លោក រ៉ុង ឈុន ទាមទារ​ឲ្យ​សាលាឧទ្ធរណ៍​ផ្ដល់​យុត្តិធម៌​ដល់​ក្រុម​គ្រូ​បង្រៀន ១១នាក់

ដោយ ហេង រស្មី
2020-02-26
អ៊ីម៉ែល
មតិ
Share
បោះពុម្ព
លោក​ រ៉ុង ឈុន​ ថ្លែង​ប្រាប់​ក្រុម​អ្នក​សារព័ត៌មាន​ពេល​យក​បណ្តឹងទៅ​ដាក់​នៅ​សាលាដំបូង​រាជធានី​ក្រុង​ភ្នំពេញ នៅ​ព្រឹក​ថ្ងៃទី១៦ ខែ​មករា ឆ្នាំ២០១៩។
លោក​ រ៉ុង ឈុន​ ថ្លែង​ប្រាប់​ក្រុម​អ្នក​សារព័ត៌មាន​ពេល​យក​បណ្តឹងទៅ​ដាក់​នៅ​សាលាដំបូង​រាជធានី​ក្រុង​ភ្នំពេញ នៅ​ព្រឹក​ថ្ងៃទី១៦ ខែ​មករា ឆ្នាំ២០១៩។
រូបថត​ពី​បណ្តាញ​សង្គម

ទីប្រឹក្សា​សមាគម​គ្រូ​បង្រៀន​ឯករាជ្យ​កម្ពុជា លោក រ៉ុង ឈុន បាន​ទាមទារ​ឱ្យ​សាលាឧទ្ធរណ៍​ផ្ដល់​យុត្តិធម៌​ដល់​ក្រុម​គ្រូ​បង្រៀន​ចំនួន ១១នាក់ ដែល​ត្រូវ​ក្រសួង​អប់រំ​បាន​លុប​ឈ្មោះ​ចេញ​ពី​ក្របខ័ណ្ឌ​គ្រូ​បង្រៀន។

លោក រ៉ុង ឈុន ដែល​មាន​ឈ្មោះ​ក្នុង​សំណុំ​រឿង​ទាំង ១១នាក់​បាន​អះអាង​ថា ប្រសិន​បើ​ផ្អែក​ទៅ​លើ​ច្បាប់​ក្រុម​គ្រូបង្រៀន​ទាំង ១១នាក់ នឹង​ត្រូវ​លើក​លែង​ការ​ចោទ​ប្រកាន់​ទាំង​ស្រុង ប៉ុន្តែ​សំណុំ​រឿង​នេះ​ទាក់​ទិន​ក្នុង​រឿង​នយោបាយ​ដូច្នេះ​លោក​ មិន​រំពឹង​ថា សាល​ឧទ្ធរណ៍ និង​ផ្ដល់​យុត្តិធម៌​ដល់​ពួក​គេ​ទេ៖ «រឿង​នេះ​ពាក់​ព័ន្ធ​នឹង​រឿង​នយោបាយ​ពីព្រោះ​អ្នក​ដែល​ត្រូវ​បាន​លុប​ឈ្មោះ​ហ្នឹង​សុទ្ធ សឹង​ជា​ក្រុម​ប្រឹក្សា​ខេត្ត​ក្រុម​ប្រឹក្សា​ ស្រុក​ ក្រុម​ប្រឹក្សា​ឃុំ​ ហើយ​រួម​ទាំង​រូប​ខ្ញុំ​ផង​ដែរ ដែល​ត្រូវ​បាន​លុប​ឈ្មោះ​ហ្នឹង»

សាលា​ឧទ្ធរណ៍​បាន​ចេញ​ដីកា​កោះ​ហៅ​ក្រុម​គ្រូបង្រៀន​ចំនួន ១១នាក់ ដែល​ក្នុង​នោះ​រួម​មាន​លោក​ រ៉ុង ឈុន អតីត​សមាជិក​គណៈកម្មាធិការ​ជាតិ​រៀប​ចំ​ការ​បោះ​ឆ្នោត អោយ​ចូល​រួម​សវនាការ​នៅ​ថ្ងៃ​ទៅ​០៣​ មីនា​ ខាង​មុខ​នេះ​ពាក់ព័ន្ធ​នឹង​បណ្ដឹង​បដិសេធ​ប្រកាស​ស្ដីពី​ការ​លុបឈ្មោះ​របស់​ក្រសួង​អប់រំ​ដែល​មាន​លោក ហង្ស ជួនណារ៉ុន ភាគី​ចុង​ចោទ​នោះ​ក្នុង​សំណុំ​រឿង​នេះ។

អាស៊ី​សេរី​មិន​អាច​ទាក់ទង​អ្នកនាំពាក្យ​ក្រសួង​អប់រំ លោក ឌី ខាំបូលី ដើម្បី​សុំ​ការ​ឆ្លើយតប​រឿង​ក្រុម​គ្រូបង្រៀន​ដាក់​បណ្ដឹង​ឧទ្ធរណ៍​នេះ​បានទេ កាលពី​​ថ្ងៃ​ទី​២៦ កុម្ភៈ ដោយ​លោក​មិន​លើក​ទូរស័ព្ទ។

ក្រសួង​អប់រំ យុវជន និង​កីឡា កាល​ពី​ដើម​ឆ្នាំ២០១៨ កន្លង​ទៅ​បាន​លុបឈ្មោះ​គ្រូបង្រៀន​ដែល​សុទ្ធ សឹង​ជា​អ្នក​និយម​​បក្ស​ប្រឆាំង​ចំនួន ១៣​នាក់ ចេញ​ពី​ក្របខ័ណ្ឌ ក្រោម​ហេតុផល​ថា ពួកគាត់​បាន​បោះបង់ចោល​ការងារ និង​មួយ​ចំនួន​ទៀត អវត្តមាន​ដោយ​គ្មាន​ច្បាប់​អនុញ្ញាត។

ក្នុង​ចំណោម​ ១៣នាក់ មាន​ក្រុម​គ្រូ​បង្រៀន ១១​នាក់ បាន​ដាក់​បណ្ដឹង​ទៅ​សាលាដំបូង​រាជធានី​ភ្នំពេញ​ដើម្បី​ដោះស្រាយ​ករណី​នេះ ក៏ប៉ុន្តែ​តុលា​ក្រុង​ភ្នំពេញ​​បានសម្រេច​តម្កល់​រឿង​ទុក​ឥត​ចាត់ការ កាលពី​ខែ​សីហា ឆ្នាំ​២០១៩។ ក្រុម​គ្រូបង្រៀន​ក៏បាន​ប្ដឹង​ទាស់​សេចក្ដី​សម្រេច​នេះ ហើយ​បច្ចុប្បន្ន​សំណុំ​រឿង​នេះ​ត្រូវ​បាន​សាលាឧទ្ធរណ៍​នឹង​បើក​សវនាការ​ជំនុំជម្រះ​នៅ​ដើម​ខែ មីនា​ខាង​មុខ។

កាលពី​ថ្ងៃ​ទី​២២ ខែ​មេសា ឆ្នាំ២០១៩ កន្លង​ទៅ សាលាដំបូង​រាជធានី​ភ្នំពេញ បាន​ចេញ​សាលក្រម​រដ្ឋប្បវេណី​ស្រប​ទៅ​តាម​សំណើ​របស់​តំណាង​ក្រសួង​អប់រំ ដោយ​បាន​លើក​ចោល​បណ្ដឹង​របស់​ក្រុម​គ្រូបង្រៀន ក្រោម​ហេតុផល​ថា បណ្ដឹង​នេះ​ធ្វើឡើង​ហួស​កាលកំណត់​នៃ​ច្បាប់។ ចំពោះ​ការ​លើក​ឡើង​របស់​ក្រុម​គ្រូបង្រៀន​អំពី​លិខិត​ស្នើសុំ​អន្តរាគមន៍ ដែល​ពួក​គេ​បាន​ដាក់​ជូន​ខុទ្ទកាល័យ​លោក​នាយក​រដ្ឋមន្ត្រី ហ៊ុន សែន និង​រដ្ឋមន្ត្រី​ក្រសួង​អប់រំ លោក ហង្ស ជួន ណារ៉ុន នោះ​វិញ តុលាការ​សម្រេច​ថា លិខិត​ទាំងនោះ​ពុំ​មាន​ភាព​ត្រឹម​ត្រូវ​តាម​ច្បាប់​ឡើយ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល