លោក ហ្សង់ហ្វ្រង់ស័រ ពី​អ្នក​កាសែត​មាន​កេរ្តិ៍​ឈ្មោះ ទៅ​ជា​មន្ត្រី​នយោបាយ​របស់​ត្រកូល​ហ៊ុន

0:00 / 0:00

អតីត​អ្នកនយោបាយ​បក្ស​ប្រឆាំង មន្ត្រី​អង្គការ​សង្គម​ស៊ីវិល និង​អ្នកសារព័ត៌មាន​ជាច្រើន​នាក់​បាន​ក្លាយជា​មន្ត្រីជាន់ខ្ពស់​ក្នុង​រដ្ឋាភិបាល​អាណត្តិ​ទី ៧ ដែល​ជា​រដ្ឋាភិបាល​បន្ត​ត្រកូល ដឹកនាំ​ដោយ​លោក ហ៊ុន ម៉ាណែត។ ក្នុង​ចំណោម​អ្នក​ទទួល​បាន​បុណ្យស័ក្ដិ​ធំ​ទាំងនោះ ក៏​រួមមាន​ទាំង​លោក តាន់ ហ្សង់ហ្វ្រង់ស័រ (Tain Jean Francois) អតីត​នាយក​ការផ្សាយ​នៃ​វិទ្យុ​បារាំង​អន្តរជាតិ​(RFI) ជា​ខេមរភាសា ម្នាក់​ផង​ដែរ។ តើ​ហេតុអ្វី​បានជា​អ្នកជំនាញ​ផ្នែក​សារព័ត៌មាន​រូប​នេះ​ក្លាយ​ជា​មន្ត្រី​ជាន់ខ្ពស់​រដ្ឋាភិបាល?

លោក តាន់ ហ្សង់ហ្វ្រង់ស័រ ឬ ហ្សង់ហ្វ្រង់ស័រ តាន់ (Jean Francois Tain) ជា​អ្នកជំនាញ​ផ្នែក​សារព័ត៌មាន​ល្បីឈ្មោះ​មួយ​រូប ដែល​បាន​ចូល​បម្រើ​រដ្ឋាភិបាល​បន្ត​ជំនាន់​នៃ​ត្រកូល «​ហ៊ុន»។ លោក​ហាក់​មាន​ទំនោរ​ទៅ​រក​រដ្ឋាភិបាល​គណបក្ស​ប្រជាជន​កម្ពុជា​ជា​យូរ​មក​ហើយ តាមរយៈ​ការ​អត្ថាធិប្បាយ​ព័ត៌មាន និង​ទំនាក់ទំនង​ដ៏​ជិតស្និទ្ធ​របស់​លោក​ជាមួយ​មន្ត្រី​កំពូលៗ​នៃ​រដ្ឋាភិបាល។

ប្រវត្តិ​សង្ខេប

លោក ហ្សង់ហ្វ្រង់ស័រ មាន​អាយុ ៥៧ ឆ្នាំ។ លោក​កើត​នៅ​ស្រុក​មោងឫស្សី ខេត្ត​បាត់ដំបង នៅ​ឆ្នាំ ១៩៦៦ ក្នុង​គ្រួសារ​មួយ​ដែល​មាន​ឪពុក​ជា​ថៅកែ​រោង​ម៉ាស៊ីនកិនស្រូវ និង​ម្ដាយ​ជា​មេផ្ទះ។ ឪពុក​របស់​លោក​បាន​ស្លាប់​ក្នុង​សម័យ​ខ្មែរក្រហម​។ លោក និង​ម្ដាយ រួម​ទាំង​សាច់ញាតិ​មួយចំនួន​ទៀត​បាន​ភៀស​ខ្លួន​ទៅ​រស់នៅ​ក្នុង​ជំរំ​លើទឹក​ដី​ថៃ ក្នុង​ឆ្នាំ ១៩៧៩ ហើយ​ទទួល​បាន​សិទ្ធិ​ជ្រកកោន​ជា​ជនភៀសខ្លួន​នៅ​ប្រទេស​បារាំង​តាមរយៈ​អង្គការ​សហប្រជាជាតិ​ក្នុង​ឆ្នាំ​ដដែល​នោះ។

ការងារ និង​កេរ្តិ៍ឈ្មោះ

លោក ហ្សង់ហ្វ្រង់ស័រ ដែល​មាន​សញ្ជាតិ​បារាំង បាន​ចាប់ផ្ដើម​អាជីព​ជា​អ្នកសារព័ត៌មាន​នៅ​វិទ្យុ​បារាំង​អន្តរជាតិ (RFI) នៅ​ឆ្នាំ ១៩៩២ ហើយ​ក្រោយ​មក​លោក​បាន​ក្លាយជា​ថ្នាក់ដឹកនាំ​នៃ​វិទ្យុ​បារាំង​អន្តរជាតិ (RFI) ផ្នែក​ខេមរភាសា មុននឹង​ប្រកាស​លាឈប់​នៅ​ខែសីហា ឆ្នាំ​២០២៣ នេះ។

ក្នុង​អាជីព​ជា​អ្នក​អត្ថាធិប្បាយ​ព័ត៌មាន លោក ហ្សង់ហ្វ្រង់ស័រ មាន​របៀប​និយាយ សំឡេង និង​ស្ទីល​ខុសប្លែក​ពី​គេ ដោយមាន​ទឹកដម​សំឡេង​សង្កត់​ធ្ងន់ៗ។ លោក​តែងតែ​បកស្រាយ​ប្រវត្តិសាស្ត្រ និង​ភូមិសាស្ត្រ​នយោបាយ​ក្នុង​របៀប​សាមញ្ញ​ងាយ​យល់​។ គឺ​ចំណុច​ទាំងនេះ​ហើយ ដែល​លោក​អាច​ឆក់​យក​បេះដូង​អ្នក​ស្ដាប់​មួយចំនួន ជាពិសេស​យុវជន​ដែល​ជា​សិស្ស​-​និស្សិត ដែល​ចូលចិត្ត​តាមដាន​ព្រឹត្តិការណ៍​នយោបាយ​ជាតិ និង​អន្តរជាតិ។

ប្រភព​មួយចំនួន​បាន​រៀបរាប់​ប្រាប់​វិទ្យុ​អាស៊ីសេរី​ថា លោក ហ្សង់ហ្វ្រង់ស័រ គឺជា​អ្នកដឹកនាំ​ដ៏​ល្អ​មួយ​រូប​នៅ​វិទ្យុ​បារាំង​អន្តរជាតិ​ផ្នែក​ខេមរភាសា។ លោក​យកចិត្តទុកដាក់​ចំពោះ​បុគ្គលិក និង​ផ្ដល់​សេរីភាព​ពេញលេញ​ដល់​ពួកគេ​ក្នុង​ការ​បំពេញ​មុខងារ​ជា​អ្នកសារព័ត៌មាន​ឯករាជ្យ​។ ជាមួយ​គ្នា​នេះ លោក​ជា​មនុស្ស​សួរដេញដោល​រកហេតុ​ផល ស្ងប់ស្ងាត់ និង​មាន​ឯកជន​ភាព​ខ្ពស់។

ការងារ​មួយទៀត​ដែល​ជួយ​ឱ្យ​លោក ហ្សង់ហ្វ្រង់ស័រ មាន​កេរ្តិ៍ឈ្មោះ​បោះ​សំឡេង នោះ គឺ​លោក​ជា​អ្នក​បណ្ដុះបណ្ដាល​ជំនាញ​សារព័ត៌មាន និង​ធ្វើ​បាឋកថា​តាម​សាកលវិទ្យាល័យ វេទិកា​យុវជន និង​ជា​វាគ្មិន​កិត្តិយស​ក្នុង​កម្មវិធី​មួយចំនួន។

ការ​ចូលរួម​ជាមួយ​រដ្ឋាភិបាល

ក៏ប៉ុន្តែ​លោក ហ្សង់ហ្វ្រង់ស័រ បានសម្រេច​ចិត្ត​បោះបង់ចោល​អាជីព​ទាំងនេះ ដើម្បី​ឈោង​ចាប់​យក​តួនាទី​ជា​មន្ត្រី​ជាន់ខ្ពស់​រដ្ឋាភិបាល ក្រោម​ការគ្រប់គ្រង​របស់​លោក ហ៊ុន ម៉ាណែត ដែល​ជា​កូនប្រុស​ច្បង​ស្នង​តំណែង​ពី​លោក ហ៊ុន សែន។

