លោក សម រង្ស៊ី អះអាង​ថា លោក​នៅ​តែ​ប៉ុនប៉ង​រក​ច្រក​វិល​ទៅ​កម្ពុជា​វិញ ឲ្យ​បាន​ក្នុង​ពេល​ឆាប់ៗ នេះ

ដោយ មួង ណារ៉េត
2019.11.16
សម រង្ស៊ី លោក សម រង្ស៊ី ប្រធាន​ស្ដីទី​គណបក្ស​សង្គ្រោះ​ជាតិ
រូម៖

ប្រធាន​ស្តីទី​គណបក្ស​សង្គ្រោះ​ជាតិ​លោក សម រង្ស៊ី អះអាង​ថា លោក​នៅ​តែ​ប៉ុនប៉ង​រក​ច្រក​វិល​ទៅ​កម្ពុជា​វិញ​ ឲ្យ​បាន​ក្នុង​ពេល​ឆាប់ៗ នេះ។ លោក​បញ្ជាក់​ថា លោក និង​មន្រ្តីបក្ស​ប្រឆាំង​ដទៃ​ទៀត កំពុង​ប្រើ​មធ្យោបាយ​ការ​ទូត ដើម្បី​ជួយ​អន្តរាគមន៍​សម្រួល​ដំណើរ​មាតុភូមិ​និវត្តន៍​នេះ ស្រប​ពេល​ដែល​របប​ក្រុង​ភ្នំពេញ​កំពុង​រង​សម្ពាធ​ជុំ​ទិស។

លោក សម រង្ស៊ី បន្ត​អំពាវនាវ​ឲ្យ​ពលរដ្ឋខ្មែរ​ បន្ត​អត់ធ្មត់​បន្តិច​ទៀត។ លោក​ថា គណបក្ស​សង្គ្រោះ​ជាតិ ជិត​ទទួល​បាន​ជ័យជំនះហើយ។

លោក សម រង្ស៊ី ដែលកំពុង​មាន​វត្តមាន​នៅ​ប្រទេស​អាស៊ាន ក្បែរៗ ប្រទេស​កម្ពុជា​នៅ​ឡើយ ផ្តល់​បទ​សម្ភាសន៍​ជាមួយ​នឹង​អាស៊ី​សេរី ពី​ទីក្រុង​ហ្សាការតា​ ប្រទេស​ឥណ្ឌូនេស៊ី កាល​ពី​ថ្ងៃ​ទី១៥ ខែ​វិច្ឆិកា​មាន​ប្រសាសន៍​ថា លោក​មិន​អាច​លើក​ទ័ព ទៅ​ត​ទល់​ជាមួយ​លោក ហ៊ុន សែន បាន​ទេ ហើយ​ក៏​មិន​អាច​ឆ្លង​កាត់​ដែន​ដី​ប្រទេស​ថៃ​បាន​ដែរ បើ​រដ្ឋាភិបាល​ប្រទេស​ថៃ បិទ​ផ្លូវ​មិន​ឲ្យ​លោក​ចូល​ទៅ​ប្រទេស​គេ ដើម្បី​ធ្វើ​ដំណើរ​ឆ្ពោះ​ទៅ​ប្រទេស​កម្ពុជា ដូច​បាន​គ្រោង​ទុក​បាន​នោះ។

ទោះ​ជា​យ៉ាង​នេះ​ក្តី លោក​ថា ការ​ធ្វើ​ឲ្យ​របប​លោក ហ៊ុន សែន ប្រតិកម្ម​ខ្លាំង​ទៅ​លើ​កម្លាំង​ពលរដ្ឋ ដែល​ទាមទារ​ឲ្យ​មាន​ការ​ផ្លាស់ប្តូរ​ជា​វិជ្ជមាន​បែប​នេះ គឺ​ជា​សញ្ញាណ​បង្ហាញ​អំពី​ភាព​ខ្លាំង​របស់​គណបក្ស​សង្គ្រោះ​ជាតិ និង​ការភ័យ​ខ្លាច​របស់​លោក ហ៊ុន សែន ចំពោះ​ការ​បាត់បង់​អំណាច និង បង្ហាញ​អំពី​ការ​យក​ចិត្ត​ទុក​ដាក់​របស់​សហគមន៍​អន្តរជាតិ លើ​បញ្ហា​រំលោភ​សិទ្ធិ​មនុស្ស និង​បំផ្លាញ​ប្រជាធិបតេយ្យ​នៅ​កម្ពុជា៖ «ជោគជ័យ​របស់​យើង​ធំ​ណាស់ ដែល​យើង​បាន​ប្រមូល​កម្លាំង​ដល់​កម្រិត​ហ្នឹង ធ្វើ​ឲ្យ​ ហ៊ុន សែន ញ័រ ឲ្យ​ ហ៊ុន សែន ស្លន់ស្លោ ពង្រាយ​ទ័ពដាក់​រទេះ​តង់ ដាក់​កាណុង ដាក់​កាំភ្លើង​យន្ត​រារាំង​មិន​ឲ្យ​យើង​ចូល​តាម​ជាយ​ដែន។ រួច​ហើយ​គំរាម​ព្រមាន​ក្រុមហ៊ុន​អាកាសចរណ៍ មិន​ឲ្យ​គេ​ដឹកខ្ញុំ​ទៅ​ស្រុក​ខ្មែរ។ ទូទាំង​ពិភពលោក គេ​សើច»

ទោះជារងការ​រារាំង​ ដែលមិនអាច​ឲ្យ​លោក​វិល​ចូល​ទៅ​ស្រុក​ខ្មែរ​វិញ​បាន​តាម​កាល​កំណត់​ ក៏​លោក សម រង្ស៊ី ថា​ លោក​កំពុង​តែ​ប្រើ​មធ្យោបាយ​ការ​ទូត ដើម្បី​បើក​ផ្លូវ​ឲ្យ​ថ្នាក់​ដឹក​នាំ​គណបក្ស​សង្គ្រោះ​ជាតិ បាន​ទៅ​ដល់​ទឹក​ដី​ប្រទេស​កម្ពុជា ក្នុង​ពេល​ឆាប់ៗ ខាង​មុខ​នេះ គឺ​ទៅ​ដោយ​អហិង្សា និង​សន្តិវិធី។

លោក សម រង្ស៊ី ចាត់​ទុក​សកម្មភាព​ដាក់​សម្ពាធ​លើ​របប​លោក ហ៊ុន សែន ថា​មាន​ប្រសិទ្ធិភាព​ខ្ពស់ ជា​ពិសេស​សម្ពាធ​ពី​សហភាព​អឺរ៉ុប ដែល​ទើប​តែ​បាន​ដាក់​ឱសានវាទ ឲ្យ​លោក ហ៊ុន សែន ៣០ថ្ងៃ ដើម្បី​ស្តារ​សិទ្ធិ​មនុស្ស និង​ប្រជាធិបតេយ្យ​ឡើវិញ​ឲ្យ​ទាន់ បើ​មិន​ដូច្នេះ​ទេ ប្រទេស​កម្ពុជា​នឹង​បាត់បង់​ការ​អនុគ្រោះ​ពន្ធ EBA ពី​សហភាព​អឺរ៉ុប។

គណៈកម្មការអឺរ៉ុប បានញ្ចូន​របាយការណ៍​បឋម​ស្តីពី​ការ​ព្យួរ​ប្រព័ន្ធ​អនុគ្រោះ​ពន្ធ EBA ទៅ​រដ្ឋាភិបាល​កម្ពុជា​រួច​ហើយ កាល​ពី​ថ្ងៃ​ទី ១២ ខែ​វិច្ឆិកា។ របាយការណ៍​នេះ គឺ​ជា​របាយការណ៍​សម្ងាត់ ដោយ​ផ្ញើ​ទៅ​តែ​រដ្ឋាភិបាល​កម្ពុជា​ប៉ុណ្ណោះ។ អាស៊ីសេរី​ កាលពីថ្ងៃទី ១៤ ខែ វិច្ឆិកា បាន​ទទួលបាន​របាយការណ៍​ដែល​មាន​កម្រាស់ ៧០ទំព័រ​នេះ ពី​ប្រភព​មន្រ្តី​ដែល​មាន​របាយការណ៍​នេះ​ក្នុង​ដៃ ប៉ុន្តែ​សុំ​មិន​បញ្ចេញ​ឈ្មោះ។

ក្នុងរបាយការណ៍​នោះ​បញ្ជាក់​ថា របប​លោក ហ៊ុន សែន មិន​បាន​ស្តារ​សិទ្ធិមនុស្ស និង​ប្រជាធិបតេយ្យ​ ដើម្បី​បន្ត​រក្សា​បាន​ការ​អនុគ្រោះ​ពន្ធ EBA នេះ​ត​ទៅ​ទៀត​នោះ​ទេ។

មិន​តែ​ប៉ុណ្ណោះ សហភាព​អឺរ៉ុប​ថា ស្ថានភាព​រំលោភ​សិទ្ធិមនុស្ស និង​បំផ្លាញ​ប្រជាធិបតេយ្យ​នេះ រឹត​តែ​អាក្រក់​ខ្លាំង​ជាង​មុន​ទៅ​ទៀត គឺ​អាក្រក់​ជាង​កាល​ពី ៩ខែ​មុន ពោល​គឺ កាល​ពី​ខែ​កុម្ភៈ ដែល​គណៈកម្មការ​អឺរ៉ុបបាន​ចាប់ផ្តើម​នីតិវិធី​ត្រួត​ពិនិត្យ និង​វាយ​តម្លៃ​ស្ថានភាព​សិទ្ធិ​មនុស្ស និង ប្រជាធិបតេយ្យ​ ដែល​ឈាន​ទៅ​ការ​ព្យួរ​ការ​អនុគ្រោះ​ពន្ធ នៅ​ដើម​ឆ្នាំ២០២០ បើ​ស្ថានភាព​នេះ​នៅ​តែ​មិន​ប្រសើរ​ឡើង​វិញ។

ស្ថានភាព​កាន់​តែ​អាក្រក់​នេះ រួម​មាន​ទាំង​កា​របន្តមិន​ទំលាក់​ចោល​បទ​ចោទ​ប្រឆាំង​ប្រធាន​គណបក្ស​សង្គ្រោះ​ជាតិ​លោក កឹម សុខា ការ​រម្លាយ​គណបក្ស​សង្គ្រោះ​ជាតិ ការ​បោះ​ឆ្នោត​ដោយ​ផាត់​ចោល​គណបក្ស​សង្គ្រោះ​ជាតិ ការ​បណ្តេញ​អង្គការ​សង្គម​ស៊ីវិល ការ​បិទ​ប្រព័ន្ធ​ផ្សព្វផ្សាយ​ឯករាជ្យ និង​បន្ត​ធ្វើ​ទុក្ខ​បុក​ម្នេញ​បណ្តាញ​ផ្សព្វផ្សាយ​ព័ត៌មាន ដូច​ករណី​បន្ត​មិន​ទម្លាក់​ចោល​បទ​ចោទ​ប្រឆាំង​អតីត​អ្នក​រាយការណ៍​ព័ត៌មាន​អាស៊ីសេរី​ពីរ​រូប គឺ​លោក អ៊ួន ឈិន និង​លោក យាង សុធារិន្ទ បញ្ហា​រំលោភ​ដីធ្លី និង​ការ​រឹតត្បិត​សិទ្ធិសេរីភាព​របស់​សហជីពកម្មករ និង ចុងក្រោយ​ការ​បន្ត​ចាប់​ឃុំ​ខ្លួន​ និង​ ចោទ​ប្រកាន់​មន្រ្តី និង​សកម្មជន​គណបក្ស​សង្គ្រោះ​ជាតិ​នៅ​មូលដ្ឋាន​ជា​ទ្រង់ទ្រាយ​ធំ ដោយសារ​តែ​ចោទ​ប្រកាន់​អ្នក​ទាំង​នោះ ដោយសារ​តែ​គាំទ្រ​ដំណើរ​មាតុភូមិ​និវត្តន៍​របស់​លោក សម រង្ស៊ី វិល​ទៅ​កម្ពុជា​វិញ​នោះ។

របាយការណ៍​នោះ សង្កត់​ធ្ងន់​ថា យោង​តាមការ​វាយ​តម្លៃ​ជា​ទូទៅ​លើ​ស្ថានភាព​សិទ្ធិ​មនុស្ស និង ប្រជាធិបតេយ្យ​នៅ​កម្ពុជា គណៈកម្មការ​អឺរ៉ុប​រក​ឃើញ​ថា​របប​នេះ បាន​រំលោភបំពាន​យ៉ាង​ធ្ងន់ធ្ងរ និង ជា​ប្រព័ន្ធ​ទៅ​លើ​អនុសញ្ញា​អន្តរជាតិ​ស្តីពី​សិទ្ធិ​ពលរដ្ឋ និង​សិទ្ធិ​នយោបាយ (ICCPR) និង​រំលោភ​ធ្ងន់ធ្ងរ​ទៅលើ​គោលការណ៍​សិទ្ធិ​ការងារ នៃ​អង្គការ​អន្តរជាតិ​ខាង​ការងារ​ (ILO) ដែល​ប៉ះពាល់​ដល់​ការ​បន្ត​ប្រព័ន្ធ​អនុគ្រោះ​ពន្ធ EBA ដល់​កម្ពុជា​ត​ទៅ​ទៀត បើ​កម្ពុជា​មិន​កែ​ខ្លួន។

បើ​យោង​តាម​ឱសានវាទ ដែល​កំណត់​ដោយ​គណៈកម្មការ​អឺរ៉ុប​នេះ របប​លោក ហ៊ុន សែន គិត​មក​ត្រឹម​ថ្ងៃ​ទី១៦ ខែ​វិច្ឆិកា គឺ​មាន​ពេល​តែ ២៦ថ្ងៃទៀត​ប៉ុណ្ណោះ ដែលត្រូវ​ស្តារ​ស្ថានភាព​ទាំង​នេះ​ឡើង​វិញ។

ជុំវិញ​ការ​ឈាន​ទៅ​បាត់បង់​ការ​អនុគ្រោះ​ពន្ធ​ផ្នែក​ពាណិជ្ជកម្ម​នេះ លោក សម រង្ស៊ី ស្នើ​ឲ្យ​ពលរដ្ឋ​ខ្មែរ ត្រូវ​តែ​បន្ត​ធ្វើ​សកម្មភាព​គ្រប់​បែប​យ៉ាង ដោយ​សន្តិវិធី ដើម្បី​ប្រាប់​ទៅ​សហគមន៍​អន្តរជាតិ​ថា ពលរដ្ឋ​ខ្មែរ​មិន​ព្រម​ទទួល​ទណ្ឌកម្ម​ពី​អន្តរជាតិ ដោយសារ​តែ​លោក ហ៊ុន សែន និង មិន​ត្រូវ​ទទួល​ទណ្ឌកម្ម​ជំនួស​លោក ហ៊ុន សែន ទេ។

លោកបន្តថា គណបក្ស​សង្គ្រោះជាតិ ចង់​រក្សា​ប្រព័ន្ធ​អនុគ្រោះ​ពន្ធ EBA ពី​សហភាព​អឺរ៉ុប ដើម្បី​រក្សា​ឆ្នាំង​បាយ​របស់​កម្មករ​ប្រមាណ ៨សែន​នាក់។ ក្នុង​បុព្វហេតុ​នេះ លោក សម រង្ស៊ី បន្ថែម​ថា អ្នក​និយម​ប្រជាធិបតេយ្យ នឹង​នៅ​តែ​បន្ត​តស៊ូ ដើម្បី​ផ្តួល​រំលំ​របប​លោក ហ៊ុន សែន បើ​លោក ហ៊ុន សែន ខ្លួន​ឯង​មិន​ព្រម​កែ​ខ្លួន ហើយ​មិន​ព្រម​បើក​ផ្លូវ​ឲ្យ​លទ្ធិ​ប្រជាធិបតេយ្យ​ដំណើរ​ការ​ឡើង​វិញ តាម​ការ​ទាមទារ​របស់​សហភាព​អឺរ៉ុប និងប្រជាពលរដ្ឋ​ដែល​ស្រលាញ់​ប្រជាធិបតេយ្យ៖ «សូម​បង​ប្អូន​រក្សា​ការ​ប្រមូល​ផ្តុំ​ស្មារតី​ប្រយុទ្ធ របស់​យើង​។ យើង​ត្រូវ​តែ​រក្សាកំដៅ​នយោបាយ​។ ឲ្យ​កំដៅ​នយោបាយ​នៅខ្ពស់​ ឲ្យ​វាក្តៅ​ ហើយ​បើ​ពេលណាមកដល់​ ឲ្យ​វាក្តៅជាហ្នឹង​ទៀត។ ពេលហ្នឹង​បាន​ពួកជន​ផ្តាច់ការ​ ត្រូវ​តែ​ថយ​។ ទាល់តែ​អន្តរជាតិ​សំពង​ពី​ខាង​ក្រៅ យើង​ធ្វើ​ឲ្យ​ក្តៅរហូត​ដល់​ផ្ទុះ​ពីខាងក្នុង បាន​ជនផ្តាច់​ការ​ថយ ជន​ផ្តាច់ការ​ធ្វើ​សម្បទាន​ពិតប្រាកដ។ តែ​ឥឡូវនេះ សូ​មរក្សា​ជំហរ និងក្តីសង្ឃឹម​របស់​យើង​ រក្សាកម្លាំង​របស់​យើង ត្រៀម​ខ្លួន បើ​ត្រូវ​ធ្វើសកម្មភាព​គួបផ្សំ​ជាមួយ​អន្តរជាតិ​ពេលណា យើង​នឹង​ធ្វើ​ពេលហ្នឹង»

ថ្មីៗ នេះ លោក ហ៊ុន សែន បាន​បញ្ជា​ឲ្យ​បន្ធូរ​ស្ថានការណ៍​តានតឹង ដោយ​ផ្តើម​ពី​ការ​កែប្រែ​លក្ខខណ្ឌ​ឃុំ​ខ្លួន​លោក កឹម សុខា ដោយលែង​ឃុំខ្លួន​ប្រធាន​គណបក្ស​ប្រឆាំង​រូប​នេះ​ក្នុង​ផ្ទះ​បន្ត​ទៅទៀត​។ ចំណែក​ឯសកម្មជន​គណបក្ស​សង្គ្រោះ​ជាតិ ដែល​លោក ហ៊ុន សែន ចេញ​បញ្ជា​ឲ្យ​ចាប់​ខ្លួន​ជា​ទ្រង់​ទ្រាយ​ធំ និង​ចោទ​ប្រកាន់​ពី​បទ​ក្បត់​ជាតិ​ចាប់​តាំង​ពី​ខែ សីហាមក ដោយសារ​តែ​ពួកគាត់​គាទ្រ​ដំណើរ​មាតុភូមិ​និវត្តន៍​របស់​លោក សម រង្ស៊ីនោះ ក៏​លោក ហ៊ុន សែន ចេញ​បញ្ជាឲ្យ​តុលាការ​ដោះ​លែង​វិញ យ៉ាង​ប្រញាប់​ប្រញាល់​ដែរ។

មន្រ្តី​នាំពាក្យ​រដ្ឋាភិបាល​កម្ពុជា​លោក ផៃ ស៊ីផាន អះអាង​ប្រាប់​អាស៊ីសេរី​ថា ស្ថានការណ៍​នយោយបាយ​នៅ​ប្រទេស​កម្ពុជា មាន​ភាព​ល្អ​ប្រសើរ​ច្រើន​ហើយ ដែល​មិន​ត្រូវ​មាន​វត្តមាន​លោក សម រង្ស៊ី នោះ​ទេ។ ទោះ​ជា​យ៉ាង​នេះក្តី​ លោក​ថា រដ្ឋាភិបាល​កម្ពុជា នឹង​នៅតែ​រក្សា​ជំហរ​ចាប់​ខ្លួន​លោក សម រង្ស៊ី បើ​ហ៊ាន​វិល​ចូល​ស្រុក​ខ្មែរ​វិញ​មែន​នោះ៖ «កាតព្វកិច្ច​របស់​រាជ​រដ្ឋាភិបាល​ គឺចាប់​រង្ស៊ី រួច​បញ្ជូន​ទៅ​តុលាការ»

ទោះ​បី​ជា​លោ​អះអាង​ថា រក្សា​ជំហរ​ចាប់លោក សម រង្ស៊ី យ៉ាង​ណា​ក្តី លោក ផៃ ស៊ីផាន ថា​រដ្ឋាភិបាល​កម្ពុជា មិន​ទាន់​សម្រេច​ថាតើ​នឹង​ដក​បម្រាម​ ដែល​ហាម​ក្រុមហ៊ុន​អាកាសចរណ៍​ស៊ីវិល មិន​ឲ្យ​ដឹក​លោក សម រង្ស៊ី និង​មន្រ្តី​បក្ស​ប្រឆាំង​មួយ​ចំនួន​ទៀត ចូល​មក​កម្ពុជា​វិញ នៅ​ពេល​ណា​នៅឡើយ​នោះទេ៖ «ឲ្យ​គាត់​មក៍​ឬ​ក៏យ៉ាង​ម៉េច? អាហ្នឹង​ទៅ​តាម​រយៈ​​ស្ថានភាព​។ បើ​សិន​គាត់​មក៍បង្កើត​នូវ​បញ្ហា​ចលាចល បង្កើត​អ្វីអ៊‍ីចឹង​ទៅ យើង​រក​វិធីគ្រប់​បែប​យ៉ាង​ ដើម្បី​ទប់​ស្កាត់​ ក្នុង​ន័យ​រក្សា​សណ្តាប់​ធ្នាប់​សាធារណៈ។ យើង​រក​គ្រប់​មធ្យោបាយ»

ចំពោះ​សារ​អំពាវនាវ​ឲ្យ​ពលរដ្ឋ​ក្រោក​តវ៉ា ទាមទារ​ឲ្យ​របប​ក្រុង​ភ្នំពេញ ទទួល​ខុស​ត្រូវ​ចំពោះ​ការ​ព្យួរ​ការ​អនុ​គ្រោះ​ពន្ធ EBA នោះ លោក ផៃ ស៊ីផាន អះអាង​ថា​កម្ពុជា ជា​ប្រទេស​ប្រជាធិបតេយ្យ ដែល​ប្រជាពលរដ្ឋ មាន​សិទ្ធិតវ៉ា ដោយ​សន្តិវិធី​បាន៖ «តាម​រដ្ឋធម្មនុញ្ញ​ ការ​តវ៉ា​ត្រូវ​តែ​ធ្វើតាម​យន្ត​ដែល​មាន​ស្រាប់។ ប្រជាពលរដ្ឋ​អាច​តវ៉ា​ជាមួយ​រដ្ឋាភិបាល តាម​រយៈ​សភា ឬ​តុលាការ។ ប៉ុន្តែ មិន​អាច​យកការ​បះបោរ​ធ្វើ​ជា​ការ​តវ៉ា​ទេ ព្រោះ​យើង​នឹង​បង្ក្រាប»

លោក សម រង្ស៊ី និង មន្រ្តី​បក្ស​ប្រឆាំង​ឯ​ទៀត ដែល​អម​ដំណើរ​របស់​លោក​ទៅ​កាន់​តំបន់​អាស៊ាន និង​ប៉ុនប៉ង​ធ្វើ​មាតុភូមិ​និវត្តន៍​ទៅ​កម្ពុជា​វិញ នៅ​ថ្ងៃ​ទី៩ ខែ​វិច្ឆិកានោះ ត្រូវ​បាន​រារាំង​គ្រប់​មធ្យោបាយ​ពីរ​សំណាក់​អាជ្ញាធរ​របប​ក្រុង​ភ្នំពេញ​ ទាំង​ហាម​ក្រុមហ៊ុន​អាកាសចរណ៍​ស៊ីវិល ៤៧ ក្រុមហ៊ុន មិន​ឲ្យ​ដឹក​លោក សម រង្ស៊ី ចូល​កម្ពុជា និង​ស្នើឲ្យ​អាជ្ញាធរ​ប្រទេស​អាស៊ាន​ទាំង​អស់ ជួយ​សហការ​ទប់​ស្កាត់​លោក សម រង្ស៊ី កុំឲ្យ​ចូល​កម្ពុជា​វិញ​បាន។ មិន​តែ​ប៉ុណ្ណោះ របប​នេះ​បាន​ពង្រាយ​កង​កម្លាំង​ប្រដាប់​អាវុធ តាម​ព្រំដែន​នៅ​ច្រក​ទ្វារ​ព្រំដែន​អន្តរជាតិ​ប៉ោយប៉ែត និង​បាន​ចាប់​សកម្មជន​បក្ស​ប្រឆាំង​ដាក់​ឃុំឃាំង​ជា​ច្រើន​នាក់។

ទោះជាមិន​ទាន់​អាច​វិល​ចូល​ស្រុក​ខ្មែរ​បាន​នៅ​ពេល​នេះ​ក៏​ដោយ​ ក៏​អ្នក​ឃ្លាំមើល​សង្គម​យល់​ថា លោក សម រង្ស៊ី មាន​ឥទ្ធិពល​ធ្វើឲ្យ​អន្តរជាតិ​ ចាប់​អារម្មណ៍​ខ្លាំង លើ​វិបត្តិន​យោបាយ​នៅ​កម្ពុជា ដែល​សហគមន៍​អន្តរជាតិ បន្ត​ដាក់​សម្ពាធ​បន្ថែម ដើម្បី​ឲ្យ​របប​លោក ហ៊ុន សែន ស្តារ​សិទ្ធិ​មនុស្ស និង​ប្រជាធិបតេយ្យ​ឡើងវិញ​ឲ្យ​បាន​ឆាប់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
នយោបាយ
សង្គម​ស៊ីវិល​រំពឹង​ថា​ ឯកអគ្គរដ្ឋទូត​អាមេរិក​ប្រចាំ​កម្ពុជា​ថ្មី​នឹង​បន្ត​ចូល​រួម​លើក​ស្ទួយ​ប្រជាធិបតេយ្យ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។