សង្គម​ស៊ីវិល​ថា អាមេរិក​អាច​នឹង​បន្ត​ដាក់​សម្ពាធ​លើ​រដ្ឋាភិបាល លោក ហ៊ុន សែន ឱ្យ​គោរព​គោលការណ៍​ប្រជាធិបតេយ្យ

មន្ត្រី​អង្គការ​សង្គម​ស៊ីវិល​ព្រួយបារម្ភ​ថា សហរដ្ឋអាមេរិក​អាច​នឹង​បន្ត​ដាក់​សម្ពាធ​លើ​រដ្ឋាភិបាល លោក ហ៊ុន សែន ដើម្បី​ឱ្យ​គិតគូរ​ស្ដារ​ប្រជាធិបតេយ្យ និង​ការគោរព​សិទ្ធិមនុស្ស​នៅ​កម្ពុជា​។ ការ​លើកឡើង​នេះ​ក្រោយ​ពេល ក្រុម​ព្រឹទ្ធសភា និង​សមាជិកសភា​អាមេរិក​កាលពី​ថ្ងៃទី​១៦ សីហា បាន​ជួបពិភាក្សា​ជាមួយ​ក្រុម​អង្គការ​សង្គម​ស៊ីវិល សហជីព និង​អ្នកសារព័ត៌មាន ដោយ​ពួកគាត់​បាន​លើកឡើង​អំពី​ការ​ធ្លាក់ចុះ​នៃ​លទ្ធិប្រជាធិបតេយ្យ ជាពិសេស​បញ្ហា​សិទ្ធិ​សេរីភាព​បញ្ចេញមតិ​កំពុង​រង​ការ​រឹតត្បិត​នៅ​កម្ពុជា។

​ក្រុម​អង្គការ​សមាគម​ដែល​ធ្វើការ​លើកស្ទួយ​វិស័យ​សិទ្ធិមនុស្ស​នៅ​កម្ពុជា នៅតែ​បន្ត​ទទូច​ដល់​រដ្ឋាភិបាល លោក ហ៊ុន សែន ឱ្យ​បញ្ឈប់​ការ​រឹតត្បិត​សេរីភាព​លើ​អ្នកសារព័ត៌មាន និង​ប្រើ​កម្លាំង​បង្ក្រាប​ដោយ​ហិង្សា​លើ​សកម្មជន​សង្គម ពលរដ្ឋ ដែល​សម្ដែង​មតិ​ឆ្អាល​ពី​បញ្ហា​ប្រទេសជាតិ ដើម្បី​បញ្ចៀស​រាល់​សម្ពាធ និង​ទណ្ឌកម្ម​នានា​ពី​អន្តរជាតិ ជាពិសេស​ពី​សហរដ្ឋអាមេរិក។

