មន្ត្រីជាន់ខ្ពស់របស់គណបក្សកាន់អំណាចអះអាងថា គណបក្សនេះគ្មានការចរចានយោបាយណាមួយជាមួយនឹងមេដឹកនាំគណបក្សប្រឆាំងនៅមុនការបោះឆ្នោតឡើយ។ ទោះយ៉ាងណា ប្រធានស្តីទីគណបក្សសង្គ្រោះជាតិលោក សម រង្ស៊ី បានអំពាវនាវឱ្យប្រជាពលរដ្ឋខ្មែរត្រៀមនាំគ្នាចេញទៅបោះឆ្នោតថ្នាក់ជាតិនៅខែកក្កដា ឱ្យបានច្រើនដើម្បីផ្លាស់ប្ដូររដ្ឋាភិបាលរបស់លោក ហ៊ុន សែន ចេញពីការគ្រប់គ្រងអំណាចតាមបែបតវង្សត្រកូល។
ការបោះឆ្នោតជ្រើសរើសតាំងតំណាងរាស្ត្រ អាណត្តិទី៧ នឹងរៀបចំនៅកក្កដាខាងមុខនេះ ខុសពីអាណត្តិទី៦ ប្រធានស្តីទីគណបក្សសង្គ្រោះជាតិលោក សម រង្ស៊ី បានជំរុញឱ្យពលរដ្ឋត្រៀមខ្លួនចេញទៅបោះឆ្នោតដើម្បីការផ្លាស់ប្ដូរ។ ប៉ុន្តែគណបក្សកាន់អំណាចចាត់ទុកសាររបស់មេបក្សប្រឆាំងនោះថា ជាល្បិចកលនយោបាយ។
អ្នកនាំពាក្យគណបក្សប្រជាជនកម្ពុជាលោក សុខ ឥសាន ប្រាប់វិទ្យុអាស៊ីសេរីថា តាមរយៈស្នាដៃដឹកនាំប្រទេសរយៈពេល៦អាណត្តិកន្លងមកនេះ គណបក្សប្រជាជនមិនបារម្ភ ឬភ័យខ្លាចចរន្តពលរដ្ឋចេញទៅបោះឆ្នោតដើម្បីការផ្លាស់ប្ដូរ ដូចការលើកឡើងរបស់លោក សម រង្ស៊ី នោះទេ ពីព្រោះបក្សលោកព្យាករណ៍មុនការបោះឆ្នោតថា នឹងទទួលបានសំឡេងឆ្នោតយ៉ាងហោចជាង៧៥ភាគរយដែរ។ លោក សុខ ឥសាន អះអាងថា បច្ចុប្បន្នមេដឹកនាំគណបក្សកាន់អំណាចពុំចាំបាច់ត្រូវជួបចរចាដោះស្រាយវិបត្តិនយោបាយជាមួយមេដឹកនាំគណបក្សប្រឆាំងនៅក្រៅប្រទេសឡើយ។
លោក សុខ ឥសាន៖ «តួនាទីមិនអាចខ្វះបានក្នុងការដឹកនាំសង្គមកម្ពុជាដោយគណបក្សប្រជាជនកម្ពុជានៅតែប្រជាពលរដ្ឋគាំទ្រ ត្រូវការជាប់ជានិច្ច ជាពិសេស គឺការថែរក្សាឱ្យបាននូវសន្តិភាព ស្ថិរភាពនយោបាយ និងជីវភាពរស់នៅដោយសុខក្សេមក្សាន្តនៅក្នុងសង្គមកម្ពុជាដូចបច្ចុប្បន្ននៅមានការរីកចម្រើនតាមរយៈការកសាងអភិវឌ្ឍប្រទេសតាមកម្មវិធីនយោបាយរបស់គណបក្សប្រជាជនកម្ពុជា»។
ទោះយ៉ាងណាមន្ត្រីបក្សប្រឆាំងលើកឡើងថា លោក ហ៊ុន សែន មិនហ៊ានអនុញ្ញាតឱ្យលោក សម រង្ស៊ី និងថ្នាក់ដឹកនាំវិលចូលកម្ពុជាដើម្បីប្រកួតប្រជែងតាមរយៈការបោះឆ្នោតដោយសេរី ត្រឹមត្រូវ និងយុត្តិធម៌នោះទេ ពីព្រោះពួកគេមើលឃើញថា លោក ហ៊ុន សែន ភ័យខ្លាចចាញ់ការបោះឆ្នោត និងបារម្ភពីផែនការផ្ទេរអំណាចតពូជនៅពេលអនាគត។
ប្រតិកម្មនេះ ធ្វើឡើងបន្ទាប់ពីប្រធានស្តីទីគណបក្សសង្គ្រោះជាតិលោក សម រង្ស៊ី កាលពីថ្ងៃទី៣១ ខែមករា បានបង្ហោះវីដេអូ (Video) នៅលើទំព័រហ្វេសប៊ុកផ្ទាល់ខ្លួន ដោយលោកអំពាវនាវឱ្យពលរដ្ឋខ្មែរត្រៀមចេញទៅបោះឆ្នោតជ្រើសតាំងតំណាងរាស្ត្រ អាណត្តិទី៧ ដោយរក្សាឧត្តមគតិដើម ហើយកុំបារម្ភពីការលួចបន្លំសន្លឹកឆ្នោតតទៅទៀត។ លោក សម រង្ស៊ី លើកឡើងថា លោក ហ៊ុន សែន អាចគ្រប់គ្រងអំណាចរហូតដល់សព្វថ្ងៃដោយសារការលួចបន្លំសន្លឹកឆ្នោត ប៉ុន្តែលោកថា ដំណោះស្រាយដែលល្អបើសិនពលរដ្ឋខ្មែរចេញទៅបោះឆ្នោតនៅខែកក្កដាមានចំនួនច្រើនលើសលប់ដើម្បីឱ្យមានការផ្លាស់ប្ដូរ នោះលោក ហ៊ុន សែន មិនអាចប្រកែកនឹងឆន្ទៈពលរដ្ឋខ្មែរបានឡើយ។
លោក សម រង្ស៊ី៖ «បើយើងទៅបោះឆ្នោតទាំងអស់ សន្លឹកឆ្នោតដែលទាមទារឱ្យមានការផ្លាស់ប្តូរវាច្រើន ទោះបីខាង ហ៊ុន សែន លួចអត់អស់ទេ វាច្រើនពេក កាលពីគណបក្សសង្គ្រោះជាតិលួចប៉ុណ្ណឹងហើយ ពាក់កណ្តាលនគរ តែឥឡូវបើទាំងនគរយើងទាំងមូលទៅបោះឆ្នោតដើម្បីដេញ ហ៊ុន សែន ចេញ ខ្ញុំជឿថា ចង់លួចសន្លឹកឆ្នោតប៉ុន្មានក៏លួចអត់អស់ដែរ ហើយអ្វីដែលនៅសល់នៅតែជាសន្លឹកឆ្នោតអ្នកស្នេហាជាតិ អ្នកប្រជាធិបតេយ្យដដែល»។
កម្ពុជានឹងរៀបចំការបោះឆ្នោតជាតិជ្រើសតាំងតំណាងរាស្ត្រអាណត្តិទី៧ នៅថ្ងៃអាទិត្យ ទី២៣ ខែកក្កដា ឆ្នាំ២០២៣។ គណៈកម្មាធិការជាតិរៀបចំការបោះឆ្នោត (គ.ជ.ប) នៅតែរងការរិះគន់ពីសហគមន៍ជាតិ និងអន្តរជាតិថា ជាស្ថាប័នពុំឯករាជ្យ មិនអព្យាក្រឹត្យ និងមាននិន្នាការគាំទ្រគណបក្សកាន់អំណាច ខណៈក្បាលម៉ាស៊ីន ថ្នាក់ដឹកនាំ និងមន្ត្រីជាន់ខ្ពស់នៃស្ថាប័នជាតិមួយនេះ ភាគច្រើនសុទ្ធតែជាមនុស្សចេញពីជួរមន្ត្រីជាន់ខ្ពស់របស់គណបក្សប្រជាជនកម្ពុជា។
ជុំវិញរឿងនេះ អ្នកជំនាញវិទ្យាសាស្ត្រនយោបាយ លោក ឯម សុវណ្ណារ៉ា មើលឃើញថា សារអំពាវនាវរបស់លោក សម រង្ស៊ី ឱ្យពលរដ្ឋទៅបោះឆ្នោតនៅពេលខាងមុខនេះ គឺជាសញ្ញាវិជ្ជមានទាំងបន្ធូរបន្ថយបរិយាកាសនយោបាយ និងជំរុញឱ្យពលរដ្ឋដែលធ្លាប់បោះបង់ឱកាសដោយសារពុំមានជំនឿលើស្ថាប័នបោះឆ្នោតងាកទៅបោះឆ្នោតវិញ។ ទោះយ៉ាងណា លោកយល់ថាការចរចានយោបាយវាងមេដឹកនាំគណបក្សប្រជាជន និងមេដឹកនាំគណបក្សប្រឆាំងអាចកើតឡើងបានលុះត្រាតែកម្លាំងរបស់អ្នកប្រជាធិបតេយ្យមានសន្ទុះ ឬប្រហាក់ប្រហែលនឹងកម្លាំងរបស់បក្សកាន់អំណាចក្នុងលទ្ធផលនៃការបោះឆ្នោតខាងមុននេះ។
លោក ឯម សុវណ្ណារ៉ា៖ «ចរន្តនៃការអំពាវនាវរបស់លោក សម រង្ស៊ី និងកម្លាំងគណបក្សភ្លើងទៀនអាចស្ទុះឡើង ឬហៅថាកម្លាំងប្រជាធិបតេយ្យ និងបញ្ញវន្ត បញ្ញាជនផ្សេងៗបានចូលរួមច្រើននោះ ខ្ញុំគិតថាកម្លាំងប្រកួតប្រជែងអាចមកប្រហាក់ប្រហែលគ្នា ឬអាចប្រកួតប្រជែងគ្នាបាន ប៉ុន្តែស្ថានភាពបច្ចុប្បន្នយើងពិបាកសង្ឃឹមណាស់ តែក៏ជាចរន្តមួយដែរ ថ្វីត្បិតតែនៅក្នុងស្ថានភាពហ្នឹងលោក សម រង្ស៊ី គិតថាពេលដែលពលរដ្ឋចូលរួមបោះឆ្នោតនឹងតាមដាននូវលទ្ធផល និងដំណើរការរាប់សន្លឹកឆ្នោតដោយមិនទុកឱ្យគណៈកម្មាធិការជាតិរៀបចំការបោះឆ្នោតរាប់តែឯងទេបាទ»។
គិតមកទល់ពេលនេះ គណបក្សកាន់អំណាច បានអនុវត្តយុទ្ធនាការគាស់រម្លើងប្រជាធិបតេយ្យអស់រយៈពេលជាង៥ឆ្នាំហើយចាប់តាំងពីការរម្លាយគណបក្សសង្គ្រោះជាតិកាលពីចុងឆ្នាំ២០១៧មក។ យុទ្ធនាការនេះ ត្រូវបានក្រុមអ្នកតាមដានសង្គម និងនយោបាយកម្ពុជាមើលឃើញថា ធ្វើឡើងដើម្បីធានាជ័យជម្នះទុកជាមុនសម្រាប់គណបក្សកាន់អំណាច។ យុទ្ធនាការនេះ ទំនងជាបន្តទៅទៀតក្នុងឆ្នាំ២០២៣នេះ ស្របពេលកម្ពុជាត្រៀមរៀបចំការបោះឆ្នោតជាតិជ្រើសតាំងតំណាងរាស្ត្រអាណត្តិទី៧ ហើយលោកនាយករដ្ឋមន្ត្រី ហ៊ុន សែន កំពុងអនុវត្តផែនការផ្ដាច់ព្រ័ត្រនៃការផ្ទេរអំណាចទៅឱ្យកូនៗរបស់លោក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។