ក្រុម​យុវជន​ថ្កោលទោស​របប​ក្រុងភ្នំពេញ​រឿង​បណ្ដោយ​ឱ្យ​បាត់ EBA ចំនួន​២០%

ដោយ មួង ណារ៉េត
2020-08-15
អ៊ីម៉ែល
មតិ
Share
បោះពុម្ព
លោកនាយករដ្ឋមន្ត្រី ហ៊ុន សែន ក្នុង​ពិធី​ប្រារព្ធ​ទិវា ៧ មករា ថ្ងៃ​ទី៧ ខែ​មករា ឆ្នាំ២០២០។
លោកនាយករដ្ឋមន្ត្រី ហ៊ុន សែន ក្នុង​ពិធី​ប្រារព្ធ​ទិវា ៧ មករា ថ្ងៃ​ទី៧ ខែ​មករា ឆ្នាំ២០២០។
រូប៖ ហ្វេសប៊ុក​លោក ហ៊ុន សែន

ក្រុម​យុវជន​ថ្កោលទោស​របប​លោក ហ៊ុន សែន ដែល​សុខចិត្ត​ឱ្យ​សហភាព​អឺរ៉ុប ដកហូត​ការ​អនុគ្រោះ​ពន្ធ EBA ចំនួន​២០% ពី​កម្ពុជា​។ ពួកគេ​ថា ការសម្រេចចិត្ត​នេះ ឆ្លុះបញ្ចាំង​ឱ្យ​ឃើញ​ថា របប​ដឹកនាំ​បច្ចុប្បន្ន​មិន​គិតគូរ​អំពី​សុខទុក្ខ​របស់​កម្មករ និង​ពលរដ្ឋ​ខ្មែរ ដែល​ពឹង​ផ្អែកលើ​វិស័យ​កាត់ដេរ​នោះ​ឡើយ​។ ប្រតិកម្ម​របស់​ក្រុម​យុវជន​នេះ គឺ​បន្ទាប់ពី​គណៈកម្មការ​អឺរ៉ុប​បាន​ប្រកាស​ចូល​ជា​ធរមាន​សេចក្តី​សម្រេច​ដកហូត​ការ​អនុគ្រោះ​ពន្ធ EBA ចំនួន​២០% ពី​កម្ពុជា កាលពី​ថ្ងៃ​ទី​១២ សីហា។

ក្រុម​យុវជន​យល់ឃើញ​ស្របគ្នា​ថា សហភាព​អឺរ៉ុប​មិន​ចង់​ដក​ការ​អនុគ្រោះ​ពន្ធ​ផ្នែក​ណាមួយ​ពី​កម្ពុជា​នោះ​ទេ ប៉ុន្តែ​ដោយសារ​របប​ដឹកនាំ​បច្ចុប្បន្ន​មិន​ព្រម​កែ​លម្អ​ស្ថានភាព​សិទ្ធិមនុស្ស និង​ប្រជាធិបតេយ្យ ទើប​សហភាព​អឺរ៉ុប​សម្រេចចិត្ត​បែបនេះ ដើម្បី​រក្សា​គុណ​តម្លៃ​លើកស្ទួយ​សិទ្ធិមនុស្ស​របស់​ខ្លួន។

