មន្ត្រីបក្សប្រឆាំង និងសង្គមស៊ីវិល រិះគន់រដ្ឋមន្ត្រីក្រសួងមហាផ្ទៃ ដែលណែនាំនគរបាលឲ្យបន្តបង្ក្រាបអ្នកប្រឆាំង
2024.09.17
លោក ស សុខា រដ្ឋមន្ត្រីក្រសួងមហាផ្ទៃ ថ្លែងសន្ទរកថា ក្នុងពិធីបិទវគ្គបណ្ដុះបណ្ដាលកងកម្លាំងនគរបាលជាតិ ៥០៦នាក់ នៅខេត្តកណ្តាល នាព្រឹកថ្ងៃទី១៧ ខែកញ្ញា ឆ្នាំ២០២៤។
រូប៖ ហ្វេសប៊ុកលោក ស សុខា
មន្ត្រីគណបក្សប្រឆាំង និងមន្ត្រីសង្គមស៊ីវិល រិះគន់រដ្ឋមន្ត្រីក្រសួងមហាផ្ទៃ ដែលណែនាំឲ្យនគរបាល បន្តត្រៀមខ្លួនបង្ក្រាបអ្នកនយោបាយបក្សប្រឆាំង និងអ្នករិះគន់ ក្រោមហេតុផលរក្សាសន្តិសុខសង្គម។ ពួកគាត់ចាត់ទុកសារណែនាំរបស់រដ្ឋមន្ត្រីក្រសួងមហាផ្ទៃថា គឺជាការបំពានគោលការណ៍ច្បាប់ និងគោលការណ៍ប្រជាធិបតេយ្យ។
មន្ត្រីគណបក្សប្រឆាំង និងមន្ត្រីសង្គមស៊ីវិល លើកឡើងថា រដ្ឋមន្ត្រីក្រសួងមហាផ្ទៃគួរតែណែនាំឲ្យនគរបាលអនុវត្តតួនាទី និងច្បាប់ឲ្យបានត្រឹមត្រូវដោយបង្កលក្ខណៈងាយស្រួលឲ្យគ្រប់គណបក្សនយោបាយ និងពលរដ្ឋ អាចធ្វើសកម្មភាពនយោបាយ និងការបញ្ចេញមតិដោយគ្មានការរារាំង ការគំរាមកំហែង និងការធ្វើទុក្ខបុកម្នេញ។
អតីតប្រធានប្រតិបត្តិគណបក្សភ្លើងទៀនប្រចាំខេត្តកណ្តាល ដែលកំពុងភៀសខ្លួននៅប្រទេសថៃ លោក លី ម៉េងឃាង ថ្លែងថា ការណែនាំរបស់លោក ស សុខា ឲ្យនគរបាល ដែលជាមន្ត្រីសាធារណៈចាំបង្ក្រាបអ្នកនយោបាយបក្សប្រឆាំង និងអ្នករិះគន់នេះ មិនត្រឹមតែរំលោភគោលការណ៍ច្បាប់ និងសិទ្ធិសេរីភាពជាមូលដ្ឋានរបស់ប្រជាពលរដ្ឋប៉ុណ្ណោះទេ គឺជាការដាក់សម្ពាធលើនគរបាលទាំងនោះ ឲ្យបំពេញការងារគ្មានវិជ្ជាជីវៈ និងមិនអព្យាក្រឹតថែមទៀត ដោយកាន់ជើងតែគណបក្សកាន់អំណាច ហើយរើសអើងគណបក្សប្រឆាំង និងអ្នករិះគន់។ លោក អះអាងថា គណបក្សប្រឆាំង គ្មានបំណងផ្ដួលរំលំរដ្ឋាភិបាល ដូចការចោទប្រកាន់ឡើយ ប៉ុន្តែរដ្ឋាភិបាល តែងប្រឌិតរឿងបង្ក្រាបគណបក្សប្រឆាំងឥតឈប់ឈរ ដើម្បីធ្វើឲ្យបក្សប្រឆាំងចុះខ្សោយ និងបំបិទមិនឲ្យចូលរួមការបោះឆ្នោត។
លោក លី ម៉េងឃាង៖ «សូមសំណូមពរដល់មន្ត្រីនគរបាលទាំងអស់ កុំអនុវត្តតាមតែបទបញ្ជាអ៊ីចឹង។ យើងត្រូវយកគោលការណ៍ច្បាប់ ជាពិសេស យើងត្រូវគោរពរដ្ឋធម្មនុញ្ញ គោរពសិទ្ធិពលរដ្ឋខ្មែរ កុំធ្វើអ្វីតាមតែបទបញ្ជារបស់មេ។ ខ្ញុំសូមរំលឹកដល់លោកធំៗ ថ្នាក់ដឹកនាំគណបក្សប្រជាជនទាំងអស់ ខ្ញុំធ្លាប់ឮលោក ហ៊ុន សែន ប្រកាសថា សូមកុំឲ្យ «ទឹកឡើងត្រីស៊ីស្រមោច ទឹកហោចស្រមោចស៊ីត្រី» ប៉ុន្តែខ្ញុំកត់សម្គាល់ថា ទង្វើរបស់គាត់ធ្វើក្នុងពេលបច្ចុប្បន្ននេះ កាន់តែធ្វើឲ្យប្រជា ពលរដ្ឋឈឺចាប់ខ្លាំងទៅៗ ដូច្នេះ នៅពេលពលរដ្ឋទ្រាំលែងបាន គឺ "ទឹកឡើងត្រីស៊ីស្រមោច ទឹកហោចស្រមោចស៊ីត្រី" ត្រូវតែមានពុំខាន»។
ការលើកឡើងនេះ គឺបន្ទាប់ពីរដ្ឋមន្ត្រីក្រសួងមហាផ្ទៃ លោក ស សុខា រំលឹកជាថ្មីទៀត ដល់កងកម្លាំងនគរបាលជាតិ ៥០៦នាក់ ក្នុងពិធីបិទវគ្គបណ្ដុះបណ្ដាលចំនួន៤ នៅខេត្តកណ្តាល នាព្រឹកថ្ងៃទី១៧ ខែកញ្ញាថា ការងារសន្តិសុខ គឺជាតួនាទីស្នួលរបស់នគរបាល។លោកព្យាយាមទាញភ្ជាប់ប្រទេសកម្ពុជាទៅនឹងប្រទេសនានា ថា កំពុងប្រឈមនឹងបញ្ហាអសន្តិសុខដោយលោកចោទថា ក្នុងនោះមានករណីបង្កឡើងដោយអ្នកនយោបាយប្រឆាំង និងក្រុមឧទ្ទាម។ រដ្ឋមន្ត្រីក្រសួងមហាផ្ទៃរូបនេះ បន្តចោទថា ក្រុមប្រឆាំង បានប៉ុនប៉ងផ្ដួលរំលំរដ្ឋាភិបាលច្រើនលើកមកហើយ ប៉ុន្តែ បានបរាជ័យដោយសារកិច្ចប្រតិបត្តិការបង្ការ ទប់ស្កាត់ និងបង្ក្រាបរបស់សមត្ថកិច្ច។
ផ្ទុយពីការលើកឡើងនេះ អ្នកឃ្លាំមើល ព្រមទាំងក្រុមអង្គការជាតិ និងអន្តរជាតិ ពិនិត្យឃើញថា នៅកម្ពុជា គ្មានអ្នកប្រឆាំងជ្រុលនិយម ឬក្រុមឧទ្ទាមនោះទេ គឺមានតែអ្នកស្នេហាជាតិ អ្នកស្នេហាសិទ្ធិមនុស្ស និងអ្នកស្នេហាបរិស្ថាន ដែលពួកគេកំពុងជាប់គុក ទាំងមិនបានប្រព្រឹត្តកំហុសដោយសារតែប្រព័ន្ធតុលាការ និងកងកម្លាំងសមត្ថកិច្ចរងសម្ពាធពីអ្នកកាន់អំណាច។
ប្រធានអង្គការសម្ពន្ធខ្មែរដើម្បីកិច្ចព្រមព្រៀងសន្តិភាពទីក្រុងប៉ារីសស្ដីពីកម្ពុជា លោក អ៊ិន ណាត មានប្រសាសន៍ថា សារណែនាំរបស់លោក ស សុខា នេះ គឺជាការបំពានគោលការណ៍ប្រជាធិបតេយ្យនិងរដ្ឋធម្មនុញ្ញ។ លោកយល់ថា លោក ស សុខា គួរតែណែនាំនគរបាលឱ្យយល់ដឹងច្រើន អំពីតួនាទី និងការអនុវត្តច្បាប់ ដើម្បីធានាបរិយាកាសអំណោយផលឲ្យគ្រប់គណបក្សនយោបាយ និងពលរដ្ឋ អនុវត្តសិទ្ធិនយោបាយ និងសិទ្ធិបញ្ចេញមតិពេញលេញ។
