អ្នកនាំពាក្យកងរាជអាវុធហត្ថលើផ្ទៃប្រទេស លោក ខេង ទីតូ មានប្រសាសន៍នៅថ្ងៃទី២២ ខែកញ្ញា ថា លោកឧត្តមសេនីយ៍ទោ រ័ត្ន ស្រ៊ាង មេបញ្ជាការកងរាជអាវុធហត្ថខេត្តបន្ទាយមានជ័យ និងជាមេបញ្ជាការរងកងរាជអាវុធហត្ថលើផ្ទៃប្រទេស ត្រូវប្ដូរឲ្យមកមកជំនួសតំណែងរបស់លោកឧត្តមសេនីយ៍ត្រី យ៉ា គីមអ៊ី។ ការផ្លាស់ប្ដូរតំណែងនោះ នឹងធ្វើជាផ្លូវការនៅរសៀលថ្ងៃទី២៣ ខែកញ្ញា នៅកងរាជអាវុធហត្ថរាជធានីភ្នំពេញ។
លោក ខេង ទីតូ បញ្ជាក់ថា ការផ្លាស់ប្ដូរតួនាទីមេបញ្ជាការកងរាជអាវុធហត្ថរាជធានីភ្នំពេញ នៅពេលនេះ គឺមានមូលហេតុ ២យ៉ាង។ ទី១ ជាការកែទម្រង់បែបបទរដ្ឋបាល និងទី២ ដោយសារតែឧត្តមនីយ៍ទោ រ័ត្ន ស្រ៊ាង មានសមត្ថភាពខ្ពស់ក្នុងការគ្រប់គ្រងមន្ត្រីកងរាជអាវុធហត្ថ៖ «រ័ត្ន ស្រ៊ាង គាត់ធ្លាប់មានបទពិសោធន៍ គាត់ធ្លាប់គ្រប់គ្រងការងារកងកម្លាំងនៅខេត្តបន្ទាយមានជ័យ អ៊ីចឹងគាត់មានបទពិសោធន៍ក្នុងការគ្រប់គ្រងកងកម្លាំងគាត់ហ្នឹង គាត់មានសមត្ថភាពគ្រប់គ្រាន់ក្នុងការគ្រប់គ្រងកងកម្លាំងនៅក្នុងរាជធានីភ្នំពេញ»។
ការផ្លាស់ប្ដូរតំណែងលោក យ៉ា គីមអ៊ី មេបញ្ជាការកងរាជអាវុធហត្ថរាជធានីភ្នំពេញ ឲ្យទៅលោក រ័ត្ន ស្រ៊ាង ធ្វើឡើងបន្ទាប់ពីមានអំពើហិង្សាប៉ះទង្គិចរវាងអ្នកតវ៉ាបោះឆ្នោត និងព្រះសង្ឃវាយកម្ទេចដុតរថយន្តប៉េអឹម ២គ្រឿង នៅសង្កាត់ស្ទឹងមានជ័យ កាលពីពេលបោះឆ្នោត ថ្ងៃទី២៨ កក្កដា កន្លងមក។
ការផ្លាស់ប្ដូរតួនាទីមេបញ្ជាការកងរាជអាវុធហត្ថរាជធានីភ្នំពេញនេះ ក៏ធ្វើឡើងស្របពេលដែលមានមន្ត្រីកងរាជអាវុធហត្ថជាច្រើនពាន់នាក់ត្រូវបានដាក់ពង្រាយឲ្យត្រួតពិនិត្យសន្តិសុខនៅតាមច្រកចេញចូលមកក្រុងភ្នំពេញ ដើម្បីការពារកុំឲ្យមានការជួបជុំណាមួយរបស់ពលរដ្ឋពីតាមបណ្ដាខេត្ត ដើម្បីតវ៉ាប្រឆាំងទាមទារឲ្យព្រះមហាក្សត្រពន្យារពេលប្រជុំសភាលើកដំបូង ដែលត្រូវធ្វើឡើងនៅថ្ងៃទី២៣ ខែកញ្ញា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។