មន្ត្រីបក្សភ្លើងទៀននៅក្រុងប៉ោយប៉ែត ដែលកំពុងជាប់ឃុំក្នុងពន្ធនាគារដោយសាររឿងនយោបាយ លោក ចៅ វាសនា បាត់បង់ឪពុកបង្កើត ហើយលោក មិនអាចចូលរួម ពិធីបុណ្យសពឪពុកបង្កើតនៅក្រុងប៉ោយប៉ែត។ ក្រុមគ្រួសារ និងមន្ត្រីសិទ្ធិមនុស្ស ចាត់ទុកការឃុំខ្លួន លោក ចៅ វាសនា ទាំងគ្មានកំហុសឱ្យរងទុក្ខវេទនាបែកបាក់គ្រួសារគឺការដាក់ទណ្ឌកម្មផ្លូវចិត្តមួយដ៏ឈឺចាប់ ហើយស្នើដល់រដ្ឋាភិបាលបញ្ឈប់ការធ្វើទុក្ខបុកម្នេញតទៅទៀត។
គ្រួសារសកម្មជននយោបាយមួយទៀតដែលកំពុងជាប់ឃុំ សោកសង្រេងក្រោយពេលលោកតា សៅ ភូ អាយុ៨៣ឆ្នាំ ដែលជាឪពុកបង្កើតនរបស់មន្ត្រីបក្សភ្លើងទៀនប្រចាំក្រុងប៉ោយប៉ែតគឺលោក ចៅ វាសនា នោះបានស្លាប់ដោយសារជំងឺប្រចាំកាយនៅព្រឹកថ្ងៃទី០១ ខែធ្នូ ដោយមិនបានជួបមុខកូនប្រុសជាលើកចុងក្រោយ។
ចៅសង្កាត់រងទី២ នៃសង្កាត់ប៉ោយប៉ែត ដែលត្រូវជាកូនបង្កើតលោក ចៅ វាសនា គឺ អ្នកស្រី ចៅ រតនៈ ប្រាប់វិទ្យុអាស៊ីសេរីថា អ្នកស្រីឈឺចាប់ដែលឪពុកមិនបានទាន់ដង្ហើមចុងក្រោយរបស់អ្នកមានគុណ ខណៈគាត់ជាអ្នកតស៊ូលះបង់ដើម្បីយុត្តិធម៌សង្គម និងប្រជាធិបតេយ្យត្រូវជាប់ពន្ធនាគារដោយអយុត្តិធម៌។ អ្នកស្រីរៀបរាប់ទាំងទឹកភ្នែកថា អ្វីដែលគ្រួសារខ្លោចចិត្តបំផុតនោះគឺលោកតារបស់លោកស្រីដង្ហោយរកលោក ចៅ វាសនា ឱ្យត្រឡប់ទៅផ្ទះវិញជាច្រើនសប្តាហ៍មុនពេលគាត់ស្លាប់។
អ្នកស្រី ចៅ រតនៈ៖ «តើក្តុកក្តួលប៉ុណ្ណានៅពេលដែលគាត់មានអាយុជីវិតមិនអាចក្រាបថ្វាយបង្គំលាឪពុកជាចុងក្រោយបាន ចុះបើឪពុករបស់ខ្ញុំដឹងព័ត៌មាននេះ គាត់មានអារម្មណ៍បែបមិច ខ្ញុំតែឮអ៊ីចឹងខ្ញុំគិតដល់ឪពុករបស់ខ្ញុំមុនគេ ទីមួយសម្ពាធផ្លូវចិត្ត ទីពីរគាត់មិនមានឱកាសជួបឪពុកជាលើកចុងក្រោយ គ្មានថ្ងៃវិលវិញទេ គឺលាគ្នារហូតហើយ»។
អ្នកស្រី ចៅ រតនៈ ឱ្យដឹងថា មកដល់ពេលនេះឪពុកអ្នកស្រីកំពុងជាប់នៅក្នុងពន្ធនាគារព្រៃសមិនទាន់ទទួលដំណឹងដ៏ក្រៀមក្រំនេះឡើយទេ។ អ្នកស្រីស្នើដល់តុលាការ និងមន្ត្រីពន្ធនាគារអនុញ្ញាតឱ្យលោក ចៅ វាសនា បានជូនដំណើរឪពុកជាលើកចុងក្រោយដើម្បីបង្ហាញកតញ្ញូតាធម៌របស់កូនចំពោះឪពុក ជាពិសេសដោះលែងលោកឱ្យមានសេរីភាពមកជួបជុំគ្រួសារនៅថ្ងៃសវនាការនៅតុលាការខេត្តបន្ទាយមានជ័យសប្តាហ៍ក្រោយនេះ។
