រដ្ឋាភិបាលថៃទទួលស្គាល់ភាពជាប់គាំងការបង្កើតគណៈកម្មការចរចាតំបន់ត្រួតស៊ីគ្នា ខណៈកម្ពុជាបន្តរក្សាភាពស្ងប់ស្ងាត់សាជាថ្មី
2024.12.06
ភាពស្និទ្ធស្នាលរវាងអតីតនាយករដ្ឋមន្ត្រីថៃ គឺលោក ថាក់ស៊ីន ស៊ីណាវ៉ាត់ (Thaksin Shinawatra) រូបខាងឆ្វេង និងលោក ហ៊ុន ម៉ាណែត ក្នុងអំឡុងពេលគ្រួសារត្រកូល ថាក់ស៊ីន មកលេងគ្រួសារត្រកូលហ៊ុន កាលពីខែកុម្ភៈ ឆ្នាំ២០២៤។
រូប៖ ហ្វេសប៊ុក Duong Dara 2024-02-21
ថៃនៅមិនទាន់បង្កើតគណៈកម្មការជំនាញ ដើម្បីចរចាជាមួយកម្ពុជា ក្នុងរឿងវិវាទដែនសមុទ្រ ដែលប្រទេសទាំងពីរអះអាងថា «ត្រួតស៊ីគ្នា» នោះនៅឡើយទេ។ អ្នកឃ្លាំមើលកម្ពុជាយល់ឃើញថា ភាពជាប់គាំងរបស់រដ្ឋាភិបាលថៃ គឺបណ្ដាលមកពីវិបត្តិនយោបាយផ្ទៃក្នុង ដោយសារពលរដ្ឋ និងគណបក្សប្រឆាំងថៃ មិនទុកចិត្តមេដឹកនាំថៃ ដែលមានទំនាក់ទំនងជិតស្និទ្ធជាមួយគ្រួសារមេដឹកនាំកម្ពុជារបស់ត្រកូល ហ៊ុន។
ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិថៃ លោក ភូមិថាំ វេឆាយាឆៃ (Phumtham Wechayachai) បានប្រកាសនៅថ្ងៃទី៦ ខែធ្នូ ថា ការបង្កើតគណៈកម្មការបច្ចេកទេសរួម ឬ JTC ដើម្បីចរចាអនុស្សរណៈយោគយល់គ្នាឆ្នាំ២០០១ (MOU44) ស្ដីពីការអភិវឌ្ឍរួមគ្នាសម្រាប់វិស័យធនធានថាមពល (OCA) ជាមួយកម្ពុជានោះ នៅមិនទាន់មានការរីកចម្រើននៅឡើយ ដោយការបង្កើតគណៈកម្មការនេះ កំពុងដំណើរការពិភាក្សានៅក្នុងក្រសួងការបរទេស មុននឹងលើកយកមកពិភាក្សាបន្តនៅក្នុងគណៈរដ្ឋមន្ត្រី។
រដ្ឋមន្ត្រីក្រសួងការពារជាតិថៃរូបនេះបញ្ជាក់បន្ថែមថា ចំពោះការផ្សព្វផ្សាយព័ត៌មានអំពីការលើកឡើងរបស់នាយករដ្ឋមន្ត្រីកម្ពុជា លោក ហ៊ុន ម៉ាណែត ដែលថា «កោះគជ់នៅមិនទាន់បានសម្រេចថា ជាដែនអធិបតេយ្យរបស់ប្រទេសណាមួយនៅឡើយ ដោយតម្រូវឱ្យមានការចរចា» នោះ លោក ភូមិថាំ វេឆាយាឆៃ ប្រាប់ថា លោកមិនយល់អំពីអ្វី ដែលលោក ហ៊ុន ម៉ាណែត បាននិយាយនោះទេ ដោយលោកនៅតែអះអាងថា កោះគជ់គឺជាកម្មសិទ្ធិផ្ដាច់មុខរបស់ថៃដដែល និងមិនមានការលើកយករឿងនេះ មកជជែកចរចាឡើយ។
ជុំវិញរឿងនេះ អតីតតំណាងរាស្ត្រគណបក្សសង្គ្រោះជាតិ លោក អ៊ុំ សំអាន យល់ឃើញថា មូលហេតុនៃការជាប់គាំងក្នុងការបង្កើតគណៈកម្មការរបស់រដ្ឋាភិបាលថៃនេះ គឺដោយសារតែវិបត្តិនយោបាយ ដែលកើតចេញពីការមិនទុកចិត្តរបស់ប្រជាពលរដ្ឋ និងគណបក្សប្រឆាំងរបស់ថៃ ចំពោះនាយករដ្ឋមន្ត្រីរបស់ខ្លួន គឺអ្នកស្រី ផែថងថាន ស៊ីណាវ៉ាត់ (Paetongtarn Shinawatra) ដែលគេចោទថា ឪពុករបស់អ្នកស្រី ដែលជាអតីតនាយករដ្ឋមន្ត្រីថៃ គឺលោក ថាក់ស៊ីន ស៊ីណាវ៉ាត់ (Thaksin Shinawatra) មានទំនាក់ទំនងជិតស្និទ្ធជាមួយគ្រួសារមេដឹកនាំកម្ពុជារបស់ត្រកូលហ៊ុន។
លោក អ៊ុំ សំអាន៖ «បន្ទាប់ពីបង្កើតគណៈកម្មការនេះរួចហើយក៏ដោយកម្ពុជាក៏មិនត្រូវចរចាទ្វេភាគីជាមួយប្រទេសថៃនោះទេ កម្ពុជាត្រូវទាមទារឱ្យថៃ ត្រូវលុបចោលអនុស្សរណៈយោគយល់គ្នាឆ្នាំ២០០១ ជាមួយកម្ពុជាហ្នឹង ហើយបន្ទាប់មកទៀតកម្ពុជាត្រូវប្ដឹងទៅតុលាការអន្តរជាតិ ដើម្បីទាមទារយ៉ាងហោចក៏ពាក់កណ្ដាលនៃកោះគជ់មកវិញ ហើយដែនសមុទ្រខ្មែរដែលអះអាងថា ត្រួតស៊ីគ្នាចំនួន ៣ម៉ឺនគីឡូម៉ែត្រការ៉េហ្នឹងមកវិញ»។
កាលពីថ្ងៃទី៨ ខែវិច្ឆិកា នាយករដ្ឋមន្ត្រីថៃ អ្នកស្រី ផែថងថាន ស៊ីណាវ៉ាត់ បានថ្លែងនៅក្នុងកិច្ចប្រជុំគណៈរដ្ឋមន្ត្រីថៃថា រដ្ឋាភិបាលរបស់អ្នកស្រីនឹងបង្កើតគណៈកម្មការ ដើម្បីដោះស្រាយបញ្ហាតំបន់ ដែលអះអាងថា «ត្រួតស៊ីគ្នា» ជាមួយកម្ពុជា មិនឱ្យលើសពីខែវិច្ឆិកាឡើយ។ ប៉ុន្តែការបង្កើតគណៈកម្មការនេះ មិនបានសម្រេចតាមការកំណត់នៅឡើយទេ។
វិទ្យុអាស៊ីសេរី មិនអាចទាក់ទងរដ្ឋមន្ត្រីទទួលបន្ទុកកិច្ចការព្រំដែន លោក ឡាំ ជា និងអ្នកនាំពាក្យក្រសួងការបរទេស លោក ជុំ សុន្ទរី ដើម្បីសុំការបកស្រាយជុំវិញរឿងនេះបានទេ នៅថ្ងៃទី៦ ខែធ្នូ។
កាលពីថ្ងៃទី២៩ ខែវិច្ឆិកា លោកនាយករដ្ឋមន្ត្រី ហ៊ុន ម៉ាណែត បានបន្តចោទអ្នកដែលលើកឡើងពីបញ្ហាកោះគជ់ថា ជាក្រុមប្រឆាំងជ្រុលនិយម និងយករឿងនេះមកដុតកំហឹងពលរដ្ឋ ឱ្យប្រឆាំងនឹងរដ្ឋាភិបាល។ ក៏ប៉ុន្តែ ទន្ទឹមនឹងការគំរាមកំហែង និងវាយប្រហារលើអ្នកនយោបាយបក្សប្រឆាំងនោះ មកទល់ពេលនេះ រដ្ឋាភិបាលត្រកូលហ៊ុន មិនទាន់បានបកស្រាយពន្យល់ពលរដ្ឋឱ្យបានច្បាស់លាស់ និងមានហេតុផលសមរម្យនៅឡើយទេជុំវិញបញ្ហាកោះគជ់នេះ។
ចំណែកឯនាយករដ្ឋមន្ត្រីថៃ អ្នកស្រី ផែថងថាន ស៊ីណាវ៉ាត់ (Paetongtarn Shinawatra) វិញ អ្នកស្រីត្រូវប្រជាពលរដ្ឋ និងមេដឹកនាំគណបក្សប្រឆាំង រិះគន់កាន់តែខ្លាំងឡើង បន្ទាប់ពីអ្នកស្រីបានពន្យល់ពីការគូសវាសខ្សែបន្ទាត់កំណត់ដែនសមុទ្រ ដែលកាត់ចំពាក់កណ្ដាលកោះគជ់ ដោយអ្នកស្រីអះអាងថា មេដឹកនាំកម្ពុជា បានសម្រេចឆ្វៀលកោះគជ់ទាំងមូលឱ្យមកថៃហើយ។ ទោះជាបែបនេះក្ដី ពលរដ្ឋ និងមេបក្សប្រឆាំងថៃបានចោទថា ការបកស្រាយរបស់អ្នកស្រីអាចនឹងធ្វើឱ្យថៃបាត់បង់កោះគជ់ពាក់កណ្ដាល។
បច្ចុប្បន្ននេះអគ្គមេបញ្ជាការកងទ័ពជើងទឹកថៃ កំពុងដំណើរការរៀបចំធ្វើសមយុទ្ធកងនាវាចរប្រចាំឆ្នាំ នៅឈូងសមុទ្រថៃ ចន្លោះពីថ្ងៃទី១០ ដល់ថ្ងៃទី១២ ខែធ្នូ ដោយកងនាវិកថៃត្រៀមចល័តសព្វាវុធ នាវាមុជទឹក នាវាចម្បាំង និងបោះយុថ្កានៅក្បែរទីតាំងកោះគជ់នេះតែម្ដង។
អ្នកឃ្លាំមើលលើកឡើងថា មានតែការលើកយកសំណុំរឿងតំបន់ដែលអះអាងថា «ត្រួតស៊ីគ្នា» នេះ ប្ដឹងទៅតុលាការអន្តរជាតិប៉ុណ្ណោះ ទើបអាចបញ្ចប់វិវាទនេះ ព្រមទាំងបង្ការកុំឱ្យមានជម្លោះប្រដាប់អាវុធ និងកុំឱ្យពលរដ្ឋនៃប្រទេសទាំងពីរ មានអរិភាពជាមួយគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- មនុស្ស ៤នាក់ស្លាប់ និង ៥នាក់ទៀតរបួសធ្ងន់ ពេលប្រជ្រៀតគ្នាយកអាំងប៉ាវនៅភូមិគ្រឹះលោក សុខ គង់
- លោក សម រង្ស៊ី អំពាវនាវឱ្យកងកម្លាំងប្រដាប់អាវុធ និងអ្នកនយោបាយរួមគ្នាផ្លាស់ប្ដូររបបត្រកូល ហ៊ុន
អត្ថបទពេញនិយម
នយោបាយ
- លោក ហ៊ុន ម៉ាណែត បដិសេធមិនពាក់ព័ន្ធនឹងឃាតកម្មលើលោក លិម គិមយ៉ា
- ភរិយា លោក លិម គិមយ៉ា រៀបរាប់ពីសកម្មភាពនៅលើឡានក្រុង មកទីក្រុងបាងកក មុនពេលឃាតកបាញ់សម្លាប់ប្ដី
- អ្នកឃ្លាំមើលថា លោក ហ៊ុន ម៉ាណែត អសមត្ថភាពរកទីផ្សារជូនពលរដ្ឋ ទើបងាកទៅទម្លាក់ការទទួលខុសត្រូវលើបក្សប្រឆាំង
- ពលរដ្ឋខ្មែរនៅប្រទេសជប៉ុនទាមទារយុត្តិធម៌ជូនសពលោក លិម គិមយ៉ា
- មន្ត្រីជាន់ខ្ពស់បក្សប្រឆាំងពន្យល់ពីមូលហេតុដែលរដ្ឋាភិបាលត្រកូលហ៊ុនមិនតវ៉ារឿងកោះគជ់