឹកដី ជាពិសេស កោះត្រល់ឱ្យទៅវៀតណាមកន្លងមក។
លោក អ៊ំ សំអាន៖ «ព្យាយាមបកស្រាយមេច ក៏ប្រជាពលរដ្ឋមិនគាំទ្រគាត់ដែរ ដល់ដំណាក់កាលនេះ ពលរដ្ឋលែងជឿលើការដឹកនាំរបស់លោក ហ៊ុន សែន និងត្រកូល ហ៊ុន ទៀតហើយ អ៊ីចឹងបានជាគាត់ខ្លាចអស់អំណាចត្រឹមលោក ហ៊ុន ម៉ាណែត ហ្នឹងឯង។ អ៊ីចឹងហើយបានជាគាត់ភ័យខ្លាច ស្លន់ស្លោ គំរាមចាប់គេដាក់ពន្ធនាគារឱ្យតែហ៊ាននិយាយរឿង CLV ហ្នឹង ជាពិសេស អ្នកនយោបាយមិនគួរធ្វើនយោបាយថោកទាបអ៊ីចឹងទេ»។
ជាមួយគ្នានេះដែរ ប្រជាពលរដ្ឋខ្មែរជាច្រើនបាននាំគ្នាចូលបញ្ចេញមតិទាមទារឱ្យរដ្ឋាភិបាលលោក ហ៊ុន ម៉ាណែត បញ្ឈប់ដាក់ខេត្តខ្មែរចំនួន៤ នៅក្នុងកិច្ចសហប្រតិបត្តិការតំបន់អភិវឌ្ឍន៍ត្រីកោណពិសេស (CLV) នៅតាមទំព័រហ្វេសប៊ុកក្រសួងស្ថាប័នរដ្ឋាភិបាលព្រោងព្រាត ដោយក្នុងនោះរួមទាំងហ្វេសប៊ុករបស់លោក ហ៊ុន សែន ផងដែរ។ ពួកគាត់ប្រកាសមិនគាំទ្រគម្រោងតំបន់ត្រីកោណអភិវឌ្ឍន៍ជាមួយវៀតណាម និងឡាវ ដោយខ្លាចបាត់បង់ទឹកដីដូចសម័យអតីតកាល។ អ្នកខ្លះស្នើលោក ហ៊ុន សែន ឱ្យបោះឆ្នោតស្ទង់មតិ រីឯអ្នកខ្លះលើកឡើងថា មនុស្ស ដែលនៅក្បែរលោក ហ៊ុន សែន ចេញសារគាំទ្រគម្រោង CLV ធ្វើឡើង ដោយបង្ខំចិត្ត ដោយមិនបានកើតចេញពីឆន្ទៈពិតនោះទេ។
ទាក់ទងរឿងនេះ ប្រធានព្រឹទ្ធសភាលោក ហ៊ុន សែន និយាយនៅក្នុងប្រព័ន្ធតេឡេក្រមនៅថ្ងៃទី១២ ខែសីហាថា លោកមិនអាចដកខ្លួនចេញពីគម្រោងត្រីកោណអភិវឌ្ឍន៍ជាមួយវៀតណាមតាមសំណើ និងក្តីកង្វល់របស់ពលរដ្ឋបានទេ ពីព្រោះគម្រោង CLV ជាកិច្ចសហប្រតិបត្តិការ ដើម្បីផលប្រយោជន៍ដល់សេដ្ឋកិច្ច និងសង្គម ដោយនឹងមិនធ្វើឱ្យកម្ពុជាបាត់ទឹកដីឱ្យវៀតណាមឡើយ។ ទន្ទឹមនឹងនេះលោក ហ៊ុន សែន ខឹងច្រលោត និងព្រមានបង្ក្រាបលើពលរដ្ឋទាំងឡាយណា ដែលហ៊ានចេញតវ៉ាប្រឆាំងនឹងគម្រោងតំបន់ត្រីកោណ ដែលលោកចោទថា ក្រុមប្រឆាំងនៅពីក្រោយ។
លោក ហ៊ុន សែន៖ «ប៉ុន្តែសារបញ្ជូនពីខាងក្រៅញុះញង់ឱ្យបងប្អូនទទួលការវិនាសពិបាកនឹងស្រោចស្រង់ នេះមិនមែនជាការគំរាមទេ ប៉ុន្តែ គឺការនិយាយបញ្ជាក់ច្បាស់អំពីផលប្រយោជន៍ជាតិ និងប្រជាជនមិនអាចទុកឱ្យមនុស្សប៉ុន្មាននាក់បំផ្លាញសេចក្តីសុខរបស់បងប្អូនប្រជាជន ១៧លាននាក់បានឡើយ មានអ្នកខ្លះឃើញហេតុការណ៍នៅបង់ក្លាដេស្ហ ប្រៀបធៀបហេតុការណ៍ប្រទេសកម្ពុជា សូមសាកល្បងមើល ប្រសិនបើអ្នកអាចចាត់ទុកថា ខ្លួនឯងជាអ្នកខ្លាំងសូមអញ្ជើញសាកល្បង»។
ប្រតិកម្មរបស់លោក ហ៊ុន សែន នេះធ្វើឡើងបន្ទាប់ពីពលរដ្ឋមួយចំនួន នៅថ្ងៃទី១២ ខែសីហា បានបង្កើតក្រុមប្រព័ន្ធតេឡេក្រាមមួយឈ្មោះរួបរួម ដើម្បីជាតិ។ ក្រុមនោះបានប្រកាសគ្រោងប្រមូលគ្នាធ្វើបាតុកម្ម នៅថ្ងៃទី១៨ ខែសីហា ក្នុងរាជធានីភ្នំពេញ ដើម្បីទាមទារឱ្យរដ្ឋាភិបាលដកខ្លួនចេញពីកិច្ចសហប្រតិបត្តិការតំបន់អភិវឌ្ឍន៍ត្រីកោណពិសេស (CLV)។
លោក អ៊ំ សំអាន មើលឃើញថា លោក ហ៊ុន សែន សុខចិត្តបង្ក្រាប និងចាប់ពលរដ្ឋខ្មែរ ដែលឈឺឆ្អាលរឿងទឹកដីដាក់គុក តែមេបក្សប្រជាជនកម្ពុជារូបនេះ មិនដកខ្លួនចេញពីគម្រោង CLV តាមសំណើរបស់ពលរដ្ឋឡើយ ដោយលោកគិតថា លោក ហ៊ុន សែន ទំនងមានកិច្ចសន្យាដោះដូរផលប្រយោជន៍អំណាចជាមួយមេដឹកនាំវៀតណាម។ ប៉ុន្តែ លោកថា ស្ថានការណ៍សង្គមដុនដាបមកដល់បច្ចុប្បន្ន ពលរដ្ឋខ្មែរមិនខ្លាចការគំរាម ឬបំបាក់ទឹកចិត្តក្នុងងើបតស៊ូស្វែងរកយុត្តិធម៌ដោយសន្តិវិធីឡើយ។
អ្នកឃ្លាំមើលផ្នែកសិទ្ធិមនុស្ស និងសង្គម លោក ស៊ឹង សែនករុណា ថ្លែងថា ពលរដ្ឋខ្មែរទាំងក្នុង និងក្រៅប្រទេសមានសិទ្ធិសេរីភាពពេញលេញ ក្នុងការចេញតវ៉ារឿងទឹកដីជាការសិទ្ធិសេរីភាព ដែលធានាដោយរដ្ឋធម្មនុញ្ញ និងច្បាប់អន្តរជាតិ។ លោកសង្កេតឃើញថា ពលរដ្ឋលែងជឿ ចំពោះការអះអាងរបស់លោក ហ៊ុន សែន ទៀតហើយ ដោយសារបញ្ហាប្រវត្តិសាស្ត្រ ដែលកម្ពុជាបាត់បង់ទឹកដីឱ្យទៅវៀតណាមនៅជាប់ដិតដាមមកដល់សព្វថ្ងៃ។ ដូច្នេះ វិធីគំរាមកំហែងលើពលរដ្ឋមិនមែនជាដំណោះស្រាយដោយសន្តិវិធីនោះទេ ផ្ទុយទៅវិញ សកម្មភាពបំបិទសិទ្ធិសេរីភាពទាំងនោះ គឺជាអំពើរំលោភសិទ្ធិមនុស្ស និងបញ្ឆេះកំហឹងធ្វើឱ្យពលរដ្ឋកាន់តែខឹងសម្បារងើបប្រឆាំងរដ្ឋាភិបាលក្រុងភ្នំពេញកាន់តែច្រើន។
លោក ស៊ឹង សែនករុណា៖ «រូបភាពគំរាមកំហែងដាក់កងទ័ព និងការប្រើប្រាស់អាជ្ញាធរមានសមត្ថកិច្ចទៅបិទបាំងសំឡេងបញ្ចេញមតិ វាជាការរំលោភបំពានសិទ្ធិសេរីភាពរបស់ពលរដ្ឋ ផ្ទុយពីរដ្ឋធម្មនុញ្ញរបស់ប្រទេសយើងផង ផ្ទុយពីកតិកាសញ្ញាស្ដីពីសិទ្ធិមនុស្សអន្តរជាតិទាំងឡាយផង។ អ៊ីចឹង អាហ្នឹងជារឿងបង្ហាញកាន់តែច្បាស់ពីអំពើផ្ដាច់ការ អំពើរឹតត្បិតសិទ្ធិសេរីភាព ដែលមិនសក្ដិសមកើតមាននៅក្នុងប្រទេសយើងតែងតែអះអាងថា ជាសង្គមគោរពសិទ្ធិមនុស្ស ប្រជាធិបតេយ្យ ឬសន្តិភាពទាំងហ្នឹង»។
ប្រជាពលរដ្ឋខ្មែរនៅប្រទេសកូរ៉េខាងត្បូង ជប៉ុន អូស្ត្រាលី អាមេរិក កាណាដាជាដើម បាននាំគ្នាធ្វើបាតុកម្មជាបន្តបន្ទាប់ ដើម្បីទាមទារឱ្យរដ្ឋាភិបាលលោក ហ៊ុន ម៉ាណែត ងាកមកស្តាប់មតិរបស់ប្រជាពលរដ្ឋ ដោយបញ្ឈប់ដាក់ខេត្តខ្មែរចំនួន៤ នៅក្នុងកិច្ចសហប្រតិបត្តិការតំបន់អភិវឌ្ឍន៍ត្រីកោណពិសេស (CLV)។ ពួកគាត់ព្រមានថា ពលរដ្ឋខ្មែរទាំងក្នុង និងក្រៅប្រទេសនឹងប្រមូលផ្តុំគ្នាធ្វើបាតុកម្មនៅគ្រាប់ទីកន្លែងរហូតដល់រដ្ឋាភិបាលដកខ្លួនចេញពីគម្រោងនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សង្គមស៊ីវិលបារម្ភថា កសាងស្តូបមិត្តភាព-កម្ពុជាវៀតណាមជាង ២០ខេត្ត/ក្រុង ជានិមិត្តរូបបំបែកបំបាក់សាមគ្គីខ្មែរ
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- លោក ហ៊ុន សែន ស្នើតែងតាំងលោក គុយ សុផល ភ្លាមៗ «ខ្លាចព្រះមហាក្សត្រយកមនុស្សក្រៅពីបក្ខពួកខ្លួន»
- ពលរដ្ឋខ្មែរនៅកូរ៉េខាងត្បូងប្រមាណ៣ពាន់ ធ្វើមហាបាតុកម្មប្រឆាំង CLV ម្តងទៀត
- លោក ហ៊ុន ម៉ាណែត អះអាងថា យុវជន ៩នាក់ ដែលកំពុងជាប់ឃុំ ពាក់ព័ន្ធនឹង «គម្រោងផ្ដួលរំលំរដ្ឋាភិបាល»
អត្ថបទពេញនិយម
នយោបាយ
- បទសម្ភាសន៍៖ អតីតមនុស្សជំនិតសម្ដេចក្រុមព្រះថា លោក ហ៊ុន សែន ជ្រៀតជ្រែកព្រះមហាក្សត្រលើការតែងតាំងរដ្ឋមន្ត្រីក្រសួងព្រះបរមរាជវាំងថ្មី
- ពលរដ្ឋខ្មែរនៅកូរ៉េត្រៀមចេញធ្វើបាតុកម្មទ្រង់ទ្រាយធំប្រឆាំងគម្រោង CLV ជាលើកទី២
- សាលាដំបូងរាជធានីភ្នំពេញ ផ្ដន្ទាទោសមន្ត្រីគណបក្សកម្លាំងជាតិ លោក គា វិសាល ឲ្យជាប់ពន្ធនាគារ ២ឆ្នាំកន្លះ
- គណបក្សកម្លាំងជាតិ ថាការបន្តចាប់ខ្លួនមន្ត្រីជាន់ខ្ពស់របស់គណបក្សនេះ ធ្វើឲ្យប៉ះពាល់ដំណើរការប្រជាធិបតេយ្យ
- រដ្ឋមន្ត្រីក្រសួងព្រះបរមរាជវាំង លោក គង់ សំអុល ស្លាប់ក្នុងវ័យ៩៤ឆ្នាំ