មន្ត្រី​ជាន់​ខ្ពស់​គណបក្ស​ប្រឆាំង​​ប្រកាន់​ជំហរ​ថា​ របប​ក្រុង​ភ្នំពេញ​កំពុង​រំលោភ​សិទ្ធិមនុស្ស​ធ្ងន់ធ្ងរ

ដោយ ហេង រស្មី
2020-09-25
អ៊ីម៉ែល
មតិ
Share
បោះពុម្ព
(ឆ្វេង) លោក ស ខេង រដ្ឋមន្ត្រី​ក្រសួងមហាផ្ទៃ និង​លោក អេង ឆៃអ៊ាង អនុប្រធាន​គណបក្ស​សង្គ្រោះ​ជាតិ។
(ឆ្វេង) លោក ស ខេង រដ្ឋមន្ត្រី​ក្រសួងមហាផ្ទៃ និង​លោក អេង ឆៃអ៊ាង អនុប្រធាន​គណបក្ស​សង្គ្រោះ​ជាតិ។
រូប៖ ហ្វេសប៊ុក​លោក ស ខេង និង​ RFA

មន្ត្រី​ជាន់​ខ្ពស់​គណបក្ស​ប្រឆាំង​ថ្លែង​ការ​ពារ​ជំហរ​របស់​ខ្លួន​តប​ទៅ​នឹង​លោក ស ខេង ថា របប​ក្រុង​ភ្នំពេញ​ពិត​ជា​មាន​ការ​រំលោភ​សិទ្ធិមនុស្ស​ពិត​ប្រាកដ​មែន។​ ការ​លើក​ឡើង​នេះ​ បាន​កើត​មាន​ឡើង​បន្ទាប់​ពី​ក្រសួង​មហាផ្ទៃ​បាន​ចោទ​ប្រកាន់​មន្ត្រី​បក្ស​ប្រឆាំង​ថា​ និយាយ​គ្មាន​ការ​ពិត​នឹង​មាន​ចរិត​នយោបាយ ពី​ស្ថាន​ភាព​សិទ្ធិមនុស្ស​ នៅ​កម្ពុជា។

លោក អេង ឆៃអ៊ាង អនុប្រធាន​គណបក្ស​សង្គ្រោះ​ជាតិ​ មាន​ប្រសាសន៍​ថា​ ពាក់​ព័ន្ធ​នឹង​បញ្ហា​សិទ្ធិ​មនុស្ស​នៅ​កម្ពុជា សួរ​តែ​ប្រជា​ពលរដ្ឋ​ទៅ​ដឹង​ហើយ​ថា មាន​ការ​រំលោភ​សិទ្ធិ​មនុស្ស​បែប​ណា​នៅ​ក្នុង​ការ​គ្រប់គ្រង​ដោយ​របប​ក្រុង​ភ្នំពេញ​សព្វ​ថ្ងៃ​នេះ។

លោក​ថា​ អ្នក​នយោបាយ​មិន​អាច​ទៅ​និយាយ​អ្វី​តាម​ការ​នឹក​ឃើញ​បាន​ទេ​ គឺ​ទាល់​តែ​មាន​ការ​ទាមទារ​ មាន​ការ​ប្រាប់​ មាន​ការ​សំដែង​ពី​ប្រជាពលរដ្ឋ បាន​អ្នក​នយោបាយ​យក​មក​និយាយ​បាន ទាក់ទិន​នឹង​ការ​រំលោភ​សិទ្ធិមនុស្ស​នៅ​កម្ពុជា៖ «ឥឡូវ​យើង​សួរ​ថា តើ​ប្រជាពលរដ្ឋ​ខ្មែរ​បច្ចុប្បន្ន​ហ្នឹង​ លោក​មាន​សេចក្ដី​សុខ​ផ្លូវ​ចិត្ត​ទេ វា​អត់​មាន។ ឥឡូវ​យើង​មើល​ថា សង្គ្រាម​អត់​ច្បាំង​គ្នា អត់​បាញ់​គ្នា វា​មាន​មែន ប៉ុន្តែ​សម្រាប់​សន្តិភាព​ផ្លូវ​ចិត្ត វា​អត់​មាន ពី​ព្រោះ​សង្គម​ពោរពេញ​ទៅ​ដោយ​អំពើ​អយុត្តិធម៌​ ពោរពេញ​ទៅ​ដោយ​ការ​គាប​សង្កត់ បំភិត​បំភ័យ​ប្រជាពលរដ្ឋ​មិន​អាច​ប្រកប​មុខ​របរ​បាន​ស្រួល​ បាត់​បង់​ចំណូល​ បាត់​បង់​ការងារ គឺ​ថា ប្រជាពលរដ្ឋ​ខ្មែរ​ រស់​នៅ​ក្រោម​ការ​ភ័យ​ខ្លាច​ព្រួយ​បារម្ភ​គ្រប់បែប​យ៉ាង»

ប្រតិកម្ម​របស់​មន្ត្រី​ជាន់​ខ្ពស់​គណបក្ស​ប្រឆាំង​នេះ​បាន​ធ្វើ​ឡើង​ ក្រោយ​ពី​ក្រសួង​មហាផ្ទៃ​បានចាត់​ទុក​ការ​លើក​ឡើង​របស់​លោក​ អេង ឆៃអ៊ាង ជាមួយ​វិទ្យុ​អាស៊ី​សេរី កាល​ពី​ថ្ងៃ​ទី២៤ កញ្ញា​ថា «អាជ្ញាធរ​មូលដ្ឋាន​ជា​អ្នក​គាប​សង្កត់ សិទ្ធិ​ប្រជាពលរដ្ឋ​ នឹង​ប្រព្រឹត្តិ​អំពើ​ពុក​រលួយ»

លោក ស ខេង បាន​អះអាង​នៅ​ក្នុង​សេចក្ដី​ណែនាំ​មួយ​ថា កន្លង​មក​ក្រសួង​មហាផ្ទៃ​បាន​ទទួល​យក​ការ​ដោះ​ស្រាយ​ចំពោះ​បណ្ដឹង​សំណើ​ សំណូមពរ មតិយោបល់ ការ​ថ្នាំងថ្នាក់ ឬ​ក្ដី​កង្វល់​របស់​ប្រជា​ពលរដ្ឋ​ ដែល​ពាក់ព័ន្ធ​នឹង​សមត្ថកិច្ច​របស់​ក្រសួងមហាផ្ទៃ​ តាមរយៈ​ការ​ដាក់​លិខិត​មក​ក្រសួង​មហាផ្ទៃ តាមរយៈ​ហ្វេសប៊ុក​ផេក​របស់​លោក​ផ្ទាល់​ និង​តាមរយៈ​ការ​ដកស្រង់​សារព័ត៌មាន​ និង​បណ្ដាញ​ទំនាក់​ទំនង​សង្គម​នានា​ ដើម្បី​បញ្ជូន​ទៅ​ឲ្យ​ជំនាញ​ពាក់ព័ន្ធ​នានា ចំណុះ​ក្រសួង រដ្ឋបាល​រាជធានី ខែត្រ និង​ស្នងការដ្ឋាន​នគរបាល​រាជធានី ខែត្រ ដោះ​ស្រាយ។

លោក អេង ឆៃអ៊ាង អនុ​ប្រធាន​គណបក្ស​សង្គ្រោះ​ជាតិ ចាត់​ទុក​សេចក្ដី​ណែនាំ​របស់​លោក ខេង រដ្ឋមន្ត្រី​ក្រសួង​មហាផ្ទៃ​ដែល ឲ្យ​មន្ត្រី​ថ្នាក់​ក្រោម​យក​ចិត្ត​ទុក​ដាក់​ដោះ​ស្រាយ​បញ្ហា​ជូន​ប្រជាពលរដ្ឋ​នោះ គ្រាន់​តែ​ជា​ការ​បោក​បញ្ឆោត​តែ​ប៉ុណ្ណោះ។ លោក អេង ឆៃអ៊ាង សង្កត់​ធ្ងន់​ថា មាន​បញ្ហា​អយុត្តិធម៌ សង្គម​ជា​ច្រើន​ដែល​សមត្ថកិច្ច​មិន​ដោះ​ស្រាយ​ជូន​ពលរដ្ឋ រាប់​ទាំង​ការ​ទទួល​សេវា​រដ្ឋ ដែល​មន្ត្រី​ថ្នាក់​ក្រោម​ប្រព្រឹត្តិ​អំពើ​ពុក​រលួយ បញ្ហា​ជម្លោះ​ដីធ្លី​ពលរដ្ឋ​មក​បណ្ដា​ខែត្រ​មក​រាជធានី​ភ្នំពេញ ទាមទារ​ឲ្យ​ស្ថាប័ន​ពាក់ព័ន្ធ​ជួយ​ដោះ​ស្រាយ ផ្ទុយ​ទៅ​វិញ​សមត្ថកិច្ច​រាជធានី បង្ក្រាប និង​ករណី​ខ្លះ​ចាប់​ចង​ពលរដ្ឋ​ទៀត​ក៏​មាន។

នៅ​ក្នុង​លិខិត​របស់​ក្រសួង​មហា​ផ្ទៃ​កាល​ពី​ថ្ងៃ​ទី២៥ កញ្ញា បាន​ចាត់​ទុក​ថា សំដី​របស់​លោក​ អេង ឆៃអ៊ាង នេះ​បញ្ជាក់​ឲ្យ​ឃើញ​ពី​ចរិត​ពិត​នៃ​អ្នក​នយោបាយ​ប្រឆាំង ដែល​មាន​ភ្នែក​ភ្លឺ​នឹង​គេ​ដែរ តែ​ធ្វើ​ពុត​ត្បុត​ជា​មនុស្ស​ខ្វាក់​ ធ្វើ​មិន​ដឹង​មិន​ឮ មើល​មិន​ឃើញ​ នូវ​សមិទ្ធផល និង​ស្នាដៃ​ជា​ច្រើន ដែល​រដ្ឋាភិបាល​​បាន​ធ្វើ​កន្លង​មក។

