អ្នកនាំពាក្យនៃស្នងការដា្ឋននគរបាលរាជធានីភ្នំពេញចេញសេចក្ដីប្រកាសព័ត៌មាន កាលពីល្ងាចថ្ងៃទី០៥ ខែមេសា នេះបានឱ្យដឹងថា ករណីឃាត់ខ្លួនមន្ត្រីបក្សភ្លើងទៀតពីររូបរួមមាន អតីតប្រធាន គណៈកម្មការប្រតិបត្តិគណបក្សភ្លើងទៀនខណ្ឌជ្រោយចង្វារ និងតំណាងគណបក្សឆន្ទៈខ្មែរ លោក ដាង ប៊ុនហាក់ និង ចៅសង្កាត់រងទី២ នៃសង្កាត់ស្ទឹងមានជ័យទី២ លោក គឹម ថាយមុន្នី ពាក់ព័ន្ធនឹងការក្លែងបន្លំឯកសារសាធារណៈ។
សេចក្ដីប្រកាសព័ត៌មានដដែលថា សមត្ថកិច្ចបានឃាត់ខ្លួន លោក ដាង ប៊ុនហាក់ និង លោក គឹម ថាយមុន្នី នៅថ្ងៃទី៥ ខែមេសា ក្រោយពីព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ លោក សេង ហៀង បានចេញដីកាបញ្ជាឱ្យចូលខ្លួន កាលពីថ្ងៃទី០៣ ខែមេសា។
ស្នងការដ្ឋាននគរបាលរាជធានីភ្នំពេញឱ្យដឹងថាសមត្ថកិច្ច កាលពីថ្ងៃទី១៥ ខែមីនា បានទទួលពាក្យបណ្ដឹងពីលោកស្រី ម៉ែន ស្រីទូច នាំ និង លោក ទូច សំអុល ដែលជាអ្នកប្ដឹងទៅលើមន្ត្រីបក្សភ្លើងទៀនទាំងពីររូបពីបទក្លែងបន្លំឯកសារសាធារណៈ។ ពួកគេបានចោទ លោក ដាង ប៊ុនហាក់ និង លោក គឹម ថាយមុន្នី ថាបានចុះឈ្មោះចូលបញ្ជីរាយ នាមបេក្ខជនឈរឈ្មោះបម្រុងជ្រើសរើសក្រុមប្រឹក្សាខណ្ឌមានជ័យ របស់គណបក្សឆន្ទៈខ្មែរ ដោយគ្មានការអនុញ្ញាតពីសាមីខ្លួន ប្រព្រឹត្តនៅរាជធានីភ្នំពេញ កាលពីថ្ងៃទី២៣ ខែកុម្ភៈ កន្លងមកនេះ។
ទោះជាយ៉ាងណាមន្ត្រីសង្គមស៊ីវិលលើកឡើងថា ក្នុងករណីដែលអាជ្ញាធរបានចាប់ខ្លួនមន្ត្រីបក្សភ្លើងទៀនកន្លងមកនេះច្រើនធ្វើឡើងក្រោមរូបភាពនយោបាយជាជាងការអនុវត្តច្បាប់។
អាជ្ញាធរក្រុងភ្នំពេញបានចាប់ខ្លួនសកម្មជន និងមន្ត្រីបក្សប្រឆាំងនៅអំឡុងការបោះឆ្នោតព្រឹទ្ធសភា។ ការចាប់ខ្លួនជាបន្តបន្ទាប់នេះបានធ្វើឱ្យសកម្មជន និងមន្ត្រីបក្សប្រឆាំងបានកើនឡើងដល់២៧នាក់ ក្នុងចំណោមអ្នកទោសមនសិការ៤២នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