សភា​អាមេរិក​អនុម័ត​លើ​សេចក្ដី​សម្រេច​​ស្ដីពី​សិទ្ធិ​មនុស្ស​និង​ប្រជាធិបតេយ្យ​នៅ​កម្ពុជា

ដោយ តាំង សារ៉ាដា
2016-09-12
Share
ប្រជុំ​សភា អាមេរិក ៦២០ កិច្ច​ប្រជុំ​សភា​​​សហរដ្ឋអាមេរិក កាល​ពី​ថ្ងៃ​ទី​៦ ខែ​កក្កដា ឆ្នាំ​២០១៦។
Photo courtesy of US Congress

សភា​តំណាងរាស្ត្រ​របស់​សហរដ្ឋអាមេរិក បាន​បើក​កិច្ច​ប្រជុំ​ពេញ​អង្គ​ពិភាក្សា​អនុម័ត​លើ​សេចក្ដី​សម្រេច​លេខ ៧២៨ ស្ដីពី​ប្រជាធិបតេយ្យ សិទ្ធិមនុស្ស និង​នីតិរដ្ឋ​នៅ​កម្ពុជា នៅ​ថ្ងៃ​ច័ន្ទ ទី​១២ ខែ​កញ្ញា។ សេចក្ដី​សម្រេច​លេខ ៧២៨ នេះ ធ្វើ​ឡើង​ដើម្បី​ថ្កោលទោស​គ្រប់​ទម្រង់​នៃ​ការ​ប្រើ​អំពើ​ហិង្សា​ខាង​ផ្នែក​នយោបាយ និង​ការ​ដាក់​ទណ្ឌកម្ម​ចំពោះ​អំពើ​រំលោភ​សិទ្ធិមនុស្ស​ដែល​កំពុង​កើត​មាន​នៅ​កម្ពុជា ហើយ​ទាមទារ​ឲ្យ​រដ្ឋាភិបាល​ដោះលែង​អ្នក​ទោស​នយោបាយ គោរព​សេរីភាព​ខាង​សារព័ត៌មាន សិទ្ធិ​ក្នុង​ការ​ជួប​ប្រជុំ ការ​ធ្វើ​បាតុកម្ម ការ​ហ៊ាន​និយាយ​រិះគន់​រដ្ឋាភិបាល និង​គាំទ្រ​ការ​កែទម្រង់​ការ​បោះឆ្នោត​ដោយ​សេរី និង​យុត្តិធម៌​នៅ​ឆ្នាំ​២០១៧ និង​២០១៨ ដោយ​មាន​ការ​ចូលរួម​សង្កេតការណ៍​ពី​សហគមន៍​អន្តរជាតិ។

ក្រោយ​ការ​អនុម័ត​សេចក្ដី​សម្រេច​នេះ មិន​មាន​លក្ខណៈ​បង្ខំ​ឲ្យ​រដ្ឋាភិបាល​លោក ហ៊ុន សែន គោរព​នោះ​ទេ ក៏ប៉ុន្តែ​សេចក្ដី​សម្រេច​អាច​បង្កើន​ការ​យល់​ដឹង​ដល់​តំណាងរាស្ត្រ​សហរដ្ឋអាមេរិក ឲ្យ​ផ្ញើ​សារ​ទៅ​រដ្ឋាភិបាល​កម្ពុជា ថា ទំនាក់ទំនង​រវាង​កម្ពុជា និង​អាមេរិក អាច​មាន​ទៅ​បាន លុះត្រាតែ​ការ​បោះ​ឆ្នោត​អាច​ប្រព្រឹត្ត​ទៅ​ដោយ​សេរី និង​យុត្តិធម៌ ដូច​អ្វី​ដែល​កម្ពុជា ធ្លាប់​បាន​ព្រមព្រៀង​ជាមួយ​សហរដ្ឋអាមេរិក។

តំណាងរាស្ត្រ​សហរដ្ឋអាមេរិក លោក អាឡាន់ ឡូវ៉ិនថល (Alan Lowenthal) ដែល​ជា​អ្នក​ផ្ដួចផ្ដើម​បង្កើត​ឲ្យ​មាន​សេចក្ដី​សម្រេច​នេះ ធ្លាប់​ប្រាប់​អាស៊ីសេរី​ថា សភា​សហរដ្ឋអាមេរិក នឹង​ឃ្លាំមើល​ដំណើរ​ការ​បោះ​ឆ្នោត​នៅ​កម្ពុជា យ៉ាង​យក​ចិត្ត​ទុក​ដាក់​ដោយ​មិន​ខ្វល់​ថា​តើ​គណបក្ស​ណា​ឈ្នះ ឬ​ចាញ់​នោះ​ទេ តែ​អ្វី​ដែល​សំខាន់ គឺ​ទំនាក់ទំនង​ផ្នែក​សេដ្ឋកិច្ច នយោបាយ និង​នីតិរដ្ឋ ដែល​កម្ពុជា ធ្លាប់​បាន​ព្រមព្រៀង​ជាមួយ​នឹង​សហរដ្ឋអាមេរិក។ ប្រសិន​បើ​រដ្ឋាភិបាល​កម្ពុជា មិន​គោរព​កិច្ច​ព្រមព្រៀង​នេះ​ទេ នោះ​សភា​អាមេរិក​នឹង​មាន​តួនាទី​ចាប់​ផ្ដើម​ពិភាក្សា​ថា តើ​នឹង​ត្រូវ​ធ្វើ​អ្វី​បន្ត​ទៀត​ជាមួយ​នឹង​កម្ពុជា។

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល