មេធាវីបន្តទាមទារតុលាការឱ្យផ្ដល់សេរីភាពលោក កឹម សុខា ឡើងវិញ ព្រោះតុលាការគ្មានភស្តុតាងចោទប្រកាន់គ្រប់គ្រាន់
2022.08.17
មេធាវីលោក កឹម សុខា បន្តទាមទារឲ្យតុលាការផ្តល់សេរីភាពដល់លោក កឹម សុខា ឡើងវិញ។ មេធាវីការពារក្ដីប្រធានគណបក្សសង្គ្រោះជាតិ លោក កឹម សុខា អ្នកស្រី ម៉េង សុភារី លើកឡើងថា ការខ្វះខាតឯកសាររបស់តំណាងអយ្យការក្នុងការចោទប្រកាន់ លើ លោក កឹម សុខា ជាការបញ្ជាក់ថា តុលាការគ្មានភស្តុតាងគ្រប់គ្រាន់ ដាក់បន្ទុកលោក កឹម សុខា នោះទេ។
លោក កឹម សុខា បានបាត់បង់សិទ្ធិសេរីភាពជិត ៥ឆ្នាំហើយ ក្រោយរដ្ឋាភិបាល លោក ហ៊ុន សែន បានចោទប្រកាន់ថា មេបក្សប្រឆាំងរូបនេះថា ឃុបឃិតជាមួយរដ្ឋបរទេស ដើម្បីផ្តួលរំលំរដ្ឋាភិបាល។ ទោះយ៉ាងណាក្ដី តុលាការមិនដែលបានបង្ហាញថា រដ្ឋបរទេសមួយណា ដែលមានទំនាក់ទំនងសម្ងាត់ជាមួយលោក កឹម សុខា ដើម្បីផ្ដួលរំលំរដ្ឋាភិបាលនោះទេ។ តុលាការត្រឹមចោទសួរលោក កឹម សុខា ជុំវិញការធ្វើបាតុកម្ម កាលពីឆ្នាំ២០១៣ និងឆ្នាំ២០១៤។
មេធាវីការពារក្ដី លោក កឹម សុខា លើកឡើងថា ករណីគ្មានភស្តុតាងរបស់តុលាការនេះ បានផ្ដល់ប្រយោជន៍ដល់លោក កឹម សុខា ព្រោះផ្អែកតាមរដ្ឋធម្មនុញ្ញ តុលាការមិនអាចធ្វើផ្ដន្ទាទោស ដាក់ទោស ឬដាក់ទោសលើជនណាម្នាក់ ឬលោក កឹម សុខា បានឡើយ។ អ្នកស្រីបន្តថា ផ្អែកលើការលើចំណុចនេះ តុលាការគួរតែទម្លាក់ចោលបទចោទប្រកាន់ ឬដោះលែងលោក កឹម សុខា ឲ្យមានសេរីភាពឡើងវិញ៖ «តំណាងអយ្យការគាត់បាននិយាយហើយថា គាត់នឹងដាក់ភស្តុតាងរហូត រហូតដល់ចប់ការដេញដោល ប្រសិនបើមាន មានន័យថា ម៉េច មានន័យ អ្វីដែលមានពីមុនៗ មក គឺអត់គ្រប់គ្រាន់ទេ កន្លែងហ្នឹងបង្ហាញថា ភស្តុតាងអត់គ្រប់គ្រាន់ ហើយភស្តុតាងអត់គ្រប់គ្រាន់ទេ តាមច្បាប់រដ្ឋធម្មនុញ្ញរបស់យើង មាត្រា៣៨ ចែងថា ម៉េច? ថា វិមតិសង្ស័យ ជាប្រយោជន៍ជនជាប់ចោទ។ អ៊ីចឹង វិមតិសង្ស័យមានន័យថាម៉េច? មានន័យថា រាល់ការចោទទាំងឡាយណា បើនៅសល់ចំណុចសង្ស័យ គឺអត់អាចធ្វើការដាក់ទោស ផ្ដន្ទាទោស ឬចោទប្រកាន់អីបានទេ»។
អ្នកស្រីមេធាវី ម៉េង សុភារី លើកឡើងដូច្នេះ ក្រោយចប់សវនាការទី៥២ នៃការជំនុំជម្រះក្ដី លោក កឹម សុខា ថ្ងៃទី១៧ ខែសីហា។
សវនាការលោក កឹម សុខា លើកនេះ ក៏មិនខុសពីពេលមុនៗ ដែរ គឺមានភាពតានតឹងរវាង មេធាវី ការពារក្ដី លោក កឹម សុខា និងតំណាងអយ្យការ រហូតដល់ពេលខ្លះ លោក កឹម សុខា ប្រើសិទ្ធិមិនឆ្លើយតបនូវសំណួររបស់តំណាងអយ្យការ ។
អ្នកឃ្លាំមើលថា តំណាងអយ្យការ សួរសំណួរលោក កឹម សុខា ដូចចង់ច្របាច់ក ដើម្បីចង់បានចម្លើយ។ តុលាការនឹងបន្តសវនាការសំណុំរឿង លោក កឹម សុខា នៅថ្ងៃទី២៤ ខែសីហាសប្ដាហ៍ក្រោយទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។