លោក​ត្រូវ​បាន​តែងតាំង​ជា​រដ្ឋមន្ត្រី​ប្រតិភូ​អម​នាយករដ្ឋមន្ត្រី​ទទួលបន្ទុក​កិច្ចការបរទេស និង​សហប្រតិបត្តិការ​អន្តរជាតិ កាលពី​ថ្ងៃទី ២២ សីហា ឆ្នាំ ២០២៣ ពោល​គឺជា​ថ្ងៃ​ដែល​រដ្ឋាភិបាល​ថ្មី​ចាប់ផ្ដើម​ដំណើរការ​។ មុន​ការតែងតាំង ៥ ថ្ងៃ លោក​បាន​ជួប​ជាមួយ​លោក ហ៊ុន សែន រយៈពេល​ជាង ៤ ម៉ោង ហើយ​លោក​បាន​ចាត់ទុក​ជំនួប​នេះ​ថា ជា «​កិត្តិយស និង​ឱកាស​ដ៏​វិសេសវិសាល​» សម្រាប់​លោក។

លោក ហ្សង់ហ្វ្រង់ស័រ ទំនងជា​បាន​រៀបចំ​ខ្លួន​ជា​យូរ​មក​ហើយ ដើម្បី​ឈោង​ចាប់​យក​តួនាទី​ជា​មន្ត្រី​ធំ​ក្នុង​ជួរ​រដ្ឋាភិបាល។

​កាលពី​ខែ​សីហា ឆ្នាំ ២០២២ ក្នុងពេលដែល​ផែនការ​ផ្ទេរអំណាច​ត​ពូជពង្ស​របស់​លោក ហ៊ុន សែន លេច​រូបរាង​កាន់តែ​ច្បាស់ ហើយ​រង​ការរិះគន់​ខ្លាំង​នោះ លោក ហ្សង់ហ្វ្រង់ស័រ ខណៈ​កំពុង​កាន់​តួនាទី​ជា​នាយក​ការផ្សាយ​នៃ​វិទ្យុ​បារាំង​អន្តរជាតិ​ផ្នែក​ខេមរភាសា​នោះ បាន​ថ្លែង​នៅក្នុង​កិច្ចពិភាក្សា​ជា​សាធារណៈ​មួយ​ថា ការ​បន្តវេន​កាន់អំណាច​ក្នុង​ត្រកូល​មេដឹកនាំ គឺជា​រឿង​ធម្មតា​លើ​ពិភពលោក។

លោក ហ្សង់ហ្វ្រង់ស័រ៖ «បាតុភាព​នៃ​ការ​បន្តវេន​នយោបាយ​នៅក្នុង​ត្រកូល​ក្រុម​គ្រួសារ​តែមួយ​ត​គ្នា​ពីរ​បី​ជំនាន់ ឬ​នៅក្នុង​ត្រកូល​ក្រុម​គ្រួសារ​មួយ​ក្ដាប់​តូច​ពីរ​បី​ជំនាន់ ឬក៏​ដាច់ៗ​គ្នា បាន​ន័យថា បែប​ទៅ​ហើយ​មកវិញ គឺជា​បាតុភាព​មួយ​ធម្មតា ដែល​គេ​សង្កេតឃើញ​នៅ​សឹង​គ្រប់​សង្គម​។ សូម្បី​នៅ​សហរដ្ឋអាមេរិក​ក៏មានដែរ ចច ប៊ូស(George H.W. Bush)ដែល​ជា​ប្រធានាធិបតី​អាមេរិក​ពី​ឆ្នាំ ១៩៨៩ ដល់​ឆ្នាំ ១៩៩៣ ហើយ​និង ប៊ូស កូន(Gorge W. Bush)ដែល​ជា​ប្រធានាធិបតី​អាមេរិក​ពី​ឆ្នាំ ២០០១ ដល់​ឆ្នាំ ២០០៩»។

ជាង​មួយ​ខែ​ក្រោយមក លោក ហ៊ុន ម៉ាណែត ក៏បាន​ថ្លែង​សារ​ដូចគ្នា​នឹង​លោក ហ្សង់ហ្វ្រង់ស័រ នេះដែរ​ថា ការដឹកនាំ​បន្តវេន គឺជា​ករណី​ទូទៅ​ដែល​កើត​មាននៅ​ប្រទេស​ជាច្រើន​លើ​ពិភពលោក ដូចជា សហរដ្ឋអាមេរិក ជប៉ុន និង​ហ្វីលីពីន ជាដើម​។ ប៉ុន្តែ​អ្វី​ដែល​ទាំង​លោក ហ្សង់ហ្វ្រង់ស័រ និង​លោក ហ៊ុន ម៉ាណែត មិន​ព្រម​និយាយប្រាប់​ពលរដ្ឋ​ឱ្យ​ដឹង​នោះ គឺថា ការដែល​ត្រកូល​អ្នកដឹកនាំ​ទាំងនោះ​មានឱកាស​ដឹកនាំ​ប្រទេស គឺ​ដោយសារ​ការបោះឆ្នោត​តាម​លក្ខណៈ​ប្រជាធិបតេយ្យ សេរី និង​យុត្តិធម៌ ពោល​គឺ​មិនមែន​តាមរយៈ​ការប្រើប្រាស់​ប្រព័ន្ធ​តុលាការ​ដើម្បី​រំលាយ និង​ផាត់​ចោល​គណបក្សប្រឆាំង ហើយ​ផ្ទេរអំណាច​ពី​ឪពុក​ទៅ​កូន​ដូច​នៅ​កម្ពុជា​នោះ​ទេ។

ចំណុច​មួយទៀត​ដែល​អាច​ឆ្លុះបញ្ចាំង​ពី​ជំហរ និង​គោលដៅ​នយោបាយ​របស់​លោក ហ្សង់ហ្វ្រង់ស័រ នោះ គឺ​បទ​អត្ថាធិប្បាយ​របស់​លោក​ភាគច្រើន​ផ្ដោត​តែ​ទៅលើ​ព្រឹត្តិការណ៍​តំបន់ និង​អន្តរជាតិ​។ ចំពោះ​បញ្ហា​នយោបាយ​រសើប ឬក៏​ព័ត៌មាន​ក្ដៅៗ និង​ចម្រូងចម្រាស​នៅ​កម្ពុជា​វិញ ខ្លួន​លោក​ផ្ទាល់​មិនសូវ​លើក​យក​មក​ផ្សាយ ឬ​ធ្វើ​អត្ថាធិប្បាយ​នោះ​ទេ​។ ជាមួយ​គ្នា​នេះ លោក​ហាក់​ព្យាយាម​និយាយ​បញ្ចៀស ឬ​និយាយ​សើៗ​ចំពោះ​វិបត្តិ​នានា​ដែល​កំពុង​កើត​មាននៅ​កម្ពុជា ដូចជា ករណី​រំលោភ​សិទ្ធិមនុស្ស​ធ្ងន់ធ្ងរ អំពើ​អយុត្តិធម៌​សង្គម និង​ការបំផ្លាញ​លទ្ធិប្រជាធិបតេយ្យ​ដែល​ប្រព្រឹត្ត​ដោយ​រដ្ឋាភិបាល ជាដើម។

អ្នកជំនាញ​ផ្នែក​ភូមិសាស្ត្រ​នយោបាយ បណ្ឌិត រ៉ូ វណ្ណៈ គឺជា​បញ្ញវន្ត​មួយ​រូប​ដែល​បាន​តាមដាន​ការវិភាគ និង​សំណេរ​របស់​លោក លោក ហ្សង់ហ្វ្រង់ស័រ ទាំង​ក្នុង​សៀវភៅ និង​លើ​បណ្ដាញសារព័ត៌មាន​។ លោក​យល់​ឃើញ​ថា ស្នាដៃ​ទាំងនោះ​គួរ​ឱ្យ​ចាប់អារម្មណ៍ ប៉ុន្តែ​មាន​លក្ខណៈ​ត្រឹម​ជា​ការ​ពណ៌នា (Narrative) មិនមែន​បែប​សិក្សាធិការ (Academic) ដែល​អាច​យក​ជា​សំអាង (Citation) សម្រាប់​អ្នក​សិក្សា​ស្រាវជ្រាវ​បាន​នោះ​ទេ។

បណ្ឌិត រ៉ូ វណ្ណៈ៖ «បញ្ហា​ទាក់ទង​នឹង​កម្ពុជា ភាគច្រើន​គឺ​មិនសូវ​ជា​មុត​ស្រួច ដោយសារតែ​កត្តា​អ្វីខ្លះ​ក៏​យើង​មិនដឹង​ដែរ​នៅ​ពីក្រោយ​ឆាក​។ ប៉ុន្តែ​អាច​មួយ​ក្នុងចំណោម​ហ្នឹង គឺ​ដោយសារតែ​ភាព​ស្និទ្ធ​របស់​គាត់​ជាមួយនឹង​អ្នកកាន់អំណាច ឬ​រដ្ឋាភិបាល​នៅពេល​អនាគត ហើយ​ក្រោយ​មក​នៅ​ពេល​ដែល​គាត់​ចូល​រដ្ឋាភិបាល​គេ​អាច​វិនិច្ឆ័យ​បាន​ថា ជំហរ និង​ឥរិយាបថ​របស់​គាត់​នៅ​ពេល​ដែល​គាត់​ជា​អ្នកកាសែត​ហ្នឹង គឺ​ស្របគ្នា​នឹង​ការបម្រើ​របៀបវារៈ ឬក៏​នយោបាយ​របស់​រដ្ឋាភិបាល»។

លោក ហ្សង់ហ្វ្រង់ស័រ មាន​ទំនាក់ទំនង​យ៉ាង​ជិតស្និទ្ធ​ជាមួយ​ក្រុម​មន្ត្រី​គ្រាក់ៗ​នៃ​រដ្ឋាភិបាល​កម្ពុជា ដូចជា អតីតរដ្ឋមន្ត្រី​ក្រសួង​ការបរទេស លោក ប្រាក់ សុខុន រដ្ឋមន្ត្រី​ថ្មី​នៃ​ក្រសួងការបរទេស​លោក សុខ ចិន្ដាសោភា រដ្ឋមន្ត្រី​ក្រសួងយុត្តិធម៌ លោក កើត រិទ្ធ និង​រដ្ឋមន្ត្រី​ក្រសួងកសិកម្ម​លោក ឌិត ទីណា ជាដើម។ លោក​ចាប់ផ្ដើម​បង្ហាញ​ពី​ទំនាក់ទំនង​ល្អ​របស់​លោក​ជាមួយ​មន្ត្រីជាន់ខ្ពស់​រដ្ឋាភិបាល​នេះ នៅ​ពេល​លោក​បាន​ក្លាយជា​មន្ត្រី​ធំ​ដូច​ពួកគេ​ដែរ។

ម្យ៉ាងវិញទៀត ក្រោយពេល​បាន​ឡើង​ធ្វើ​ធំ​ភ្លាម លោក ហ្សង់ហ្វ្រង់ស័រ ក៏​ចាប់ផ្ដើម​រៀន​ចេះ​និយាយ​បញ្ចើចបញ្ចើ​មេ​ថ្មី​របស់​លោក ដូច​មន្ត្រី​ផ្សេងទៀត​ដែរ​។ លោក​បាន​លើក​សរសើរ​លោក ហ៊ុន ម៉ាណែត ថា ជា​មេដឹកនាំ​ថ្មី​ដែល​មាន «​សន្ដាន​ចិត្តល្អ​» គិតគូរ​ពី​សុខទុក្ខ​របស់​អ្នក​ដែល​មាន​ជីវភាព​លំបាកលំបិន​ក្នុង​សង្គម ដូចជា កម្មករ​-​កម្មការិនី ក្រុម​អ្នក​ប្រកប​របរ​សេដ្ឋកិច្ច​ក្រៅ​ប្រព័ន្ធ និង​អ្នក​រស់នៅ​តាម​ស្រុកស្រែ​ចម្ការ​។ លោក ហ្សង់ហ្វ្រង់ស័រ ពោល​ពាក្យ​សរសើរ​បែបនេះ ក្រោយពី​លោក ហ៊ុន ម៉ាណែត ប្រកាស​ដាក់ចេញ​នូវ​យុទ្ធសាស្ត្រ «​បញ្ច​កោណ​» និង​ក្រោយពេល​នាយករដ្ឋមន្ត្រី​ថ្មី​រូប​នេះ​ចុះ​ជួប​កម្មករ​លើកដំបូង ដើម្បី​ឃោសនា​នយោបាយ។

​នាយក​ប្រតិបត្តិ​សមាគម​សម្ព័ន្ធ​អ្នកសារព័ត៌មាន​កម្ពុជា ហៅ​កាត់​ថា ខេ​ម​បូ​ចា (CamboJA) លោក ណុប វី មានប្រសាសន៍ថា ការ​ចូលរួម​របស់​លោក ហ្សង់ហ្វ្រង់ស័រ ក្នុង​រដ្ឋាភិបាល ជា​ជម្រើស​ផ្ទាល់ខ្លួន។

លោក ណុប វី៖ «​អ្នក​ដែល​សម្រេចចិត្ត​ចូលរួម​ក្នុង​ជួរ​រដ្ឋាភិបាល ខ្ញុំ​គិតថា គឺជា​ជម្រើស​របស់​ពួកគាត់​ទៅតាម​អ្វី​ដែល​ពួកគាត់​យល់ថា ត្រឹមត្រូវ​។ ប៉ុន្តែ​ចំណុច​សំខាន់​ថា តើ​ពួកគាត់​នឹង​ទៅ​ចូលរួម​ក្នុង​ការ​ជួយជ្រោមជ្រែង​រដ្ឋាភិបាល ដើម្បី​អាច​នឹង​ធ្វើ​កិច្ច​ការងារ​ឱ្យ​កាន់តែ​ល្អ​ប្រសើរ​ចំពោះ​កិច្ច​ការងារ​មួយចំនួន ដូចជា​រឿង​ទាក់ទង​នឹង​សិទ្ធិមនុស្ស សេរីភាព​បញ្ចេញមតិ សេរីភាព​សារព័ត៌មាន ឬក៏​ការងារ​របស់​អ្នកសារព័ត៌មាន​យើង​បាន​កម្រិត​ណា»។

មូលហេតុ​ដែល​លោក​អាច​ឡើង​ធំ

លោក ហ្សង់ហ្វ្រង់ស័រ ត្រូវ​បានតែងតាំង​ជា​មន្ត្រីជាន់ខ្ពស់​រដ្ឋាភិបាល ក្នុងពេលដែល​លោក​មិនទាន់​ដាច់ស្រេច​ពី​តួនាទី​ជា​នាយក​ការផ្សាយ​នៃ​វិទ្យុ​បារាំង​អន្តរជាតិ​(RFI) នៅឡើយ​ទេ​។ លោក​ឱ្យ​ដឹង​លើ​ហ្វេសប៊ុកថា តួនាទី​របស់​នឹង​ត្រូវ​បញ្ចប់​នៅ​ថ្ងៃទី៣១ ខែ​សីហា ប៉ុន្តែ​លោក​ត្រូវ​បាន​តែងតាំង តាំងពី​ថ្ងៃទី២២ សីហា មក​ម្ល៉េះ​។ លោក ហ្សង់ហ្វ្រង់ស័រ មិន​បាន​បង្ហាញ​អំពី​មូលហេតុ​ដែល​លោក​ចូល​បម្រើ​រដ្ឋាភិបាល​របស់​លោក ហ៊ុន ម៉ាណែត នោះ​ទេ។

វិទ្យុ​អាស៊ីសេរី​បាន​ព្យាយាម​ទាក់ទង​លោក​ជាច្រើន​ដង​តាម​ទូរស័ព្ទ និង​តាម​បណ្ដាញ​សង្គម​ផ្លូវការ​របស់​លោក ដើម្បី​សាកសួរ​អំពី​រឿង​ទាំងនេះ ប៉ុន្តែ​មិន​ទទួល​បាន​ការ​ឆ្លើយ​តប​ឡើយ។

ប្រភព​មួយចំនួន​ចេញពី​វិទ្យុ​បារាំង​អន្តរជាតិ​ដែល​សុំ​លាក់​ឈ្មោះ បាន​ប្រាប់​វិទ្យុ​អាស៊ីសេរី​ថា លោក ហ្សង់ហ្វ្រង់ស័រ បាន​និយាយប្រាប់​បុគ្គលិក​របស់​លោក​ថា ក្រោយ​ការ​លា​ឈប់​ពី​វិទ្យុ​បារាំង​អន្តរជាតិ លោក​នឹង​ចំណាយពេល​ដើម្បី​សម្រាក និង​សរសេរ​សៀវភៅ ដោយ​មិន​ត្រូវការ​តួនាទី ឬ​បុណ្យស័ក្ដិ​ក្នុង​រដ្ឋាភិបាល​ឡើយ​។ ប្រភព​ដដែល​ឱ្យ​ដឹង​ថា ពួកគេ​មានការ​សោកស្ដាយ និង​ស្រងាកចិត្ត​ជា​ខ្លាំង នៅពេល​លោក ហ្សង់ហ្វ្រង់ស័រ ក្រឡាស់​សម្ដី​ក្នុង​ពេល​ដ៏​ខ្លី​បែបនេះ​។ សោកស្ដាយ និង​ស្រងាកចិត្ត​ជា​ខ្លាំង​នោះ គឺ​នៅ​ត្រង់​ថា ទង្វើ​បែបនេះ​របស់​លោក ហ្សង់ហ្វ្រង់ស័រ អាច​ប៉ះពាល់​ដល់​ទំនុកចិត្ត​របស់​អ្នក​ស្ដាប់​ចំពោះ​វិទ្យុ​បារាំង​អន្តរជាតិ ពីព្រោះ​គេ​អាច​នឹង​វាយតម្លៃ​ថា ស្ថាប័ន​ព័ត៌មាន​ឯករាជ្យ​មួយ​នេះ គឺជា​ឈ្នាន់​សម្រាប់​បុគ្គលិក​នៅ​ទីនោះ ដើម្បី​ឈោង​ឡើង​ទៅ​យក​តួនាទី​ក្នុង​រដ្ឋាភិបាល​ទៅវិញ។

ទាក់ទង​ទៅ​នឹង​មូលហេតុ​ដែល​គណបក្ស​ប្រជាជន​កម្ពុជា​ទទួលយក​លោក ហ្សង់ហ្វ្រង់ស័រ ជា​សមាជិក និង​ផ្ដល់​តួនាទី​ធំ​ក្នុង​ជួរ​រដ្ឋាភិបាល​បែបនេះ អ្នកនាំពាក្យ​គណបក្ស​នេះ​គឺ លោក សុខ ឥសាន ប្រាប់​វិទ្យុ​អាស៊ីសេរី​ថា គឺ​ដោយសារ​លោក ហ្សង់ហ្វ្រង់ស័រ «​មិនដែល​និយាយ​វាយប្រហារ​លើ​គណបក្ស​ប្រជាជន​កម្ពុជា​» របស់​លោក។

ក្រោយពេល​ក្លាយ​ជា​រដ្ឋមន្ត្រី​ប្រតិភូ​អម​នាយករដ្ឋមន្ត្រី​នេះ លោក ហ្សង់ហ្វ្រង់ស័រ មាន​ការងារ​សំខាន់​មួយ គឺ​ធ្វើ​សន្និសីទ​សារព័ត៌មាន ក្រោយ​លោក ហ៊ុន ម៉ាណែត វិលត្រឡប់​មកពី​កិច្ចប្រជុំ​សំខាន់ៗ​នៅ​ក្រៅ​ប្រទេស។ សកម្មភាព​ការងារ​មួយ​ចំនួន​ទៀត​ដែល​លោក​បាន​បង្ហាញ​នោះ មាន​ដូចជា ការ​ជួប​ជាមួយ​មន្ត្រី​រដ្ឋាភិបាល​បរទេស ការចូលរួម​ប្រជុំ​ជាមួយ​សមាជិក​រដ្ឋាភិបាល និង​ការដឹកនាំ​ក្រុមការងារ​ស្រាវជ្រាវ និង​សរសេរ​របាយការណ៍។

លោក ហ្សង់ហ្វ្រង់ស័រ ប្រហែលជា​កំពុង​មាន​មោទនភាព​នឹង​មុខងារ​ថ្មី​របស់​លោក​នេះ ពីព្រោះ​លោក​បាន​បង្ហោះ​សា​រលើ​ហ្វេសប៊ុក​ជាប្រចាំ​អំពី​សកម្មភាព​ការងារ​របស់​លោក​។ ប៉ុន្តែ​នៅ​ត្រង់​ថា តើ​តួនាទី​ជា​រដ្ឋមន្ត្រី​ប្រតិភូ​អម​នាយករដ្ឋមន្ត្រី​ទទួលបន្ទុក​កិច្ចការបរទេស និង​សហប្រតិបត្តិការ​អន្តរជាតិ​របស់​លោក​នេះ មាន​ប្រសិទ្ធភាព ឬក៏​បម្រើ​ឧត្តម​ប្រយោជន៍​ជាតិ​កម្រិត​ណា ហើយ​ថា តើ​លោក​អាច​ផ្ដល់​ធាតុ​ចូល ឬ​មតិយោបល់​ច្រើន​ប៉ុនណា​ដល់​រដ្ឋាភិបាល​របស់​លោក ហ៊ុន ម៉ាណែត នោះ? នេះ​ជា​រឿង​មួយ​ផ្សេងទៀត​ដែល​គេ​កំពុង​រង់ចាំ​មើល៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។