លោក ហ៊ុន សែន អះអាង​ថា លោក​គោរព និង​ការពារ​ព្រះមហាក្សត្រ​ឱ្យ​ខាង​តែ​បាន

ដោយ មាន ឬទ្ធិ
2022.10.25
Share on WhatsApp
Share on WhatsApp
លោក ហ៊ុន សែន អះអាង​ថា លោក​គោរព និង​ការពារ​ព្រះមហាក្សត្រ​ឱ្យ​ខាង​តែ​បាន លោក​នាយករដ្ឋមន្ត្រី ហ៊ុន សែន (ស្ដា) និង​លោក សម រង្ស៊ី ប្រធានស្ដីទីគណបក្ស​សង្គ្រោះជាតិ។
RFA

លោកនាយក​រដ្ឋមន្ត្រី ហ៊ុន សែន អះអាង​ថា រូប​លោក​បាន​គោរព និង​ការពារ​ព្រះមហាក្សត្រ​ឱ្យ​ខាង​តែ​បាន ហើយ​លោក​អំពាវនាវ​ឱ្យ​ប្រជាពលរដ្ឋ និង​ព្រះសង្ឃ​ងើប​ប្រឆាំង​នឹង​លោក សម រង្ស៊ី ដោយ​លោក​ចោទ​ថា មេដឹកនាំ​បក្ស​ប្រឆាំង​រូប​នេះ​ជេរប្រមាថ​ព្រះមហាក្សត្រ ដែល​លោក​ត្រូវ​កម្ចាត់​ចោល​។ ប្រតិកម្ម​នេះ បន្ទាប់ពី​លោក សម រង្ស៊ី ថ្លែង​ថា លោក ហ៊ុន សែន និង​ព្រះមហាក្សត្រ​ក្បត់ជាតិ​ដោយសារ​កាត់​ទឹកដី​ឱ្យ​បរទេស។ មន្ត្រី​ជាន់ខ្ពស់​គណបក្ស​ប្រឆាំង​យល់ថា ​សារ​របស់​លោក ហ៊ុន សែន ជា​ល្បិចកល​នយោបាយ​យក​ព្រះមហាក្សត្រ​ធ្វើជា​ខែល​ទប់ស្កាត់​លោក សម រង្ស៊ី ដើម្បី​សម្រេច​មហិច្ឆតា​ផ្ទេរអំណាច​ត​វង្ស​ត្រកូល​នៅពេល​ខាងមុខ។

ថ្លែង​សារ​នយោបាយ​ក្នុង​ពិធី​ចែក​ស្រូវពូជ និង​ស្បៀង​ជូន​ពលរដ្ឋ​រងគ្រោះ​ទឹកជំនន់​ជាង​៥​ពាន់​គ្រួសារ​នៅ​ខេត្តពោធិ៍សាត់ លោក ហ៊ុន សែន នៅ​ថ្ងៃទី​២៥ ខែតុលា​បាន​អះអាង​ថា កន្លងមក​លោក​តែងតែ​គោរព និង​ការពារ​ចំពោះ​ព្រះមហាក្សត្រ​។ លោក ហ៊ុន សែន ដែល​ទើប​ចាញ់ក្ដី​លោក សម រង្ស៊ី នៅ​តុលាការ​បារាំង​កាល​ពី​ពេល​ថ្មីៗ ​នេះ​ក្នុង​សំណុំរឿង​បរិហារកេរ្តិ៍ ក៏បាន​អំពាវនាវ​ឱ្យ​ប្រជាពលរដ្ឋ រួម​ទាំង​ព្រះសង្ឃ​ងើបឈរ​ប្រឆាំង​នឹង​ប្រធាន​ស្តី​គណបក្ស​សង្គ្រោះ​ជាតិ​លោក សម រង្ស៊ី ដោយ​លោក​ចោទ​ថា មេដឹកនាំ​បក្ស​ប្រឆាំង​រូប​នេះ​ជេរប្រមាថ​ព្រះមហាក្សត្រ ដែល​លោក​ត្រូវតែ​កម្ចាត់​ចោល ដើម្បី​ការពារ​សន្តិភាព និង​របប​រាជា​និយម​នៅ​កម្ពុជា​។ លោក ហ៊ុន សែន ក៏បាន​ព្រមាន​ដល់​អ្នក​ដែល​ផ្សារភ្ជាប់​ជាមួយ​លោក សម រង្ស៊ី ត្រូវ​ផ្តាច់​ខ្លួន​ឱ្យ​បាន​ឆាប់ ពីព្រោះ​បក្សនយោបាយ​មួយ​នោះ​នឹង​ប្រឈម​ការអនុវត្ត​ច្បាប់​បើ​សិន​រកថា​មាន​ទំនាក់ទំនង​ជាមួយ​លោក សម រង្ស៊ី។

លោក ហ៊ុន សែន៖ «បក្ស​ណាក៏ដោយ​ផ្សា​ភ្ជាប់​ខ្លួន​ជាមួយ​ជន​ក្បត់ជាតិ​នេះ ចាំ​បាត់​ត្រូវតែ​ពិនិត្យមើល​ដោយ​តុលាការ ហើយ​យើង​ក៏​មិន​ទុក​ឱ្យ​ជន​ក្បត់ជាតិ​នេះ​បន្ត​ការ​រំខាន បើ​ជេរ​ត្រឹម​នាយករដ្ឋមន្ត្រី​វា​មិន​អី​ទេ ប៉ុន្តែ​កន្លងទៅ​វា​ជេរ​មហាក្សត្រ ឥឡូវ​វា​ជេរ​មហាក្សត្រ​ទៀត ហើយ​រហូត​វា​ជេរ​មហាក្សត្រ​គ្មាន​មនសិការ​ជាតិ​សូម្បីតែ​បន្តិច តែ​ចំពោះ​យើង​គោរព​មហាក្សត្រ ព្រោះ​ប្រទេស​របស់​យើង​រាជា​និយម»

ភ្លាមៗ ​ក្រោយ​ការ​អំពាវនាវ​របស់​លោក ហ៊ុន សែន មាន​លិខិត​ថ្កោលទោស​លោក សម រង្ស៊ី ជាច្រើន​បាន​ផ្សព្វផ្សាយ​ព្រោងព្រាត​តាម​ហ្វេសប៊ុក និង​ប្រព័ន្ធ​ផ្សព្វផ្សាយ​។ លិខិត​ទាំងនោះ​ចេញ​មកពី​តុលាការ ក្រសួង ស្ថាប័ន ដែល​ស្ថិត​ក្រោម​ការ​គ្រប់គ្រង​របស់​រដ្ឋាភិបាល​ឯក​បក្ស​ចាប់ពី​ថ្នាក់​ជាតិ​រហូតដល់​ថ្នាក់ក្រោម​ជាតិ។

ប្រតិកម្ម​របស់​លោក ហ៊ុន សែន នេះ ធ្វើឡើង​បន្ទាប់ពី​មេដឹកនាំ​បក្ស​ប្រឆាំង​លោក សម រង្ស៊ី និយាយ​ជា​វីដេអូ​មួយ​នៅក្នុង​ពិធី​សំណេះសំណាល​ជាមួយ​អ្នកគាំទ្រ​នៅ​ប្រទេស​បារាំង​នា​កាល​ពី​ពេល​ថ្មីៗ ​នេះ ដោយ​ចោទ​ថា លោក ហ៊ុន សែន និង​ព្រះមហាក្សត្រ​បាន​ក្បត់ជាតិ​ដោយសារ​កាត់​ទឹកដី​ឱ្យ​បរទេស​។

លោក សម រង្ស៊ី៖ «បន្ទាប់ពី​លោក ហ៊ុន សែន គឺ​ស្តេច​សព្វថ្ងៃ​ក្បត់ជាតិ ព្រោះ​យើង​បំពេញបន្ថែម​ឱ្យ​គេ ក្បត់ជាតិ​ពេញទី​ហើយ អាហ្នឹង​ដូច​កាត់​ទឹកដី​ខ្មែរ​ឱ្យទៅ​បរទេស»

ឆ្លើយតប​រឿង​នេះ មន្ត្រីជាន់ខ្ពស់ និង​អតីត​តំណាង​គណបក្ស​សង្គ្រោះ​ជាតិ​មណ្ឌល​សៀមរាប លោក អ៊ុំ សំអាន យល់​ថា សារ​អំពាវនាវ​ឱ្យ​ប្រជាពលរដ្ឋ​ខ្មែរ​ប្រឆាំង​នឹង​លោក សម រង្ស៊ី គឺជា​ល្បិចកល​នយោបាយ​របស់​លោក ហ៊ុន សែន ទាញ​ព្រះមហាក្សត្រ​ធ្វើជា​ខែល​ការពារ​អំណាច​ផ្តាច់ការ​ត​វង្ស​ត្រកូល​របស់​ខ្លួន​។ លោក​អះអាង​ថា អ្នក​ដែល​មិន​ផ្តល់​តម្លៃ ឬ​ជេរប្រមាថ​ព្រះមហាក្សត្រ និង​គំរាម​ប្តូរ​របប​ដឹកនាំ​ប្រទេស​តាម​អំពើ​ចិត្ត​កន្លងទៅ​គឺ​លោក ហ៊ុន សែន តែម្តង​។ ទោះ​យ៉ាងណា​លោក​ថា ចំណាត់ការ​របស់​លោក ហ៊ុន សែន លើ​លោក សម រង្ស៊ី ជា​បន្តបន្ទាប់​មក​នេះ​បង្ហាញ​ថា លោក ហ៊ុន សែន កំពុង​ភ័យខ្លាច​នឹង​ប្រជាប្រិយភាព​លោក សម រង្ស៊ី។

លោក អ៊ុំ សំអាន៖ «ឱ្យ​ប្រជាពលរដ្ឋ​ប្រឆាំង​លោក សម រង្ស៊ី ទៅ​ការពារ​ស្តេច​ហ្នឹង ដើម្បី​ការពារ​អំណាច​របស់​គាត់​ត​វង្ស​ត្រកូល​តែប៉ុណ្ណោះ​មិនមែន​ការពារ​ព្រះមហាក្សត្រ ព្រោះ​ព្រះមហាក្សត្រ​មិន​ចង់បាន​អំណាច​អី​គាត់ ដោយ​លោក​គ្រងរាជ្យ​មិន​កាន់​អំណាច​ផង​ហ្នឹង លោក​មិន​តបត​ជាមួយ​លោក សម រង្ស៊ី និង​អ្នក​ផ្សេង​ទេ»

ផ្ទុយ​ពី​អះអាង​របស់​លោក ហ៊ុន សែន ដែល​ថា​លោក​បាន​គោរព និង​ការពារ​ចំពោះ​ព្រះមហាក្សត្រ​នោះ គេ​មើល​ឃើញ​ថា​លោក ហ៊ុន សែន មិនបាន​គោរព​ព្រះមហាក្សត្រ​ដូច​ការ​លើកឡើង​នេះ​ទេ ជាក់ស្តែង​កាលពី​ឆ្នាំ​២០០៥ លោក ហ៊ុន សែន បាន​គំរាម​រំលាយ​របប​រាជានិយម ហើយ​ដាក់​ជំនួស​មកវិញ​នូវ​របប​សាធារណរដ្ឋ ប្រសិនបើ​ព្រះមហាក្សត្រ សម្ដេចព្រះ​នរោត្តម សីហមុនី មិន​ព្រម​ឡាយព្រះហស្តលេខា​លើ​សន្ធិសញ្ញា​បំពេញបន្ថែម​ស្ដីពី​ព្រំដែន​កម្ពុជា​-​វៀតណាម។

ជំរុញ​រឿង​នេះ អ្នកស្រាវជ្រាវ​ការអភិវឌ្ឍ​សង្គម លោក​បណ្ឌិត សេង សារី មាន​ប្រសាសន៍ថា អង្គ​ព្រះមហាក្សត្រ​មិន​អាច​នរណា​ប៉ះពាល់​បាន​ឡើយ​។ លោក​បន្ត​ថា ការ​ទាញ​ព្រះមហាក្សត្រ​ជាប់​ពាក់ព័ន្ធ​ការប្រកួតប្រជែង​របស់​អ្នកនយោបាយ​ជា​រឿង​មិន​ត្រឹមត្រូវ​នោះ​ទេ ដោយ​ត្រូវ​រក្សា​ស្ថាប័ន​នេះ​ដើរ​តួនាទី​ឯករាជ្យ​សម្រាប់​ដោះស្រាយ​វិបត្តិ​នយោបាយ​វិញ​។ លោក​យល់ថា​សារ​អំពាវនាវ​របស់លោក ហ៊ុន សែន នោះ គឺជា​ការ​កេង​ចំណេញ​ផ្នែក​នយោបាយ។

លោក​បណ្ឌិត សេង សារី កត់​សម្គាល់​ថា​លោក ហ៊ុន សែន រំពឹង​ថា ការ​រម្លាយ​គណបក្ស​សង្គ្រោះ​ជាតិ​ចាប់តាំងពី​២០១៧ នឹង​ធ្វើ​ឱ្យ​ចលនា​ប្រជាធិបតេយ្យ​បែកបាក់​ធ្ងន់ធ្ងរ ផ្ទុយ​ទៅវិញ​កម្លាំង​គាំទ្រ​លោក សម រង្ស៊ី នៅតែ​គំរាមកំហែង​ដល់​ការ​កាន់អំណាច​គណបក្ស​ប្រជាជន​កម្ពុជា​ដដែល ជាពិសេស​ការប្រកួតប្រជែង​តាមរយៈ​ការ​ឆ្នោត​នៅ​ឆ្នាំ​២០២៣ និង​ការ​ផ្ទេរ​អំណាច​នា​ពេល​ខាងមុខ​។ លោក​យល់ថា​យុទ្ធសាស្ត្រ​ទុក​ឱ្យ លោក សម រង្ស៊ី ឱ្យ​នៅ​ឯកោ​ហើយ​ត្រូវ​បញ្ចប់​អាច​មាន​ប្រសិទ្ធភាព​តិចតួច ពីព្រោះ​អ្នកគាំទ្រ​លោក សម រង្ស៊ី សុំា​នឹង​គំរាមកំហែង ការភ័យខ្លាច ចំណែក​អ្នក​ដែល​ចាកចេញ​វិញ​ជីវិត​នយោបាយ​របស់​ពួកគេ​ត្រូវ​បញ្ចប់​ជា​បន្តបន្ទាប់។

លោក សេង សារី៖ «ខ្ញុំ​មើល​ថា ​ទោះបី​វាង​តាមផ្លូវ​ណាក៏ដោយ ចុងក្រោយ​នៅតែ​ដដែល ដោះស្រាយ​នៅ​លើ​តុ​ជាមួយគ្នា​ដដែល។ ដូច្នេះ ហើយ​ជា​សំណូមពរ​ ភាគី​ទាំងសងខាង​អាច​ដកឃ្លា​ម្នាក់​មួយ​ជំហាន បន្ថយ​សារ​នយោបាយ​ ដែល​បង្កើត​ឱ្យ​មាន​កំហឹង​បុគ្គល ហើយ​រក​អ្នក​ដែល​មាន​អំណាច ឬ​រក​អ្នកណា​ដែល​អាច​ភ្ជាប់​ជា​ស្ពាន​ធ្វើ​មិច​ ដើម្បី​ឱ្យ​អ្នកនយោបាយ​ទាំងពីរ ដែល​មាន​ទ្រព្យ​នយោបាយ​ច្រើន​ជាងគេ​ពីរ​រូប​នៅ​កម្ពុជា​អាចងាក​​មកជជែក​គ្នា​បាន ហើយ​ផ្ដល់​នូវ​អធ្យាស្រ័យ​គ្នា​ខ្ពស់»

តុលាការ​នៃ​របប​លោក ហ៊ុន សែន បាន​កាត់ក្ដី​ផ្ដន្ទាទោស​លោក សម រង្ស៊ី ឱ្យ​ជាប់ពន្ធនាគារ​អស់​មួយ​ជីវិត និង​ដកសិទ្ធិ​នយោបាយ​ជា​ស្ថាពរ ពី​បទ «​ប្រគល់​ឱ្យ​រដ្ឋ​បរទេស​» ពាក់ព័ន្ធ​នឹង​ការ​ចោទ​ប្រកាន់​ថា លោក សម រង្ស៊ី បាន​ចុះហត្ថលេខា​លើ​កិច្ចព្រមព្រៀង​កាត់​ទឹកដី​កម្ពុជា​ចំនួន ៤​ខេត្ត ឱ្យ​ជនជាតិ​ដើម​ភាគតិច​ម៉ុងតាញ៉ា ដើម្បី​រស់​នៅ។

ស្ទើរ​គ្រប់​វេទិកា លោក ហ៊ុន សែន តែងតែ​លើកឡើង​ពី​ផែនការ​នយោបាយ​តាម​កម្ចាត់​លោក សម រង្ស៊ី ចេញពី​ឆា​កនយោបាយ ហើយ​លោក​ថា បើ​មាន​កម្លាំង​ណាមួយ​ដែល​ចេញ​មក​គាំទ្រ​លោក សម រង្ស៊ី លោក​មិន​ខ្លាច​ក្នុង​ការ​បង្ហូរឈាម​នោះ​ទេ​។ លោក​អនុវត្តន៍​ផែនការ​នេះ ដូច​ផែនការ​កម្ទេច​ក្រុម​ខ្មែរ​ក្រហម​ដែរ​។ កាល​ថ្មីៗ​នេះ លោក ហ៊ុន សែន ប្រកាស​ថា លោក​នឹង​ប្រើ​យុទ្ធសាស្ត្រ ឌីហ្វីដ ដែល​មាន​ប្រាំ​តួអក្សរ​អង់គ្លេស DIFID (Divide Isolate Finish Integrate Develop ) ប៉ុន្តែ លោក​អនុវត្តន៍​លើ​លោក សម រង្ស៊ី តែ​ពីរ​អក្សរ​ទេ គឺ​អាយ​អែហ្ស (IF)​។ ពីរ​តួ​ទេ​IF នេះ ពាក្យ​សាមញ្ញ​មានន័យថា ទុក​ឱ្យ​ឯកោ​ហើយ​ត្រូវ​បញ្ចប់។

គណបក្ស​ភ្លើងទៀន ដែល​មាន​មេដឹកនាំ​កើត​ចេញ​អតីតមន្ត្រី​គណបក្ស​សង្គ្រោះ​ជាតិ ដែល​មេដឹកនាំ​គណបក្ស​នេះ ភាគច្រើន​មាន​និន្នាការ​គោរព​ស្រលាញ់ លោក សម រង្ស៊ី ត្រូវ​បាន​គេ​មើល​ឃើញ​ថា ជា​គណបក្ស​គួរ​ប្រកួតប្រជែង​ដ៏​ស្រួចស្រាល់ ជាមួយ​បក្ស​កាន់អំណាច ដែល​នឹង​អាច​មាន​លទ្ធភាព​ដណ្ដើម​កៅអី​សភា ពី​គណបក្ស​កាន់អំណាច​យ៉ាងហោចណាស់​ ២០​អាសនៈ ក្រោយ​ពី​គណបក្ស​ដណ្ដើម​បាន​អាសនៈ​ក្រុម​ប្រឹក្សាឃុំ​សង្កាត់​ជាង​ ២.០០០ (ពីរ​ពាន់​) កាលពី​ពេល​​បោះឆ្នោត​ថ្នាក់ក្រោម​ថ្ងៃទី​៥ ខែ​មិថុនា​កន្លង​​ទៅ។

វិទ្យុ​អាស៊ីសេរី​មិន​អាច​ទាក់ទង​អ្នកនាំពាក្យ​ក្រសួង​មហាផ្ទៃ​លោក ខៀវ សុភ័គ ដើម្បី​បញ្ជាក់​ជុំវិញ​សារ​ព្រមាន​របស់​លោក ហ៊ុន សែន ថា នឹង​រំលាយ​គណបក្ស​ណា​ ដែល​មាន​ទំនាក់ទំនង​ជាមួយ​លោក សម រង្ស៊ី នោះបាន​ទេ ​នៅ​ថ្ងៃទី​២៥ ខែតុលា។

កាលពី​ឆ្នាំ​២០១៧ រដ្ឋាភិបាល​ធ្វើ​លោក ហ៊ុន សែន បាន​កែ​ធ្វើ​ច្បាប់​ស្ដីពី​គណបក្ស ហាម​គ្រប់​គណបក្ស​នយោបាយ​មិន​ត្រូវ​ប្រើប្រាស់​សារ​ជា​សំឡេង រូបភាព ឯកសារ​ជា​លាយលក្ខណ៍អក្សរ ឬ​សកម្មភាព​របស់​ទណ្ឌិត​ជាប់ទោស​ពី​បទ​ឧក្រិដ្ឋ ឬ​ពី​បទ​មជ្ឈិម ដើម្បី​ជា​ផលប្រយោជន៍​នយោបាយ​សម្រាប់​គណបក្ស​របស់​ខ្លួន​។ ចំពោះ​ទោសទណ្ឌ​ដល់​គណបក្ស​នយោបាយ ​ដែល​បាន​ប្រព្រឹត្ត​ផ្ទុយ​ពី​ច្បាប់​នេះ​វិញ គឺ​តុលាការ​អាច​សម្រេច​ផ្អាក​សកម្មភាព​គណបក្ស​នយោបាយ​នោះ​រហូតដល់ ៥​ឆ្នាំ ឬ​អាច​រំលាយ​គណបក្ស​នោះ​ចោល​តែម្ដង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
នយោបាយ
គណបក្ស​ភ្លើង​ទៀន​ចាប់​ផ្ដើម​យុទ្ធនាការ​ពង្រឹង​​សមាជិក​បក្ស​តាម​មូលដ្ឋាន ដើម្បី​ទទួល​បាន​​ការ​​គាំទ្រ​​ពី​​ប្រជាពលរដ្ឋ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។