អគ្គលេខាធិការ​សហព័ន្ធ​និស្សិត​បញ្ញវន្ត​កម្ពុជា លោក គៀន ពន្លក សង្កេត​ឃើញ​ថា សហភាព​អឺរ៉ុប​បាន​ទុក​ពេល​ជាច្រើន​ខែ​ឱ្យ​រដ្ឋាភិបាល​កែ​លម្អ​ស្ថានភាព​សិទ្ធិមនុស្ស និង​ប្រជាធិបតេយ្យ ដើម្បី​រក្សា​ប្រព័ន្ធ​អនុគ្រោះ​ពន្ធ​ទាំងស្រុង។ តែ​ទីបំផុត រដ្ឋាភិបាល​សុខចិត្ត​បោះបង់ចោល​សំណើ​នេះ ដោយ​ងាក​ទៅ​ចុះ​កិច្ចព្រមព្រៀង​ពាណិជ្ជកម្ម​សេរី​ជាមួយ​ប្រទេស​ចិន ផ្គើន​សហភាព​អឺរ៉ុប​វិញ​។ លោក​វាយតម្លៃ​ថា នេះ​ជា​នយោបាយ​គិតតែ​ប្រយោជន៍​អំណាច​របស់​ខ្លួន ដោយ​ផាត់​ចោល​ប្រយោជន៍​កម្មករ​ទូទាំង​ប្រទេស៖ «អ្វី​ដែល​សំខាន់​របស់​រដ្ឋាភិបាល​កម្ពុជា​នោះ គឺ​ការ​ថែរក្សា​អំណាច​របស់​ខ្លួន ហើយ​និង​ផលប្រយោជន៍​របស់​បក្ខ​ពួក​ខ្លួន ជាជាង​ផលប្រយោជន៍​របស់​ប្រជាជន​កម្ពុជា​ទាំងមូល​។ និយាយ​រួម គឺ​សហភាព​អឺរ៉ុប​មិន​ត្រឹមតែ​មិន​ខុស​ទេ ហើយ​សហភាព​អឺរ៉ុប​តែងតែ​ព្រួយបារម្ភ​ពី​ប្រទេស​កម្ពុជា ព្រួយបារម្ភ​ពី​ប្រជាជន​កម្ពុជា និង​ស្ថានភាព​ដែល​កើតឡើង​នៅ​ក្នុង​ប្រទេស​កម្ពុជា​។ អ្នក​ដែល​ខុស គឺ​រដ្ឋាភិបាល​កម្ពុជា»

ចំណែក យុវជន​គណបក្ស​សង្គ្រោះ​ជាតិ​ដែល​កំពុង​ភៀសខ្លួន​នៅ​ក្រៅ​ប្រទេស កញ្ញា សៅ ឧសភា ឱ្យ​ដឹង​ថា កញ្ញា​មាន​សាច់ញាតិ ៩​នាក់ ជា​កម្មករ​រោងចក្រ ហើយ​ពួកគាត់ និង​កម្មករ​រាប់​សែន​នាក់​ទៀត កំពុង​បាត់បង់​ការងារ​បណ្តើរៗ​ហើយ ដោយសារតែ​វិបត្តិ​ជំងឺ​កូវីដ-១៩​។ កញ្ញា​បន្ត​ថា ក្នុង​ស្ថានភាព​ដ៏​លំបាក​នេះ មិន​គួរ​របប​លោក ហ៊ុន សែន សុខចិត្ត​យក​ជម្រើស​វាយ​បំបែក​ឆ្នាំងបាយ​កម្មករ​បែបនេះ​ទេ។

យុវជន​បក្ស​ប្រឆាំង​រូប​នេះ រិះគន់​ថា ការ​បាត់បង់ EBA ចំនួន​២០% នេះ គឺជា​កំហុស​របស់​លោក ហ៊ុន សែន និង​របប​ដឹកនាំ​របស់​គាត់​។ កញ្ញា​បន្ថែម​ថា ប្រសិនបើ​លោក ហ៊ុន សែន មិន​ចង់​ឱ្យ​ពលរដ្ឋ​ស្អប់​លោក​កាន់តែ​ខ្លាំង និង​មិន​ចង់​ឱ្យ​ប្រទេសជាតិ​ធ្លាក់​ដុនដាប​ទេ នោះ​លោក​ត្រូវតែ​ប្រញាប់​អនុវត្ត​តាម​សំណើ​របស់​សហភាព​អឺរ៉ុប៖ «ខ្ញុំ​ក៏​​មាន​ការ​សោកស្ដាយ​ដែរ ដែល​ប្រព័ន្ធ​អនុគ្រោះ​ពន្ធ​បាត់​ដោយសារតែ​មនុស្ស​ម្នាក់ គឺ​បុគ្គល​លោក ហ៊ុន សែន ហ្នឹង ហើយ​ប្រជាពលរដ្ឋ​ខ្មែរ​រាប់​លាន​នាក់​ត្រូវ​រង​ផល​ប៉ះពាល់ ដោយសារតែ​មនុស្ស​ម្នាក់ គាត់​មិន​គោរព​ច្បាប់​។ គាត់​ធ្វើ​យ៉ាង​ណា​ដើម្បី​ថែរក្សា​អំណាច​ផ្ដាច់ការ​របស់​គាត់ ហើយ​វា​ជា​គំនិត​មួយ​អាត្មា​និយម ជា​គំនិត​មួយ​ដែល​ចង់​រស់​តែ​ខ្លួនឯង ហើយ​មិន​ខ្វល់​ពី​ប្រជាពលរដ្ឋ​ដែល​ស្ថិត​ក្រោម​ការដឹកនាំ​របស់​ខ្លួន»

សេចក្តី​សម្រេច​ដក​ការ​អនុគ្រោះ​ពន្ធ EBA ចំនួន​២០% ពី​កម្ពុជា បាន​ចូល​ជា​ធរមាន ចាប់ពី​ថ្ងៃទី​១២ សីហា តទៅ​។ សហភាព​អឺរ៉ុប​បាន​បញ្ជាក់​ច្បាស់ៗ​ថា ការ​ដក​ផ្នែក​ខ្លះ​នៃ​ការ​អនុគ្រោះ​ពន្ធ​នេះ គឺ​ដោយសារតែ​មានការ​រំលោភ​សិទ្ធិមនុស្ស​ធ្ងន់ធ្ងរ​ជា​ប្រព័ន្ធ មិន​អាច​ប្រកែក​បាន នៅ​កម្ពុជា។

ជុំវិញ​ការ​ចូល​ជា​ធរមាន​នៃ​ដក EBA ចំនួន​២០% នេះ លោកនាយក​រដ្ឋមន្ត្រី ហ៊ុន សែន មិន​ទាន់​មាន​ប្រតិកម្ម​អ្វី​នៅឡើយ​ទេ គិត​ត្រឹម​ថ្ងៃ​ទី​១៤ សីហា។

ទោះជា​យ៉ាងណា ប្រធាន​អង្គភាព​នាំ​ពាក្យ​រដ្ឋាភិបាល លោក ផៃ ស៊ីផាន បាន​ថ្លែង​ក្នុង​សន្និសីទ​សារព័ត៌មាន​នៅ​ថ្ងៃ​ទី​១២ សីហា ថា ការសម្រេច​របស់​សហ​ភាព​អឺរ៉ុប​នេះ គឺជា​រឿង​អយុត្តិធម៌​សម្រាប់​កម្ពុជា៖ «យើង​បាន​រក្សា​ពាក្យ​មួយ​ថា ការសម្រេចចិត្ត​នេះ​គឺ​អយុត្តិធម៌​សម្រាប់​កម្ពុជា ដោយ​ហេតុផល​នយោបាយ​។ នេះ​ជា​រឿង​ធំ​មួយ មិនមែន​ជា​រឿងហេតុ​ផល​សេដ្ឋកិច្ច​ទេ ជា​រឿង​ហេតុផល​នយោបាយ​។ យើង​បាន​ពន្យល់​ហើយ ហើយ​គេ​នៅតែ​បន្ត​ទៀត ដោយសារ​យក​លេស​នេះ យក​លេស​នោះ»

ផ្ទុយ​ពី​ការ​អះអាង​នេះ មន្ត្រី​កម្មវិធី​ផ្នែក​អភិបាលកិច្ច និង​គោលនយោបាយ​នៃ​មជ្ឈមណ្ឌល​ភីឌីភី (PDP) លោក ហេង គឹមហុង មើលឃើញ​ថា សំណើ​របស់​សហភាព​អឺរ៉ុប​មិន​ប៉ះពាល់​ដល់​អធិបតេយ្យ​ជាតិ​នោះ​ទេ តែ​ជា​ការ​ជួយ​ជំរុញ​ឱ្យ​កម្ពុជា​មាន​ការ​គោរព​សិទ្ធិមនុស្ស និង​ងាក​មក​គន្លង​ប្រជាធិបតេយ្យ​វិញ​។ លោក​សង្កត់ធ្ងន់​ថា រដ្ឋាភិបាល​ជា​អ្នកទទួលខុសត្រូវ​ចំពោះ​ការ​ធ្វើ​ឱ្យ​បាត់ EBA ចំនួន​២០% និង​ហានិភ័យ​នៃ​ការបាត់បង់​ប្រព័ន្ធ​អនុគ្រោះ​ពន្ធ​នេះ​បន្ត​ទៀត​នៅ​ថ្ងៃមុខ ព្រោះ​សហភាព​អឺរ៉ុប​បាន​ទុក​ពេល​ជាច្រើន​សម្រាប់​រដ្ឋាភិបាល

