រដ្ឋមន្ត្រីក្រសួងមហាផ្ទៃលោក ស ខេង បញ្ជាទៅអាជ្ញាធរពាក់ព័ន្ធត្រូវការពារសុវត្ថិភាព និងបង្កលក្ខណៈងាយស្រួលដល់គ្រប់សកម្មភាពគណបក្សនយោបាយ ដោយគ្មានការរើសអើង និងប្រកាន់បក្ខពួក ដើម្បីជំរុញឲ្យដំណើរការបោះឆ្នោតជ្រើសរើសក្រុមប្រឹក្សាឃុំ-សង្កាត់ នាពេលខាងមុខ ប្រព្រឹត្តទៅដោយសេរី ត្រឹមត្រូវ និងយុត្តិធម៌។
ការលើកឡើងរបស់លោក ស ខេង នេះធ្វើឡើងបន្ទាប់ពីគណបក្សនយោបាយខ្លះ រួមមានគណបក្សភ្លើងទៀនបានរិះគន់អាជ្ញាធរនៅតាមបណ្តាខេត្តមួយចំនួនថាបានរំខានសកម្មភាពជួបប្រជុំរារាំងមិនឲ្យលើកស្លាកគណបក្សនៅទីសាធារណៈនិងជាពិសេសហាមពលរដ្ឋមិនឲ្យចូលរួមជាមួយគណបក្សផ្សេងទៀតជាដើម។
លោក ស ខេង ថ្លែងក្នុងពិធីប្រគល់រថយន្តដល់វរសេនាតូចនគរបាលការពារព្រំដែននៅអគ្គស្នងការនគរបាលជាតិកាលពីថ្ងៃទី២៥ ខែមករា ម្សិលមិញថារដ្ឋាភិបាលនៅតែបន្តពង្រឹង លទ្ធិប្រជាធិបតេយ្យសេរីពហុបក្ស និងការអនុវត្តនយោបាយកំណែទម្រង់វិមជ្ឈការនិងវិសហមជ្ឈការតាមរយៈការផ្ទេរអំណាចពីថ្នាក់ជាតិទៅថ្នាក់ក្រោមជាតិឱ្យបានកាន់តែច្រើននិងស្របតាមច្បាប់។ លោកបន្តថា ក្នុងនាមជានគរបាលជាតិអាជ្ញាធរត្រូវប្រកាន់ជំហរអព្យាក្រឹត្យមិនបែងចែកមិនប្រកាន់សំរាប់គណបក្សនយោបាយនោះទេ។
ទោះជាយ៉ាងនេះក៏ដោយប្រធានស្តីទីនិងជាអ្នកនាំពាក្យគណបក្សភ្លើងទៀនលោក ថាច់ សេដ្ឋា ធ្លាប់ប្រាប់វិទ្យុអាស៊ីសេរីថា អាជ្ញាធរបានគំរាមកំហែងពលរដ្ឋមិនឲ្យមកគាំទ្រគណបក្សភ្លើងទៀនហើយការលើកស្លាកគណបក្សវិញកន្លែងខ្លះត្រូវបានកាត់បំផ្លាញចោលនិងកន្លែងខ្លះទៀតអាជ្ញាធរយកលេសថាមិនបានសុំការអនុញ្ញាតជាមុន៖ «ជាទូទៅពេលយើងចុះទៅ យើងកត់សម្គាល់ មានការហាមឃាត់ ឬសម្លុត គំរាមពលរដ្ឋ មិនឲ្យចូលរួមគាំទ្រជាមួយគណបក្សភ្លើង ទៀន។ ករណីមួយចំនួនបានទៅកាត់ស្លាកបក្សចោលដូចនៅសៀមរាប កន្លែងខ្លះទៀតមិនឲ្យលើកស្លាក ដូចជាថ្មីៗនេះនៅខេត្តកំពងចាម ហើយកន្លែងខ្លះទៀត គេលើកបាន តែយើងលើកអត់បាន »។
បន្ថែមពីនេះ ប្រធានគណបក្សភ្លើងទៀននៅខេត្តប៉ៃលិន លោកខឹម មុនីកុសល ក៏បានប្រាប់វិទ្យុអាស៊ីសេរីថា អភិបាលរងក្រុងប៉ៃលិនលោក ចក់ ឬទ្ធី ថ្មីៗនេះបានដឹកនាំប៉ូលិសជាច្រើននាក់ ទៅរារាំងពួកលោកមិនឱ្យលើកស្លាកគណបក្សនៅលើដីកម្មសិទ្ធិរបស់សកម្មជនបក្សលោកនោះទេ ទោះបីបានបង្ហាញលិខិតជូនដំណឹងទៅសាលាខេត្តប៉ៃលិនក៏ដោយ។
ការបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់ សម្រាប់អាណត្តិទី៥ នឹងប្រព្រឹត្តទៅនៅថ្ងៃអាទិត្យ ទី៥ ខែមិថុនា ឆ្នាំ២០២២ ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។