ក្រសួង​មហាផ្ទៃ​លើក​ឡើង​ថា​ ប្រសិន​បើ​ដូច​អ្វី​ដែល​លោក អេង ឆៃអ៊ាង និយាយ​ម្ល៉េះ​សម​រដ្ឋាភិបាល​សព្វ​ថ្ងៃ​ មិន​អាច​ស្ថិត​នៅ​គង់​វង្ស​បានទេ​ ហើយ​ក៏​មិន​អាច​កសាង​ប្រទេស​អោយ​បាន​រីក​ចម្រើន​ដូច​សព្វ​ថ្ងៃ​បាន​ដែរ។

អាស៊ី​សេរី​មិន​អាច​ សុំ​ការ​បំភ្លឺ​បន្ថែម​ ពី​អ្នក​នាំ​ពាក្យ​ក្រសួង​មហាផ្ទៃ​លោក ខៀវ សុភ័ក បាន​ទេ​កាល​ពី​ថ្ងៃ​ទី២៥ កញ្ញា។

លោក អេង ឆៃអ៊ាង បាន​បញ្ជាក់​ថា មូល​ហេតុ​ដែល​នាំ​ឲ្យ​មាន​ការ​រំលោភ​សិទ្ធិមនុស្ស ដោយ​សារ​តែ​របប​ក្រុង​ភ្នំពេញ​ បាន​ដឹក​នាំ​ប្រទេស​ដោយ​គ្មាន​ការ​ប្រើ​ប្រាស់​ច្បាប់​ទម្លាប់ គឺ​ប្រើ​ប្រាស់​តែ​បបូរ​មាត់​របស់​ខ្លួន​ ច្បាប់​ទុក​ក្រោម​គូទ​ ។​លោក​និយាយ​ថា​ មនុស្ស​បច្ចុប្បន្ន​នេះ​ដណ្ដើម​គ្នា​រស់ អ្នក​ណា​មាន​ឧកាស​ គឺ​ធ្វើ​តាម​អំពើ​ចិត្ត ដែល​នាំ​ឲ្យ​តម្លៃ​នៃ​សីលធម៌​សង្គម​ធ្លាក់​ចុះ។

ទាក់​ទិន​នឹង​បញ្ហា​នេះ​ នាយករង​ទទួល​បន្ទុក​ផ្នែក​សិទ្ធិមនុស្ស​នៃ​អង្គការ លីកាដូ លោក អំ សំអាត បញ្ជាក់​ថា ទាក់​ទិន​នឹង​សិទ្ធិ​សេរីភាព​បច្ចុប្បន្ន​នេះ​ សង្គម​ស៊ីវិល​ដែល​ធ្វើ​ការ​ផ្នែក​សិទ្ធិ​មនុស្ស​ហ្នឹង​យល់​ឃើញ​ថា មួយ​រយៈ​ពេល​ចុង​ក្រោយ​នេះ​មាន​ការ​រឹតត្បិត​សិទ្ធិ​សេរីភាព​របស់​ប្រជាពលរដ្ឋ។​

លោក​បាន​បញ្ជាក់​ថា កន្លង​មក​គេ​ឃើញ​មាន​ការ​ចាប់​ខ្លួន​អ្នក​ហ៊ាន និយាយ​រិះគន់​រដ្ឋាភិបាល​ និង​ក្រុម​យុវជន​ជា​បន្ត​បន្ទាប់ ដែល​តវ៉ា​ដោយ​សន្តិ​វិធី នៅ​ពី​មុខ​តុលាការ ដើម្បី​ឱ្យ​ដោះ​លែង​សកម្ម​ជន​ផ្សេងៗ ទៀត ដែល​កំពុង​ជាប់​ឃុំ។

លោក​បន្ថែម​ថា បញ្ហា​រំលោភ​សិទ្ធិមនុស្ស​​នេះ មិន​មែន​តែ​អង្គការ​សង្គម​ស៊ីវិល​នៅ​ក្នុង​ស្រុក​ទេ សូម្បី​តែ​សហរដ្ឋ​អាមេរិក​ក្ដី សហគមន៍​អឺរ៉ុប​ក្ដី ក៏​ដូច​ជា អង្គការ​សហប្រជាជាតិ និង​អ្នក​រាយការណ៍​ពិសេស​តាម​ជំនាញ​ផ្សេងៗ នៃ​ផ្នែក​សិទ្ធិមនុស្ស ក៏​បាន​សំដែង​ការ​ព្រួយ​បារម្ភ អំពី​ស្ថាន​ភាព​សិទ្ធិមនុស្ស​ នៅ​កម្ពុជា​ដែរ។ ជា​ពិសេស សេរីភាព​ក្នុង​ការ​ជួប​ប្រជុំ និង​ការ​ប្រមូល​ផ្ដុំ​ដោយ​សន្តិ​វិធី​ផង​ដែរ នៅ​ក្នុង​ការ​ចាប់​ខ្លួន​រយៈ​ពេល​ចុង​ក្រោយ​នេះ ត្រូវ​បាន​រឹតត្បិត៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល