សម្ដេច​ក្រុមព្រះ៖ ប្រជាពលរដ្ឋ​នៅ​តែ​មាន​​ភក្ដីភាព​​ចំពោះ​សែ​រាជវង្សានុវង្ស

ដោយ​ សូត សុខប្រាថ្នា
2014.03.30
Share on WhatsApp
Share on WhatsApp
សម្ដេច​ក្រុមព្រះ នរោត្ដម រណឫទ្ធិ ៦១០ សម្ដេច​ក្រុមព្រះ នរោត្ដម រណឫទ្ធិ យាង​ចូល​រួម​​កាត់​ខ្សែបូ ដើម្បី​ឆ្លង​ស្ពាន​ក្នុង​ភូមិ​ចម្ការឪឡឹក ឃុំ​ព្រែកក្របៅ ស្រុក​កងមាស ខេត្ត​កំពង់ចាម នៅ​ថ្ងៃ​ទី​៣០ មីនា ឆ្នាំ​២០១៤។
RFA/Saut Sokprathna

ប្រធាន​គណបក្ស​សង្គម​រាស្ត្រ​រាជាធិបតេយ្យ សម្តេច​ក្រុមព្រះ នរោត្តម រណឫទ្ធិ យាង​ចូល​រួម​នៅ​ក្នុង​ពិធី​សម្ពោធ​សមិទ្ធផល​មួយ​ចំនួន​នៅ​ក្នុង​វត្ត​ចាស់ ភូមិ​ចម្ការឪឡឹក ឃុំ​ព្រែកក្របៅ ស្រុក​កងមាស ខេត្ត​កំពង់ចាម ដែល​មាន​ព្រះសង្ឃ​ជា​ច្រើន​អង្គ និង​ប្រជាពលរដ្ឋ​ជា​ច្រើន​នាក់​ចូល​រួម នៅ​ថ្ងៃ​៣០ មីនា។

មាន​ព្រះបន្ទូល​នៅ​ក្នុង​ពិធី​បុណ្យ​នោះ ព្រះអង្គ​មិន​បាន​លើក​ឡើង​ពី​គោលនយោបាយ​របស់​គណបក្ស​ព្រះអង្គ​ដែល​ទើប​តែ​បង្កើត​ថ្មី​នោះ​ទេ ប៉ុន្តែ​ព្រះអង្គ​បែរ​ជា​លើក​ឡើង​អំពី​ការ​ចង់​ឲ្យ​មាន​ការ​ដោះស្រាយ​បញ្ហា​នយោបាយ​ដែល​ជាប់​គាំង​ពី​សំណាក់​គណបក្ស​ជាប់​ឆ្នោត​ធំៗ​ទាំង​ពីរ ពិសេស​សុំ​ឱ្យ​បក្ស​សង្គ្រោះ​ជាតិ ចូល​សភា​ដើម្បី​ដោះស្រាយ​បញ្ហា​ជាតិ​ជា​ធំ។

នេះ​ជា​លើក​ដំបូង​ហើយ ដែល​ប្រធាន​គណបក្ស​សង្គម​រាស្ត្រ​រាជាធិបតេយ្យ​ បាន​បង្ហាញ​ពី​ព្រះ​វត្តមាន​របស់​ទ្រង់ នៅ​តាម​មូលដ្ឋាន​ដល់​ប្រជាពលរដ្ឋ​នៅ​ខេត្ត​កំពង់ចាម។ មាន​ព្រះរាជ​បន្ទូល​​ក្នុង​ពិធី​នោះ សម្ដេច​ក្រុមព្រះ នរោត្តម រណឫទ្ធិ នៅ​តែ​ជឿ​ជាក់​ថា ប្រជាពលរដ្ឋ​ខ្មែរ​នៅ​តែ​មាន​​ភក្ដីភាព​ចំពោះ​សែ​រាជវង្សានុវង្ស ពិសេស​គឺ​ព្រះ​បរម​រតនកោដ្ឋិ ឬ​សម្ដេច​ឪ ដែល​ស្ថិត​នៅ​ក្នុង​សន្ដាន​ចិត្ត​របស់​​ប្រជាពលរដ្ឋ​ខ្មែរ​ទូទៅ។ បន្ថែម​ពី​នេះ​ទៀត ព្រះអង្គ​នៅ​តែ​ទទូច​ឱ្យ​គណបក្ស​ធំៗ ទាំង​ពីរ​ធ្វើ​ការ​ដោះស្រាយ​បញ្ហា​ជាតិ​ជាមួយ​គ្នា ពិសេស​ទទូច​ឱ្យ​បក្ស​ប្រឆាំង​ព្រម​ចូល​សភា​ដើម្បី​​ដោះស្រាយ​បញ្ហា​ជាតិ​ទាំង​មូល។