យុវជន​រូប​នេះ​គូស​បញ្ជាក់​ថា ការបាត់បង់ EBA ចំនួន​២០% នេះ ធ្វើ​ឱ្យ​កម្ពុជា​ខាតបង់​៣ យ៉ាង​ជា​សំខាន់ គឺ​ទីមួយ​ត្រូវ​បង់ពន្ធ​លើ​មុខទំនិញ​មួយ​ចំនួន ទី​ពីរ វិនិយោគិន​អាច​រារែក​ចិត្ត​ក្នុង​ការ​មក​បណ្ដាក់​ទុន​នៅ​កម្ពុជា និង​ទី​បី កម្ពុជា​ខូច​មុខមាត់​លើ​ឆាក​អន្តរជាតិ​ដោយសារ​ជាប់​ឈ្មោះ​ជា​ប្រទេស​រំលោភ​សិទ្ធិមនុស្ស​ធ្ងន់ធ្ងរ៖ «កូវីដ-១៩ បាន​ធ្វើ​ឱ្យ​សេដ្ឋកិច្ច​កម្ពុជា​ខូច​មួយ​ផ្នែក ចុះ​ហេតុអ្វី​បានជា​យើង​មិន​ព្រម​ធ្វើ​ឱ្យ​ល្អ​ប្រសើរ​ទៅលើ​ចំណុច​ដែល​ខ្វះខាត ដើម្បី​ទទួល​យក​បាន EBA ២០%​ទៀត​? ខ្ញុំ​ស្នើ​សុំ​ឱ្យ​រដ្ឋាភិបាល មេត្តា​ពិចារណា​ឡើងវិញ​អំពី​ការពិនិត្យ​ទៅលើ​អនុសាសន៍​របស់​សហភាព​អឺរ៉ុប ព្រោះ​អនុសាសន៍​ទាំងអស់​នោះ​មិនមែន​ជា​ការ​ជ្រៀតជ្រែក​កិច្ច​ការងារ​ផ្ទៃក្នុង​ទេ គឺជា​ការ​ផ្តល់​គំនិត​រវាង​គ្នា និង​គ្នា​ក្នុងនាម​ជា​រដ្ឋ​សមាជិក​អង្គការ​សហប្រជាជាតិ»

ថ្វី​ដ្បិត​តែ​ការសម្រេច​ដក EBA ចំនួន​២០% នេះ​ចូល​ជា​ធរមាន​ហើយ​ក្តី ក៏​សហភាព​អឺរ៉ុប​នៅតែ​ទទូច​ឱ្យ​របប​លោក ហ៊ុន សែន គិតគូរ​ស្ដារ​ប្រជាធិបតេយ្យ និង​គោរព​សិទ្ធិមនុស្ស​ឡើងវិញ​ដដែល​។ សហភាព​អឺរ៉ុប​បញ្ជាក់​ថា បើ​ស្ថាន​ភាព​ដុនដាប​ផ្នែក​សិទ្ធិមនុស្ស​នៅ​កម្ពុជា​ត្រូវ​បាន​កែ​លម្អ​ជា​ដុំកំភួន នោះ​សហភាព​អឺរ៉ុប​នឹង​ផ្ដល់​ការ​អនុគ្រោះ​ពន្ធ​ទាំងស្រុង​ដល់​កម្ពុជា​ជាថ្មី​ឡើងវិញ។

ទោះជា​បែបនេះ​ក្តី យុវជន​គណបក្ស​សង្គ្រោះ​ជាតិ កញ្ញា សៅ ឧសភា ថ្លែង​ថា កញ្ញា​គ្មាន​ជំនឿ​ទេ​ថា លោក ហ៊ុន សែន នឹង​អនុវត្ត​តាម​សំណើ​នេះ ព្រោះ​អាទិភាព​សំខាន់​ជាងគេ​របស់​បុរស​ខ្លាំង​រូប​នេះ គឺ​រក្សា​អំណាច​ផ្ដាច់ការ​ត​វង្ស​ត្រកូល​របស់​គាត់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល