ព័ត៌មាន​សំខាន់ៗ​ចំនួន ៩ ដែល​លោក​អ្នកនាង​គួរ​អាន​នៅ​ថ្ងៃអង្គារនេះ

. អង្គការ​ឃ្លាំមើល​សិទ្ធិ​មនុស្ស​ចេញ​​របាយការណ៍​​​​បង្ហាញ​​ពី​​រដ្ឋាភិបាល​​កម្ពុជា​​ប្រើការ​រីក​រាល​ដាល​នៃ​ជំងឺកូវីដ១៩ ដើម្បី​រំលាយ​សហជីព

អង្គការ​ឃ្លាំមើល​សិទ្ធិមនុស្ស​អន្តរជាតិ បាន​ចេញ​របាយការណ៍​មួយ​នៅ​ថ្ងៃ​ទី២១ ខែវិច្ឆិកា ដោយ​បាន​បង្ហាញ​ថា រដ្ឋាភិបាល​កម្ពុជា​ប្រើប្រាស់​ការ​រីក​រាលដាល​នៃ​ជំងឺកូវីដ១៩ ដើម្បី​រំលាយ​សហជីព។ អង្គការ​នេះ​អំពាវនាវ​ដល់​សហគមន៍​អឺរ៉ុប និង​អាមេរិក ដាក់​សម្ពាធ​លើ​រដ្ឋាភិបាល​កម្ពុជា​បន្ថែម​ទៀត។ មន្ត្រី​អង្គការ​សង្គម​ស៊ីវិល​យល់​ឃើញ​ថា របាយការណ៍​របស់​អង្គការ​ឃ្លាំមើល​សិទ្ធិមនុស្ស​អន្តរជាតិ​នេះ ឆ្លុះ​បញ្ចាំង​ពី​ការ​ពិត និង​ជំរុញ​ឱ្យ​រដ្ឋាភិបាល​កម្ពុជា​លើក​កម្ពស់​ការ​អនុវត្ត​ច្បាប់​ ស្ដីពី ​ការងារ​ ឡើងវិញ ដើម្បី​ទទួល​បាន​អត្ថ​ប្រយោជន៍ ដូចជា ​ការ​អនុគ្រោះ​ពន្ធ​ផ្សេង​ៗ ​ពី​បណ្ដា​ប្រទេស​ប្រជាធិបតេយ្យ។ អានព័ត៌មានពិស្តារ ...

. លោក ហ៊ុន សែន ថាប្រមុខ​ការពារជាតិ​ចិននិង​អាមេរិក​នឹង​ជួប​គ្នា​នៅ​សៀមរាប

លោក​នាយករដ្ឋមន្រ្តី ហ៊ុន សែន អះអាងថា នឹង​មាន​ជំនួប​រវាង​រដ្ឋមន្រ្តីការពារជាតិ​សហរដ្ឋអាមេរិក លោក ឡយដ៍ អូស្ទីន (Lloyd J. Austin) និង​រដ្ឋមន្រ្តីការពារជាតិ​ចិន​លោក វ៉ៃ ហ្វេងហេ (Wei Fenghe) ​នៅ​លើ​ទឹកដី​ខេត្តសៀមរាបអំឡុងពេល​មេទ័ពនៃ​ប្រទេស​មហាអំណាច​ទាំង២​ចូលរួម​កិច្ចប្រជុំ​រដ្ឋមន្ត្រី​ការពារ​ជាតិ​អាស៊ាន​បូក​លើកទី៩​ជាមួយ​ដៃគូពាក់ព័ន្ធ (ADMM Plus)។

លោក ហ៊ុន សែន បង្ហើបព័ត៌មាននេះ​នៅពេលដែល​លោកថ្លែងបើក​កម្មវិធី​បើកការ​ប្រកួត​កីឡា​ជាតិ​លើកទី៣​និង​កីឡា​ជនពិការ​លើកទី១នៅ​ពហុកីឡដ្ឋានជាតិ​មរតកតេជោកាលពី​ល្ងាច​ថ្ងៃចន្ទ ទី២១ ខែវិច្ឆិកា ម្សិលម៉ិញ។ កម្ពុជាកំពុងរៀបចំ​កិច្ចប្រជុំ​ចង្អៀត​រដ្ឋមន្ត្រីការពារជាតិ​អាស៊ាន​លើកទី៩និង​កិច្ចប្រជុំរដ្ឋមន្ត្រី​ការពារជាតិ​អាស៊ាន​បូក​លើកទី​៩​ជាមួយ​ដៃគូពាក់ព័ន្ធ (ADMM Plus) នៅ​ខេត្តសៀមរាបដែល​ប្រព្រឹត្តទៅ​ពីថ្ងៃទី២១ ដល់ថ្ងៃទី២៣ ខែវិច្ឆិកា។

. រដ្ឋាភិបាល​កម្ពុជានិង​ចិនបង្កើន​ការ​ពង្រឹង​កិច្ចសហប្រតិបត្តិការ​វិស័យ​កងទ័ពស្របពេល​អាមេរិក​នៅ​តែ​បន្តសង្ស័យ​អំពី​មូលដ្ឋាន​ទ័ព​ចិន​នៅ​កម្ពុជា

ក្រុមអ្នក​ឃ្លាំមើល លើកឡើងថា រដ្ឋមន្រ្តីការពារ​ជាតិ​ចិន​លោក វ៉ៃ ហ្វេង ហេ (Wei Feng He) មក​បំពេញ​ទស្សនកិច្ច​នៅ​កម្ពុជា​កំពុង​ពង្រីក​ឥទ្ធិពល​ខ្លួនមក​លើ​កម្ពុជា​កាន់​តែខ្លាំង​ឡើង។ លោក វ៉ៃ ហ្វេង ហេ បាន​ជួប​ពិភាក្សា​ការងារ​ជាមួយ​លោក ហ៊ុន សែន កូនប្រុសច្បង​របស់​លោក​គឺ​លោក ហ៊ុន ម៉ាណែត និង​រដ្ឋមន្ត្រីការពារជាតិ លោក ទៀ បាញ់ ក្នុងក្របខណ្ឌ​ពង្រឹង​វិស័យ​កងទ័ព​នៃ​ប្រទេស​ទាំងពីរស្របពេល​អាមេរិក​នៅតែ​បន្តសង្ស័យ​អំពី​ការ​សាងសង់​មូលដ្ឋានទ័ព​ចិន​នៅ​កម្ពុជា។ អានព័ត៌មានពិស្តារ ...

. ប្រតិកម្មរបស់​សកម្មជន​បរិស្ថាន​ទៅ​នឹង​រដ្ឋាភិបាល​កម្ពុជា​ដែល​ទាមទារ​ឱ្យ​អាមេរិក​ដោះលែង​មន្ត្រី​ជាន់ខ្ពស់​ក្រសួង​កសិកម្ម​រឿង​ជួញដូរ​សត្វស្វា

សកម្មជន​បរិស្ថានរិះគន់​រដ្ឋាភិបាល​លោក ហ៊ុន សែន ថា ការស្នើសុំ​ឱ្យ​រដ្ឋាភិបាល​អាមេរិក​ដោះលែង​មន្ត្រីជាន់ខ្ពស់​ក្រសួង​កសិកម្ម​ជុំវិញ​ករណី​ជួញដូរ​សត្វស្វា​ក្តាម​ខុស​ច្បាប់​គឺជារឿងគួរ​ឱ្យ​អាម៉ាស់​សម្រាប់​កម្ពុជា។ ពួកគាត់ថា រដ្ឋាភិបាល​កម្ពុជា​គួរ​សហការ​ជាមួយ​អាមេរិកដំណើរការ​នីតិវិធី​តាម​ផ្លូវ​ច្បាប់​ដើម្បី​រក​ការ​ពិតប្រសើរ​ជាង​ប្រកែកមិន​ទទួល​ស្គាល់​កំហុស។ អ្នកសិក្សា​ផ្នែក​ច្បាប់​យល់​ថាក្រសួង​កសិកម្ម​គួរស្វែង​រក​ភស្តុតាង​បញ្ជាក់ថា មន្ត្រីរបស់ខ្លួន​គ្មាន​កំហុសនិង​សហការ​ជាមួយ​តុលាការ​អាមេរិក​ទៅតាម​ផ្លូវ​ច្បាប់។ អានព័ត៌មានពិស្តារ ...

. មន្ត្រីសង្គមស៊ីវិល និង​យុវជនទទូច​ឱ្យអាជ្ញាធរ​ស្វែងរក​យុត្តិធម៌ជូន​អតីត​សកម្មជន​បក្ស​សង្រ្គោះជាតិ លោក ស៊ិន ខុន

អង្គការ​សង្គមស៊ីវិលនិង​យុវជន​ទទូច​ដល់​អាជ្ញាធរ​ពាក់ព័ន្ធ​ឱ្យ​ស្វែងរក​យុត្តិធម៌ជូនអតីត​សកម្មជន​បក្ស​សង្រ្គោះ​ជាតិ​ដែល​បាន​ស្លាប់អស់​រយៈពេល​១​ឆ្នាំខណៈដែល​ពេល​នេះ​នៅ​មិនទាន់​រក​ឃើញ​មុខ​ឃាត់​ករ​ពិតប្រាកដ​នៅ​ឡើយ។ពួកគេថា បើសិនជា​អាជ្ញាធរ​មិន​ស្រាវជ្រាវ​រក​ឃាតករ​ពិត​មក​ផ្ដន្ទាទោស​តាម​ច្បាប់​ទេ​នោះកាន់តែ​បង្ហាញថា ឃាត់កម្ម​នេះ​ជា​រឿង​នយោបាយ​ជាជាង​គំនុំ​បុគ្គល។ អានព័ត៌មានពិស្តារ ...

. មជ្ឈមណ្ឌល​សិទ្ធិមនុស្ស​ធ្វើយុទ្ធនាការ ​១៦​ថ្ងៃ​ដើម្បី​លុបបំបាត់​អំពើ​ហិង្សា​លើ​ស្ត្រី

មជ្ឈមណ្ឌល​សិទ្ធិមនុស្សកម្ពុជាគ្រោង​ធ្វើយុទ្ធនាការ​លុបបំបាត់​អំពើហិង្សា​លើ​ស្ត្រី រយៈពេល ១៦ថ្ងៃ ចាប់​ផ្ដើមពី​ថ្ងៃទី២៥ ខែវិច្ឆិកា ដែល​ចំថ្ងៃទិវា​អន្តរជាតិ​ដើម្បី​លុប​បំបាត់​អំពើ​ហិង្សា​លើ​ស្ត្រីរហូត​ដល់​ថ្ងៃទី១០ ខែធ្នូ។ យុទ្ធនាការ​រយៈពេល​១៦ថ្ងៃ​នេះមជ្ឈមណ្ឌល​សិទ្ធិមនុស្ស​កម្ពុជានឹង​លើក​កម្ពស់​ការ​យល់ដឹង​ពី​សិទ្ធិស្ត្រីផលប៉ះពាល់​នៃ​អំពើ​ហិង្សា​ទាក់ទង​នឹង​យេនឌ័រ​ក្នុង​សហគមន៍និង​អំពាវនាវ​ដល់​រដ្ឋាភិបាល​ឲ្យ​ចាត់​វិធានការ​ជាក់​លាក់​បន្ទាន់ដើម្បី​លុបបំបាត់​អំពើហិង្សា​ទាក់ទង​នឹង​យេនឌ័រនិង​លើកកម្ពស់​សមភាពយេនឌ័រ​នៅ​កម្ពុជា។

សេចក្ដីប្រកាស​ព័ត៌មាន​របស់​មជ្ឈមណ្ឌល​សិទ្ធិមនុស្សកម្ពុជា​ផ្សាយ​កាលពីថ្ងៃទី២១ ខែវិច្ឆិកា បញ្ជាក់​ថាតាមការ​ប៉ាន់​ស្មានមាន​ស្ដ្រី​ម្នាក់​ក្នុង​ចំណោម ៥នាក់ ត្រូវបាន​ដៃ​គូរបស់​ខ្លួន​ប្រើ​ហិង្សា។ ប្រភព​ដដែល​បញ្ជាក់​ថាការប៉ាន់ស្មាន​នេះគឺចាប់​ផ្ដើម​តាំងពី​ការ​រាតត្បាត​កូវីដ១៩៕

. ពលរដ្ឋ​ប្រមាណ​៧៤​គ្រួសារ​នៅ​ខេត្តបាត់ដំបងសុំអន្តរាគមន៍​ពី​អាជ្ញាធរក្រោយ​ទីប្រឹក្សា​ឧបនាយករដ្ឋមន្ត្រី យឹម ឆៃលី ធ្វើ​របង​ដី​បិទ​ផ្លូវ

ពលរដ្ឋរស់​នៅ​ខេត្តបាត់ដំបង​ប្រមាណ​៧៤គ្រួសារស្នើអាជ្ញាធរ​ឃុំតាគ្រៃ​អន្តរាគមន៍​បើក​ផ្លូវ​ចេញ​ចូល​ផ្ទះ​ខណៈ​ទីប្រឹក្សា​ឧបនាយករដ្ឋមន្ត្រី យឹម ឆៃលី គឺ លោក តូ ធានទឺ បានធ្វើរបងបិទផ្លូវ​មិនអោយ​ពលរដ្ឋ​ចេញ​ចូល។មន្ត្រីសង្គមស៊ីវិលយល់​ថា លោក តួ ធានទឺ គួរបើកផ្លូវ ហើយអាជ្ញាធរ​ពាក់ព័ន្ធ​គួរចុះ​ទៅ​ពិនិត្យ​ជាក់ស្ដែងដើម្បីសម្របសម្រួល​បើក​ផ្លូវ​ជូន​ដល់​ពលរដ្ឋ​ឡើងវិញ។ អានព័ត៌មានពិស្តារ ...

. ឆ្មាំអភរិក្ស​របស់​ក្រសួង​បរិស្ថាន​រងការ​ចោទ​ថាមិន​អើពើ​ការពារ​សត្វព្រៃក្នុង​ឧទ្យានជាតិ​ជួរភ្នំក្រវាញ់​កណ្តាល

ប្រជាសហគមន៍​ការពារ​សត្វព្រៃ​ខេត្តកំពង់ស្ពឺ​អះអាងថាឆ្មាំ​អភិរក្សរបស់​ក្រសួង​បរិស្ថានមិន​អើ​ពើ​អភិរក្ស​សត្វព្រៃដែល​កំពុង​ជួប​គ្រោះ​ថ្នាក់​ដល់​ជីវិត​ដោយ​សារ​ការដាក់​អន្ទាក់​ពង្រាយ​ពាស​ពេញ​តំបន់​ឧទ្យាន​ជាតិ​ជួរភ្នំក្រវាញ់​កណ្តាល។ ពួកគាត់អំពាវនាវ​ឱ្យ​រដ្ឋាភិបាលពិនិត្យពី​ប្រសិទ្ធភាព​ការងារ​របស់​ឆ្មាំ​អភិរក្ស​នៃក្រសួង​បរិស្ថាន​ឡើង​វិញដែលមិន​បាន​បំពេញ​តួនាទីនិង​ភារកិច្ចស្រប​តាម​ច្បាប់​នោះ​ទេ។ អានព័ត៌មានពិស្តារ ...

. គណៈកម្មការ​ទទួល​បន្ទុក​ផ្នែក​សេរីភាព​សាសនា​អន្តរជាតិ​សហរដ្ឋអាមេរិក (USCIRF) ជំរុញ​ឲ្យ​អាមេរិក​អន្តរាគមន៍​វៀតណាម​បញ្ឈប់​ការ​ធ្វើទុក្ខ​បុកម្នេញ​សិទ្ធិសាសនា​ខ្មែរ​ក្រោម

សហព័ន្ធខ្មែរ​កម្ពុជា​ក្រោម​និង​ពលរដ្ឋខ្មែរក្រោម​ស្វាគមន៍ស្ថាប័ន​ការពារ​សិទ្ធិសេរីភាព​ផ្នែកសាសនា​របស់​សហរដ្ឋ​អាមេរិកដែលបាន​ស្នើឲ្យ​រដ្ឋាភិបាលលោក​ប្រធានាធិបតី (Joe Biden) អន្តរាគមន៍​ទៅរដ្ឋាភិបាល​កុម្មុយនិស្ត​វៀតណាម​ឲ្យបញ្ឈប់ការ​ធ្វើទុក្ខ​បុកម្នេញ​សេរីភាព​សាសនា​របស់​ជនជាតិដើម​ខ្មែរ​ក្រោម។ សំណើនេះ​ធ្វើឡើង​ដោយ​សារតែអាជ្ញាធរវៀតណាម​កំពុងស្វែងរក​គ្រប់វិធី​ដើម្បី​វាយកំទេច​សាលាឆទាន​របស់​ពលរដ្ឋក្រោមដែលបានកសាង​ដើម្បីប្រតិបត្តិ​ព្រះពុទ្ធសាសនា​និង​បង្រៀន​អក្សរខ្មែរ។ អានព័ត៌មានពិស្តារ ...

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។