នាយក​ទទួលបន្ទុក​ផ្នែក​សិទ្ធិមនុស្ស​អង្គការ​លីកាដូ (Licadho) លោក អំ សំអាត មាន​ប្រសាសន៍​ថា ក្រុម​ព្រឹទ្ធសភា និង​សមាជិកសភា​អាមេរិក​ដែល​មក​បំពេញ​ទស្សនកិច្ច​នៅ​កម្ពុជា ស្របពេល​ដែល​មាន​ករណី​អាជ្ញាធរ​ប្រើ​ហិង្សា និង​ឃាត់ខ្លួន​អ្នកសារព័ត៌មាន និង​សកម្ម​សង្គម​នោះ គឺ​ភស្តុតាង​បន្ថែម​ទៀត​ដែល​ស្រប​នឹង​របាយការណ៍​កន្លងមក​របស់​អង្គការ​ជាតិ និង​អន្តរជាតិ ដែល​រកឃើញ​ថា​ស្ថានភាព​សេរីភាព​បញ្ចេញមតិ​នៅ​កម្ពុជា​មាន​ការ​ធ្លាក់ចុះ​។ លោក​ព្រួយបារម្ភ​ថា បើ​កម្ពុជា​នៅតែ​គ្មាន​ការ​ដោះស្រាយ​បញ្ហា​សិទ្ធិមនុស្ស និង​ស្តារ​ប្រជាធិបតេយ្យ​ទេ​នោះ កម្ពុជា​អាច​ប្រឈម​ការ​ដាក់​ទណ្ឌ​សេដ្ឋកិច្ច​បន្ថែម​ទៀត៖ «​ទិដ្ឋភាព​កើត​លើ​អ្នកសារព័ត៌មាន សកម្មជន​បរិស្ថាន​ម្សិលមិញ​ហ្នឹង​ការ​កត់ត្រា (Noted) បន្ថែម​ទៀត ក្រៅ​តែ​អំពី​ការ​អំពាវនាវ​ឱ្យ​បើក ទូលាយ និង​លើកកម្ពស់ ទៅលើ​សេរីភាព​ទាំងអស់​ហ្នឹង​។ អ៊ីចឹង​យើង​មានការ​បារម្ភ​ដែរ ព្រោះ​សហគមន៍​អឺរ៉ុប មុន​ពេល​បោះឆ្នោត​ក្រុមប្រឹក្សា​ឃុំ​សង្កាត់ សភា​សហគមន៍​អឺរ៉ុប​បាន អនុម័ត​ញត្តិ ដើម្បី តាមដាន​ការវិវត្តន៍ ឬ​វឌ្ឍនភាព​សិទ្ធិមនុស្ស​នៅ​កម្ពុជា។ ប្រសិនជា​មិន​មាន​អ្វី ក្នុង​ការ​កែប្រែ​ទៅ​លើ ការ​កែលម្អ​សិទ្ធិមនុស្ស ដូចជា​លទ្ធិប្រជាធិបតេយ្យ នៅ​កម្ពុជា​ទេ អាហ្នឹង​គេ​នឹង​ពិនិត្យ​បន្ថែម​ទៀត ការ​អនុគ្រោះ​ពន្ធ EBA»។

មិន​ខុសគ្នា​នេះ​ដែរ នាយក​ប្រតិបត្តិ​សមាគម​សម្ព័ន្ធ​អ្នកសារព័ត៌មាន​កម្ពុជា (CamboJA) លោក ណុប វី ប្រាប់​វិទ្យុ​អាស៊ីសេរី​នៅ​ថ្ងៃទី​១៧ ខែ​សីហា​ថា សេរីភាព​បញ្ចេញមតិ ជាពិសេស​លំហ​សេរីភាព​សារព័ត៌​មាននៅ​កម្ពុជា​កំពុង​ការ​រឹតត្បិត​កាន់តែ​ខ្លាំង​។ ជាពិសេស​ថ្មីៗ​នេះ អាជ្ញាធរ​រដ្ឋាភិបាល​លោក ហ៊ុន សែន បាន​ប្រើ​អំពើ​ហិង្សា និង​ឃាត់ខ្លួន​សកម្មជន​សង្គម និង​អ្នកសារព័ត៌មាន​សរុប​៩​នាក់​យក​ទៅ​សួរនាំ​ច្រើន​ម៉ោង ដោយសារតែ​ការ​អនុវត្ត​សិទ្ធិ​ជា​មូលដ្ឋាន​របស់​ពួកគេ ក្នុង​ការ​បង្ហាញ​ព័ត៌មាន​ចុង​ក្រោយ​អំពី​វិនាសកម្ម​ព្រៃឈើ​នៅ​តំបន់​ព្រៃ​អភិរក្ស​សួនសត្វ​ភ្នំ​តាម៉ៅ។ លោក ណុប វី ចាត់ទុក​ករណី​នេះ​ថា ជា​ការ​គំរាមកំហែង​រឹតត្បិត​សេរីភាព​បញ្ចេញមតិ​លើ​សកម្មជន​សង្គម និង​អ្នក​សារព័ត៌មាន​ដែល​បំពេញ​ការងារ​ជួយ​ដល់​សង្គម៖ «យើង​ក៏​ស្នើ​ឱ្យ​មាន​កិច្ច​សន្ទនា​រវាង សមាជិក​សភា និង​សមាជិក​ព្រឹទ្ធសភា​សហរដ្ឋអាមេរិក​ជាមួយ​នឹង​សមាជិកសភា​ប្រទេស​កម្ពុជា ជាមួយ​រដ្ឋាភិបាល ដើម្បី​ស្វែងរក​ជំហាន ដែល​អាច​ធ្វើ​ឱ្យ​មាន​ភាព​ប្រសើរ​ឡើង ធានា​ថា ការ​ដាក់​ចេញ​នូវ​យន្តការ​ណាមួយ ដើម្បី​ការពារ​ដល់​សេរីភាព​បញ្ចេញមតិ សេរីភាព​អ្នកសារព័ត៌មាន ក៏ដូចជា​ការ​លើកកម្ពស់​សិទ្ធិមនុស្ស គឺថា​ត្រូវ​បាន​អនុវត្ត​ប្រកបដោយ​ប្រសិទ្ធភាព»។

កាលពី​ថ្ងៃទី​១៦ ខែ​សីហា គណៈប្រតិភូ​ដែល​មាន​ក្រុម​ព្រឹទ្ធសភា និង​សមាជិកសភា​អាមេរិក​ចំនួន​៥​រូប បាន​ជួបពិភាក្សា​ជាមួយ​ក្រុម​អង្គការ​សង្គម​ស៊ីវិល សហជីព និង​អ្នកសារព័ត៌មាន អំពី​បញ្ហា​សិទ្ធិ​សេរីភាព​បញ្ចេញមតិ និង​បញ្ហា​នៃ​ការ​ធ្លាក់​លទ្ធិប្រជាធិបតេយ្យ​នៅ​កម្ពុជា​។ ក្នុង​ជំនួប​នោះ នាយក​ប្រតិបត្តិ​សមាគម​សម្ព័ន្ធ​អ្នកសារព័ត៌មាន​កម្ពុជា (CamboJA) លោក ណុប វី ថា គណៈប្រតិភូ​ព្រឹទ្ធសភា និង​សមាជិកសភា​អាមេរិក លើកឡើង​ថា ពួកគាត់​នៅតែ​បន្ត​ជំរុញ​ដល់​រដ្ឋាភិបាល​លោក ហ៊ុន សែន ឱ្យ​បើកចំហ​សេរីភាព​បញ្ចេញមតិ សេរីភាព​សារព័ត៌មាន និង​ដោះស្រាយ​បញ្ហា​ជូន​កម្មករ​បុគ្គល​ណាហ្គាវើលដ៍ (Nagaworld) ដែល​កំពុង​តវ៉ា​ទាមទារ​រក​ដំណោះស្រាយ​ការងារ។

ក្រុម​គណៈប្រតិភូ​នេះ​ដឹកនាំ​ដោយ​សមាជិក​ព្រឹទ្ធសភា លោក អេដវឺត ម៉ារឃីយ៍ (Edward J. Markey (D-Mass) និង​មាន​សមាជិកសភា​ចំនួន​៤​រូប​ទៀត​។ ដំណើរ​ទស្សនកិច្ច​របស់​ក្រុម​ព្រឹទ្ធសភា និង​សមាជិកសភា​សហរដ្ឋអាមេរិក​នៅ​កម្ពុជា​នេះ ធ្វើឡើង​បន្ទាប់​ពី​បញ្ចប់​ដំណើរ​ទស្សនកិច្ច​ទៅ​កោះ​តៃវ៉ាន់ កាល​ពី​ថ្ងៃទី​១៤ និង​១៥ ខែ​សីហា កន្លង​ទៅ​នេះ។

វិទ្យុ​អាស៊ីសេរី​នៅ​មិនទាន់​អាច​ស្នើសុំ​ព័ត៌មាន​បន្ថែម​ពី​ស្ថានទូត​សហរដ្ឋអាមេរិក​ប្រចាំ​នៅ​កម្ពុជា ទាក់ទង​នឹង​ដំណើរ​ទស្សនកិច្ច​របស់​ព្រឹទ្ធសភា និង​សមាជិកសភា​អាមេរិក​មក​កម្ពុជា​នេះ​បាន​នៅ​ឡើយ​ទេ កាល​ពី​យប់​ថ្ងៃ​ទី១៧ សីហា។

នាយិកា​មជ្ឈមណ្ឌល​សិទ្ធិមនុស្ស​កម្ពុជា (CCHR) អ្នកស្រី ចក់ សុភាព ដែល​បាន​ជួប​ព្រឹទ្ធសភា និង​សមាជិកសភា​អាមេរិក ប្រាប់​វិទ្យុ​អាស៊ីសេរី​ឱ្យ​ដឹង​ថា ព្រឹទ្ធសភា និង​សមាជិកសភា​អាមេរិក នៅតែ​បង្ហាញ​ការ​ខ្វល់ខ្វាយ​ពី​ស្ថានភាព​សិទ្ធិមនុស្ស និង​បញ្ហា​សិទ្ធិ​នយោបាយ​នៅ​កម្ពុជា​។ អ្នកស្រី​បន្ថែម​ថា បើ​រដ្ឋាភិបាល​កម្ពុជា​មាន​ឆន្ទៈ​ពិតប្រាកដ​ក្នុង​ការ​ពង្រីក​អភិបាលកិច្ច​ល្អ គឺ​រដ្ឋាភិបាល​ត្រូវតែ​ផ្តល់​កិច្ច​គាំពារ​ដល់​សិទ្ធិ​សេរីភាព​ជា​មូលដ្ឋាន​ពលរដ្ឋ និង​សកម្មជន​ដែល​សកម្ម​ចូលរួម​ការងារ​សង្គម៖ «ការចូលរួម​ពី​សហគមន៍​ជាតិ និង​អន្តរជាតិ​ជា​រឿង​មួយ ប៉ុន្តែ​ចាំបាច់​បំផុត​ដែល​រដ្ឋាភិបាល​ត្រូវ​មាន​ទំនួល​ខុសត្រូវ និង​ធ្វើ​កិច្ច​ការងារ​ស្រប​ទៅ​តាម​កាតព្វកិច្ច របស់​ខ្លួន​ដែល​មាន​ក្នុង​ស្មារតី​នៃ​រដ្ឋធម្មនុញ្ញ និង​ច្បាប់​ពាក់ព័ន្ធ»។

ទាក់ទង​នឹង​បញ្ហា​នេះ អ្នកនាំពាក្យ​គណៈកម្មាធិការ​សិទ្ធិមនុស្ស​របស់​រដ្ឋាភិបាល​លោក កត្តា អ៊ន ប្រាប់​វិទ្យុ​អាស៊ីសេរី​ថា រដ្ឋាភិបាល​បាន​អនុវត្ត​ការ​គោរព​សិទ្ធិ​ជាទូទៅ​របស់​ពលរដ្ឋ​មាន​លក្ខណៈ​ល្អ​ប្រសើរ។ ទោះ​យ៉ាងណា លោក​បញ្ជាក់​ថា ក្រុម​ព្រឹទ្ធសភា និង​សមាជិកសភា​អាមេរិក​កាលពី​ថ្ងៃទី​១៦ សីហា ក៏បាន​ជួប​ប្រជុំ​ជាមួយ​តំណាង​រដ្ឋសភា​កម្ពុជា និង​តំណាង​ក្រសួង​ការបរទេស​កម្ពុជា​ដើម្បី​ចង់​ដឹង​ពី​បញ្ហា​មួយ​ចំនួន​ដែល​នៅ​កម្ពុជា៖ «​ម្សិលមិញ​មាន​កិច្ចប្រជុំ ជាមួយ​ក្រសួង​ស្ថាប័ន​ពាក់ព័ន្ធ​មួយ​ចំនួន​ដែរ ពី​បញ្ហា​ដែល​សមាជិក​ព្រឹទ្ធសភា​ទាំងនោះ ចង់​ដឹង​ទៅ​លើ​បញ្ហា​មួយចំនួន​ទាក់ទង វិស័យ​ផ្សេងៗ​នៅ​កម្ពុជា​។ ខ្ញុំ​មិនបាន​ចូលរួម​ប្រជុំ​នៅ​ទី​នោះ​ទេ បើសិនជា​លោក​អាច​ដឹង​ទៅ​សួរ​ខាង​ក្រសួង​ការបរទេស​ប្រហែល​ជា​ច្បាស់​ជាង»។

វិទ្យុ​អាស៊ីសេរី មិន​អាច​ទាក់ទង អ្នកនាំពាក្យ​រដ្ឋសភា លោក ឡេង ប៉េងឡុង និង​អ្នកនាំពាក្យ​ក្រសួង​ការបរទេស លោក ជុំ សុន្ទរី ដើម្បី​សាកសួរ​ជុំវិញ​រឿង​នេះ​បាន​ទេ នៅ​ថ្ងៃទី​១៧ ខែ​សីហា។

កន្លងទៅ​សហរដ្ឋអាមេរិក រួម​ទាំង​ប្រទេស​ប្រជាធិបតេយ្យ​មួយ​ចំនួន និង​អង្គការ​ជាតិ អន្តរជាតិ​ជាច្រើន​ស្ថាប័ន ជាពិសេស​ទីភ្នាក់ងារ​អង្គការ​សហប្រជាជាតិ​តែងតែ​ជំរុញ​ដល់​រដ្ឋាភិបាល​លោក ហ៊ុន សែន ឱ្យ​មាន​ការគោរព​គោលការណ៍​ប្រជាធិបតេយ្យ​ដោយ​ត្រូវ​បញ្ចប់​រាល់​ការ​រឹតត្បិត​សិទ្ធិ​សេរីភាព​បញ្ចេញ​ជា​មូលដ្ឋាន​របស់​ពលរដ្ឋ សកម្មជន​សិទ្ធិមនុស្ស សកម្មជន​សង្គម និង​នយោបាយ ដែល​ពួកគាត់​តែងតែ​បំពេញ​ការងារ​ក្នុង​សង្គម​ស្របតាម​ច្បាប់។

​ទាក់ទង​នឹង​ស្ថានភាព​សិទ្ធិមនុស្ស និង​ប្រជាធិបតេយ្យ​នៅ​កម្ពុជា​នេះ សមាជិក​ព្រឹទ្ធសភា​មកពី​គណបក្សកាន់អំណាច​គឺ គណបក្ស​ប្រជាធិបតេយ្យ ប្រចាំ​រដ្ឋ​ម៉ាស្សាឈូសេត (Massachusetts) លោក អេដវឺត ម៉ារឃីយ៍ កន្លង​មក​នេះ​បាន​ស្នើ​សេចក្ដី​ស្នើ​ច្បាប់​ដាក់​ទណ្ឌកម្ម​ជាក់លាក់​លើ​មន្ត្រី​កម្ពុជា ឬ S.3052 មាន​ឈ្មោះ​ជា​ផ្លូវការ​ថា «​ច្បាប់​ស្ដីពី​ប្រជាធិបតេយ្យ និង​សិទ្ធិមនុស្ស​កម្ពុជា​ឆ្នាំ​២០២២» ដែល​បច្ចុប្បន្ន​ឆ្លង​ផុត​គណៈកម្មាធិការ​ទំនាក់ទំនង​បរទេស​ដ៏​មាន​ឥទ្ធិពល​របស់​ព្រឹទ្ធសភា​អាមេរិក និង​កំពុង​បញ្ជូន​បន្ត​មក​ឱ្យ​ព្រឹទ្ធសភា​ពេញ​អង្គ​អនុម័ត៕

....................

ព័ត៌មានបឋម

នាយក​ប្រតិបត្តិ​សមាគម​សម្ព័ន្ធ​អ្នក​សារ​ព័ត៌មាន​កម្ពុជា លោក ណុប វី ដែល​បាន​ជួន​ពិភាក្សា​ជាមួយ​ក្រុម​ព្រឹទ្ធសភា និង​សមាជិក​សភា​អាមេរិក​ប្រាប់​វិទ្យុ​អាស៊ី​សេរី កាល​ពី​យប់​ថ្ងៃ​ទី១៦ ខែសីហា​ថា ក្រុម​អង្គការ​សង្គម​ស៊ីវិល និង​អ្នក​សារ​ព័ត៌មាន​បាន​លើក​ឡើង​ប្រាប់​ក្រុម​ព្រឹទ្ធសភា និង​សមាជិក អាមេរិក​អំពី​ក្ដី​បារម្ភ​របស់​ពួក​គេ ទាក់ទង​នឹង​ការ​រំលោភ​បំពាន​សិទ្ធិ​សេរីភាព​ជា​មូលដ្ឋាន​របស់​ពលរដ្ឋ ការ​ធ្វើ​ទុក្ខ​បុក​ម្នេញ​អ្នក​សារ​ព័ត៌មាន ការ​អូស​បន្លាយ​មិន​ផ្ដល់​ដំណោះស្រាយ​វិវាទ​ការងារ និង​ការ​រំលោភ​បំពាន​ស្រ្តី​ជា​កូដករ​នៅ​ក្រុមហ៊ុន​ណាហ្គាវើលដ៏​ជា​ដើម។

លោក ណុប វី បន្ត​ថា ក្រុម​របស់​លោក ក៏​បាន​ស្នើ​ដល់​ក្រុម​ព្រឹទ្ធសភា និង​សមាជិក​សភា​អាមេរិក​ឱ្យ​ជួយ​គាំទ្រ​ទាំង​ស្មារតី និង​ធនធាន​ចាំបាច់​នានា ដើម្បី​ធានា​ឱ្យ​ក្រុម​អង្គការ​សង្គម​ស៊ីវិល សហជីព និង​អ្នក​សារ​ព័ត៌មាន​អាច​បំពេញ​ការងារ​របស់​ខ្លួន​បាន​ក្នុង​ការ​ការពារ​សិទ្ធិ​សេរីភាព ជា​ពិសេស សិទ្ធិ​នយោបាយ និង​សេរីភាព​បញ្ចេញ​មតិ​របស់​ពលរដ្ឋ និង​សិទ្ធិ​ការងារ។ លើស​ពី​នេះ លោក ណុប វី ថា ក្រុម​អង្គការ​សង្គម​ស៊ីវិល​បាន​ស្នើ​ដល់​ក្រុម​ព្រឹទ្ធសភា និង​សមាជិក​សភា​អាមេរិក​ធ្វើ​យ៉ាង​ណា​ជួយ​ជំរុញ​ដល់​រដ្ឋាភិបាល​បើក​ចំហ និង​ផ្ដល់​ឱកាស​ឱ្យ​អង្គការ​សង្គម​ស៊ីវិល​អាច​ចូលរួម​ជជែក​ពិភាក្សា​ពី​គម្រោង​បង្កើត​បទដ្ឋាន​ច្បាប់​ទាក់ទង​នឹង​ឧក្រិដ្ឋកម្ម​តាម​ប្រព័ន្ធ​អ៊ីនធឹណិត (Internet) ដើម្បី​បញ្ចៀស​ការ​រឹតត្បិត​សិទ្ធិ​សេរីភាព​មូលដ្ឋាន​របស់​ពលរដ្ឋ៖ «យើង​ក៏​ទទូច​ឱ្យ​សហរដ្ឋ​អាមេរិក​ជជែក​ជាមួយ​រដ្ឋាភិបាល​កម្ពុជា​ក្នុង​ភាព​ជា​ដៃគូ ដើម្បី​ធានា​ថា មតិ​យោបល់​ប្រជាពលរដ្ឋ​ជុំវិញ​ច្បាប់​ទាំង​អស់​ហ្នឹង​ត្រូវ​បាន​ទទួល​យក ហើយ​ធានា​យ៉ាង​ណា​ថា ច្បាប់ ដែល​បាន​បង្កើត​ឡើង​ហ្នឹង​បម្រើ​ដល់​ប្រយោជន៍​សាធារណៈ​បម្រើ​ដល់​ផល​ប្រយោជន៍​ប្រជាពលរដ្ឋ​ជា​ជាង​បម្រើ​ទៅ​ដល់​មន្ត្រី​តែ​មួយ​ចំនួន​តូច តែ​មួយ​ក្រុម​តូច»។

លោក ណុប វី បញ្ជាក់​ថា លោក​បាន​ដឹង​ថា ក្រុម​ព្រឹទ្ធសភា និង​សមាជិក​សភា​អាមេរិក​បាន​ជួប​ជាមួយ​តំណាង​រដ្ឋសភា​កម្ពុជា​ដែរ។

វិទ្យុ​អាស៊ី​សេរី​នៅ​មិន​ទាន់​អាច​សុំ​ព័ត៌មាន​បន្ថែម​ពី​ស្ថានទូត​សហរដ្ឋ​អាមេរិក​នៅ​ភ្នំពេញ​អំពី​ដំណើរ​ទស្សនកិច្ច​របស់​សមាជិក​ព្រឹទ្ធសភា និង​សមាជិក​សភា​នេះ​បាន​នៅ​ឡើយ​ទេ នៅ​យប់​ថ្ងៃ​ទី១៦ ខែសីហា។

ចំណែក​នាយិកា​មជ្ឈមណ្ឌល​សិទ្ធិមនុស្ស​កម្ពុជា អ្នកស្រី ចក់ សុភាព ដែល​បាន​ជួន​ពិភាក្សា​ជាមួយ​ក្រុម​ព្រឹទ្ធសភា និង​សមាជិក​សភា​អាមេរិក បាន​សរសេរ​នៅ​លើ​ហ្វេសប៊ុក​របស់​អ្នកស្រី ដោយ​ផ្សារ​ភ្ជាប់​ដំណើរ​ទស្សនកិច្ច​របស់​ក្រុម​ព្រឹទ្ធសភា និង​សមាជិក​សភា​អាមេរិក​ទៅ​នឹង​ការ​ឃាត់​ខ្លួន និង​វាយតប់​យុវជន​ស្រឡាញ់​បរិស្ថាន និង​អ្នក​សារ​ព័ត៌មាន​នៅ​តំបន់​ភ្នំ​តាម៉ៅ ប្រព្រឹត្ត​ដោយ​អាជ្ញាធរ​រដ្ឋ ដែល​កើត​ឡើង​ស្រប​គ្នា​នឹង​ដំណើរ​ទស្សនកិច្ច​នេះ។ អ្នកស្រី ចក់ សុភាព ចោទ​សួរ​ថា តើ​សេរីភាព​សារ​ព័ត៌មាន និង​សិទ្ធិមនុស្ស​ពិត​ជា​ល្អ​ប្រសើរ បើ​អ្នក​សារ​ព័ត៌មាន និង​ពលរដ្ឋ​ត្រូវ​រង​អំពើ​ហិង្សា​ពី​មន្ត្រី​មាន​សមត្ថកិច្ច​បែប​នេះ? អ្នកស្រី​សរសេរ​បន្ត​ថា ករណី​ប្រើ​ហិង្សា​នេះ មិនមែន​តែ​មួយ​ករណី ដែល​ទើប​កើត​មាន​ទេ ផ្ទុយ​ទៅ​វិញ​កន្លង​មក មានករណី​ជា​ច្រើន​ទៀត​កើត​ឡើង នៅ​ពេល​សហគមន៍​អនុវត្ត​សិទ្ធិ​ជួប​ប្រជុំ​តវ៉ា​របស់​ពួក​គេ តួ​យ៉ាង​ករណី​ស្ត្រី​ថ្ងៃ​សុក្រ និង​ណាហ្គាវើលដ៏។

