ពលរដ្ឋខ្មែររស់នៅសហរដ្ឋអាមេរិករិះគន់មន្ត្រីស្ថានទូតថា ខ្ជិលច្រអូស
2024.10.17
ទិដ្ឋភាពស្ថានទូតខ្មែរប្រចាំសហរដ្ឋអាមេរិក កាលពីថ្ងៃទី១២ តុលា ២០២៤។
RFA
ពលរដ្ឋខ្មែររស់នៅសហរដ្ឋអាមេរិករិះគន់មន្ត្រីស្ថានទូតខ្មែរប្រចាំរដ្ឋធានី វ៉ាស៊ីនតោនថា ខ្វះការយកចិត្តទុក ធ្វើអនាម័យ និងសម្អាតរៀបចំបរិវេណស្ថានទូត និងនិវេសនដ្ឋាន ឬកន្លែងស្នាក់នៅអគ្គរាជទូតស្នាក់នៅឱ្យមានសោភ័ណភាព។ ពួកគាត់ស្នើឱ្យមន្ត្រីស្ថានទូតកាត់ស្មៅ និងបោសសំរាមនៅជុំវិញស្ថានទូត ដែលជាកន្លែងតំណាងឱ្យជាតិមួយនេះបានត្រឹមត្រូវឡើងវិញ។
ស្លឹកឈើស្វិតក្រៀមជ្រុះធ្លាក់រាយប៉ាយពេញផ្លូវ ដើមឈើខ្លះវល្លិព័ទ្ធ ចំណែកស្មៅចុះពេញដេសដាស តាំងពីក្រោយដល់មុខ និងនៅតាមរបងនៅបរិវេណអគារលេខ៤៥៣០ នៅផ្លូវលេខ១៦ នៅក្នុងរដ្ឋធានីវ៉ាស៊ីនតោន។
ពលរដ្ឋខ្មែររស់នៅទីក្រុងឡុងប៊ិច (Long Beach) រដ្ឋកាលីហ្វនីញ៉ា (California) លោកស្រី ស៊ិន ម៉ាសែល ដែលមកធ្វើបាតុកម្មនៅមុខស្ថានទូត កាលពីថ្ងៃទី១៤ ខែតុលា ប្រាប់ថា លោកស្រីភ្ញាក់ផ្អើលពេញនៅបរិវេណស្ថានទូត មានស្មោះដុះវែងៗបែបនេះ។ លោកស្រីបន្តថា រូបភាពបែបនេះជាការបង្ហាញថា មន្ត្រីទូតមិនមែនមកធ្វើការទេ តែទំនងមកដេកស៊ី។
លោកស្រី ស៊ិន ម៉ាសែល៖ «ឥឡូវនេះ សូមផ្ដាំទៅស្ថានទូតដែលធ្វើការហ្នឹងកុំឱ្យតែដេកតែស៊ីស៊ីតែដេកណា សូមឱ្យមើលរៀបចំបោសសំអាតឱ្យមានសណ្ដាប់ធ្នាប់ឱ្យគេដឹងថា នេះតំណាងឱ្យខ្មែរ។ ដល់ឆ្អេះអ៊ីចឹងទៅប្រទេសផ្សេងៗគេមកមើលគេថា ខ្មែរអ៊ីចឹងតាមពិតខ្មែរអត់មានអ្នកឆ្អេះទេ ព្រោះខ្មែរកាន់ព្រះពុទ្ធសាសនា ព្រះពុទ្ធសាសនាព្រះអង្គបង្រៀនកូនចៅឱ្យចេះសម្អាត»។
ស្រដៀងគ្នានេះដែរ ពលរដ្ឋខ្មែររស់នៅសហរដ្ឋអាមេរិកម្នាក់ទៀត លោកស្រី សំ វឌ្ឍនា យល់ថា ការបំពេញការងារ និងរស់នៅរបស់មន្ត្រីទូតប្រចាំសហរដ្ឋអាមេរិកខ្វះការរៀបចំ និងខ្វះអនាម័យ។ លោកស្រីយល់ថា ស្ថានទូតស្ថានទូតបែបនេះ បង្ហាញថា មន្ត្រីស្ថានទូតខ្វិលច្រអូស ចំណែកការបំពេញ ការងារបម្រើពលរដ្ឋ ឬការបង្កើតទំនាក់ទំនងជាមួយបរទេសក៏ទំនងមានភាពស្ពឹកស្រពន់ដែរ។
លោកស្រី សំ វឌ្ឈនា៖ «គិតឃើញថា ការរៀបចំ និងអ្នកធ្វើការនៅស្ថានទូតហ្នឹងខ្វះការរៀបចំរបៀបរៀបរយ ហើយបង្ហាញអត្តចរិតខ្មែរដូចថា យើងក្នុងស្ថានទូតមួយហ្នឹងគេដែរ រួចការរៀបចំជុំវិញហ្នឹងវាមានភាពគគ្រិច»។
បើទោះជាស្ថានទូតកម្ពុជា ប្រចាំសហរដ្ឋអាមេរិក មានអគារធំល្អ ដែលមានតម្លៃរាប់លានដុល្លារ ដើម្បីឱ្យមន្ត្រីបំពេញការងារ និងបម្រើសេវាជូនពលរដ្ឋក្ដី ប៉ុន្តែនៅជុំវិញអគារនេះហាក់ដូចកន្លែងគ្មានមនុស្សធ្វើការ ឬជាទីតាំងដែលគេទុកចោល។ ទីតាំងនេះ ក្រៅពីមានអគារស្ថានទូត ក៏មានអគារនិវេសនដ្ឋាន ជាកន្លែងស្នាក់នៅផ្លូវការរបស់ឯកអគ្គរាជទូត និងកន្លែងតម្កល់រូបសំណាក ព្រះបាទ ជ័យវរ្ម័ន ទី៧ ក៏មិនបានកាត់ស្មៅ ឬរៀបចំឱ្យបានសមរម្យនោះដែរ។
ទាក់ទងបញ្ហានេះវិទ្យុអាស៊ីសេរីបានសុំការបំភ្លឺពីមន្ត្រីស្ថានទូតកម្ពុជា ប្រចាំសហរដ្ឋអាមេរិក ប៉ុន្តែមន្ត្រីដែលលើកទូរស័ព្ទសុំមិនអត្ថាធិប្បាយទេ ដោយជំរុញវិទ្យុអាស៊ីសេរីផ្ញើសំណួរតាមអ៊ីមែលវិញ។ ទោះយ៉ាងណា បើទោះជាវិទ្យុអាស៊ីសេរី បានផ្ញើសំនួរតាមអ៊ីមែលក្ដី តែខាងស្ថានទូតមិនទាន់ឆ្លើយបំភ្លឺរឿងនៅឡើយទេ គិតត្រឹមម៉ោងផ្សាយនេះ។ ចំណែកអ្នកនាំពាក្យក្រសួងការបរទេស លោក ជុំ សន្ទរី ក៏មិនអាចសុំការអត្ថាធិប្បាយបានដែរ នៅថ្ងៃទី១៦ ខែតុលា។
ប្រធានចលនាខ្មែរដើម្បីប្រជាធិបតេយ្យ អ្នកស្រី មូរ សុខហួរ ចង់ឃើញរដ្ឋសភាសួរដេញដោលទៅក្រសួងការបរទេស ពីការចំណាយថវិកាលើខ្មែរមន្ត្រីស្ថានទូត និងការចំណាយថវិកាលើថ្លៃរៀបចំអនាម័យនៅស្ថានទូតឱ្យពលរដ្ឋបានដឹង។ អ្នកស្រីបន្តថា ប្រទេសកម្ពុជា មានវប្បធម៌ និងអរិយធម៌ល្អ ប៉ុន្តែនៅពេលអ្នកស្រី ឃើញសំរាមពេញទីធ្លាស្ថានទូតបែបនេះមិនដឹង កម្ពុជាត្រូវបង្ហាញមោទនភាពជាតិឱ្យបរទេសដឹងតាមរបៀបណានោះទេ។
អ្នកស្រី មូរ សុខហួរ៖ «ប្រទេសអាមេរិកជាប្រទេសដែលមានអំណាច ហើយវ៉ាស៊ីនតោនទៀតជាទីក្រុងរដ្ឋបាលនៃប្រទេសមួយដែលមានអំណាចហើយស្ថានទូតខ្មែរបង្ហាញនូវភាពថ្លៃថ្នូរជាតំណាងនៃភាពថ្លៃថ្នូរគេចាប់ផ្ដើមដំបូងគេមើលដំបូងគេមើលទង់ជាតិ បងប្អូនអញ្ជើញទៅមើលទង់ជាតិយើងនៅផ្ទះលោកទូតឡើងកញ្ចាស់ ហើយទង់ជាតិនៅនេះ(មុខស្ថានទូត)ក៏ឡើងកញ្ចាស់មោទនភាពអត់មាន អ៊ីចឹងយើងមើលទាំងស្មៅទាំងអីវាមិនគួរសោះ»។
ក្រុមពលរដ្ឋលើកឡើងថា ប្រសិនបើស្ថានទូតខ្វះថវិកា ទិញម៉ាស៊ីនកាត់ស្មៅ ឬគ្មានថវិកាជួលគេកាត់ស្មៅ ពួកគាត់នឹងរ៉ៃប្រាក់គ្នាផ្ដល់ឱ្យស្ថានទូតដើម្បីធ្វើអនាម័យ និងរៀបចំសោភណភាពជុំវិញស្ថានទូតឱ្យបានល្អឡើងវិញ។ ស្ថានទូតខ្មែរប្រចាំនៅរដ្ឋធានីវ៉ាស៊ីនតោន មានទីតាំងនៅបណ្ដោយផ្លូវលេខ១៦ ជាតំបន់នៃតាំងស្ថានទូតបណ្ដាប្រទេសផ្សេងទៀត ប៉ុន្តែ ស្ថានទូតប្រទេសដទៃបានរៀបចំកាត់ស្មៅឬបោសសំរាមនៅបរិវេណស្ថានទូតរបស់គេបានសមរម្យ សូម្បីពលរដ្ឋធម្មតានៅតំបន់នេះ ឬកន្លែងផ្សេងទៀត នៅសហរដ្ឋអាមេរិកក៏រៀបចំមានសណ្ដាប់ធ្នាប់ល្អជាងស្ថានទូតកម្ពុជាដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
- លោក ហ៊ុន សែន តែងតាំងលោក ហៃ វណ្ណា និងសកម្មជន ១៨នាក់ទៀតជាទីប្រឹក្សា និងជំនួយការ
អត្ថបទពេញនិយម
នយោបាយ
- លោក ហ៊ុន សែន ទៅមជ្ឈិមបូព៌ា «ទំនងចង់ទៅដើរទាក់ទាញវិនិយោគទុន ខណៈរដ្ឋាភិបាលកូន កំពុងជួបបញ្ហាសេដ្ឋកិច្ច»
- ពលរដ្ឋខ្មែរនៅជប៉ុនធ្វើបាតុកម្មជំរុញឱ្យលោក ហ៊ុន ម៉ាណែត ស្ដារលទ្ធិប្រជាធិបតេយ្យឡើងវិញ
- បទសម្ភាសន៍អ្នកស្រី ធិត គឹមហ៊ុន អំពីការធ្វើសមាជរបស់ពលរដ្ឋខ្មែរ-អាម៉េរិកាំងរឿងកោះគជ់
- ពលរដ្ឋខ្មែរនៅអាមេរិកធ្វើសមាជទាមទារឲ្យរដ្ឋាភិបាលកម្ពុជា ប្ដឹងករណីកោះគជ់ទៅតុលាការអន្តរជាតិ
- អ្នកវិភាគថា របបផ្ដាច់ការត្រកូលហ៊ុន នឹងដួលរលំដូចរបបផ្ដាច់ការនៅស៊ីរីដែរ