នាវា​ចម្បាំង​ចិន ២គ្រឿង​បាន​មក​ដល់​កម្ពុជា ដើម្បី​ត្រៀម​ធ្វើ​សមយុទ្ធ​កងទ័ព​ជើង​ទឹក​នៅ​ខេត្តព្រះសីហនុ

ដោយ មាន ឫទ្ធិ
2024.05.20
នាវា​ចម្បាំង​ចិន ២គ្រឿង​បាន​មក​ដល់​កម្ពុជា ដើម្បី​ត្រៀម​ធ្វើ​សមយុទ្ធ​កងទ័ព​ជើង​ទឹក​នៅ​ខេត្តព្រះសីហនុ នាវា​ច្បាំង​របស់​ចិន ២គ្រឿង​ ​ចូល​ចត​នៅ​កំពង់ផែ​ស្វយ័ត​ក្រុងព្រះសីហនុ នៅ​ថ្ងៃ​ទី១៣ ខែឧសភា ឆ្នាំ២០២៤ រួបទាង​កងទ័ព​ជើង​ទឹក​ប្រមាណ ៣០០រយ​នាក់ ត្រៀម​ចូលរួម​សមយុទ្ធ​យោធា «នាគមាស» លើកទី៦។
រូប៖ ហ្វេសប៊ុកក្រសួងការពារជាតិ

នាវា​ចម្បាំង​របស់​ប្រទេសចិន (China) ចំនួន ២គ្រឿង​បាន​ចូល​ចត​នៅ​កំពង់ផែ​ស្វយ័ត​ក្រុង​ព្រះសីហនុ​កាល​ពី​ថ្ងៃ​ទី១៩ ខែឧសភា ខណៈ​សមយុទ្ធ​យោធា​លើ​គោក​រវាង​កងទ័ព​នៃ​ប្រទេស​ទាំង​ពីរ​កំពុង​បន្ត​ដំណើរ​ការ។ ចំណែក អ្នក​វិភាគ​លើកឡើង​ថា ការ​បញ្ជូន​នាវា​ចម្បាំង​ធ្វើ​សមយុទ្ធ​ជាមួយ​កងទ័ព​កម្ពុជា ចិន​ហាក់​ចង់​បង្ហាញ​ឥទ្ធិពល​យោធា​របស់​ខ្លួន ជាជាង​ផ្ដល់​ប្រយោជន៍​សម្រាប់​កង​ទ័ព​កម្ពុជា។

នាវា​ច្បាំង​របស់​ចិន ២គ្រឿង​ដែល​មាន​ឈ្មោះ ឈីជីគ័ង (Qijiguang) និង​ជីងកាងស៊ាន (Jinggangshan) បាន​ចូល​ចត​នៅ​កំពង់ផែ​ស្វយ័ត​ក្រុងព្រះសីហនុ ត្រៀម​ចូលរួម​សមយុទ្ធ​យោធា «នាគមាស» លើកទី៦។ ការ​ចូល​ចត​នេះ​មាន​រយៈ​ពេល ៥ថ្ងៃ គឺ​ចាប់​ពី​ថ្ងៃ​ទី១៩ ដល់​ថ្ងៃ​ទី២៣ ខែឧសភា។

ឯកអគ្គរដ្ឋទូត​ចិន​ប្រចាំ​កម្ពុជា លោក វ៉ាង វិនធាន (Wang Wentian) ដែល​ចូលរួម​ទទួល​ស្វាគមន៍​នាវា​ចម្បាំង​ចិន​ចូល​ចត​នៅ​កំពង់ផែ​ស្វយ័ត​ក្រុងព្រះសីហនុ កាល​ពី​ថ្ងៃទី១៩ ខែឧសភា បាន​ប្រាប់​ក្រុម​អ្នក​សារព័ត៌មាន​ថា កិច្ច​សហប្រតិបត្តិការ​រវាង​កងទ័ព​ចិន និង​កម្ពុជា នឹង​ផ្ដល់​ផល​ប្រយោជន៍​លើ​ការ​ការពារ​សន្តិសុខ​ប្រទេស​ទាំង​ពីរ និង​សន្តិសុខ​ក្នុង​តំបន់។ លោក​ទាត់​ចោល​កង្វល់​ជុំវិញ​វត្តមាន​នាវា​ចម្បាំង​ចិន​នៅ​កម្ពុជា ដោយ​អះអាង​ថា នាវា​ចម្បាំង​ចិន​នាំ​មក​នូវ «មិត្តភាព» និង «កិច្ច​សហប្រតិបត្តិ​ការ»

Chinese_Warship_docking_at_Sihanoukville_port_051324_National_Defense_FB_5.jpg
កងទ័ព​ជើងទឹក​កម្ពុជា​ទទួល​ស្វាគមន៍​កងទ័ព​ជើង​ទឹកចិន ​ប្រមាណ ៣០០រយ​នាក់ និង​នាវា​ច្បាំង​ ២គ្រឿង​ ពេល​​ចូល​ចត​នៅ​កំពង់ផែ​ស្វយ័ត​ក្រុងព្រះសីហនុ នៅ​ថ្ងៃ​ទី១៣ ខែឧសភា ឆ្នាំ២០២៤ ត្រៀម​ចូលរួម​សមយុទ្ធ​យោធា «នាគមាស» លើកទី៦។ រូបពីហ្វេសប៊ុកក្រសួងការពារជាតិ

ក្រសួង​ការពារ​ជាតិ​ចិន ធ្លាប់​បញ្ជាក់​ថា ការ​បញ្ជូន​នាវា​ចម្បាំង​របស់​ចិន​ចូលរួម​ធ្វើ​សមយុទ្ធ​គឺ​ជា​ផ្នែក​មួយ​ដែល​កងទ័ព​ជើង​ទឹក​ចិន​បាន​កំណត់​ទុក​សម្រាប់​កម្មវិធី​ហ្វឹកហ្វឺន​នៅ​លម្ហ​សមុទ្រ​ជាមួយ​កងទ័ព​ជើង​ទឹក​កម្ពុជា និង​កងទ័ព​នៃ​ប្រទេស​ក្នុង​តំបន់។

កាល​ពី​ថ្ងៃ​ទី១៣ ខែឧសភា ចិន​ក៏​បាន​បញ្ជូន​កងទ័ព​ជើង​ទឹក​ប្រមាណ ៣០០រយ​នាក់ និង​នាវា​ចម្បាំង​ពហុ​មុខងារ​ប្រភេទ លេខ-០៧១ (Type-071) ដែល​មាន​បណ្ដោយ​ប្រវែង​ជាង ២រយម៉ែត្រ (២១០ម៉ែត្រ) ទទឹង​ប្រវែង ២៨ម៉ែត្រ និង​ជម្រៅ​ទឹក​ប្រវែង ០៧ម៉ែត្រ ទម្ងន់ ២ម៉ឺន ៥ពាន់ តោន (២៥.០០០តោន) ចូល​ចត​នៅ​កំពង់ផែ​ក្រុង​ព្រះសីហនុ។

ដោយ​ឡែក នាវា​ចម្បាំង​ចិន​ពីរ​គ្រឿង​ផ្សេង​ទៀត ដែល​កំពុង​ចត​នៅ​កំពង់​ផែរាម​ស្រាប់​កាល​ពី​អំឡុង​ខែ​ធ្នូ ឆ្នាំ២០២៣ នោះ ត្រូវ​គេ​ជឿ​ថា ជា​នាវា​ចម្បាំង​របស់​ចិន​ល្បឿន​លឿន​ខ្នាត​តូច​ទម្ងន់ ១.៥០០តោន ប្រភេទ​បាញ់​មីសីល និង​មាន​បំពាក់​គ្រាប់​បាញ់​នាវា និង​អាច​ដឹក​ឧទ្ធម្ភាគចក្រ​បាន។

កងទ័ព​កម្ពុជា​ជាង ១ពាន់​នាក់ (.៣១៥នាក់) និង​កងទ័ព​ចិន​ជាង ៧រយ​នាក់ (៧៦០នាក់) កំពុង​ផ្ដើម​ធ្វើ​សមយុទ្ធ​យោធា «នាគមាស» ប្រចាំ​ឆ្នាំ២០២៤ ក្រោម​ប្រធានបទ «ប្រតិបត្តិការ​ប្រឆាំង​អំពើ​ភេរវកម្ម​រួម និង​ការ​សង្គ្រោះ​មនុស្ស​ធម៌» ដែល​រៀបចំ​ធ្វើ​ឡើង​នៅ​មជ្ឈមណ្ឌល​ហ្វឹកហ្វឺន​កងរាជអាវុធហត្ថ​ភ្នំ​ជុំសែនរីករាយ នៅ​ស្រុក​សាមគ្គីមានជ័យ ខេត្តកំពង់ឆ្នាំង និង​នៅ​លើ​ផ្ទៃ​សមុទ្រ និង​ដែន​អាកាស​កម្ពុជា​ក្នុង​តំបន់​ខេត្តព្រះសីហនុ។

ប្រទេសចិន​កុម្មុយនិស្ត​បាន​បញ្ជូន​អាវុធ​ទំនើប រថពាសដែក​យន្ត​គ្រប់​ប្រភេទ គ្រឿង​សព្វាវុធ​ចុង​ក្រោយ​មួយ​ចំនួន ដូចជា​​ឆ្កែ​រ៉ូប៉ូត​សង្គ្រាម និង​ដ្រូន  (Drone) ស៊ើបការណ៍​ជាដើម ដើម្បី​ហ្វឹកហ្វឺន​ដល់​កងទ័ព​ជើង​គោក​កម្ពុជា។ រីឯ វិញ្ញាសា​សមយុទ្ធ​យោធា​កងទ័ព​ជើង​ទឹក​នៅ​លើ​ផ្ទៃ​សមុទ្រ​តំបន់​ខេត្តព្រះសីហនុ​វិញ​អ្នកនាំពាក្យ​អគ្គបញ្ជាការដ្ឋាន​នៃ​កងយោធពលខេមរភូមិន្ទ លោក ថោង សូលីម៉ូ បញ្ជាក់​ថា នឹង​មាន​នាវា​ចូល​រួម​សរុប ១៤គ្រឿង និង​ឧទ្ធម្ភាគចក្រ ២គ្រឿង។

សមយុទ្ធ​យោធា​រវាង​កងទ័ព​ជើង​គោក​កម្ពុជា និង​ចិន ចំនួន ៥ថ្ងៃ​កន្លង​ទៅ​នេះ ភាគី​កងទ័ព​ចិន​បាន​បង្ហាត់ និង​ពន្យល់​បច្ចេកទេស​ការ​បាញ់​កាំភ្លើង​របស់​ប្រទេសចិន​ប្រភេទ​កាំភ្លើង​ខ្លី ឃ្យូប៊ីយូ-១៩១ (QBU-191) ការ​ជួយ​សង្គ្រោះ​ចំណាប់ខ្មាំង និង​ការ​ប្រឆាំង​នឹង​ដ្រូន (Drone) ស៊ើបការណ៍​របស់​សត្រូវ។ ក្រៅ​ពី​នេះ កងទ័ព​នៃ​ប្រទេស​ទាំងពីរ​ក៏​បើក​ការ​ហាត់​សម​បាញ់​អាវុធ​ធុន​ស្រាល និង​អាវុធ​ធុន​ធ្ងន់​រួម​គ្នា ជាដើម។

ជុំវិញរឿងនេះ អ្នកវិភាគ និង​ជា​អ្នក​ស្រាវជ្រាវ​ផ្នែក​អភិវឌ្ឍន៍​សង្គម បណ្ឌិត មាស នី លើកឡើង​ថា កម្ពុជា​គួរ​តែ​រិះរក​ការ​ចរចា​ធ្វើ​សមយុទ្ធ​ជាមួយ​កងទ័ព​អាមេរិក​ឡើង​វិញ ដើម្បី​ឱ្យ​ជួយ​ពង្រឹង​សមត្ថភាព​កងទ័ព​កម្ពុជា​ដែរ ព្រោះ​លោក​យល់​ថា ការ​ធ្វើ​សមយុទ្ធ​ជាមួយ​កងទ័ព​ចិន​តែ​មួយ​មិន​អាច​ជួយ​ពង្រឹង​សមត្ថភាព​កងទ័ព​កម្ពុជា​បាន​ទេ។ ម្យ៉ាងទៀត លោក​មើល​ឃើញ​ថា ចិន​ផ្ដល់​កិច្ច​សហការ​ជាមួយ​កម្ពុជា​ជា​បន្តបន្ទាប់ ចិន​អាច​សម្លឹង​ឃើញ​ផល​ប្រយោជន៍​ពី​កម្ពុជា​ធំ​ជាង​កម្ពុជា​សម្លឹង​ឃើញ​ផល​ប្រយោជន៍​ពី​ចិន ព្រោះ​កម្ពុជា​ជា​តំបន់​ស្នូល​ដែល​ចិន​ត្រូវ​ការ​ក្នុង​ការ​ជ្រើស​តាំង​ជា​ភូមិសាស្ត្រ​នយោបាយ ដើម្បី​ប្រជែង​ឥទ្ធិពល​ជាមួយ​លោក​សេរី។

បណ្ឌិត មាស នី៖ «ខ្ញុំ​មិន​ចោទ​ប្រកាន់​ថា រដ្ឋាភិបាល​កម្ពុជា​ផ្ដល់​វត្តមាន​ឱ្យ​កងទ័ព​ចិន ប៉ុន្តែ​សំខាន់​រដ្ឋាភិបាល​កម្ពុជា​ត្រូវ​តែ​ស្មោះត្រង់​ស្ដី​ដែល​ខ្លួន​ឯង​បាន​ប្រកាស​ផង​ដែរ ទើប​បាន​សុខ។ ប៉ុន្តែ បើ​យើង​គ្រាន់​តែ​ថា ដៃ​នៅ​តែ​ធ្វើ ជើង​នៅ​តែ​ដើរ បាន​ន័យ​ថា ចង់​មិន​ចង់​យើង​កំពុង​បណ្ដោយ​ឱ្យ​ខ្លួន​យើង​ធ្លាក់​ចូល​ក្នុង​អន្ទាក់​ភូមិសាស្ត្រ​នយោបាយ ហើយ​ជា​គ្រោះថ្នាក់​ណាស់​សម្រាប់​ប្រទេស​មួយ​តូច នៅ​ចន្លោះ​ប្រទេស​គេ​ធំៗ ប្រទេស​យើង​តូច ហើយ​ក្រ​ទៀត​យើង​ពិបាក​នឹង​ការពារ​ខ្លួន​ឯង​ណាស់ នៅ​ពេល​ដែល​មាន​វិបត្តិ​ពិភព​លោក​ធំៗ កើត​ឡើង»

វិទ្យុអាស៊ីសេរី​មិន​អាច​ទាក់ទង​អ្នកនាំពាក្យ​ក្រសួង​ការពារ​ជាតិ លោក ឈុំ សុជាត ដើម្បី​សាកសួរ​បន្ថែម​ជុំវិញ​រឿង​នេះ​បាន​ទេ​នៅ​ថ្ងៃ​ទី២០ ខែឧសភា។

ក្រុម​អ្នក​ជំនាញ​ភូមិសាស្ត្រ​នយោបាយ តែងតែ​ជំរុញ​ឱ្យ​កម្ពុជា​មាន​កិច្ច​ចរចា​ជាមួយ​អាមេរិក និង​សម្ពន្ធមិត្ត​អាមេរិក ដើម្បី​រៀបចំ​ការ​ធ្វើ​សមយុទ្ធ​យោធា​រួមគ្នា ខណៈ​ការ​ប្រជែង​ឥទ្ធិពល​រវាង​ប្រទេស​មហា​អំណាច និង​បញ្ហា​ក្នុង​តំបន់​កាន់​តែ​មាន​ភាព​តានតឹង។ ពួកគេ​លើក​ឡើង​ថា ការណ៍​ដែល​កម្ពុជា​មិន​ខ្វល់​ពី​តុល្យភាព​នៃ​កិច្ច​សហប្រតិបត្តិការ​រវាង​ប្រទេស​មហា​អំណាច និង​ចាប់​យក​ចិន​តែ​មួយ កម្ពុជា​អាច​នឹង​ត្រូវ​ចិន​ប្រើប្រាស់​ជា​ឈ្នាន់​សម្រាប់​បម្រើ​ភូមិសាស្ត្រ ដែល​ទាញ​ឱ្យ​កម្ពុជា​គ្មាន​ជំហរ​នយោបាយ​អព្យាក្រឹត្យ និង​ធ្វើ​អ្វី​តាម​តែ​ប្រទេស​ចិន​ចង់​បាន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។