មន្ត្រីជាន់ខ្ពស់គណបក្សសង្គ្រោះជាតិ និងអ្នកតាមដានស្ថានការណ៍នយោបាយ លើកឡើងស្របគ្នាថា បញ្ជាការដ្ឋានអង្គរក្សជាអង្គភាពការពារអំណាចឱ្យលោក ហ៊ុន សែន និងក្រុមគ្រួសារ ជាជាងបម្រើប្រយោជន៍ជាតិពិតប្រាកដ។ ការលើកឡើងបែបនេះ គឺបន្ទាប់ពីមេទ័ពជើងគោកលោក ហ៊ុន ម៉ាណែត បានអះអាងថា បញ្ជាការដ្ឋានអង្គរក្សសម្រេចបានសមិទ្ធផលការងារជាច្រើន ជាពិសេសការការពារសុវត្ថិភាពជូនលោកនាយករដ្ឋមន្ត្រី ហ៊ុន សែន ដែលជាឪពុករបស់លោក។
សមិទ្ធផលការងារដែលបញ្ជាការដ្ឋានអង្គរក្សសម្រេចបានធំបំផុតនោះ គឺការពង្រឹងអំណាចផ្ដាច់ការឱ្យលោក ហ៊ុន សែន និងការការពារផលប្រយោជន៍ឱ្យក្រុមគ្រួសាររបស់លោក។ នេះបើតាមការវាយតម្លៃរបស់មន្ត្រីជាន់ខ្ពស់បក្សប្រឆាំង និងអ្នកឃ្លាំមើលបញ្ហានយោបាយ។
មន្ត្រីជាន់ខ្ពស់ និងជាអតីតតំណាងរាស្ត្រជាប់ឆ្នោតរបស់គណបក្សសង្គ្រោះជាតិដែលត្រូវតុលាការកំពូលរម្លាយចោលលោក អ៊ុំ សំអាន ថ្លែងថា បញ្ជាការដ្ឋានអង្គរក្សត្រូវបានបង្កើតឡើងដោយលោក ហ៊ុន សែន ដើម្បីគ្រាន់តែការពារសុវត្ថិភាពជូនរូបលោក និងក្រុមគ្រួសារប៉ុណ្ណោះ មិនមែនសម្រាប់ការពារថ្នាក់ដឹកនាំប្រទេសជាទូទៅនោះឡើយ។ ម្យ៉ាងវិញទៀត លោកសង្កេតឃើញថា អង្គភាពយោធាមួយនេះបានប្រែក្លាយខ្លួនទៅជាអ្នកជ្រោមជ្រែងអំណាចផ្ដាច់ការរបស់លោក ហ៊ុន សែន តាមរយៈអន្តរាគមន៍ដោយផ្ទាល់ ឬដោយប្រយោលក្នុងអំពើហិង្សាបង្ហូរឈាម និងការរំលោភបំពាននានា៖ «កងអង្គរក្សហ្នឹង គឺការពារអំណាចផ្ដាច់ការរបស់លោក ហ៊ុន សែន ហើយនិងការពារអំណាចរបស់លោក ហ៊ុន ម៉ាណែត ដែលបន្តអំណាច បន្តតំណែងពីលោក ហ៊ុន សែន នៅពេលអនាគតបន្តទៀត។ គឺដើម្បីការពារក្រុមគ្រួសារត្រកូលហ៊ុនតែប៉ុណ្ណឹងឯង មិនមែនដើម្បីការពារផលប្រយោជន៍ជាតិ ការពារផលប្រយោជន៍ប្រជាពលរដ្ឋ ប្រទេសជាតិអ្វីនោះទេ » ។
ប្រតិកម្មរបស់អតីតតំណាងរាស្ត្របក្សប្រឆាំងរូបនេះ កើតមានឡើងក្រោយពីកូនប្រុសច្បងរបស់លោក ហ៊ុន សែន គឺលោក ហ៊ុន ម៉ាណែត ដែលជាមេបញ្ជាការកងទ័ពជើងគោក បានលើកឡើងថា បញ្ជាការដ្ឋានអង្គរក្សសម្រេចបានស្នាដៃ និងសមិទ្ធផលជាច្រើនក្នុងរយៈពេល ៣០ឆ្នាំកន្លងទៅនេះ។ លោករៀបរាប់ថា សមិទ្ធផលទាំងនោះ មានជាអាទិ៍ ការពង្រឹងសមត្ថភាពរហូតក្លាយជាអង្គភាពឆ្នើម ការចុះជួយដោះស្រាយការលំបាករបស់ពលរដ្ឋនៅមូលដ្ឋាន និងការការពារជាតិ សាសនា ព្រះមហាក្សត្រ។ ជាពិសេសលោកអះអាងថា បញ្ជាការដ្ឋានអង្គរក្សសម្រេចបាននូវភារកិច្ចចម្បងបំផុត គឺការពារសន្តិសុខ-សុវត្ថិភាពជូនប្រមុខរដ្ឋាភិបាល និងភរិយា ព្រមទាំងក្រុមគ្រួសារ ឬនិយាយដោយសាមញ្ញថា ការពារឪពុកម្ដាយ និងក្រុមគ្រួសាររបស់លោក។ ទាយាទស្នងតំណែងពីលោក ហ៊ុន សែន រូបនេះថ្លែងទៀតថា ទិសដៅទៅមុខទៀតសម្រាប់កងទ័ព គឺស្មោះត្រង់ចំពោះជាតិ សាសនា ព្រះមហាក្សត្រ ព្រមទាំងការពាររដ្ឋធម្មនុញ្ញ រដ្ឋាភិបាល និងនាយករដ្ឋមន្ត្រី។
លោក ហ៊ុន ម៉ាណែត ថ្លែងសារទាំងនេះក្នុងពិធីខួបអនុស្សាវរីយ៍៣០ឆ្នាំ នៃបេសកកម្មជាប្រវត្តិសាស្ត្ររបស់វរសេនាតូចលេខ ២៤៦ អតីតយោធាក្រុងភ្នំពេញ ដែលបច្ចុប្បន្នក្លាយជាបញ្ជាការដ្ឋានអង្គរក្ស កាលពីថ្ងៃទី១២ ខែមីនា និងត្រូវបានស្រង់សម្ដីយកមកចុះផ្សាយដោយប្រព័ន្ធឃោសនាក្នុងស្រុក។
វិទ្យុអាស៊ីសេរីមិនអាចទាក់ទងមេបញ្ជាការកងអង្គរក្សលោក ហ៊ីង ប៊ុនហៀង និងអ្នកនាំពាក្យក្រសួងការពារជាតិលោក ឈុំ សុជាត ដើម្បីសាកសួររឿងនេះបានទេ នៅថ្ងៃទី១៣ ខែមីនា ដោយទូរស័ព្ទចូល តែពុំមានអ្នកទទួល។
ជុំវិញរឿងនេះ អគ្គលេខាធិការសហព័ន្ធនិស្សិតបញ្ញវន្តកម្ពុជាលោក គៀន ពន្លក សង្កេតឃើញថា ជាច្រើនឆ្នាំមកនេះ បញ្ជាការដ្ឋានអង្គរក្សការពារផលប្រយោជន៍ឱ្យលោកនាយករដ្ឋមន្ត្រី ហ៊ុន សែន និងក្រុមគ្រួសារ ច្រើនជាងការពារប្រយោជន៍ជាតិ និងប្រជាពលរដ្ឋ។ លោកបន្តថា សាររបស់លោក ហ៊ុន ម៉ាណែត នេះ ហាក់បង្ហាញឱ្យឃើញកាន់តែច្បាស់ថា បញ្ជាការដ្ឋានអង្គរក្សជាកម្មសិទ្ធិផ្ដាច់មុខ និងជាអ្នកការពារអំណាចឱ្យក្រុមគ្រួសារលោក ហ៊ុន សែន៖ «នេះ គឺជាបញ្ហាមួយដែលប្រជាពលរដ្ឋខ្មែរគួរតែពិចារណា ហើយគួរតែមើលឃើញពីភាពប្រក្រតីទាំងអស់នេះអំពីកងអង្គរក្ស ដែលការពារតែនាយករដ្ឋមន្ត្រី ហើយនិងក្រុមគ្រួសារដើម្បីពង្រឹងអំណាចរបស់ខ្លួន។ ហើយគួរតែដល់ពេលហើយដែលពលរដ្ឋត្រូវសម្លឹងមើលថា ប្រទេសកម្ពុជាមួយនេះ គឺត្រូវការលទ្ធិប្រជាធិបតេយ្យជាចាំបាច់ » ។
បញ្ជាការដ្ឋានអង្គរក្សត្រូវបានបង្កើតឡើងកាលពីថ្ងៃទី៤ ខែកញ្ញា ឆ្នាំ២០០៩ ហើយបែងចែកជាច្រើនផ្នែក និងជាកងឯកភាពផ្សេងៗ ក្នុងនោះ រួមមាន ផ្នែកអន្តរាគមន៍ ផ្នែកប្រយុទ្ធ សង្គ្រោះ ពេទ្យ សិល្បៈ និងកសិកម្មជាដើម។ អង្គភាពនេះ កើតចេញពីកងវរសេនាតូចលេខ ២៤៦ អតីតយោធាក្រុងភ្នំពេញ ដែលជាកងពលបង្កើតឡើងដោយលោក ហ៊ុន សែន ក្នុងសម័យរដ្ឋកម្ពុជា ឆ្នាំ១៩៩០។ កងកម្លាំងនៃបញ្ជាការដ្ឋានអង្គរក្សលោក ហ៊ុន សែន នេះ មានបំពាក់អាវុធធុនធ្ងន់ និងទំនើបៗ ស្មើនឹងកងយោធពលខេមរភូមិន្ទថ្នាក់ជាតិដែរ ក្នុងនោះរួមមាន យន្តហោះ រថក្រោះ រថពាសដែកមិនតិចជាង ១០០គ្រឿង និងកាំជ្រួចហ្វូងបេអឹម ២១ (BM-21) ព្រមទាំងកាំភ្លើងគ្រប់ធុនក្រោមការឧបត្ថម្ភរបស់ប្រទេសចិនកុម្មុយនីស្ត ដែលជាបង្អែករបស់លោក ហ៊ុន សែន។
ទោះជាយ៉ាងណា អង្គភាពមួយនេះត្រូវបានគេរកឃើញថា មានជាប់ពាក់ព័ន្ធដោយផ្ទាល់នឹងអំពើឧក្រិដ្ឋ និងការរំលោភបំពានធ្ងន់ធ្ងរជាច្រើន ក្នុងនោះរួមមាន ការគប់គ្រាប់បែកសម្លាប់ហ្វូងបាតុករអហិង្សា និងអំពើរដ្ឋប្រហារបង្ហូរឈាមសម្លាប់ជីវិតជនស៊ីវិល និងកងកម្លាំងរបស់ហ្វ៊ុនស៊ិនប៉ិចរាប់រយនាក់ កាលពីឆ្នាំ ១៩៩៧ ការវាយទាត់ធាក់យ៉ាងដំណំលើតំណាងរាស្ត្រគណបក្សសង្គ្រោះជាតិ កាលពីឆ្នាំ២០១៥ អំពើច្បាមយកដីធ្លី និងការកាងការពារអាជីវកម្មខុសច្បាប់របស់ក្រុមហ៊ុនចិននៅកម្ពុជា ជាដើម។
ដោយសារតែរំលោភសិទ្ធិមនុស្សធ្ងន់ធ្ងរទាំងនេះ សហរដ្ឋអាមេរិកបានប្រកាសដាក់ទណ្ឌកម្មបង្កកទ្រព្យសម្បត្តិមេកងអង្គរក្សលោក ហ៊ុន សែន គឺលោក ហ៊ីង ប៊ុនហៀង កាលពីឆ្នាំ ២០១៨។ ថ្មីៗនេះទៀតសោត តុលាការក្រុងប៉ារីស ប្រទេសបារាំង ក៏បានចេញដីកាតាមចាប់ខ្លួនលោក ហ៊ីង ប៊ុនហៀង និងគូកនម្នាក់ទៀត គឺលោក ហ៊ុយ ពិសិដ្ឋ អតីតមេបញ្ជាការរងកងអង្គរក្ស ពីបទ «ប៉ុនប៉ងសម្លាប់មនុស្ស» ទាក់ទងនឹងការគប់គ្រាប់បែកលើហ្វូងបាតុករ កាលពីខែមីនា ឆ្នាំ១៩៩៧ ដែលបណ្ដាលឱ្សស្លាប់មនុស្សយ៉ាងហោចណាស់ ១៦នាក់ និងជាង ១០០ នាក់ទៀតរងរបួស។
របាយការណ៍នានាឲ្យដឹងថា លោក ហ៊ុន សែន មានអង្គរក្ស និងក្រុមទ័ពស្រួចឯកជនមិនតិចជាង ៣ពាន់នាក់ឡើយ នៅទីបញ្ជាការដ្ឋានអង្គរក្សរបស់លោកនេះ។ ជានិច្ចកាល ពួកមេដឹកនាំ និងមន្ត្រីគ្រាក់ៗនៃបញ្ជាការដ្ឋានអង្គរក្សតែងតែប្រកាសប្ដេជ្ញាចិត្ត និងត្រៀមខ្លួនទុកជាស្រេច ដើម្បីចេញប្រតិបត្តិការស្ម័គ្រស្លាប់ការពារលោក ហ៊ុន សែន និងក្រុមគ្រួសារគ្រប់កាលៈទេសៈទាំងអស់។ មិនត្រឹមតែប៉ុណ្ណោះ ពួកគេបានប្រកាសទៀតថា នឹងគាំទ្របេក្ខភាពលោក ហ៊ុន សែន ជានាយករដ្ឋមន្ត្រីគ្រប់អាណត្តិ ដែលនេះគឺជាការអនុវត្តផ្ទុយទៅនឹងច្បាប់។ ច្បាប់ស្ដីពីលក្ខន្តិកៈទូទៅចំពោះយោធិននៃកងយោធពលខេមរភូមិន្ទចែងថា យោធិនត្រូវមានអព្យាក្រឹត្យភាពក្នុងមុខនាទី ក្នុងសកម្មភាពការងារ និងហាមឃាត់ការប្រើប្រាស់មុខងារ និងសម្ភារៈរបស់រដ្ឋ ដើម្បីបម្រើសកម្មភាពនយោបាយណាមួយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។