សម្តេច​ក្រុមព្រះ នរោត្តម រណឫទ្ធិ បាន​មាន​ព្រះរាជ​បន្ទូល​ថា ព្រះអង្គ​មាន​អារម្មណ៍​សប្បាយ​ព្រះទ័យ​ណាស់​ដែល​បាន​ចូល​រួម​ក្នុង​ពិធី​បុណ្យ​ឆ្លង​សមិទ្ធផល​ក្នុង​វត្ត​នៅ​ពេល​នេះ។ ព្រះអង្គ​បន្ត​ថា តាម​ការ​ប្រមើល​ទៅ ប្រជាពលរដ្ឋ​ដែល​បាន​ចូល​រួម​នោះ​មិន​បញ្ជាក់​ថា គាំទ្រ​ព្រះអង្គ​នោះ​ទេ ប៉ុន្តែ​ប្រជាពលរដ្ឋ​គឺ​នៅ​តែ​មាន​ភក្តីភាព​ចំពោះ​ព្រះបិតា​របស់​ព្រះអង្គ ជាប់​ក្នុង​សន្ដាន​ចិត្ត​ដដែល ហើយ​ស្ថាប័ន​ព្រះមហាក្សត្រ​នៅ​តែ​មាន​សារសំខាន់​សម្រាប់​ប្រជានុរាស្ត្រ​ ប្រៀប​បាន​ទឹក​និង​ត្រី​យ៉ាង​នោះ​ឯង។

ព្រះអង្គ​បន្ថែម​ទៀត​ថា ចំពោះ​រឿង​ថា ព្រះអង្គ​បង្កើត​គណបក្ស​នយោបាយ​ដើម្បី​បំបែក​សំឡេង​គណបក្ស​ប្រឆាំង​នោះ គឺ​ជា​រឿង​មិន​អាច​ទៅ​រួច​នោះ​ទេ ពីព្រោះ​មិន​មាន​គណបក្ស​ណា​មួយ​ជា​សត្រូវ​របស់​ព្រះ​អង្គឡើយ។

សម្ដេច​ក្រុមព្រះ៖ «មាន​ស្វាមីភក្ដិ​ចំពោះ​ឪពុក​ខ្ញុំ ព្រះបរមរតនកោដ្ឋិ សម្ដេច​តា សម្ដេច​តាទូត ដែល​ព្រះអង្គ​ជា​ព្រះបិតា​ជាតិ ព្រះរាជ​បិតា​នៃ​ឯករាជ្យ​ជាតិ ព្រះ​រាជបិតា​នៃ​ការ​រួបរួម​ជាតិ ព្រះ​រាជបិតា​ជាតិ និយាយ​ឱ្យ​ចំ​ទៅ ប្រជារាស្រ្ត​គាត់​ស្រលាញ់​ខ្លាំង​ណាស់។ ដូច្នេះ លោក​យាយ លោកតា លោក​មា​លោក​មីង​ខ្លះ​គាត់​និយាយ​ថា យី! មើល​មុខ​ខ្ញុំ​ដូច​មុខ​លោក (សម្ដេច​តា) អ៊ីចឹង។ តាម​យោបល់​របស់​ខ្ញុំ​ព្រះអង្គ ដែល​អញ្ជើញ​មក​នេះ ដោយ​ការ​នឹករលឹក ទី​ពីរ ដោយសារ​ខ្ញុំ​យល់​ថា ខ្ញុំ​និយាយ​ថា​ជាតិៗៗ ទីពីរ​អញ្ជើញ​មក​អបអរសាទរ​នូវ​អ្វី​មួយ​ដែល​ព្រះពុទ្ធ​សាសនា​ជា​សាសនា​របស់​រដ្ឋ»

ទោះ​បី​ជា​នៅ​ក្នុង​ពិធី​នោះ​ព្រះអង្គ​មិន​បាន​មាន​ព្រះរាជ​បន្ទូល​ទាក់​ទង​នឹង​គោល​នយោបាយ​​បក្ស​របស់​ព្រះអង្គ​ដែល​ទើប​នឹង​បង្កើត​ថ្មី​ក៏ដោយ ប៉ុន្តែ​អ្វី​ដែល​ព្រះអង្គ​បាន​លើក​ឡើង​ គឺ​ចង់​ឱ្យ​គណបក្ស​ធំៗ​ទាំង​ពីរ​​ព្រម​ចូល​ដោះស្រាយ​បញ្ហា​ជាតិ​ជាមួយ​គ្នា ពិសេស​ទទូច​ឱ្យ​គណបក្ស​ប្រឆាំង​ព្រម​ចូល​សភា និង​រឹតតែ​មិន​ចង់​ឱ្យ​មាន​ការ​ធ្វើ​បាតុកម្ម​ដែល​អាច​នាំ​ឱ្យ​មាន​ការ​បង្ហូរ​ឈាម​ខ្មែរ​ទៀត​ផង។

សម្ដេច​ក្រុមព្រះ៖ «បិណ្ឌបាត​សុំ​ឱ្យ​អ្នក​ធំ​ពីរ​សព្វថ្ងៃ​ដែល​គេ​បោះ​ឆ្នោត​ឱ្យ​នោះ សូម​ឱ្យ​ជានា​គ្នា​ទៅ។រក​មធ្យោបាយ​ឱ្យ​ចេញ​មក​ងរ អី​ក៏​ងរ... ចូល​ទៅ​រដ្ឋ​សភា​ទៅ ចូល​ទី​រដ្ឋ​សភា​ទៅ។ លោក​តា​អ្នក​ណា​មិន​ដឹង​ដែរ​ថា អា​លទ្ធផល​នេះ​វា​យ៉ាង​ម៉េច​ទៅៗៗៗ ចូល​ទៅ។ ខ្ញុំ​ព្រះករុណា​ខ្ញុំ​ក៏​ដឹង​ដែរ នៅ​ឆ្នាំ​១៩៩៨ ថា​បាន​ប៉ុន្មាន​អី​ប៉ុន្មាន ខ្ញុំ​ដឹង​ទាំង​អស់។ បើ​មិន​អ៊ីចឹង​ទេ មាន​អ្នក​គេ​ស្រវឹង ពេល​ដែល​មិន​ស្រវឹង​មិន​អី​ទេ ប៉ុន្តែ​ពេល​ស្រវឹង​ប្រាប់​ថា ព្រះអង្គ​ម៉េច​ក៏​ចូល​បាន...។ ព្រះករុណា​ព្រះ​ជា​ម្ចាស់​តម្កល់​លើ​ត្បូង លោក​តា លោក​យាយ ស្រលាញ់​សម្ដេច​តា​ទេ?»

ការ​ទទួច​ឱ្យ​បក្ស​ប្រឆាំង​ចូល​សភា​នេះ ត្រូវ​បាន​អនុ​ប្រធាន​គណបក្ស​សង្គ្រោះ​ជាតិ លោក កឹម​ សុខា ​មិន​យល់​ស្រប​ជាមួយ​ព្រះរាជ​បន្ទូល​របស់​ព្រះអង្គ​ឡើយ ដោយសារ​លោក​យល់​ថា គឺ​ជា​គំនិត​ដែល​នាំ​ឱ្យ​គណបក្ស​ខ្លួន​ចាញ់​និង​រលាយ​ទៅ​វិញ៖ «ខ្ញុំ​មិន​ទៅ​ឆ្លើយ​អី​ជាមួយ​សម្ដេច​ក្រុម​ព្រះ​ទេ។ យើង​យក​គំនិត​មនុស្ស​ចាញ់​មក​ធ្វើ​តាម​គាត់​យើ​ងចាញ់​ទៀត​ហើយ ពីព្រោះ​គាត់​ៗ​ធ្លាប់​ចាញ់​ហើយ រលាយ ដឹក​នាំ​គណបក្ស​ឡើង​រលាយ​ហើយ ហើយ​បើ​យើង​ធ្វើ​តាម​យោបល់​របស់​គាត់​ អ៊ីចឹង​មាន​ន័យ​ថា យើង​ចង់​ឱ្យ​គណបក្ស​របស់​យើង​រលាយ​ទៀត។ ដូច្នេះ​ប្រជាពលរដ្ឋ​គាត់​មិន​ល្ងង់​ទេ ហើយ​យោបល់​របស់​គាត់ គឺ​ចង់​ឱ្យ​គណបក្ស​រលាយ​ គឺ​យោបល់​កញ្ជេះ​គណបក្ស​ប្រជាជន ហើយ​ធ្វើ​ឱ្យ​បក្ស​រលាយ ហើយ​នរណា​ទៅ​ធ្វើ​តាម​គាត់​ ដូច​នេះ​ខ្ញុំ​មិន​ចាប់​អារម្មណ៍​ទេ​ក្មួយ»

ការ​បង្ហាញ​ព្រះ​វត្តមាន​របស់​សម្ដេច​ក្រុមព្រះ នរោត្តម រណឫទ្ធិ ព្រះ​ប្រធាន​គណបក្ស​សង្គម​រាស្ត្រ​រាជាធិបតេយ្យ​ពេល​នេះ គឺ​នៅ​ក្នុង​ពិធី​បុណ្យ​ឆ្លង​ស្ពាន ផ្លូវ​លំ សាលាឆទាន ប្រតិស្ឋាន​ដើម​ពោធិព្រឹក្ស ដែល​ដង្ហែរ​ពី​ប្រទេស​ឥណ្ឌា និង​មហា​សង្ឃទាន ដែល​រៀប​ចំ​ឡើង​ដោយ​អង្គការ​ធម្មទាន​សង្គម ហៅ​ថា អេស.ឌី.ឌី.អូ (SDDO) នៅ​ក្នុង​ឃុំ​ព្រែកក្របៅ ស្រុក​កងមាស ខេត្ត​កំពង់ចាម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។