តុលាការរបបលោក ហ៊ុន សែន ចេញដីកាតាមចាប់ខ្លួនថ្នាក់ដឹកនាំជាន់ខ្ពស់ ៨រូប នៃគណបក្សសង្គ្រោះជាតិ ទាក់ទងនឹងបទល្មើសក្បត់ជាតិមួយករណីថ្មីទៀត។ អ្នកវិភាគយល់ថា នេះមិនមែនជារឿងផ្លូវច្បាប់អ្វីនោះទេ ប៉ុន្តែគឺជាល្បិចបំបែកបំបាក់គណបក្សសង្គ្រោះជាតិរបស់មេដឹកនាំរបបក្រុងភ្នំពេញលោក ហ៊ុន សែន។
ចៅក្រមស៊ើបសួរតុលាការក្រុងភ្នំពេញ លោក កូយ សៅ បានចោទប្រកាន់អ្នកទាំង ៨រូប ពីបទរួមគំនិតក្បត់ និងញុះញង់ឱ្យប្រព្រឹត្តិបទឧក្រិដ្ឋជាអាទិ៍ ប្រព្រឹត្តនៅកម្ពុជា និងនៅទីកន្លែងផ្សេងទៀត ចាប់ពីថ្ងៃទី២០ ដល់ទី២៧ ខែមករា ឆ្នាំ២០១៩ នេះ។ នេះបើយោងតាមដីកាបង្គាប់ឱ្យចាប់ខ្លួនរបស់តុលាការ ដែលអាស៊ីសេរីទើបទទួលបាននៅថ្ងៃទី១៧ មីនា។
ថ្នាក់ដឹកនាំជាន់ខ្ពស់គណបក្សសង្គ្រោះជាតិដែលរងការចោទប្រកាន់ក្នុងសំណុំរឿងថ្មីមួយទៀតនេះ រួមមាន លោក សម រង្ស៊ី លោក អេង ឆៃអ៊ាង អ្នកស្រី មូរ សុខហួរ លោក អ៊ូ ច័ន្ទឫទ្ធិ លោក ហូរ វ៉ាន់ លោក ឡុង រី លោក ម៉ែន សុថាវរិន្ទ្រ និងលោក តុ វ៉ាន់ចាន់។
ថ្នាក់ដឹកនាំគណបក្សប្រឆាំងទាំងនេះ គឺជាអ្នកបានចូលរួមដោយផ្ទាល់ក្នុងកិច្ចប្រជុំគណៈកម្មាធិការអចិន្ត្រៃយ៍លើកទី១ របស់គណបក្សសង្គ្រោះជាតិ ដែលប្រព្រឹត្តទៅកាលពីថ្ងៃទី២០ មករា កន្លងទៅ នៅទីក្រុងឡូវែល (Lowell) នៃរដ្ឋម៉ាស្សាឈូសេត (Massachusetts)។ កិច្ចប្រជុំនៅពេលនោះ ផ្តោតលើចំណុច៣ សំខាន់ គឺការទទួលស្គាល់លោក សម រង្ស៊ី ជាប្រធានស្តីទីគណបក្សសង្គ្រោះជាតិបណ្ដោះអាសន្ន ការបដិសេធរឿងលោក ហ៊ុន សែន យកគណបក្សសង្គ្រោះជាតិធ្វើជាចំណាប់ខ្មាំងនយោបាយទៅគំរាមសហភាពអឺរ៉ុប និងការរៀបចំផែនការសម្រាប់ដំណើរវិលត្រឡប់របស់លោក សម រង្ស៊ី ទៅកម្ពុជាវិញ។
សម្រាប់ផែនការវិលត្រឡប់ទៅកម្ពុជាវិញរបស់លោក សម រង្ស៊ី នោះ ថ្នាក់ដឹកនាំគណបក្សសង្គ្រោះជាតិ បានដាក់ចេញនូវសកម្មភាពការងារមួយចំនួន ដូចជា បង្កើតក្រុមការងាររៀបចំកម្លាំងទទួលលោក សម រង្ស៊ី ពង្រីកសកម្មភាពការទូត ពង្រីកការផ្សព្វផ្សាយព័ត៌មានអំពីបញ្ហាជាតិ ទាក់ទងឱ្យបានស្អិតរមួត ជាមួយអ្នកប្រជាធិបតេយ្យគ្រប់មជ្ឈដ្ឋាន និងរៀបចំថវិកាសម្រាប់ដំណើរការគម្រោងនេះ។
អ្នកនាំពាក្យក្រសួងមហាផ្ទៃលោក ខៀវ សុភ័គ អះអាងប្រាប់សារព័ត៌មានក្នុងស្រុកថា សកម្មភាពរបស់លោក សម រង្ស៊ី និងថ្នាក់ដឹកនាំគណបក្សសង្គ្រោះជាតិនេះ គឺជាអំពើក្បត់ជាតិ និងញុះញង់ឱ្យមានភាពវឹកវរនៅក្នុងសង្គម។
អ្នកវិភាគនយោបាយ លោក គឹម សុខ យល់ថា ដីកាតាមចាប់ខ្លួននេះ គឺជាការបន្តយុទ្ធសាស្ត្របំបែកគណបក្សសង្គ្រោះជាតិដោយលោក ហ៊ុន សែន មិនមែនជារឿងផ្លូវច្បាប់អ្វីនោះទេ។ លោកហ៊ានអះអាងបែបនេះ ព្រោះកាលពីប៉ុន្មានថ្ងៃមុន របបក្រុងភ្នំពេញបានបញ្ចេញព័ត៌មានថា មានមន្ត្រីគណបក្សសង្គ្រោះជាតិជាច្រើននាក់ ដែលអាចជាក្រុមនិយមលោក កឹម សុខា កំពុងត្រៀមសុំសិទ្ធិធ្វើនយោបាយឡើងវិញ ក៏ប៉ុន្តែស្រាប់តែពេលនេះ ក៏លេចចេញនូវដីកាតាមចាប់ខ្លួនក្រុមអ្នកធ្វើការជាមួយលោក សម រង្ស៊ី ទៅវិញ៖ «គេគាបក្រុមលោក កឹម សុខា ឱ្យសុំសិទ្ធិធ្វើនយោបាយ។ ក្នុងពេលហ្នឹង គេប្រើវិធីក្ដៅលើក្រុមលោក សម រង្ស៊ី ដើម្បីឱ្យមើលឃើញថា ក្រុមទាំងពីរហ្នឹង បើទោះបីជាមិនបានប្រកាសអំពីការបែកបាក់ជាផ្លូវការក៏ដោយ ក៏ប៉ុន្តែគេបង្កើតរូបភាពមួយដើម្បីឱ្យប្រជាពលរដ្ឋមើលឃើញថា នៅឆ្ងាយពីគ្នា។ នេះជាយុទ្ធសាស្ត្របំបែករបស់គេ។ គេនៅតែបន្តធ្វើរបៀបហ្នឹងដដែលទេ»។
បច្ចុប្បន្ននេះ ថ្នាក់ដឹកនាំគណបក្សសង្គ្រោះជាតិទាំង ៨រូប មិនមានវត្តមាននៅក្នុងប្រទេសកម្ពុជានោះឡើយ ពោលគឺកំពុងស្នាក់នៅ និងធ្វើសកម្មភាពនយោបាយនៅក្រៅប្រទេស ដើម្បីគេចចេញពីការតាមធ្វើទុក្ខបុកម្នេញពីសំណាក់របបលោក ហ៊ុន សែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។