គ.ជ.ប​រង​ការ​ចោទ​ប្រកាន់​ថា បំប៉ោង​តួលេខ​ចំនួន​អ្នក​ចេញ​ទៅ​បោះឆ្នោត

អាស៊ីសេរី
2018-07-29
អ៊ីម៉ែល
មតិ
Share
បោះពុម្ព
ការិយាល័យ​បោះឆ្នោត​មួយ​នៅ​ខេត្ត​បាត់ដំបង នា​ថ្ងៃ​ទី​២៩ ខែ​កក្កដា ឆ្នាំ ២០១៨។ រូបថត​ផ្ដល់​ឲ្យ​ដោយ​ពលរដ្ឋ
ការិយាល័យ​បោះឆ្នោត​មួយ​នៅ​ខេត្ត​បាត់ដំបង នា​ថ្ងៃ​ទី​២៩ ខែ​កក្កដា ឆ្នាំ ២០១៨។ រូបថត​ផ្ដល់​ឲ្យ​ដោយ​ពលរដ្ឋ
រូបថត​ផ្ដល់​ឲ្យ​​ដោយ​ពលរដ្ឋ

គណៈកម្មាធិការ​ជាតិ​រៀបចំ​ការបោះឆ្នោត (​..) អះអាង​ថា លទ្ធផល​បណ្ដោះអាសន្ន​នៃ​ចំនួន​អ្នក​បាន​បោះឆ្នោត​គិត​ត្រឹម​ម៉ោង ៥រសៀល​ថ្ងៃទី២៩ កក្កដា មាន​ចំនួន​ជាង ៦ លាន ៨ សែន​នាក់។ ប្រធាន​ចលនា​សង្គ្រោះជាតិ លោក សម រង្ស៊ី ជឿជាក់​ថា នេះ​ជា​តួលេខ​បំប៉ោង គ្មាន​ការពិត ព្រោះ​គ្មាន​ការ​ចូលរួម​សង្កេតការណ៍​ពី​អ្នក​ជំនាញ និង​អង្គការ​ឯករាជ្យ។

ប្រធាន​គណៈកម្មាធិការ​ជាតិ​រៀបចំ​ការបោះឆ្នោត លោក ស៊ិក ប៊ុនហុក ថ្លែង​ក្នុង​សន្និសីទ​សារព័ត៌មាន​នៅ​រសៀល​ថ្ងៃ​ទី២៩ កក្កដា ថា នេះ​ជា​ជោគជ័យ​នៃ​ការបោះឆ្នោត​ដែល​មាន​ពលរដ្ឋ​ជាង ៨២ ភាគរយ (៨២,១៧%) នៃ​អ្នក​មានឈ្មោះ​ក្នុង​បញ្ជី​ឈ្មោះ​បោះឆ្នោត​ជាង ៨ លាន ៣ សែន​នាក់ បាន​ចេញទៅ​បោះឆ្នោត​ទៅតាម​ឆន្ទៈ​របស់​ខ្លួន។ លោក​អះអាង​ថា តួលេខ​នេះ​បង្ហាញ​ឱ្យ​សហគមន៍​អន្តរជាតិ​ដែល​មាន​បំណង​ដាក់ទណ្ឌកម្ម​លើ​កម្ពុជា​នោះ ឃើញច្បាស់​ថា ពលរដ្ឋ​ខ្មែរ​មាន​ឆន្ទៈ​ពិតប្រាកដ​ក្នុង​ការ​លើកស្ទួយ​ប្រជាធិបតេយ្យ។ «»

ឆ្លើយតប​នឹង​ការ​លើកឡើង​នេះ ប្រធាន​ចលនា​សង្គ្រោះជាតិ លោក សម រង្ស៊ី ជឿជាក់​ថា តួលេខ​ដែល គ​.​ជ​.​ប បាន​ប្រកាស​នេះ ជា​តួលេខ​ដែល​គ្មាន​ការពិត​ឡើយ តែ​ជា​តួលេខ​ដែល​របប​ក្រុង​ភ្នំពេញ​បំប៉ោង​ឡើង​ប៉ុណ្ណោះ។ ហេតុផល​ដែល​លោក​យល់ថា​នេះ ជា​តួលេខ​ក្លែងក្លាយ ដោយសារ​ក្នុង​ការិយាល័យ​បោះឆ្នោត​នីមួយៗ​មិន​មាន​អ្នកសង្កេតការណ៍​ឯករាជ្យ និង​មិន​មាន​ភ្នាក់ងារ​គណបក្ស​នយោបាយ​គ្រប់គ្រាន់។ លោក​សង្កត់ធ្ងន់​ថា ការបោះឆ្នោត​នេះ​មិនបាន​ឆ្លុះបញ្ចាំង​ពី​ឆន្ទៈ​ពិត​របស់​ពលរដ្ឋ​ខ្មែរ​ឡើយ ដោយសារ​អវត្តមាន​គណបក្ស​សង្គ្រោះ​ជាតិ​ដែល​មាន​អ្នកគាំទ្រ​រាប់​លាន​នាក់​នៅ​ទូទាំង​ប្រទេស។ «»

នៅ​ក្នុង​ការបោះឆ្នោត​ជ្រើសរើស​ក្រុម​ប្រឹក្សាឃុំ​សង្កាត់​ឆ្នាំ ២០១៧ កន្លងទៅ ចំនួន​ពលរដ្ឋ​ចេញទៅ​បោះឆ្នោត​មាន​ប្រហែល ៩០ ភាគរយ ដោយ​ក្នុង​នោះ​ប្រហែល ៥០% គាំទ្រ​គណបក្ស​ប្រជាជន​កម្ពុជា និង​ជិត​៤៤% គាំទ្រ​គណបក្ស​សង្គ្រោះជាតិ ក្នុងចំណោម​អ្នកមាន​ឈ្មោះ​បោះឆ្នោត​សរុប​ជាង ៧ លាន ៨ សែន​នាក់។ ទោះបីជា​យ៉ាងណា ឆន្ទៈ​របស់​ពលរដ្ឋ​ជិត​កន្លះ​ប្រទេស​ដែល​ស្តែង​ឡើង​តាមរយៈ​កៅអី​តំណាងរាស្ត្រ​គណបក្ស​សង្គ្រោះ​ជាតិ​ចំនួន ៥៥ អាសនៈ និង​អាសនៈ​ក្រុម​ប្រឹក្សាឃុំ​សង្កាត់​ជាង ៥​ពាន់​អាសនៈ បូករួម​ទាំង​តួនាទី​ជា​សមាជិក​ក្រុមប្រឹក្សា​រាជធានី ខេត្ត ក្រុង ស្រុក ខណ្ឌ ជាច្រើន​ទៀត​ផង​នោះ ត្រូវ​បាន​របប​លោក ហ៊ុន សែន បដិសេធ​ចោល​ទាំងស្រុង​តាមរយៈ​ការ​រំលាយ​គណបក្ស​សង្គ្រោះជាតិ។

អតីត​ឧបនាយករដ្ឋមន្ត្រី​នៃ​រដ្ឋាភិបាលចម្រុះ​អាណត្តិ​ទី ៣ ពី​ខាង​គណបក្ស​រាជានិយម​ហ៊្វុនស៊ិនប៉ិច លោក​ព្រឹទ្ធាចារ្យ លឺ ឡាយស្រេង មានប្រសាសន៍ថា អ្នកណា​ក៏​ដឹង​ដែរ​ថា គណបក្ស​ប្រជាជន​កម្ពុជា​របស់​លោក ហ៊ុន សែន នឹង​ឈ្នះ​ឆ្នោត​នៅ​អាណត្តិ​នេះ​បន្ត​ទៀត​យ៉ាង​ងាយស្រួល​បំផុត ដោយសារ​គណបក្ស​នេះ​បាន​កម្ចាត់​គណបក្ស​សង្គ្រោះជាតិ​ដែល​ជា​ដៃគូ​ប្រកួតប្រជែង​ដ៏​ស្រួចស្រាល់​រួច​ទៅ​ហើយ​នោះ។ លោក​បន្ត​ថា ទាំង​តួលេខ​នៃ​អ្នក​បាន​បោះឆ្នោត ទាំង​សំឡេងឆ្នោត និង​ទាំង​អាសនៈ​សភា​នោះ គណបក្ស​កាន់អំណាច​ចង់បាន​ប៉ុន្មាន​ក៏បាន​ដែរ ព្រោះ​បក្ស​នេះ​បាន​ក្ដោបក្ដាប់​ស្ថាប័ន​ជាតិ​សំខាន់ៗ​អស់​ទៅ​ហើយ ប៉ុន្តែ​អ្វី​ដែល​បក្ស​នេះ​ត្រូវការ​គឺ​ភាព​ស្របច្បាប់​ពី​ពលរដ្ឋ។ លោក​ថា​ការ​បង្ហាញ​ឱ្យ​ឃើញ​ពី​តួលេខ​អ្នក​ចេញទៅ​បោះឆ្នោត​ច្រើន​នេះ គឺ​ដើម្បី​ឱ្យ​របប​លោក ហ៊ុន សែន មាន​លេស​យក​ទៅ​ប្រាប់​សហគមន៍​អន្តរជាតិ​ថា រដ្ឋាភិបាល​ថ្មី​ពិតជា​កើត​ចេញពី​ការ​គាំទ្រ​របស់​ពលរដ្ឋ​ខ្មែរ​ពិតប្រាកដ​មែន។ ក៏ប៉ុន្តែ ព្រឹទ្ធាចារ្យ​រូប​នេះ ព្រមាន​ថា របប​ថ្មី​របស់​លោក ហ៊ុន សែន នឹង​ត្រូវ​ប្រឈមមុខ​នឹង​ទណ្ឌកម្ម​ពី​ក្រុម​ប្រទេស​ប្រជាធិបតេយ្យ​លោក​ខាងលិច​នៅ​ពេល​ឆាប់ៗ​ខាងមុខ ហើយ​របប​ថ្មី​នេះ​នឹង​មិន​អាច​រស់នៅ​ដោយ​ពឹងផ្អែក​តែ​ទៅលើ​ប្រទេស​ចិន​បាន​ឡើយ។ «»

..ប ប្រកាស​ថា លទ្ធផល​បណ្ដោះអាសន្ន​នៃ​ការបោះឆ្នោត​នេះ នឹង​ត្រូវ​ផ្សព្វផ្សាយ​នៅ​ថ្ងៃទី១១ ខែ​សីហា រីឯ​លទ្ធផល​ផ្លូវការ​នឹង​ត្រូវ​ផ្សព្វផ្សាយ​នៅ​ថ្ងៃទី១៥ ខែ​សីហា ឆ្នាំ​២០១៨ ខាងមុខ ក្នុង​ករណី​គ្មាន​ការបោះឆ្នោត​សាជាថ្មី​ទៀត​នោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល