លោកនាយករដ្ឋមន្ត្រី ហ៊ុន សែន បានថ្លែងសារនយោបាយ ៦ទំព័រ រៀបរាប់ពីចំណុចវិជ្ជមាន ក្រោមការដឹកនាំរបស់លោកជាង ៤០ឆ្នាំមកនេះ ធ្វើឱ្យពលរដ្ឋកម្ពុជាទទួល បានសុខសន្តិភាពពេញលេញ និងរីកចម្រើនគ្រប់វិស័យ។ លោក ហ៊ុន សែន បានអរគុណពលរដ្ឋខ្មែរ គាំទ្រសារនយោបាយរបស់លោក ប៉ះចំទិវាសន្តិភាពពិភពលោក លើកទី ៥៥ ដែលប្រារព្ធនៅថ្ងៃទី២១ ខែកញ្ញានេះ។ ក៏ប៉ុន្តែពលរដ្ឋថ្លែងថា សារនយោបាយនេះ ប្រាស់ចាកពីការពិត ព្រោះបច្ចុប្បន្នកម្ពុជាមានសុខសន្តិភាពសម្រាប់តែ មនុស្សមួយក្រុម តូចប៉ុណ្ណោះ។
ក្រុមពលរដ្ឋរស់នៅរាជធានីភ្នំពេញ និងតាមខេត្តនានា បង្ហាញទស្សនទានផ្សេងៗ គ្នា តាមបណ្ដាញសង្គម ឆ្លើយតបចំពោះសារនយោបាយរបស់លោក ហ៊ុន សែន អរគុណសន្តិភាព ចំថ្ងៃដែលពិភពលោក ប្រារព្ធទិវាសន្តិភាព។ ពលរដ្ឋខ្លះ ហាក់ខ្លាចញញើតមិនហ៊ានសម្ដែងមតិអំពីបញ្ហានេះ ព្រោះខ្លាចរដ្ឋាភិបាលចាប់ដាក់គុក ឯពលរដ្ឋខ្លះទៀតមិនគាំទ្រ ពាក្យអរគុណសន្តិភាពរបស់លោក ហ៊ុន សែន នោះទេ។ ពួកគេមើលឃើញថា រដ្ឋាភិបាលស្នេហាសន្តិភាពមិនស្មោះត្រង់នោះទេ ព្រោះបានរាំងខ្ទប់ និងចាប់ចងក្រុមយុវជនការពារបរិស្ថាន និងរឹតត្បិតពលរដ្ឋ មិនឱ្យធ្វើការងារសង្គមឱ្យបានទូលំទូលាយ ជាពិសេស គឺធ្វើបាបសកម្មជនបក្សប្រឆាំង។
ពលរដ្ឋរស់នៅរាជធានីភ្នំពេញ លោក វឿន វាសនា ថ្លែងថា សុខសន្តិភាពទទួលបាន តែសម្រាប់ក្រុមគ្រួសារ លោក ហ៊ុន សែន និងបក្ខពួករបស់គាត់ប៉ុណ្ណោះ។ ក៏ប៉ុន្តែសម្រាប់ពលរដ្ឋភាគច្រើនកំពុងរងទុក្ខវេទនា ទាំងចិត្ត និងកាយ ដោយសារមន្ត្រីរដ្ឋាភិបាលធ្វើបាបរួមមាន រំលោភដីធ្លី កាប់បំផ្លាញព្រៃឈើ និងមិនដោះស្រាយក្តីកង្វល់របស់ពលរដ្ឋជាដើម។ លោកបញ្ជាក់ថា មើលពីខាងក្រៅពលរដ្ឋភាគច្រើន បង្ហាញទឹកមុខញញឹមរីករាយ ក៏ប៉ុន្តែក្នុងចិត្តរបស់ពួកគេ បង្កប់នូវក្តីព្រួយបារម្ភ ដោយសារ ភាពអយុត្តិធម៌សង្គម ការចាប់ចងយុវជន និងសកម្មជននយោបាយដាក់គុក តាមតែអំពើចិត្តយ៉ាងអយុត្តិធម៌៖ « សន្តិភាពតែបក្ខពួក សង្គមក្រុមគ្រួសារគាត់តែប៉ុណ្ណោះ តែពលរដ្ឋរងទុក្ខវេទនា ហូរទឹកភ្នែកយំរាល់ថ្ងៃដោយសារតែ មន្ត្រីឈូសឆាយដីផ្ទះសម្បែងរបស់គាត់ គឺរដ្ឋាភិបាល អត់ដែរបានមានដំណោះស្រាយជូនពួកគាត់នោះទេ អ៊ីចឹងសង្គ្រាមផ្លូវចិត្តរបស់ពួកគាត់ស្ទើរតែបែកហើយ គឺសន្តិភាពផេះ » ។
សារនយោបាយរបស់ លោក ហ៊ុន សែន ថ្លែងអរគុណពលរដ្ឋខ្មែរ បង្កប់នូវមោទនភាព ក្រោមម្លប់សន្តិភាពមិនសាបសូន្យ បូកផ្សំទាំងអតីតកាល បច្ចុប្បន្ន និងអនាគត។ លោកថា កម្ពុជាទទួលបានសុខសន្តិភាព និងឯកភាពជាតិពេញលេញ អស់រយៈពេល ២ទសវត្សរ៍កន្លងមក ក្រោយពីឆ្លងកាត់ភ្នក់ភ្លើងសង្គ្រាម។
យុវជនរស់នៅខេត្តស្វាយរៀង លោក ឯម សុខសុវណ្ណ យល់ថា សន្តិភាពកើតមានតែមនុស្សមួយចំនួនតូចប៉ុណ្ណោះ ដែលធ្វើគថ្លង់ គាំទ្ររដ្ឋាភិបាល ដើម្បីយសតំណែង ក៏ប៉ុន្តែសម្រាប់ពលរដ្ឋណាដែលមានទស្សនផ្ទុយពីរដ្ឋាភិបាល បានភៀសខ្លួនរស់ចោលស្រុក ព្រាត់ប្រាសគ្រួសារ និងខ្លះទៀត ដេកគុកជាដើម។ លោកថា ដើម្បីឱ្យកម្ពុជា មានសុខសន្តិភាពពិតប្រាកដ រដ្ឋាភិបាល ត្រូវតែឱ្យមានការផ្សះផ្សាជាតិ ដោយត្រូវច្របាច់បញ្ចូលគ្នា គ្រប់និន្នាការនយោបាយទាំងអស់ ពុំមែនដឹកនាំប្រទេស ក្នុងរបបឯកបក្សដូចសព្វថ្ងៃនោះទេ៖ « ពលរដ្ឋទាំងអស់ ដែលធ្លាប់មានអ្នកតំណាងរបស់គាត់ កាលពីឆ្នាំ២០១៣ ពាក់កណ្ដាលប្រទេសដែរហ្នឹង អ្នកខ្លះរត់ចោលស្រុក អ្នកខ្លះក៏ជាប់គុកទៅ ដូច្នោះហើយ សន្តិភាពបានតែមនុស្សមួយចំនួន។ មនុស្សមួយចំនួនទៀតដែលមានទស្សនផ្ទុយទៅជាអត់ទទួលបានវិញ។ វាអត់បានទូលាយទាំងអស់គ្នា។ អ្វីដែលចង់បានកាលណាសន្តិភាពត្រូវសន្តិភាពចំពោះពលរដ្ឋទាំងអស់ មិនមែនផ្នែកណាមួយ ដែលមានមតិស្របតែខ្លួនឯងទេ » ។
ស្រដៀងគ្នានេះ ពលរដ្ឋរស់នៅខេត្តសៀមរាប លោក សែម វ៉ាន់ យល់ថា កម្ពុជាសព្វថ្ងៃគ្មានសន្តិភាពនោះទេ ព្រោះពលរដ្ឋភាគច្រើនមិនហ៊ានបញ្ចេញមតិរិះគន់រដ្ឋាភិបាល។ លោកថា ពលរដ្ឋបច្ចុប្បន្នកំពុងធ្វើគរថ្លង់ មិនហ៊ានសម្ដែងទស្សននយោបាយ ព្រោះពួកគេភ័យខ្លាច ប្រជាការពារភូមិ និងអាជ្ញាធរមូលដ្ឋានតាមដាន និងធ្វើទុក្ខបុកម្នេញ៖ « សព្វថ្ងៃអត់មានសន្តិភាពទេ សន្តិភាពតែបបូរមាត់ សន្តិភាពតែសំបកក្រៅទេ ប្រជាជនបញ្ចេញមតិការងារអីអត់បានទេ។ ប្រជាជនអត់ហ៊ាននិយាយអីទេ ធ្វើតែគរថ្លង់ និងខ្លាចដោយសារយើងខ្លាច បើយើងនិយាយ គេមានប្រជាការពារគេ ដើរស៊ើប។
ចំណែកពលរដ្ឋរស់នៅខេត្តស្ទឹងត្រែង លោក ថាន់ វ៉ន ឆ្ងល់ថា រដ្ឋាភិបាលចាត់ទុក ពាក្យសន្តិភាពសំខាន់ ក៏ប៉ុន្តែហេតុអ្វីមិនដាក់ទោសទណ្ឌ ចំពោះអ្នកកាប់បំផ្លាញព្រៃឈើ និងរុករានទន្ទ្រានដីព្រៃរបស់រដ្ឋអស់រាប់ពាន់ហិកតារ។ លោកថា អ្នកការពារបរិស្ថាន និងព្រៃឈើ បែរត្រូវមានទោស និងរងការគំរាមកំហែងគ្រប់រូបភាព ឯអ្នកបំផ្លាញព្រៃឈើ បែររួចខ្លួនទៅវិញ៖ « សន្តិភាពមិនមែនអត់ទេមាន តែពាក្យសន្តិភាពមានតែចង្កោមមួយផ្សេង។ បើគាំទ្ររដ្ឋាភិបាលទោះបីជាកាប់ឈើហាលវាលក៏គេនៅតែគាំទ្រ។ ជាក់ស្ដែងខ្ញុំរាល់ថ្ងៃ ខ្ញុំអ្នកការពារបែរជាខុស ដល់អ្នកកាប់ឈើបែរជាត្រូវវិញ។ គេកំពុងចោទប្រកាន់ខ្ញុំខ្លាំងណាស់រាល់ថ្ងៃ គេថា ឱ្យតែខ្ញុំផ្តល់បទសម្ភាសដល់អាស៊ីសេរី គេចាប់ដាក់គុក ខ្ញុំថា ដាក់អីក៏ដាក់ទៅ » ។
ប្រធានគណបក្សប្រជាធិបតេយ្យមូលដ្ឋាន លោក យេង វីរៈ បានបង្ហោះសារតាមទំព័រហ្វេសប៊ុក របស់ខ្លួនថា បើទោះបីជាកម្ពុជា ពុំមានជម្លោះប្រដាប់អាវុធក្តី ក៏ប៉ុន្តែ សុខសន្តិភាពពេញលេញ លុះត្រាតែសង្គមគោរពសិទ្ធិមនុស្ស រស់នៅពុំមានភាពភ័យខ្លាច និងមានយុត្តិធម៌សម្រាប់មនុស្សគ្រប់ៗ រូប។ ចំណែកនាយិកាមជ្ឈមណ្ឌលសិទ្ធិមនុស្សកម្ពុជា (CCHR) អ្នកស្រី ចក់ សុភាព ក៏បានបង្ហោះសារក្នុងហ្វេសប៊ុករបស់អ្នកស្រីថា ការតម្កល់សន្តិភាពជាគោល គួរតែបញ្ចប់ការលាបពណ៌ ចោទប្រកាន់ ចាប់ចង បញ្ឆេះ ដុតរោល និងជួយដាស់សតិឲ្យខ្មែររួបរួមគ្នា ធ្វើកិច្ចការដើម្បីទទួលបាននូវសន្តិភាពពេញលេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។