នីតិវិធី​បន្ត​របស់​គណៈកម្មការ​អឺរ៉ុប​ លើ​ការ​ព្យួរ​អនុគ្រោះ​ពន្ធ EBA

ដោយ មួង ណារ៉េត
2019-08-29
អ៊ីម៉ែល
មតិ
Share
បោះពុម្ព
អ្នកស្រី ហ្វេដេរ៊ីកា មូហ្ការ៊ីនី (Federica Mogherini) តំណាងជាន់ខ្ពស់នៃសហភាពអឺរ៉ុប ផ្នែកកិច្ចការបរទេស និង គោលនយោបាយសន្តិសុខ និង ជាអនុប្រធានស្នងការអឺរ៉ុប ជួបជាមួយលោក ហ៊ុន សែន (រូបឃើញតែខ្នង) នៅទីក្រុងប្រ៊ុចស្សែល ប្រទេសប៊ែលហ្ស៊ិក កាលពីថ្ងៃទី ១៨ ខែ តុលា ឆ្នាំ ២០១៨។
អ្នកស្រី ហ្វេដេរ៊ីកា មូហ្ការ៊ីនី (Federica Mogherini) តំណាងជាន់ខ្ពស់នៃសហភាពអឺរ៉ុប ផ្នែកកិច្ចការបរទេស និង គោលនយោបាយសន្តិសុខ និង ជាអនុប្រធានស្នងការអឺរ៉ុប ជួបជាមួយលោក ហ៊ុន សែន (រូបឃើញតែខ្នង) នៅទីក្រុងប្រ៊ុចស្សែល ប្រទេសប៊ែលហ្ស៊ិក កាលពីថ្ងៃទី ១៨ ខែ តុលា ឆ្នាំ ២០១៨។
Photo Courtesy of the EU Audio Visual Services

នីតិវិធី ៦ ខែ ដំបូង​ក្នុង​ការ​ត្រួតពិនិត្យ និង​វាយតម្លៃ​ស្ថានភាព​សិទ្ធិមនុស្ស មុននឹង​ព្យួរ​ប្រព័ន្ធ​អនុគ្រោះ​ពន្ធ EBA របស់​សហភាព​អឺរ៉ុប បាន​បិទ​បញ្ចប់​ទៅ​ហើយ កាលពី​ថ្ងៃទី១២ ខែ​សីហា​។ ឥឡូវនេះ គណៈកម្មការ​អឺរ៉ុប កំពុង​ចាប់ផ្ដើម​នីតិវិធី​បី​ខែ​បន្ទាប់ ដែល​អាច​ឈាន​ទៅ​ព្យួរ​ការ​អនុគ្រោះ​ពន្ធ EBA ពី​កម្ពុជា បើ​ស្ថានភាព​សិទ្ធិមនុស្ស ប្រជាធិបតេយ្យ និង​សិទ្ធិ​សេរីភាព​ក្នុង​វិស័យ​ការងារ នៅតែ​មិន​ប្រសើរ។

តើ​នីតិវិធី​បន្ត​របស់​គណៈកម្មការ​អឺរ៉ុប នៅ​មាន​អ្វី​ខ្លះ​ទៀត?

មូលហេតុ​ដែល​នាំ​ឱ្យ​សហភាព​អឺរ៉ុប ចាប់ផ្ដើម​នីតិវិធី ដែល​ឈាន​ទៅ​ដល់​ការ​ព្យួរ​ការ​អនុគ្រោះ​ពន្ធ EBA ពី​កម្ពុជា គឺ​ដោយសារតែ​សហភាព​អឺរ៉ុប​មិន​ពេញចិត្ត ទៅ​នឹង​ចំណាត់​ការ​របស់​របប​លោក ហ៊ុន សែន ដែល​រំលោភ​សិទ្ធិមនុស្ស បំផ្លាញ​ប្រជាធិបតេយ្យ​ធ្ងន់ធ្ងរ និង រឹតត្បិត​សិទ្ធិ​សេរីភាព​សហជីព កម្មករ និង​សិទ្ធិ​ដីធ្លី​ជាដើម ក្រោយ​របប​នេះ បាន​ចាប់​ប្រធាន​គណបក្ស​សង្គ្រោះជាតិ​លោក កឹម សុខា ដាក់​ពន្ធនាគារ រម្លាយ​គណបក្ស​សង្គ្រោះ​ជាតិ បណ្ដេញ​អង្គការ​សង្គម​ស៊ីវិល បិទ​ប្រព័ន្ធ​ផ្សព្វផ្សាយ​ឯករាជ្យ ធ្វើទុក្ខបុកម្នេញ​មន្ត្រី​សហជីព​កម្មករ បិទ​សិទ្ធិ​សេរីភាព​ប្រជាពលរដ្ឋ​ក្នុង​ការ​តវ៉ា​ដោយ​សន្តិវិធី រៀបចំ​ការបោះឆ្នោត ដោយ​ផាត់​ចោល​គណបក្សប្រឆាំង ដែល​មាន​អ្នកបោះឆ្នោត​គាំទ្រ​ជិត​ពាក់​កណ្តាល​ប្រទេស និង​បន្ត​ធ្វើទុក្ខបុកម្នេញ​មន្ត្រី​បក្ស​ប្រឆាំង​នៅ​មូលដ្ឋាន​ជាដើម។

ប្រទេស​កម្ពុជា ទទួល​បាន​កម្មវិធី​អនុគ្រោះ​ពន្ធ​លើ​«​ទំនិញ​គ្រប់មុខ លើកលែងតែ​គ្រឿង​សព្វាវុធ​» (Everything But Arms) ឬ​ហៅ​កាត់​ថា EBA នេះ ដោយសារតែ​វា​ជា​ផ្នែក​មួយ នៃ​ប្រព័ន្ធ​អនុគ្រោះ​ពន្ធ​ទូទៅ របស់​សហភាព​អឺរ៉ុប ដែល​ផ្ដល់​ឱ្យ​តែ​ប្រទេស​ក្រីក្រ​ប៉ុណ្ណោះ​។ គោលបំណង​នៃ​ការ​អនុគ្រោះ​ពន្ធ​នេះ គឺ​ចង់​ឱ្យ​ប្រទេស​ក្រីក្រ​ទាំងនោះ មាន​ឱកាស​កាត់​បន្ថយ​ភាព​ក្រីក្រ តាមរយៈ​ការ​រីក​លូតលាស់​ផ្នែក​សេដ្ឋកិច្ច ប្រកបដោយ​ចិរភាព។

ទោះជា​យ៉ាង​នេះ​ក្តី ការ​ផ្តល់​ការ​អនុគ្រោះ​ពន្ធ​នេះ គឺ​មាន​ភ្ជាប់​លក្ខខណ្ឌ​ធំៗ​មួយ​ចំនួន ដែល​ប្រទេស​នីមួយៗ ត្រូវ​បំពេញ​ឱ្យ​បានជា​ដាច់ខាត​។ លក្ខខណ្ឌ​ទាំងនោះ រួមមាន​ការ​គោរព​សិទ្ធិមនុស្ស និង ប្រជាធិបតេយ្យ និង ការ​គោរព​សិទ្ធិ​ការងារ ដែល​មាន​ចែង នៅ​ក្នុង​គោលការណ៍​ជា​មូលដ្ឋាន នៃ​អនុសញ្ញា​ទាំងឡាយ ស្ដីពី​សិទ្ធិមនុស្ស និង​សិទ្ធិ​ការងារ​របស់​អង្គការ​សហប្រជាជាតិ និង អង្គការ​អន្តរជាតិ​ខាង​ការងារ។

សហភាព​អឺរ៉ុប បាន​ថ្កោលទោស និង​ព្រមាន​របប​លោក ហ៊ុន សែន ជាច្រើនលើក​ច្រើន​សា​ទៅ​ហើយ ឱ្យ​ស្តារ​សិទ្ធិមនុស្ស និង ប្រជាធិបតេយ្យ​ឡើងវិញ បើ​ចង់​បន្ត​រក្សា​ប្រព័ន្ធ​ការ​អនុគ្រោះ​ពន្ធ​តទៅទៀត​។ ប៉ុន្តែ របប​លោក ហ៊ុន សែន នៅតែ​ចចេស​មិន​ព្រម​ស្ដារ​ស្ថានការណ៍​នេះ​ឡើងវិញ ដោយ​របប​នេះ​សម្អាង​ថា ខ្លួន​មិនបាន​ធ្វើ​អ្វី​ខុស​នោះ​ឡើយ​។ មិនតែប៉ុណ្ណោះ​មេដឹកនាំ​របប​នេះ គឺ​លោក ហ៊ុន សែន ថែមទាំង​ឌឺ​ថា បើ​ទោះ​បី​ជា​អត់ EBA ក៏​កម្ពុជា​អត់​បញ្ហា​។ លោក​ថែមទាំង​ជំរុញ​ឱ្យ​គេ​ប្រញាប់​ផ្ដាច់​វា​ទៀត​ផង៖ «បើ​សិន​គេ​ផ្ដល់​ភាព​អនុគ្រោះ​ឱ្យ​យើង យើង​ក៏​មិន​អាច​ក្លាយទៅជា​អ្នកមាន​បានទេ​។ តែ​បើ​គេ​ដក​ភាព​អនុគ្រោះ​ពី​យើង ក៏​មិន​ធ្វើ​ឱ្យ​យើង​ស្លាប់​ដែរ​។ យល់​ទេ​អា​កន្លែង​ហ្នឹង​? កុំ​ធ្វើជា​សត្វ​ឆ្កែ គ្រាន់តែ​ដើម្បី​ជាមួយ​នឹង​ឆ្អឹង​ឬ​សាច់​មួយ​ដុំ វា​មិន​ថ្លៃថ្នូរ​ទេ​។ ឧទាហរណ៍​គេ​គំរាម បើ​មិន​ធ្វើតាម​អញ អញ​នឹង​កាត់ផ្ដាច់​នេះ កាត់ផ្ដាច់​នោះ​។ កាត់​ទៅ​! លោក​ឯង​កាត់​ទៅ​! ធ្វើ​ឱ្យ​វា​អស់​សេចក្ដី​ទៅ»

ក្រោយ​ការ​ទុក​ឱកាស​ជាច្រើនលើក និង ភាព​គ្មាន​ប្រសើរ​ឡើង​ផ្នែក​សិទ្ធិមនុស្ស និង ប្រជាធិបតេយ្យ សហភាព​អឺរ៉ុប​បានសម្រេច​ដាក់​ចេញ​ជា​ផ្លូវការ​នូវ​នីតិវិធី ដែល​ឈាន​ដល់​ការ​ព្យួរ​អនុគ្រោះ​ពន្ធ EBA ពី​កម្ពុជា​នេះ។

នីតិវិធី​ព្យួរ​ការ​អនុគ្រោះ​ពន្ធ​នេះ ចែកចេញជា​បី​ដំណាក់កាល​ធំៗ​៖

ដំណាក់កាល​ទី​មួយ គឺ​ត្រួតពិនិត្យ​តាមដាន និង វាយតម្លៃ​ស៊ីជម្រៅ ថា​តើ​កម្ពុជា​បាន​ធ្វើ​អ្វីខ្លះ ដើម្បី​កែប្រែ​ស្ថានការណ៍​បច្ចុប្បន្ន ដែល​សហភាព​អឺរ៉ុប​ស្នើ​ឱ្យ​កែប្រែ​ឬ​នៅ​។ សហភាព​អឺរ៉ុប ផ្ដល់​ឱកាស​ឱ្យ​កម្ពុជា ក្នុង​ការចរចា និង ចូលរួម​សហការ ក្នុង​ការ​ប្រមូល​ព័ត៌មាន​ចាំបាច់​។ ដំណាក់កាល​ទី​មួយ​នេះ មាន​រយៈពេល ៦ ខែ ដោយ​គិត​ចាប់ពី ថ្ងៃទី១២ ខែ កុម្ភៈ ដល់​ថ្ងៃ​ទី ១២ ខែ​សីហា ឆ្នាំ​២០១៩​។ ដំណាក់កាល ៦ ខែ ដំបូង​នេះ បាន​បិទ​បញ្ចប់​ជា​ស្ថាពរ​ទៅ​ហើយ កាលពី​ថ្ងៃ​ទី១២ ខែ​សីហា កន្លង​ទៅ។

ក្នុង​ដំណាក់កាល​នោះ គណៈកម្មការ​អឺរ៉ុប ត្រូវ​ជួបពិភាក្សា​ផ្ទាល់​ជាមួយ​មន្ត្រី​ពាក់ព័ន្ធ​នានា រួម​ទាំង​មន្ត្រី​រដ្ឋាភិបាល​កម្ពុជា និង មន្ត្រី​សហជីព​កម្មករ និង មន្ត្រី​អង្គការ​សង្គម​ស៊ីវិល រួម​ទាំង​តំណាង​ខាង​ថៅកែ​រោងចក្រ​កាត់ដេរ​ផង។

គណៈប្រតិភូ​ស្វែងរក​ការពិត​របស់​គណៈកម្មការ​អឺរ៉ុប បាន​បំពេញ​ទស្សនកិច្ច​ចំនួន​ពីរ​លើក ក្នុង​រយៈពេល​នេះ​។ ភាគី​ដែល​ពាក់ព័ន្ធ ផ្សេងៗ អាច​ដាក់​ឯកសារ​ភស្តុតាង ទៅ​គណៈកម្មការ​អឺរ៉ុប​។ ឯកសារ​ទាំងនេះ អាច​ជា​កង្វល់​អំពី​ផល​ប៉ះពាល់ ករណី​ព្យួរ​ប្រព័ន្ធ​អនុគ្រោះ​ពន្ធ EBA និង ជំហរ​ការពារ​ចំណាត់​ការ ដែល​រង​ការរិះគន់ ថា​រំលោភ​សិទ្ធិមនុស្ស និង បំផ្លាញ​ប្រជាធិបតេយ្យ​។​

ខាង​សមាគម​ថៅកែ​រោងចក្រ​នៅ​កម្ពុជា (GMAC) បាន​ដាក់​ឯកសារ​ទៅ​គណៈកម្មការ​អឺរ៉ុប​ដែរ ដោយ​បង្ហាញ​អំពី​ភាព​ប្រសើរ​ឡើង និង​ការ​គោរព​សិទ្ធិ​ការងារ និង​សិទ្ធិ​សហជីព​របស់​សមាគម​រោងចក្រ​កាត់ដេរ ដែល​សហភាព​អឺរ៉ុប​គួរ​ពិចារណា មុននឹង​ព្យួរ​ការ​អនុគ្រោះ​ពន្ធ​ពី​កម្ពុជា​។ ជាមួយគ្នា​ដែរ សមាគម​ថៅកែ​រោងចក្រ​នៅ​កម្ពុជា ថ្លែង​ពី​ក្តី​កង្វល់ ថា ការ​អនុគ្រោះ​ពន្ធ EBA នេះ មាន​ផល​ប៉ះពាល់​ដល់​ប្រជាពលរដ្ឋ​ខ្មែរ​ប្រមាណ ៣​លាន​នាក់ បើ​សហភាព​អឺរ៉ុប​សម្រេច​ព្យួរ​មែន​នោះ​។ គ្រាន់តែ​វិស័យ​រោងចក្រ​កាត់ដេរ គឺ​ផ្ដល់​ការងារ​ដល់​កម្មករ ៧៥០,០០០ នាក់ ដែល​ស្មើនឹង​ជាង​ពាក់​កណ្តាល នៃ​កម្លាំង​ពលកម្ម​សរុប​នៅ​កម្ពុជា។

ខាង​របប​លោក ហ៊ុន សែន ក៏បាន​ដាក់​ឯកសារ​របស់​ខ្លួន ជូន​ទៅ​គណៈកម្មការ​អឺរ៉ុប​ដែរ គឺ​ដាក់​នៅ​កៀក​ថ្ងៃ​បិទ​បញ្ចប់ នៃ​ដំណាក់កាល ៦ ខែ​ដំបូង​នោះ​។ នេះ​បើ​តាម​មន្ត្រី​នាំ​ពាក្យ​គណៈកម្មការ​អឺរ៉ុប​ផ្នែក​ពាណិជ្ជកម្ម និង កសិកម្ម លោក ដានីញ៉ែល រ៉ូសារីយ៉ូ (Daniel Rosario) ដែល​ប្រាប់​អាស៊ីសេរី តាម​សារ​អេឡិចត្រូនិក ភ្លាមៗ​ក្រោយ​បិទ​បញ្ចប់​នីតិវិធី ៦ ខែ​ដំបូង​កាលពី​ថ្ងៃ​ទី១៣ ខែ​សីហា​នោះ​។​

•​ដំណាក់កាល​ទី​ពីរ មាន​រយៈពេល ៦ ខែ​ដែរ ប៉ុន្តែ​ចែកចេញជា​បី ដំណាក់កាល​តទៅទៀត (​គឺ​ដំណាក់កាល ៣ ខែ ដំណាក់កាល ១ ខែ និង​ដំណាក់កាល ២ ខែ​)

o​ដំណាក់កាល ៣ ខែ​ដំបូង គឺជា​ពេល​សរសេរ​របាយការណ៍​សន្និដ្ឋាន​បឋម ដោយ​ផ្អែកលើ​អ្វី​ដែល​ប្រតិភូ​គណៈកម្មការ​អឺរ៉ុប ប្រមូល​បាន​ក្នុង​អំឡុង​ទស្សនកិច្ច​ស្វែងរក​ការពិត​នៅ​កម្ពុជា និង ឯកសារ​ភស្តុតាង ដែល​ប្រមូល​បាន​ពី​ភាគី​ពាក់ព័ន្ធ​។ ដំណាក់កាល​បី​ខែ​ដំបូង​នេះ បាន​ចាប់ផ្ដើម​តាំងពី​ថ្ងៃ​ទី ១៣ ខែ សីហា មក​ម្ល៉េះ ពោល​គឺ​ចាប់ផ្ដើម​ភ្លាមៗ ក្រោយ​ចប់​ដំណាក់កាល ៦ ខែ ដំបូង​។ ដំណាក់កាល​សរសេរ​រ​បាយ​ការណ៍​បឋម​នេះ នឹង​បិទ​បញ្ចប់​នៅ​ថ្ងៃទី១២ ខែ​វិច្ឆិកា​។

ដំណាក់កាល ១​ខែ​បន្ទាប់ គឺ​ចាប់ផ្ដើម​ភ្លាមៗ ក្រោយ​សរសេរ​របាយការណ៍​សន្និដ្ឋាន​នោះ​ចប់​។ ដំណាក់កាល​នេះ គឺ​គិត​ចាប់ពី ថ្ងៃទី១៣ ខែ វិច្ឆិកា ដល់​ថ្ងៃទី ១២ ខែ ធ្នូ​។ ក្នុង​រយៈពេល​ពេញ​មួយ​ខែ​នេះ គណៈកម្មការ​អឺរ៉ុប ទុក​ឱកាស​ឱ្យ​របប​លោក ហ៊ុន សែន ឆ្លើយតប​។ ផុត​ពី​មួយ​ខែ​នេះ​ទៅ គឺ​ចូល​ដល់​ដំណាក់កាល ២ ខែ​ចុងក្រោយ។