លោក អ៊ិន ណាត៖ «រដ្ឋមន្ត្រីក្រសួងមហាផ្ទៃ គួរតែណែនាំដល់នគរបាលឲ្យអនុវត្តទៅតាមច្បាប់ កុំធ្វើបាបប្រជាជន ដោយមិនយកកម្លាំងបាយ កម្លាំងអាវុធទៅធ្វើបាបប្រជាជនដូចដែលយើងបានឃើញកន្លងមក ហើយឲ្យពួកគេ ផ្ដោតទៅលើការបង្ក្រាបការជួញដូរគ្រឿងញៀន និងការជួញដូរមនុស្ស ដែលកំពុង កើនឡើងគួរឲ្យព្រួយបារម្ភ»។
មន្ត្រីគណបក្សប្រឆាំង និងមន្ត្រីសង្គមស៊ីវិលអំពាវនាវដល់ក្រុមមេដឹកនាំរដ្ឋាភិបាលថា គួរតែបណ្ដុះបណ្ដាលមន្ត្រីអនុវត្តច្បាប់ ដូចជា កងកម្លាំងប្រដាប់អាវុធ និងមន្ត្រីតុលាការ បន្ថែមទៀត អំពីក្រមសីលធម៌ ដើម្បីឲ្យចេះបំពេញតួនាទីត្រឹមត្រូវ និងយុត្តិធម៌តាមគន្លងរដ្ឋធម្មនុញ្ញ ទើបអាចកសាងសង្គមមួយ ដែលមានយុត្តិធម៌ និងសុខដុមរមនាទាំងអស់គ្នា។ ប៉ុន្តែ ពួកគាត់ព្រមានថា ប្រសិនបើតុលាការនៅតែអយុត្តិធម៌ ហើយកម្លាំងប្រដាប់អាវុធ នៅតែយាយី និងការធ្វើទុក្ខបុកម្នេញលើប្រជាពលរដ្ឋ អ្នកនយោបាយបក្សប្រឆាំង និងសកម្មជននានា ឥតឈប់ឈរដូចសព្វថ្ងៃនេះ នោះសង្គមកម្ពុជានឹងកាន់តែប្រេះឆា ហើយឈានដល់អស្ថិរភាពនៅថ្ងៃខាងមុខ ហើយអ្នកដែលប៉ះពាល់ធ្ងន់ជាងគេ គឺជាក្រុមអ្នកមានទ្រព្យ និងក្រុមពូជពង្សអ្នកកាន់អំណាច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- អង្គការអន្តរជាតិថា រដ្ឋាភិបាលបានបរាជ័យ ចំពោះការធានារបស់ខ្លួនលើកកម្ពស់សិទ្ធិមនុស្ស
- លោក ស៊ុន ចាន់ថុល អះអាងថា ក្រុមហ៊ុនអាមេរិកាំងច្រើនចាប់អារម្មណ៍ចង់មកវិនិយោគនៅកម្ពុជា
អត្ថបទពេញនិយម
នយោបាយ
- ឧបនាយករដ្ឋមន្ត្រីកម្ពុជាថា នាវាកងទ័ពបរទេសណាក៏អាចចូលចតនៅមូលដ្ឋានទ័ពរាមដែរ
- អង្គការសិទ្ធិមនុស្សថ្កោលទោសរដ្ឋាភិបាលម៉ាឡេស៊ីបញ្ជូនពលករខ្មែរម្នាក់ ឱ្យអាជ្ញាធរកម្ពុជា ដោយសារតែរិះគន់លោក ហ៊ុន សែន
- ការបន្តតែងតាំងកូនៗរបស់មន្ត្រីជាន់ខ្ពស់ក្នុងស្ថាប័នរដ្ឋ «ជានយោបាយសន្តតិវង្ស និងការបែងចែកវណ្ណៈ»