ដំណើរ​ទស្សនកិច្ច​របស់​ក្រុម​ព្រឹទ្ធសភា និង​សមាជិក​សភា​សហរដ្ឋ​អាមេរិក ដែល​ទៅ​បំពេញ​ទស្សនកិច្ច​នៅ​កម្ពុជា​នេះ ជា​ផ្នែក​មួយ​នៃ​ដំណើរ​ទស្សនកិច្ច​របស់​គណៈប្រតិភូ​មក​ពី​គណបក្ស​ទាំង​ពីរ​នៅ​ក្នុង​រដ្ឋសភា​អាមេរិក​ទៅ​តំបន់​អាស៊ី។ ក្រុម​គណៈ​ប្រតិភូ​នេះ​ដឹកនាំ​ដោយ​សមាជិក​ព្រឹទ្ធសភា លោក អេដវឺត ម៉ារឃីយ៍ (Edward J. Markey (D-Mass.)) និង​មាន​សមាជិក​សភា​ចំនួន ៤នាក់​ទៀត គឺ​លោក ហ្ស៊ន ហ្គារ៉ាមិនឌី ( John Garamendi (D-CA 3rd District) លោក អាឡេន ឡូវិនថល (Alan Lowenthal (D-CA 47th District)) លោក ដុន បេយើ (Don Beyer (D-VA 8th District)) និង​អ្នកស្រី អូម៉ូអា អាម៉ាតា ខូលមែន រ៉េដវេហ្គិន (Aumua Amata Coleman Radewagen (R- American Samoa))។

ដំណើរ​ទៅ​កម្ពុជា​របស់​គណៈប្រតិភូ​នេះ ធ្វើ​ឡើង​បន្ទាប់​ពី​បញ្ចប់​ដំណើរ​ទស្សនកិច្ច​ទៅ​កោះ​តៃវ៉ាន់ កាល​ពី​ថ្ងៃ​ទី១៤ និង​ទី១៥ ខែសីហា​កន្លង​ទៅ​នេះ។ ទស្សនកិច្ច​របស់​គណៈប្រតិភូ​នេះទៀត​សោត​គឺ នៅ​ក្រោយ​ពេល ដែល​ប្រទេស​ចិន​ខឹង​សម្បារ និង​ប្រកាស​ដាក់​ទណ្ឌកម្ម​ប្រធាន​សភា​សហរដ្ឋ​អាមេរិក អ្នកស្រី ណេនស៊ី ផេឡូស៊ី (Nancy Pelosi) ព្រមទាំង​ធ្វើ​សម​យុទ្ធ​របស់​កងទ័ព​រំដោះ​ប្រជាជន​ចិន កាល​ពី​ដើម​ខែសីហា​រហូត​មក​ដល់​ពេល​នេះ ដោយ​គ្មាន​កំណត់​កាល​បរិច្ឆេទ​បញ្ចប់ ឆ្លើយ​តប​នឹង​ដំណើរ​ទស្សនកិច្ច​របស់​ប្រធាន​សភា​សហរដ្ឋ​អាមេរិក ទៅ​កោះ​តៃវ៉ាន់។

ទាក់ទង​នឹង​ស្ថានភាព​សិទ្ធិមនុស្ស និង​ប្រជាធិបតេយ្យ​នៅ​កម្ពុជា​នេះ សមាជិក​ព្រឹទ្ធសភា​មក​ពី​គណបក្ស​កាន់​អំណាច គឺ​គណបក្សប្រជាធិបតេយ្យ ប្រចាំ​រដ្ឋម៉ាស្សាឈូសេត (Massachusetts) លោក អេដវឺត ម៉ារឃីយ៍ កន្លង​មក​នេះ​បាន​ស្នើ​សេចក្ដី​ស្នើ​ច្បាប់​ដាក់​ទណ្ឌកម្ម​ជាក់លាក់​លើ​មន្ត្រី​កម្ពុជា ឬ S.3052 មាន​ឈ្មោះ​ជា​ផ្លូវការ​ថា «ច្បាប់​ស្ដីពី​ប្រជាធិបតេយ្យ និង​សិទ្ធិ​មនុស្ស​កម្ពុជា​ឆ្នាំ២០២២» ដែល​បច្ចុប្បន្ន​ឆ្លង​ផុត​គណៈកម្មាធិការ​ទំនាក់ទំនង​បរទេស​ដ៏​មាន​ឥទ្ធិពល​របស់​ព្រឹទ្ធសភា​អាមេរិក និង​កំពុង​បញ្ជូន​បន្ត​មក​ឱ្យ​ព្រឹទ្ធសភា​ពេញ​អង្គ​អនុម័ត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។