ពលរដ្ឋទាមទារឱ្យតុលាការដោះលែងលោក ថាច់ សេដ្ឋា
2023.10.21
អនុប្រធានគណបក្សភ្លើងទៀន លោក ថាច់ សេដ្ឋា (រូបកណ្ដា) និងភរិយា (ខាងស្ដាំ) ពេលត្រូវបានបញ្ជូនមកសវនាការនៅតុលាការ។
រូប៖ ហ្វេសប៊ុកកូនលោក ថាច់ សេដ្ឋា
ក្រុមពលរដ្ឋរិះគន់តុលាការក្រុងភ្នំពេញថា កំពុងធ្វើឱ្យប្រជាធិបតេយ្យនៅកម្ពុជាដើរថយក្រោយដោយសារតែតុលាការមិនឈរលើគោលការណ៍អព្យាក្រឹត និងយកស្ថាប័នរដ្ឋបម្រើឱ្យអ្នកមានលុយមានអំណាច។ ប្រតិកម្មនេះធ្វើឡើងបន្ទាប់ពីសាលាដំបូងរាជធានីភ្នំពេញបានសម្រេចផ្ដន្ទាទោស លោក ថាច់ សេដ្ឋា ឱ្យជាប់ពន្ធនាគាររយៈពេល៣ឆ្នាំ ដោយគ្រាន់តែលោកនិយាយការពិតពីប្រវត្តិរបស់បក្សកាន់អំណាច។
ក្រុមពលរដ្ឋស្នើឱ្យតុលាការដោះលែងលោក ថាច់ សេដ្ឋា ឱ្យមានសេរីភាពឡើងវិញ ដោយឥតលក្ខខណ្ឌ។ ពួកគាត់អះអាងថា ការនិយាយពីប្រវត្តិសាស្ត្រមិនមែនជារឿងខុសច្បាប់នោះឡើយ។
ពលរដ្ឋខ្មែរនៅជប៉ុន លោកស្រី ម៉ូរី បូរ៉ា ប្រាប់វិទ្យុអាស៊ីសេរីនៅថ្ងៃទី២០ តុលា ថា លោកស្រី ហួសចិត្ត និងមិនអាចទទួលបានចំពោះការសម្រេចរបស់សាលាដំបូងរាជធានីភ្នំពេញឱ្យលោក ថាច់ សេដ្ឋា ជាប់ពន្ធនាគាររយៈពេល៣ឆ្នាំទាំងអយុត្តិធម៌បែបនេះ។ លោកស្រីបន្តថា តុលាការគួរតែដោះលែងលោក ថាច់ សេដ្ឋា ឱ្យមានសេរីភាពប្រសិនបើមិនចង់ឱ្យពលរដ្ឋរិះគន់។ លោកស្រី ម៉ូរី បូរ៉ា បញ្ជាក់ថា នៅថ្ងៃទី២២ ខែតុលា ខាងក្រុមពលរដ្ឋរស់នៅប្រទេសជប៉ុនគ្រោងធ្វើកម្មវិធីរំលឹកខួបលើកទី៣២ នៃកិច្ចព្រមព្រៀងសន្តិភាពទីក្រុងប៉ារីស ហើយនិងលើកឡើងពីធ្វើទុក្ខបុកម្នេញលើសកម្មជននយោបាយជាពិសេស លោក ថាច់ សេដ្ឋា ផងដែរ។
លោកស្រី ម៉ូរី បូរ៉ា៖ «ក្នុងនាមខ្ញុំជាពលរដ្ឋម្នាក់តំណាងឱ្យពលរដ្ឋដែលស្រឡាញ់ជាតិនិយមតាមលទ្ធិប្រជាធិបតេយ្យគឺនាងខ្ញុំមិនចង់ឱ្យសង្គមយើងមានរូបភាពបែបហ្នឹងទេ ចំពោះការកាត់ក្ដីលើពូ ថាច់ សេដ្ឋា ក៏ដូចជាសកម្មជនផ្សេងៗទៀតវាជារឿងអាប់មុខអាប់មាត់សម្រាប់ប្រទេសជាតិយើង»។
ដោយឡែកសកម្មជនគណបក្សភ្លើងទៀន និងជាអតីតសហការី លោក ថាច់ សេដ្ឋា គឺលោក ផន ផាន់ណា ថ្លែងថា ការណ៍ដែលរដ្ឋាភិបាលក្រោមការដឹកនាំរបស់លោក ហ៊ុន ម៉ាណែត សម្រេចផ្ដន្ទាទោសលោក សេដ្ឋា បែបនេះគឺជាអំពើអយុត្តិធម៌ និងជាការគំរាមកំហែងដល់សកម្មជននយោបាយផ្សេងទៀតដែលមាននិន្នាការផ្ទុយពីរដ្ឋាភិបាល។ លោកបន្តថា បើចង់ឱ្យតុលាការឯករាជ្យទាល់តែ ផ្លាស់ប្ដូររដ្ឋាភិបាលដែលដឹកនាំដោយ លោក ហ៊ុន ម៉ាណែត ចេញជាមុនសិន។
លោក ផន ផាន់ណា៖ «និយាយពីការលះបង់វិញគឺជាគាត់ជាមនុស្សលះបង់ខ្លាំងមែនទែន គាត់ប្រាប់ខ្ញុំច្រើនពីការអូសទាញរបស់គណបក្សកាន់អំណាចហ្នឹង ប្រសិនបើគាត់ចុះចូលជាមួយគេហ្នឹងគេប្រគល់នេះប្រគល់នោះឱ្យតួនាទីនេះតួនាទីនោះឱ្យច្រើនគាត់នៅតែមិនព្រមបម្រើរដ្ឋាភិបាលអ៊ីចឹង»។
ប្រតិកម្មរបស់ពលរដ្ឋនេះគឺបន្ទាប់ពីសាលាដំបូងរាជធានីភ្នំពេញ កាលនៅថ្ងៃទី១៨ តុលា បានប្រកាសសាលក្រមឱ្យលោក ថាច់ សេដ្ឋា ជាប់ពន្ធនាគាររយៈពេល៣ឆ្នាំបន្ថែមទៀត និងពិន័យជាប្រាក់៤លានរៀល លើសំណុំរឿង ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់ឱ្យមានការរើសអើងពូជសាសន៍ទាំងដែល លោកកំពុងមានជំងឺប្រចាំកាយត្រូវការ ការថែទាំពីក្រុមគ្រួសារ។ ទង្វើរំលោភបំពាននេះធ្វើឱ្យពលរដ្ឋជាតិ និងអន្តរជាតិហួសចិត្ត និងមិនអាចទទួលយកបាន ដោយគ្រាន់តែលោក ថាច់ សេដ្ឋា ប្រើប្រាស់សិទ្ធិសេរីភាពបញ្ចេញមតិរបស់ខ្លួនតែប៉ុណ្ណោះ។ កាលពីថ្ងៃទី២១ ខែកញ្ញា កន្លងមកនេះ សាលាដំបូងរាជធានីភ្នំពេញ បានប្រកាសសាលក្រមផ្ដន្ទាទោសលោក ថាច់ សេដ្ឋា ឱ្យជាប់ពន្ធនាគាររយៈពេល ១៨ ខែ ក្នុងសំណុំរឿងទី១ ទាក់ទងនឹងការចេញសែកស្អុយ ឬសែកអត់ប្រាក់។
ប្រធានសមាគមការពារសិទ្ធិមនុស្សអាដហុក (ADHOC) លោក នី សុខា មានប្រសាសន៍ថា មិនមែនជារឿងចំឡែកទេដែលពលរដ្ឋចាត់ទុកការសម្រេចរបស់តុលាការគឺជារឿងនយោបាយ ពីព្រោះកន្លងមកតុលាការមិនដែលឈរលើគោលការណ៍ឯករាជ្យស្រាប់ទៅហើយ។ លោកបន្តការបញ្ហានយោបាយនេះនឹងធ្វើឱ្យសេដ្ឋកិច្ចនៅកម្ពុជាកាន់តែធ្លាក់ចុះ។
លោក នី សុខា ៖ «បើយើងដណ្ដើមអំណាចគ្នាគួរតែឈរលើការបោះឆ្នោតមួយដែលប្រកបទៅដោយសេរីត្រឹមត្រូវយុត្តិធម៌ឱ្យប្រជាពលរដ្ឋជាអ្នកសម្រេចចិត្តទៅអ្នកណាជាប់អ្នកណាធ្លាក់ស្ថិតនៅលើប្រជាពលរដ្ឋជាអ្នកសម្រេចចិត្តទៅ ហើយយើងងាកទៅដឹកដៃគ្នាទាំងគណបក្សប្រឆាំងក៏ដោយទាំងគណបក្សមិនប្រឆាំងក៏ដោយគឺយើងងាកទៅដឹកដៃគ្នាកសាងប្រទេសជាតិយើងទៅឱ្យមានការគោរពគោលការណ៍សិទ្ធិមនុស្សដូចអ្វីដែលជាសិទ្ធិដែលមានក្នុងរដ្ឋធម្មនុញ្ញទៅខ្ញុំគិតថាយើងអាចកសាងប្រទេសជាតិយើងរឹងមាំហើយ»។
វិទ្យុអាស៊ីសេរីមិនអាចទាក់ទងអ្នកនាំពាក្យអយ្យការអមសាលាដំបូងរាជធានីភ្នំពេញ លោក ប្លង់ សុផល ដើម្បីសុំការបកស្រាយជុំវិញបញ្ហានេះបានទេនៅថ្ងៃទី២០ ខែតុលា ។ ប៉ុន្តែអ្នកនាំពាក្យគណបក្សប្រជាជនកម្ពុជា លោក សុខ ឥសាន ថ្លែងថា ការសម្រេចរបស់តុលាការគឺជាការអនុវត្តច្បាប់។
លោក សុខ ឥសាន៖ «ទៅនិយាយណាច្រៀងណាច្រៀងទៅ ទៅនិយាយបរិហារកេរ្តិ៍គេយើងទៅលាបពណ៌គេ យើងទៅមូលបង្កាច់គេជាគេមនុស្សដែល ខ្លួនឯងចេះតែនិយាយបាតណាបាតណីអត់គិតសិទ្ធិគេម៉េចកើតអាហ្នឹងវាអ៊ីចឹង ថាច់ សេដ្ឋា ជាមួយ សុន ឆ័យ វាគូកនតែមួយវាអត់ខុសគ្នាទេហើយវាចេញមកអីចេញមកពីនយោបាយបក្សប្រឆាំងនៅកម្ពុជាវាអ៊ីចឹង»។
លោក ថាច់ សេដ្ឋា អ្នកនយោបាយគណបក្សប្រឆាំងជាន់ខ្ពស់ មានដើមកំណើតខ្មែរក្រោម ត្រូវបានសមត្ថកិច្ចក្រុងភ្នំពេញចាប់ដាក់ពន្ធនាគារ កាលពីថ្ងៃទី១៦ ខែមករា ឆ្នាំ២០២៣។ លោក ថាច់ សេដ្ឋា អាយុ៧០ឆ្នាំ កំពុងមានជំងឺប្រចាំកាយមួយចំនួនដូចជា ជំងឺបេះដូង ជំងឺលើសឈាម និងជំងឺទឹកនោមផ្អែមជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ
អត្ថបទពេញនិយម
នយោបាយ
- គណបក្សកម្លាំងជាតិបោះឆ្នោតជ្រើសតាំងលោក ជា មុនី ធ្វើជាប្រធានបក្ស
- លោក រ៉ុង ឈុន ថា លោកមិនខ្លាចក្នុងការចូលបំភ្លឺតុលាការទេ ពាក់ព័ន្ធបទចោទ «មិនរាងចាល»
- អ្នកឃ្លាំមើលថា លោក ហ៊ុន សែន និងលោក ហ៊ុន ម៉ាណែត អសមត្ថភាពក្នុងការដោះស្រាយបញ្ហា ទើបប្រកាសធ្វើច្បាប់ចោទអ្នករិះគន់ថា ជាក្រុមភេរវកម្ម
- ហេតុអ្វីបានជាលោក ហ៊ុន សែន មិនហ៊ានក្អកជាមួយវៀតណាមក្នុងរឿង CLV?
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