សកម្មជន​មួយ​ចំនួន​ដែល​ទើប​ចេញ​ពី​ពន្ធនាគារ​នៅតែ​ប្រកាន់​ជំហរ​ធ្វើ​នយោបាយ​ក្នុង​បក្ស​ប្រឆាំង

ដោយ ខែ សុណង
2019-11-20
អ៊ីម៉ែល
មតិ
Share
បោះពុម្ព
ក្រុម​អតីត​មន្ត្រី​គណបក្ស សង្គ្រោះ​ជាតិ ខេត្ត​បាត់ដំបង បង្ហោះ​រូប​ថត​កាល​ពី​ថ្ងៃ​ទី​១៩​កក្កដា ​លើក​ចង្អុល​ដៃ​ជា​សញ្ញា​បញ្ចេញ​មតិ​ផ្ទាល់​ខ្លួន បង្ហាញ​ពហិការ​មិន​ទៅ​បោះ​ឆ្នោត។
ក្រុម​អតីត​មន្ត្រី​គណបក្ស សង្គ្រោះ​ជាតិ ខេត្ត​បាត់ដំបង បង្ហោះ​រូប​ថត​កាល​ពី​ថ្ងៃ​ទី​១៩​កក្កដា ​លើក​ចង្អុល​ដៃ​ជា​សញ្ញា​បញ្ចេញ​មតិ​ផ្ទាល់​ខ្លួន បង្ហាញ​ពហិការ​មិន​ទៅ​បោះ​ឆ្នោត។
រូប​ពី​ហ្វេសប៊ុក​លោក ជា ជីវ

សកម្មជន​គណបក្សប្រឆាំង​មួយ​ចំនួន​នៅ​ខេត្ត​បាត់ដំបង ដែល​ទើបតែ​ត្រូវ​បាន​ដោះលែង​ពី​គុក​ពាក់ព័ន្ធ​រឿង​នយោបាយ​នោះ អះអាង​ថា ពួកគេ​នៅតែ​ប្រកាន់​ជំហរ​ចង់​ឱ្យ​កម្ពុជា​មាន​ប្រជាធិបតេយ្យ​ពេញលេញ​ដដែល។ ពួកគេ​បញ្ជាក់​ថា ការ​ជាប់គុក​មួយ​រយៈ​ពេល​ខ្លី​កន្លង​ទៅ​នេះ ជា​បទពិសោធន៍​មួយ​បន្ថែម​ទៀត​ធ្វើ​ឱ្យ​ស្មារតី​ស្រលាញ់​ជាតិ​កាន់តែ​ខ្លាំង​ជាង​មុន។

សកម្មជន​គណបក្ស​សង្គ្រោះ​ជាតិ​ដែល​ទើប​ចេញពី​ពន្ធនាគារ លើកឡើង​ស្រដៀង​គ្នា​ថា ថ្វីត្បិតតែ​មិន​មាន​សិទ្ធិ​សេរីភាព​ពេញលេញ​ក្ដី ក៏​ពួកគាត់​នៅតែ​ចិញ្ចឹម​ចិត្ត​តស៊ូ​ដើម្បី​សេរីភាព​និង​ប្រជាធិបតេយ្យ​ដដែល។

មន្ត្រី​គណបក្ស​សង្គ្រោះ​ជាតិ​ខេត្ត​បាត់ដំបង លោក ឡី សុខុន ប្រាប់​អាស៊ីសេរី​នៅ​រសៀល​ថ្ងៃ​ទី​២០​វិច្ឆិកា​ថា សព្វថ្ងៃ​លោក​មិន​មាន​សិទ្ធិ​សេរីភាព​ពេញលេញ​ក្នុង​ការ​និយាយ​ស្ដី​ដូច​ប្រជាពលរដ្ឋ​ដទៃ​ឡើយ ពីព្រោះ​លោក​ត្រូវ​ទៅ​បង្ហាញខ្លួន​នៅ​ប៉ុស្តិ៍​ប៉ូលិស​ជា​បន្តបន្ទាប់​ទៅមុខ​ទៀត។ លោក​បន្ត​ថា ចាប់​ពី​តុលាការ​ដោះលែង​ពី​ពន្ធនាគារ​មក លោក​បាន​បង្ហាញ​ខ្លួន​នៅ​ប៉ុស្តិ៍​ប៉ូលិស​មូលដ្ឋាន​ក្នុងស្រុក​ឯក​ភ្នំ​ម្ដង​រួច​ហើយ ព្រោះ​តុលាការ​មិន​ទាន់​ទម្លាក់​ការ​ចោទប្រកាន់​ទាំងស្រុង​នៅឡើយ​ទេ។ លោក​បញ្ជាក់​ថា បើ​ទោះ​បី​ជា​លោក​រង​ការ​ធ្វើទុក្ខបុកម្នេញ​ពី​អាជ្ញាធរ​យ៉ាង​នេះ​ក្ដី ក៏​លោក​នៅ​តែ​មាន​ជំហរ​រឹងមាំ​ដើរ​ទៅ​មុខ ដើម្បី​ចូលរួម​ស្ដារ​ប្រជាធិបតេយ្យ​នៅ​កម្ពុជា ដោយ​មិន​មានការ​ថយក្រោយ​ឡើយ៖ «បាទ! ឱ្យ​ខ្ញុំ​បាក់​ស្មារតី​គ្មាន​ទេ គ្រាន់​តែ​ថា ខ្ញុំ​មិន​មាន​សិទ្ធិ​គ្រប់​គ្រាន់​ដោយសារ​សព្វ​ថ្ងៃ​ តុលាការ​ឱ្យ​ខ្ញុំ​នៅ​ក្រៅ​ឃុំ​បណ្ដោះ​អាសន្ន​ប៉ុណ្ណោះ​ទេ។ ក៏​ប៉ុន្តែ​គោលជំហរ​របស់​ខ្ញុំ​មិន​ខុស​ពី​អ្នក​ទោស​មនសិការ​ដទៃ​ទេ​ ល្គឹក​ណា​ មិន​ទាន់​មាន​សេរីភាព​មិន​មាន​ប្រជាធិបតេយ្យ​ពេញលេញ​ ខ្ញុំ​នៅ​តែ​ធ្វើ​ការ​ដើម្បី​សេរីភាព​ និង​ដើម្បី​ប្រជាធិបតេយ្យ​បន្ត​ទៀត»

លោក​បន្ត​ថា សកម្មជន​គណបក្សប្រឆាំង​ដែល​ជាប់ពន្ធនាគារ​មួយ​រយៈ​ខ្លី​កន្លង​ទៅ​នេះ តែងតែ​ជួប​ពិភាក្សា​គ្នា​រឿង​នយោបាយ​ជា​រៀងរាល់ថ្ងៃ និង​បាន​រួមគ្នា​ជា​ធ្លុង​មួយ ត្រូវ​ស្មោះស្ម័គ្រ​នឹង​ម្ចាស់​ឆ្នោត​ដែល​បាន​បោះឆ្នោត​ជូន​គណបក្ស​សង្គ្រោះជាតិ កាល​ពី​កន្លង​ទៅ ដោយ​មិន​មានការ​ងាករេ​ឡើយ​។​

រីឯ​សកម្មជន​គណបក្ស​សង្គ្រោះ​ជាតិ​នៅ​ខេត្ត​បាត់ដំបង ម្នាក់ លោក ឌឹម សារឿន ថ្លែង​ថា ការ​ជាប់គុក​ព្រៃ​ស​នៅ​រាជធានី​ភ្នំពេញ អស់​ជាង​មួយ​ខែ មិន​បាន​ធ្វើ​ឱ្យ​លោក​តក់ស្លុត​ហើយ​ឈប់​ធ្វើ​នយោបាយ​ជាមួយ​ថ្នាក់ដឹកនាំ​គណបក្សប្រឆាំង​នោះ​ទេ ផ្ទុយទៅវិញ​កាន់តែ​ធ្វើ​ឱ្យ​លោក​មាន​ស្មារតី​រឹងមាំ​ជាង​មុន​ទ្វារ​ដង ដើម្បី​ចូលរួម​ស្ដារ​ប្រជាធិបតេយ្យ​នៅ​កម្ពុជា​។ លោក​បញ្ជាក់​ថា ក្រោយ​ចេញពី​ពន្ធនាគារ​មិន​បាន​ប៉ុន្មាន​ថ្ងៃ​ផង មាន​អ្នកគាំទ្រ​គណបក្ស​សង្គ្រោះ​ជាតិ​ជាច្រើន​នាក់​មក​សួរសុខទុក្ខ និង​ផ្ដល់​កម្លាំងចិត្ត​ដល់​លោក​បន្ត​ជីវភាព​នយោបាយ​ទៅ​មុខ​ទៀត៖ «ការ​ធ្វើ​ទុក្ខបុកម្នេញ​មិន​មែន​តែ​លើក​នេះ​ទេ គឺ​ច្រើន​លើក​ច្រើន​សារ​ហើយ អីចឹង​ខ្ញុំ​មាន​បទពិសោធន៍​​ ហើយ​ខ្ញុំ​នៅ​តែ​តាំង​ចិត្ត​ធ្វើ​នយោបាយ​ដដែល​ ប៉ុន្តែ​គ្រាន់​តែ​ថា​ធ្វើ​ម៉េច​ឱ្យ​ស្រប​ទៅ​រដ្ឋធម្មនុញ្ញ។ ដោយ​សារ​ខ្ញុំ​ចង់​ចូល​រួម​អភិវឌ្ឍន៍​ប្រទេស​ ព្រោះ​ប្រជាពលរដ្ឋ​មិន​ទាន់​បាន​ហូបចុក​និង​សិទ្ធិ​សេរីភាព​ពេញលេញ​ ហើយ​ស្រូវ​អង្ករ​ពោត សណ្ដែក​ចុះថោក​ អីចឹង​ខ្ញុំ​ទៅ​ខ្ញុំ​ចង់​ធ្វើ​យ៉ាង​ណា​ឱ្យ​ប្រទេស​រីក​ចំរើន​ជាង​ពេល​បច្ចុប្បន្ន»

មេដឹកនាំ​របប​ក្រុងភ្នំពេញ លោក ហ៊ុន សែន បាន​បញ្ជា​ឱ្យ​ក្រសួង​យុត្តិធម៌​ដោះលែង​អ្នក​ទោស​នយោបាយ​ទាំងឡាយ​ដែល​ពាក់ព័ន្ធ​នឹង​គម្រោង​ធ្វើ​មាតុភូមិនិវត្តន៍​របស់​ប្រធាន​ស្ដីទី​គណបក្ស​សង្គ្រោះ​ជាតិ លោក សម រង្ស៊ី កាលពី​ថ្ងៃ​ទី​៩ វិច្ឆិកា​កន្លងទៅ​។ ក្រោយពី​ការប្រកាស​របស់​លោក​ហ៊ុន សែន មិនបាន​ប៉ុន្មាន​ម៉ោង​ផង តុលាការ​បាន​ដោះលែង​មនុស្ស​ជាច្រើន​នាក់​ចេញពី​ពន្ធនាគារ​ជា​បន្តបន្ទាប់ ប៉ុន្តែ​ប៉ុន្មាន​ថ្ងៃ​ក្រោយមក​លោក ហ៊ុន សែន បាន​ព្រមាន​ចាប់​អ្នក​ទាំងនោះ​ដាក់គុក​វិញ​ប្រសិនបើ​ពួកគេ​និយាយ​ថា ការដោះលែង​នេះ​ដោយសារ​មាន​សម្ពាធ​ពី​សហភាព​អឺរ៉ុប។ លោក ហ៊ុន សែន បញ្ជាក់​ថា ការ​ដោះលែង​នេះ ជា​សកម្មភាព​មនុស្សធម៌​របស់​លោក ដោយសារ​លោក​យល់ថា សកម្មជន​បក្ស​ប្រឆាំង​បាន​ចាញ់បោក​ការ​អំពាវនាវ​របស់ លោក សម រង្ស៊ី។

អ្នកវិភាគ​នយោបាយ លោក បណ្ឌិត ឡៅ ម៉ុងហៃ មាន​ប្រសាសន៍​ថា ការ​ដោះលែង​សកម្មជន​គណបក្ស​ប្រឆាំង​កន្លង​ទៅ​នេះ មិនមែន​ជា​ការ​ដោះលែង​ដោយសារ​ការ​អាណិត​ស្រលាញ់​របស់​លោក ហ៊ុន សែន នោះ​ទេ គឺ​ដោយសារតែ​សម្ពាធ​ពី​សហគមន៍​អន្តរជាតិ ជាពិសេស​បន្ទាប់​មន្ត្រី​ស្ថានទូត​ប្រទេស​ប្រជាធិបតេយ្យ​លោក​ខាង​លិច បាន​ចូល​សួរសុខទុក្ខ​ប្រធាន​គណបក្ស​សង្គ្រោះ​ជាតិ លោក កឹម សុខា ដល់​ផ្ទះ​ជា​បន្តបន្ទាប់៖ «បើ​ស្មោះ​ស​ណាស់​ដោះ​លែង​លោក កឹម សុខា ឱ្យ​មាន​សេរីភាព​វិញ​ទៅ​អត់​មាន​លក្ខខណ្ឌ​អី ដែល​មិន​ឱ្យ​ធ្វើ​សកម្មភាព​នយោបាយ​ ហើយ​ក៏​ដូច​ជា​សកម្មជន​ចាំ​ទទួល​លោក​សម​ រង្ស៊ី​ ជិត ១០០នាក់ ដែល​ត្រូវ​ចាប់​ខ្លួន​សូម​ឱ្យ​លើក​លែង​ការ​ចោទ​ប្រកាន់​ទាំង​អស់​ទៅ។ ប៉ុន្តែ​លោក ហ៊ុន សែន គាត់​មិន​ធ្វើ​បែប​នេះ​ ហើយ​គាត់​ទុក​ចង​កុំ​ឱ្យ​ពួក​គេ​ធ្វើ​សកម្មភាព​អី​នាំ​ឱ្យ​ប៉ះពាល់​ដល់​គោលនយោបាយ​របស់​គាត់​បាទ

កន្លងមក​មន្ត្រី​អង្គការ​សង្គម​ស៊ីវិល បាន​លើក​ឡើង​ថា ការ​ឃុំខ្លួន​សកម្មជន​គណបក្ស​ប្រឆាំង​ជា​បន្ត​បន្ទាប់​មក​នោះ គឺ​ពុំ​មែន​ជា​ការ​អនុវត្ត​ច្បាប់​របស់​សមត្ថកិច្ច​នោះ​ឡើយ ពីព្រោះ​ជា​រឿង​នយោបាយ ដោយសារ​ពួកគេ​គាំទ្រ​គណបក្សប្រឆាំង បាន​សម្ដែង​មតិ​គាំទ្រ​ការ​ធ្វើ​មាតុភូមិនិវត្តន៍​របស់​ថ្នាក់ដឹកនាំ គណបក្ស​សង្គ្រោះ​ជាតិ។

នាយករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លីកាដូ (LICADHO) លោក អំ សំអាត យល់ថា ការ​ចាប់ចង​មនុស្ស​នេះ​ជា​យុទ្ធសាស្ត្រ​របស់​រដ្ឋាភិបាល ដើម្បី​ទប់ស្កាត់​ដល់​អ្នកគាំទ្រ​គណបក្ស​នេះ​មិន​ឱ្យ​ទៅ​ចូលរួម​អម​ដំណើរ​លោក សម រង្ស៊ី វិល​ចូល​ស្រុក​វិញ។

សកម្មជន​គណបក្ស​សង្រ្គោះជាតិ​អះអាង​ថា នៅ​ពេល​ណា​មាន​សេរីភាព​ដូចដើម​នោះ ពួកគាត់​នឹង​ធ្វើ​សកម្មភាព​នយោបាយ​ជាមួយ​ថ្នាក់ដឹកនាំ​គណបក្ស​នេះ​ភ្លាមៗ ​តែម្ដង ដើម្បី​ឱ្យ​ប្រទេស​មាន​ប្រជាធិបតេយ្យ​ពេញលេញ​ដូច​ប្រទេស​ជឿនលឿន​លោក​ខាង​លិច៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល