នាយករដ្ឋមន្ត្រីថៃថា កម្ពុជាមិនមានបញ្ហានឹងរឿងកោះគុត ដែលស្ថិតនៅក្នុងតំបន់ ដែលថៃអះអាងថា ត្រួតស៊ីគ្នានៃដែនសមុទ្ររបស់ប្រទេសកម្ពុជា និងថៃនោះទេ ខណៈគណៈកម្មាធិការបច្ចេកទេសរួមគ្នានឹងត្រូវបង្កើតសម្រាប់ចរចា ដើម្បីរកដំណោះស្រាយរួម។ ទោះជាយ៉ាងណាក្ដី អ្នកវិភាគលើកឡើងថា កម្ពុជាអាចនឹងចាញ់ប្រៀបក្នុងការចរចានេះ គឺដោយសារតែគ្មានវត្តមានបក្សប្រឆាំង និងអ្នកស្រាវជ្រាវឯករាជ្យចូលរួម។
ជុំវិញរឿងនេះ អ្នកតាមដានភូមិសាស្ត្រនយោបាយតំបន់អាស៊ីអាគ្នេយ៍ និងប៉ាស៊ីហ្វិក លោក សេង វណ្ណលី មានប្រសាសន៍ប្រាប់វិទ្យុអាស៊ីសេរី នៅថ្ងៃទី១២ វិច្ឆិកាថា បញ្ហាដែនទឹករបស់ប្រទេសថៃ និងប្រទេសកម្ពុជាបានក្លាយជាប្រធានបទ ដែលកំពុងក្ដៅខ្លាំងនៅក្នុងប្រទេសថៃ ដោយសារគណបក្សប្រឆាំង សារព័ត៌មាន និងអ្នកវិភាគព្យាយាមលើកយកបញ្ហាទាំងនេះប្រាប់ទៅពលរដ្ឋថៃ ដែលធ្វើឱ្យរដ្ឋាភិបាលប្រទេសថៃនឹងព្យាយាមយកផលប្រយោជន៍ចេញពីបញ្ហាត្រួតស៊ីគ្នារបស់ប្រទេសទាំងពីរនេះ។
ផ្ទុយទៅវិញ លោក សេង វណ្ណលី ថា ស្របពេលគណបក្សប្រឆាំងនៅកម្ពុជាចុះខ្សោយ ហើយរដ្ឋាភិបាលមិនបានបកស្រាយលំអិតបញ្ហាទឹកដីនេះដល់ពលរដ្ឋផងនោះធ្វើឱ្យពលរដ្ឋខ្មែរមិនបានយល់ពីបញ្ហាទាំងនេះនោះទេ។ ម្យ៉ាងទៀត លោក សេង វណ្ណលី យល់ថា រដ្ឋាភិបាលកម្ពុជាចង់ចរចាតែទៅលើអនុស្សរណៈយោគយល់គ្នា (MOU) ជាមួយភាគីថៃ ដែលប្រការនេះបង្ហាញថា រដ្ឋាភិបាលដែលដឹកនាំដោយគណបក្សប្រជាជនគិតតែពីផលប្រយោជន៍សេដ្ឋកិច្ច ប៉ុន្តែរដ្ឋាភិបាលមិនមានបំណងកំណត់ដែនទឹករបស់កម្ពុជាឱ្យបានជាក់លាក់នោះទេ។
លោក សេង វណ្ណលី៖ «ដោយសារអីគេដឹងថាប្រព័ន្ធនយោបាយរបស់កម្ពុជាខ្សោយ អ្នកនយោបាយឃើញតែផលប្រយោជន៍ ហើយអាចនឹងមានការសម្របសម្រួលឱ្យមានការកំណត់ព្រំដែនមួយ ដែលកម្ពុជាខ្លួនឯងនឹងខាតបង់ ហើយដោយសារកម្ពុជាមើលឃើញការអភិវឌ្ឍន៍រួម ឬផលប្រយោជន៍ពីឧស្ម័នធម្មជាតិGasឬPetroleumនៅតំបន់ត្រួតស៊ីគ្នាសំខាន់ជាងការកំណត់ព្រំដែន កម្ពុជានឹងឯកភាពជាមួយអ្វី ដែលក្រុមចរចារបស់ថៃបានស្នើ»។
ការលើកឡើងរបស់អ្នកវិភាគនេះ ធ្វើឡើងបន្ទាប់ពីនាយករដ្ឋមន្ត្រីថៃ អ្នកស្រី ផែថងថាន ស៊ីណាវ៉ាត់ (Pae Thongthan Shinawatra) ត្រូវបានកាសែត បាងកក ប៉ុស្តិ៍ (Bangkok Post) ស្រង់សំដីចុះផ្សាយ កាលពីថ្ងៃទី៩ វិច្ឆិកាថា កាលពីថ្ងៃសុក្រ ទី៨ ខែវិច្ឆិកា ក្នុងពេលអ្នកស្រីជួបជាមួយនាយករដ្ឋមន្ត្រីកម្ពុជា លោក ហ៊ុន ម៉ាណែត នៅឯកិច្ចប្រជុំនៅប្រទេសចិនថា ប្រទេសថៃត្រូវការសហការពីកម្ពុជាក្នុងកិច្ចព្រមព្រៀងអនុស្សរណៈយោគយល់គ្នា (MOU) និងថា កម្ពុជាមិនមានបញ្ហានឹងរឿងកោះគុតនោះទេ ហើយអ្វីដែលកម្ពុជាបារម្ភនោះ គឺទាក់ទងនឹងពេលវេលាដែលគណៈកម្មាធិការបច្ចេកទេស (JTC) រួមគ្នានឹងត្រូវបង្កើត ដើម្បីចាប់ផ្ដើមការចរចា។
កាសែតបាងកកប៉ុស្តិ៍រាយការណ៍ថា រដ្ឋាភិបាលថៃបានជូនដំណឹងទៅកាន់រដ្ឋាភិបាលកម្ពុជាអំពីការចរចាលើកិច្ចព្រមព្រៀងស្ដីពីការអភិវឌ្ឍន៍រួមគ្នា នៃធនធានប្រេង និងឧស្ម័ន កាលពីឆ្នាំ២០០១ នឹងចាប់ផ្ដើមឡើងវិញ បន្ទាប់ពីគណៈកម្មាធិការបច្ចេកទេសរួម (JTC) ត្រូវបានបង្កើតឡើងនៅពាក់កណ្ដាលខែវិច្ឆិកានេះ។
អ្នកស្រី ផែថងថាន ឆ្លើយតបទៅនឹងគណបក្សប្រឆាំងថៃថា កិច្ចព្រមព្រៀងស្ដីពីការអភិវឌ្ឍន៍រួមគ្នា នៃធនធានប្រេង និងឧស្ម័ននឹងដើរតួជាចម្បងសម្រាប់ការចរចាតំបន់ទាមទារត្រួតស៊ីគ្នា (OCA)។ អ្នកស្រីថា ការសម្រេចចិត្តជាឯកតោភាគីរបស់ប្រទេសទាំងពីរក្នុងការដកកិច្ចព្រមព្រៀងនេះ (MOU) អាចនាំឲ្យមានលទ្ធផលអវិជ្ជមាន។
វិទ្យុអាស៊ីសេរី មិនអាចទាក់ទងអ្នកនាំពាក្យរដ្ឋលេខាធិការដ្ឋានកិច្ចការព្រំដែន លោក អាន សុវឌ្ឍនា និងអ្នកនាំពាក្យក្រសួងការបរទេស លោក ជុំ សុន្ទរី ដើម្បីសុំការបកស្រាយជុំវិញរឿងនេះបានទេ នៅថ្ងៃទី១២ ខែវិច្ឆិកា។
ជុំវិញបញ្ហានេះ កន្លងមក អតីតតំណាងរាស្ត្រគណបក្សសង្គ្រោះជាតិ នៅមណ្ឌលខេត្តសៀមរាប លោក អ៊ុំ សំអាន អះអាងថា យោងតាមអនុសញ្ញាបារាំង-សៀម ឆ្នាំ១៩០៧ បារាំងបានកំណត់ព្រំដែនសមុទ្រថា ត្រូវយកចំណុចខ្ពស់បំផុតនៃកោះគុតជាគោល។ ចំណុចខ្ពស់បំផុត នៃកោះគុត កម្ពុជាត្រូវទទួលបានដីមួយផ្នែកធំនៃកោះនេះ ឬស្មើនឹង ២/៣ នៃកោះគុតទាំងមូល រីឯភាគីថៃទទួលបានដី ១/៣ នៃកោះនេះ។
បច្ចុប្បន្នកោះគុត ត្រូវបានរដ្ឋាភិបាលថៃអភិវឌ្ឍ ដោយបង្កើតទៅជាតំបន់ទេសចរណ៍ ដោយមានភ្ញៀវទៅកម្សាន្តប្រហែល ៣០ម៉ឺននាក់ក្នុងមួយឆ្នាំ ហើយកោះនេះ ក៏ជាកន្លែងទាហានជើងទឹករបស់ថៃ យកធ្វើជាកន្លែងសមយុទ្ធផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។