អ្នកស្រី ចៅ រតនៈ៖ «ខ្ញុំសង្ឃឹមថារដ្ឋាភិបាលគួរយកចិត្តទុកដាក់ដែលខ្ញុំជាកូនខ្មែរនៅក្នុងប្រទេសដែរគួរយល់ពីទុក្ខសោកគ្រួសារខ្ញុំផង ដោះលែងឱ្យឪពុកខ្ញុំមានសេរីភាពវិញទៅ ឪពុករបស់ខ្ញុំគ្មានទោសឧក្រឹដ្ឋអ្វីរហូតដល់ថ្នាក់មិនឱ្យនៅក្រៅឃុំទេ តែឥឡូវតារបស់ខ្ញុំត្រូវស្លាប់ដោយឪពុករបស់ខ្ញុំមិនបានមកអុជធូបជាលើកចុងក្រោយទៀត ចា៎កុំធ្វើឱ្យមានការឈឺមកលើខ្មែរគ្នាឯងខ្លាំងពេក»។
ឆ្លើយតបរឿងនេះ អ្នកនាំពាក្យអគ្គនាយកដ្ឋានពន្ធនាគារលោក នុត សវនា ប្រាប់វិទ្យុអាស៊ីសេរីថាពន្ធនាគារពុំមានគោលការណ៍អនុញ្ញាតឱ្យជនជាប់ឃុំទៅចូលរួមបុណ្យសពសាច់ញាតិនោះទេ។ ប៉ុន្តែលោកបញ្ជាក់ថា ករណីនេះគ្រួសារអាចដាក់លិខិតស្នើទៅតុលាការ និងថ្នាក់ដឹកនាំក្រសួងមហាផ្ទៃបានដើម្បីជួយសម្របសម្រួលដោះស្រាយ។
លោក នុត សវនា៖ «យើងដឹងថា ទុក្ខធុរៈរបស់គ្រួសារសំខាន់ ប៉ុន្តែវាពិបាកសម្រាប់មន្ត្រីរបស់ខ្ញុំដែរ ដោយមិនមែនយើងមិនយោគយល់ទេ តែសូមនិយាយការពិតដែរថា ការបញ្ជូនចេញទៅខាងក្រៅវាពាក់ព័ន្ធការងារសន្តិសុខ នេះវាមិនស្រួលប៉ុន្មានទេ អ៊ីចឹងវាអាចមានរូបភាពផ្សេងៗដែលអាចកើតឡើងដែលមានការថតជាវីដេអូទៅបង្ហោះតាមបណ្ដាញសង្គមជារូបភាពពិបាកគ្រប់គ្រង ប៉ុន្តែគាត់ដាក់សំណើទៅ គេនឹងទទួលសំណើទៅពិនិត្យទៅតាមហ្នឹង»។
វិទ្យុអាស៊ីសេរីមិនអាចទាក់ទងអ្នកនាំពាក្យ និងជាព្រះរាជអាជ្ញាអមសាលាដំបូង ខេត្តបន្ទាយមានជ័យ លោក សំរិទ្ធ សុខុន និងអ្នកនាំពាក្យក្រសួងមហាផ្ទៃលោក ខៀវ សុភ័ក ដើម្បីបកស្រាយបន្ថែមជុំវិញរឿងនេះបានទេ នៅថ្ងៃទី១ ខែធ្នូ។
ទោះយ៉ាងណា មន្ត្រីអង្គការសង្គមស៊ីវិល និងអ្នកច្បាប់តែងតែរិះគន់អាជ្ញាធរមិនគួរដកហូតសិទ្ធិអ្នកជាប់ឃុំមិនឱ្យជួបជុំក្រុមគ្រួសារជាលើកចុងក្រោយនោះទេ។ ពួកគេជំរុញឲ្យសមត្ថកិច្ចកែប្រែចំណុចនេះ ដោយត្រូវផ្ដល់សិទ្ធិដល់អ្នកជាប់ឃុំ។
កន្លងទៅ សកម្មជនបក្សសង្គ្រោះជាតិ និងបក្សភ្លើងទៀនមួយចំនួនដែលត្រូវបានរដ្ឋាភិបាលចាប់ឃុំខ្លួនដាក់ក្នុងពន្ធនាគារ ក្រោមហេតុផលនយោបាយនោះ ពួកគេបានឈឺចាប់ខ្លោចផ្សា ដោយសារតែសាច់ញាតិរបស់ពួកគេ បានទទួលមរណភាពហើយមិនបានចូលរួមបុណ្យសព ក្នុងនោះមានដូចជាប្រពន្ធរបស់ លោក សុខ ចន្ថា គឺអ្នកស្រី សោម ចន្ធូ និងម្ដាយក្មេករបស់លោក កាក់ កុម្ភារ ជាដើម។