ដំណាក់កាល ២ ខែ​ចុងក្រោយ​នេះ គឺជា​ពេល​សរសេរ​សេចក្ដី​សម្រេច​ស្ថាពរ ថា​តើ​ត្រូវ​ព្យួរ ឬ មិនត្រូវ​ព្យួរ​ការ​អនុគ្រោះ​ពន្ធ EBA នោះ។

មន្ត្រី​នាំ​ពាក្យ​គណៈកម្មការ​អឺរ៉ុប​ផ្នែក​ពាណិជ្ជកម្ម និង កសិកម្ម លោក ដានីញ៉ែល រ៉ូសារីយ៉ូ ប្រាប់​អាស៊ីសេរី តាម​សារ​អេឡិចត្រូនិក កាលពី​ថ្ងៃ​ទី​១៣ ខែ សីហា ថា សេចក្ដី​សម្រេច​ស្ថាពរ នឹង​ត្រូវ​ចុះផ្សាយ​ក្នុង​ទិនានុប្បវត្តិ (​ទស្សនាវដ្ដី​) ផ្លូវការ​របស់​គណៈកម្មការ​អឺរ៉ុប នៅ​អំឡុង​ពាក់​កណ្តាល​ខែ កុម្ភៈ ឆ្នាំ​២០២០ ខាងមុខ។

ដំណាក់កាល​ទី ៣ គឺជា​ពេល​កំណត់ ដែល​ត្រូវ​អនុវត្ត​ការ​ព្យួរ​ប្រព័ន្ធ​អនុគ្រោះ​ពន្ធ​នោះ ដោយ​ត្រូវ​រាប់ ៦ ខែ ចាប់ពី​ក្រោយ​សេចក្ដី​សម្រេច​ស្ថាពរ​នោះ​។ បើ​គណៈកម្មការ​នេះ សម្រេច​ដក​ការ​អនុគ្រោះ​ពន្ធ​ពី​កម្ពុជា នៅ​អំឡុង​ពាក់​កណ្តាល​ខែ កុម្ភៈ ឆ្នាំ ២០២០ មែន​នោះ ការអនុវត្ត​ការ​ព្យួរ​ប្រព័ន្ធ​អនុគ្រោះ​ពន្ធ​នេះ​ពិតប្រាកដ នឹង​ចូល​ជា​ធរមាន​នៅ ៦​ខែ​បន្ទាប់​មក​ទៀត​។ មានន័យថា ការ​ព្យួរ​ការ​អនុគ្រោះ​ពន្ធ EBA នឹង​ចាប់ផ្ដើម​អនុវត្ត នៅ​ពាក់​កណ្ដាល​ខែ​សីហា ឆ្នាំ​២០២០។

សហភាព​អឺរ៉ុប ចាត់​ទុក​ចំណាត់ការ​របស់​របប​លោក ហ៊ុន សែន ក្នុង​រយៈពេល​ជិត​ពីរ​ឆ្នាំ​ចុងក្រោយ​នេះ ថា​ជា​អំពើ​រំលោភ​សិទ្ធិមនុស្ស និង បំផ្លាញ​ប្រជាធិបតេយ្យ​ធ្ងន់ធ្ងរ ដែល​ផ្ទុយ​ទៅ​នឹង​លក្ខខណ្ឌ ដែល​កម្ពុជា​ត្រូវតែ​គោរព ដើម្បី​ជា​ថ្នូរ​នឹង​ការ​បន្ត​ទទួល​បាន​ប្រព័ន្ធ​អនុគ្រោះ​ពន្ធ​នេះ​។ សហភាព​អឺរ៉ុប ក៏បាន​ទុក​ឱកាស​ឱ្យ​របប​នេះ ស្ដារ​ស្ថានភាព​នេះ​ឡើងវិញ​ដែរ​។ ប៉ុន្តែ មន្ត្រី​ជាន់ខ្ពស់​សហភាព​អឺរ៉ុប នៅតែ​ហួសចិត្ត ដែល​របប​លោក ហ៊ុន សែន មិន​ព្រម​ធ្វើតាម​សំណូមពរ​របស់​សហភាព​អឺរ៉ុប ឱ្យ​ស្ដារ​ស្ថានភាព​នេះ​ឡើងវិញ។

