គណបក្សនយោបាយចំនួន៣ ដែលជំទាស់នឹងការកែប្រែកំណត់ហេតុរាប់សន្លឹកឆ្នោត ឬហៅថាទម្រង់១១០២ ស្នើឱ្យគណៈកម្មាធិការជាតិរៀបចំការបោះឆ្នោត (គ.ជ.ប) រក្សាទុកទម្រង់ និងនីតិវិធីនេះឲ្យនៅដដែល។ សង្គមស៊ីវិលយល់ថា នីតិវិធីរបស់គ.ជ.ប ដែលបានកែលម្អរវាងគណបក្សប្រជាជនកម្ពុជា និងគណបក្សសង្គ្រោះជាតិ កាលមុនឆ្នាំ២០១៧ មានលក្ខណៈល្អស្រាប់ហើយ។ គណបក្សប្រជាធិបតេយ្យមូលដ្ឋាន គណបក្សកម្ពុជានិយម និងគណបក្សកែទម្រង់កម្ពុជា នៅតែទាមទារឲ្យ គជប រក្សាទុក និងចែកកំណត់ហេតុរាប់សន្លឹកឆ្នោត (ទម្រង់ 1102) ឲ្យនៅដដែល សម្រាប់ដំណើរការនៃការរៀបចំបោះឆ្នោតក្រុមប្រឹក្សា ឃុំសង្កាត់ឆ្នាំ ២០២២។
អ្នកនាំពាក្យគណបក្សប្រជាធិបតេយ្យមូលដ្ឋាន លោក ឡឹក សុធារ ឲ្យដឹង ថា គណបក្សទាំង៣ បាន ដាក់សំណើឲ្យគ.ជ.ប លុបចោលគម្រោងកែប្រែ២ចំណុច គឺការលុបព័ត៌មានលទ្ធផលរាប់សន្លឹកឆ្នោតបឋម និងការបិទផ្សាយកំណត់ហេតុរាប់សន្លឹកឆ្នោត ក្នុងទម្រង់១១០២ ឲ្យនៅតាមការិយាល័យបោះឆ្នោតដដែល។ លោកបន្តថា ព័ត៌មានបឋមក្នុងទម្រង់១១០២ មានសារសំខាន់ណាស់ សម្រាប់គណបក្សនយោបាយនីមួយៗ ដើម្បីយកមកធ្វើការផ្ទៀងផ្ទាត់លទ្ធផលឆ្នោត។
លោក ឲ្យដឹងទៀតថា ក្នុងជំនួបកាលពីថ្ងៃទី១៤ មករា មន្ត្រីបច្ចេកទេសរបស់គ.ជ.ប បានសន្យាថា នឹងយកសំណើរបស់គណបក្សនយោបាយទាំង៣ ដាក់ជូនថ្នាក់ដឹកនាំគ.ជ.ប ដើម្បីពិចារណា៖ «យើងនៅតែរក្សាជំហរដដែល។ ជំហររបស់យើង ដោយសារតែទម្រង់១១០២ក្ដី ទាំងការបិទផ្សាយនូវការចែកជូនលទ្ធផលបោះឆ្នោតនេះ គឺវាមានសារសំខាន់ណាស់សម្រាប់គណបក្សនយោបាយដែលនឹងធ្វើការជជែកគ្នា ឬក៏តវ៉ានៅពេលណាមួយដែលរកឃើញថា លទ្ធផលហ្នឹងមិនប្រក្រតី ឬក៏មិនច្បាស់លាស់អ្វីជាដើម»។
គណបក្សនយោបាយទាំង៣ បានដាក់សំណើកាលពីចុងឆ្នាំ២០២១ ដើម្បីស្នើសុំ គ.ជ.ប រក្សាទុក និងចែករំលែក ឬបិទផ្សាយព័ត៌មាន និងទិន្នន័យបឋម ក្នុងទម្រង់១១០២ នៅតាមការិយាល័យបោះឆ្នោតដដែល។ សំណើនេះ ដោយសារគ.ជ.ប មានគម្រោងកែប្រែការបិទផ្សាយទម្រង់១១០២ ដោយប្ដូរមកជាការស្កេន (Scan) រួចបោះពុម្ពចេញតាមកុំព្យូទ័រ ហើយប្រគល់ឲ្យគណៈកម្មការរៀបចំការបោះឆ្នោតតាមឃុំ សង្កាត់ ចែកជូនតំណាងគណបក្សនយោបាយតាមឃុំសង្កាត់
ជុំវិញករណីនេះ វិទ្យុអាស៊ីសេរីមិនអាចសុំការបញ្ជាក់ពីអ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា បានទេ នៅថ្ងៃទី១៥ មករា។ តែយ៉ាងណា ក្នុងជំនួបជាមួយគណបក្សនយោបាយទាំង៣ និងតំណាងអង្គការសង្គមស៊ីវិល កាលពីថ្ងៃទី១៤ មករា អគ្គលេខាធិការគ.ជ.ប លោក ទេព នីថា បញ្ជាក់ថា ហេតុផលដែលមានការកែប្រែលើចំណុចនេះ ដោយសាររាជរដ្ឋាភិបាលផ្ដល់ថវិកាមួយចំនួនឱ្យគ.ជ.បមានលទ្ធភាពទិញកុំព្យូទ័រ និងម៉ាស៊ីនថតចម្លង(Scanner) សម្រាប់ផ្តល់ជូនទៅដល់គណៈកម្មការឃុំ សង្កាត់ រៀបចំការបោះឆ្នោត។
លោកអះអាងថា ការបោះឆ្នោតកន្លងមក គណៈកម្មការឃុំ សង្កាត់ ពុំមានសម្ភារឧបករណ៍ទាំងអស់នេះទេ ហើយម្យ៉ាងទៀតការប្រើប្រាស់ប្រព័ន្ធបច្ចេកវិទ្យានឹងជួយកាត់បន្ថយកំហុសឆ្គងមួយចំនួនរបស់មន្ត្រីការិយាល័យបោះឆ្នោត។ លោក ទេព នីថា អះអាងទៀតថា តំណាងគណបក្សនយោបាយនៅតែទទួលបានទម្រង់១១០២ដដែល ដោយគណៈកម្មការឃុំ សង្កាត់រៀបចំការបោះឆ្នោតថតចម្លងលទ្ធផលនៃការរាប់សន្លឹកឆ្នោតហើយប្រគល់ឲ្យតំណាងគណបក្សនយោបាយ ដែលមានវត្តមានតាមឃុំសង្កាត់។ លោកបញ្ជាក់ថា សាធារណជនក៏អាចចូលមើលលទ្ធផលទម្រង់១១០២នេះ បានដែរ នៅលើគេហទំព័ររបស់គ.ជ.ប។
ទោះជាយ៉ាងណា អង្គការសង្គមស៊ីវិលឃ្លាំមើលការបោះឆ្នោត មិនចង់ឲ្យគ.ជ.ប កែប្រែនីតិវិធីការបោះឆ្នោតទេ។
អ្នកសម្របសម្រួល និងអង្កេតនៃអង្គការខុមហ្វ្រែល (Comfrel) លោក កន សាវាង្ស សង្កេតឃើញថា នីតិវិធីបោះឆ្នោតទាំងឡាយដែលបានសម្រេចដោយគណបក្សប្រជាជនកម្ពុជា និងគណបក្សសង្គ្រោះជាតិនាពេលកន្លងទៅនោះ ជានីតិវិធីល្អបំផុត៖ «អ៊ីចឹង ! សម្រាប់ខុមហ្វ្រែលយល់ឃើញថា ការងារដែលទាក់ទងរឿងការរក្សាក្នុងការចេញ១១០២ ក្នុងការិយាល័យហ្នឹង គឺនៅតែជាអាទិភាព ហើយវាកាន់តែតម្លាភាពរវាងគ . ជ . ប ជាមួយនឹងគណបក្សនយោបាយថែមទៀត»។
គ.ជ.បកំពុងបន្តបិទផ្សាយបញ្ជីឈ្មោះបោះឆ្នោតដំបូង និងបញ្ជីឈ្មោះអ្នកបោះឆ្នោតដែលនឹងត្រូវលុបចេញពីបញ្ជីបោះឆ្នោតសម្រាប់ឆ្នាំ២០២១។ គិតត្រឹមថ្ងៃទី១៤ មករា ក្រុមប្រឹក្សាឃុំសង្កាត់ (ក.ប.ឃ.ស) ទទួលបានបណ្ដឹងតវ៉ាចំនួន៣៦ បណ្ដឹង។ បើគ្មានអ្វីប្រែប្រួលទេ ការបោះឆ្នោតក្រុមប្រឹក្សាឃុំសង្កាត់អាណត្តិទី ៥ នឹងប្រព្រឹត្តទៅនៅថ្ងៃទី៥ ខែមិថុនា ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។