ប្រធានសមាគមការពារសិទ្ធិមនុស្សអាដហុក(Adhoc) លោក នី សុខា មើលឃើញថា សកម្មជនដែលជាប់ឃុំនៅក្នុងពន្ធនាគារដោយអយុត្តិធម៌ហើយពួកគេត្រូវរស់នៅព្រាត់ប្រាសគ្នា និងមិនបានលាគ្នាជាលើកចុងក្រោយបែបនេះជារឿងសោកសៅបំផុតចំពោះក្រុមគ្រួសារសកម្មជនទាំងនោះ។ លោកយល់ថា អ្នកនយោបាយ ជាពិសេសអ្នកកាន់អំណាចគួរដល់ពេលដោះស្រាយវិបត្តិនយោបាយ ស្ដារប្រជាធិបតេយ្យស្របតាមស្មារតីនៃកិច្ចព្រមព្រៀងសន្តិភាពទីក្រុងប៉ារីសដើម្បីផលប្រយោជន៍ជាតិ និងបញ្ឈប់បង្កការឈឺចាប់តទៅទៀត។
លោក នី សុខា៖ «នៅក្នុងសង្គមកម្ពុជាដែលយើងហៅថាសង្គមប្រជាធិបតេយ្យសេរី ហើយជាសង្គមមួយនិយាយពីសន្តិភាព ការបង្រួបបង្រួម ឯកភាពជាតិទាំងអស់នេះ ខ្ញុំគិតថា មិនគួរធ្វើឱ្យមនុស្សមានការឈឺចាប់ បែកបាក់ ព្រាត់ប្រាសគ្នា អ្នកខ្លះនិរទេសខ្លួនដោយសាររឿងនយោបាយ ដោយសារមិនឯកភាពផ្នែកនយោបាយជាមួយគ្នាបែបនេះនោះទេ មកដល់ពេលនេះខ្មែរយើងគួរតែរួមគ្នា កាន់ដៃកសាងប្រទេសជាមួយគ្នា»។
ប្រធានគណៈកម្មាធិការប្រតិបត្តិគណបក្សភ្លើងទៀនក្រុងប៉ោយប៉ែត លោក ចៅ វាសនា មានដើមកំណើតខ្មែរក្រោមត្រូវបានអាជ្ញាធរខេត្តបន្ទាយមានជ័យចាប់បញ្ជូនទៅឃុំខ្លួនក្នុងពន្ធនាគារខេត្តនេះ កាលពីថ្ងៃទី២៥ ខែកក្កដាកន្លងទៅ។
តុលាការបានចោទប្រកាន់លោក ចៅ វាសនា ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងញុះញង់ឱ្យមានការរើសអើង ពាក់ព័ន្ធនឹងរឿងចូលរួមធ្វើយុទ្ធនាការអំពាវនាវឱ្យពលរដ្ឋគូសខ្វែងសន្លឹកឆ្នោត តាមបណ្ដាញសង្គមតេឡេក្រាម (Telegram) ក្នុងពេលបោះឆ្នោតជាតិ កាលពីខែកក្កដា ឆ្នាំ២០២៣។ ប៉ុន្តែ លោក ចៅ វាសនា បានច្រាលចោលការចោទប្រកាន់នោះ។
លោក ចៅ វាសនា ធ្លាប់ត្រូវបានតុលាការខេត្តបន្ទាយមានជ័យកាត់ទោសជាប់ពន្ធនាគារម្តងរួចមកហើយពីបទញុះញង់ និងបានចេញពីពន្ធនាគារវិញ កាលពីដើមឆ្នាំ២០២២ បន្ទាប់ពីលោកបានអនុវត្តទោសគ្រប់ចំនួនរយៈពេល ៥ឆ្នាំពេញនៅក្នុងពន្ធនាគារ។
ក្រុមគ្រួសារឱ្យដឹងពិធីបុណ្យសពរបស់ឪពុករបស់លោក ចៅ វាសនា ប្រព្រឹត្តទៅនៅភូមិបាលិលេយ្យ២ សង្កាត់ប៉ោយប៉ែត ខេត្តបន្ទាយមានជ័យ ហើយរៀបចំបូជានៅរសៀលថ្ងៃទី២ ខែធ្នូ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។