ស្នងការ​ពាណិជ្ជកម្ម​សហភាព​អឺរ៉ុប អ្នកស្រី សេស៊ីស្យា ម៉ាមស្ត្រុម (Cecilia Malmstrom) ប្រាប់​អាស៊ីសេរី កាលពី​ដើមខែ មិថុនា ដោយ​សម្ដែង​ការ​ខកចិត្ត ដែល​អ្វីៗ​កំពុង​ស្ថិត​ក្នុង​ដៃ​លោក ហ៊ុន សែន ប៉ុន្តែ លោក​បែរជា​មិន​ស្ដារ​ស្ថានភាព​អាក្រក់​នេះ​សោះ៖ «ចាស៎​! រឿងនេះ គឺ​ស្ថិត​ក្នុង​កណ្តាប់​ដៃ​ទាំងស្រុង​របស់​​លោក ហ៊ុន សែន និង​រដ្ឋបាល​របស់​​លោក​។ ពី​ព្រោះ​ថា យើង​គិត​ថា ស្ថានភាព​បាន​ដើរ​ថយក្រោយ ជុំវិញ​រឿង​សិទ្ធិមនុស្ស​នា​រយៈពេល​ចុងក្រោយ​នេះ​... រឿង​ដែល​គណបក្សប្រឆាំង​ត្រូវ​បាន​គេ​រម្លាយ ការបោះឆ្នោត​មិន​ត្រូវ​បាន​ទទួល​ស្គាល់​ដោយ​ប្រទេស​ជាច្រើន​នៅ​លើ​ពិភពលោក​...​។ យើង​ឃើញ​មានការ​កម្រិត​លំហ សង្គម​ស៊ីវិល និង​ប្រព័ន្ធ​សារព័ត៌មាន​ជាដើម​។ ក៏​មាន​ក្តី​បារម្ភ​មួយ​ចំនួន អំពី​បទដ្ឋាន​ការងារ អំពើ​ច្បាម​យក​ដីធ្លី​ជាដើម​។ យើង​គិត​ថា មាន​ការ​កែ​លម្អ​តិចតួច​ដែរ ខាង​វិស័យ​សង្គមកិច្ច ដែល​ជា​រឿង​ល្អ ប៉ុន្តែ​យើង​សង្ឃឹមថា មានការ​កែ​លម្អ​ច្រើនជាង​នេះ​។ អ្វីៗ​គឺ​អាច​កើត​មានឡើង​បាន​។ ប៉ុន្តែ ក្នុង​កណ្តាប់​ដៃ​លោក ហ៊ុន សែន ទំនង​ដូចជា​មិន​អាច​កើតឡើង​បាន​ច្រើន​នោះ​ទេ»

មិនមែន​តែ​សមាគម​រោងចក្រ​កាត់ដេរ​ទេ ដែល​ភ័យខ្លាច​បាត់បង់​ប្រព័ន្ធ​អនុគ្រោះ​ពន្ធ​នេះ សូម្បីតែ​សហព័ន្ធ​ស្រូវ​អង្ករ​កម្ពុជា​ឯណោះ ក៏​ព្រួយបារម្ភ​យ៉ាង​ខ្លាំង​ណាស់​ដែរ បើ​សហភាព​អឺរ៉ុប​ដក​ប្រព័ន្ធ​នេះ​មែន ព្រោះ​ការបាត់បង់ EBA នឹង​ធ្វើ​ឱ្យ​ឧស្សាហកម្ម​ស្រូវ​អង្ករ ត្រូវ​បំផ្លាញ​ខ្ទេច​ខ្ចី និង​ធ្វើ​​ឱ្យ​ប៉ះពាល់​ធ្ងន់ធ្ងរ​ដល់​ប្រជាកសិករ ខ្មែរ​ជាង​កន្លះ​លាន​គ្រួសារ ដែល​ស្មើនឹង​រាប់​លាន​នាក់​។ ស្ថាប័ន​ធំៗ​ទាំងនេះ បាន​អំពាវនាវ​សុំ​កុំ​ឱ្យ​សហភាព​អឺរ៉ុប ព្យួរ​ការ​អនុគ្រោះ​ពន្ធ​នេះ​ឱ្យ​សោះ​។ ប៉ុន្តែ ការ​អំពាវនាវ​ទៅ​សហភាព​អឺរ៉ុប ដែល​មិនមែន​ជា​អ្នកធ្វើ​ឱ្យ​ស្ថានការណ៍​អាក្រក់​ដូច​បច្ចុប្បន្ន​នេះ រង​ការរិះគន់​ជុំ​ទិស​ដែរ ថា អេះ​មិន​ចំ​រមាស់។

ប្រធាន​សហភាព​សហជីព​កម្មករ ប្រធាន​សម្ព័ន្ធ​សហគមន៍​កសិករ​កម្ពុជា និង​អ្នកវិភាគ​ផង សុទ្ធតែ​យល់ថា ទាំង​សមាគម​រោងចក្រ​កាត់ដេរ និង សហព័ន្ធ​ស្រូវ​អង្ករ​កម្ពុជា គួរតែ​យក​ពេលវេលា​នេះ ទៅ​ជជែក​ជាមួយ​របប​ក្រុងភ្នំពេញ ឱ្យ​ស្ដារ​លទ្ធិប្រជាធិបតេយ្យ និង​ការ​គោរព​សិទ្ធិមនុស្ស​ឡើងវិញ ប្រសើរ​ជាង​លើក​កង្វល់​ទៅ​សហភាព​អឺរ៉ុប ព្រោះ​របប​លោក ហ៊ុន សែន ឯណោះ​ទៅវិញ​ទេ ដែល​ត្រូវ​ទទួលខុសត្រូវ​ចំពោះ​ការណ៍​ដែល​ធ្វើ​ឱ្យ​ប្រទេស​កម្ពុជា ធ្លាក់​ដល់​កម្រិត​បែបនេះ។

តំណាង​ជាន់ខ្ពស់​ទទួលបន្ទុក​កិច្ចការ​បរទេស និង​គោលនយោបាយ​សន្តិសុខ និង​ជា​អនុប្រធាន​ស្នងការ​អឺរ៉ុប អ្នកស្រី ហ្វេដេរីកា ម៉ូហ្គែរីនី (Federica Mogherini) បញ្ជាក់​ប្រាប់​សារព័ត៌មាន​ជប៉ុន នៅ​ចុងខែ​កក្កដា​កន្លង​ទៅ​នេះ ថា​ជំហរ​របស់​សហភាព​អឺរ៉ុប គឺ​នៅតែ​ដដែល គឺ​ស្ថានភាព​រំលោភ​សិទ្ធិ​មនុស្ស និង ប្រជាធិបតេយ្យ​នៅតែ​មិន​ប្រសើរ​។ ទោះជា​យ៉ាង​នេះ​ក្តី អ្នកស្រី​ថា បង្ហើប​ថា របប​លោក ហ៊ុន សែន នៅ​មិនទាន់​យឺត​ពេល​នៅឡើយ​ទេ បើ​ប្រញាប់​ស្ដារ​សិទ្ធិមនុស្ស និង ប្រជាធិបតេយ្យ​ឡើងវិញ​នៅ​ពេល​នេះ បើ​ចង់​បញ្ចៀស​ការ​ព្យួរ​អនុគ្រោះ​ពន្ធ​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល