ក្រុមយុវជនដែលអះអាងថា ជានិស្សិតជាង ១០នាក់ នៅថ្ងៃទី២៥ ខែមីនា ដាក់ញត្តិទៅរដ្ឋសភាជាថ្មីស្នើឲ្យកោះហៅអនុប្រធានគណបក្សសង្គ្រោះជាតិ លោក កឹម សុខា ចេញមុខមកបកស្រាយរឿងខ្សែអាត់សំឡេងលេចធ្លាយពាក់ព័ន្ធនឹងការរំលោភសិទ្ធិមនុស្ស។
ការដាក់ញត្តិជាថ្មីម្តងទៀតរបស់យុវជន បានលើកយកខ្សែអាត់សំឡេងលេចធ្លាយដែលគេអះអាងថា ជាសំឡេងរបស់លោក កឹម សុខា និយាយជំរុញឲ្យស្រីកំណាន់របស់លោករំលូតកូន ដែលក្រុមយុវជននេះយល់ថា ទង្វើនេះប៉ះពាល់ដល់ការគោរពសិទ្ធិមនុស្ស។
លិខិតចំនួនពីរច្បាប់ដាច់ដោយឡែកពីគ្នា ដាក់ជូនប្រធានរដ្ឋសភា លោក ហេង សំរិន និងប្រធានគណៈកម្មការសិទ្ធិមនុស្ស លោក អេង ឆៃអ៊ាង ដើម្បីធ្វើអន្តរាគមន៍។ មន្ត្រីតំណាងរដ្ឋសភា បានទទួលញត្តិរបស់ក្រុមយុវជននេះ។
បន្ទាប់ពីចេញពីយកញត្តិទៅដាក់នៅរដ្ឋសភា លោក ស្រី ចំរើន តំណាងក្រុមយុវជននេះ ថ្លែងទៅកាន់អ្នកសារព័ត៌មានក្រៅរបងរដ្ឋសភាថា លោកចង់ឲ្យស្ថាប័នកំពូលរបស់រដ្ឋមួយនេះពន្លឿនការកោះហៅលោក កឹម សុខា ចូលបំភ្លឺរឿងខ្សែអាត់សំឡេង។
ប្រធានផ្នែកស៊ើបអង្កេតរបស់សមាគមអាដហុក (ADHOC) លោក នី សុខា ថ្លែងថា បើតាមច្បាប់ស្ដីពីការរំលូតកូន ការបង្ខំឲ្យស្ត្រីរំលូតកូនជាអំពើខុសច្បាប់។ ក៏ប៉ុន្តែលោកមន្ទិលពីភាពពិតនៃខ្សែអាត់សំឡេង។
ទោះបីជាយ៉ាងណា លោកយល់ថា ករណីក្រុមយុវជនស្នើឲ្យរដ្ឋសភាចាត់ការរឿងខ្សែអាត់សំឡេងហាក់ដូចជាមិនទាន់មានមូលដ្ឋានគ្រប់គ្រាន់។ លោកថា មានបញ្ហាជាតិធំៗផ្សេងទៀតដែលគួរត្រូវដោះស្រាយ ហើយត្រូវការការជំរុញពីក្រុមយុវជនដើម្បីពន្លឿនការដោះស្រាយបញ្ហាជាតិទាំងនោះ៖ «ក៏ប៉ុន្តែយើងពិនិត្យឃើញថា រឿងនេះហាក់បីដូចជាមិនពាក់ព័ន្ធអីធ្ងន់ធ្ងរទៅដល់រឿងជាតិទេ។ យើងគិតថា បើសិនជាយើងដាក់ញត្តិទៅរដ្ឋសភា ឲ្យបំភ្លឺរឿងជាតិធំៗ ដូចជារឿងដីធ្លីរឿងរំលោភសិទ្ធិមនុស្សធំៗ ដូចជារឿងអំពើពុករលួយអ្នកដែលយកទ្រព្យសម្បត្តិជាតិទៅលក់ហ្នឹងគប្បីពួកគាត់ធ្វើបញ្ហាហ្នឹងវិញ»។
ក្រុមយុវជនដែលអះអាងថា ជាក្រុមនិស្សិតបដិសេធមិនប្រាប់ពីឈ្មោះសាលាដែលខ្លួនរៀននោះទេ ដោយនិយាយថា គេមកមិនមែនក្នុងនាមជាតំណាងសាលាឡើយ។
គិតមកត្រឹមពេលនេះ យុទ្ធនាការតវ៉ាទាមទារឲ្យលោក កឹម សុខា ចេញមុខបកស្រាយព័ត៌មានទាក់ទងនឹងខ្សែអាត់លេចធ្លាយរបស់យុវជននេះ មានរយៈពេលជិតមួយខែហើយ។
ក្រុមយុវជនបញ្ជាក់ថា ពួកគេចង់ឃើញការទទួលខុសត្រូវរបស់មន្ត្រីសាធារណៈ។ យុវជនក្រុមនេះកំពុងសុំអន្តរាគមន៍ពីអង្គភាពប្រឆាំងអំពើពុករលួយ រដ្ឋសភា និងគណបក្សសង្គ្រោះជាតិ ដើម្បីជំរុញឲ្យលោក កឹម សុខា ចេញបកស្រាយ។
យុវជនក៏បានធ្វើដំណើរទៅតាមខេត្តជាទីដែលគណបក្សសង្គ្រោះជាតិ រៀបចំវេទិកាសាធារណៈជាមួយអ្នកគាំទ្រដើម្បីអន្ទងឲ្យមន្ត្រីជាន់ខ្ពស់គណបក្សប្រឆាំងរូបនេះ ប្រតិកម្មឆ្លើយតប។
លោក ស្រី ចំរើន ដែលនាំមុខក្រុមយុវជននេះអះអាងថា ដើម្បីស្វែងរកការពិតនៃខ្សែអាត់លេចធ្លាយ ក្រុមលោកដែលបញ្ជាក់ថា ជានិស្សិតផ្លាស់វេនគ្នាទៅតាមកាលវិភាគសាលា ចូលរួមសកម្មភាពនានា។
ទោះយ៉ាងណាក៏ដោយ ក្នុងរយៈពេល ៣ថ្ងៃ នៃមួយសប្ដាហ៍ចុងក្រោយ ក្រុមយុវជនដែលភាគច្រើនជាមនុស្សតែមួយ ចំណាយពេលវេលាពេញមួយព្រឹកដើម្បីចូលរួមចូលយុទ្ធនាការ៖ «ខ្ញុំតំណាងឲ្យក្រុមយុវជនទាំងអស់ ដូច្នេះពេលមានការស្នើសុំពីស្ថាប័នពាក់ព័ន្ធ ដូចជាអង្គភាពប្រឆាំងអំពើពុករលួយ ដើម្បីចូលរួមការពារពាក្យបណ្ដឹង។ ដូច្នេះ ខ្ញុំក៏ស្នើសាលាសុំឈប់ដើម្បីដោះស្រាយរឿងនេះ។ ក្រុមរបស់យើងដែលកំពុងធ្វើយុទ្ធនាការសព្វថ្ងៃ កើតឡើងដោយឆន្ទៈផ្ទាល់ ដោយការសម្រេចចិត្ត ការសហការគ្នា ដោយបងប្អូនសិស្សនិស្សិតសម្រេចចូលរួមដោយមានការផ្ដល់ជំនួយពីឪពុកម្ដាយ បងប្អូន សិស្ស និស្សិត ដែលគាត់មានការងារធ្វើ ដោយជួយជាមូលនិធិ ជាវិភាគទានដល់ពួកយើង ដើម្បីប្រតិបត្តិការការងារនេះផងដែរ»។
បន្ទាប់ពីឆ្លើយសំណួរអ្នកសារព័ត៌មាន ក្រុមយុវជនជាង ១០នាក់ ដែលដាក់ញត្តិបានឡើងឡានឡែនគ្រូសស៊ឺ (land cruiser) ចតចាំពួកគេនៅមុខរដ្ឋសភា។ លោក ស្រី ចំរើន មានអ្នកចាំបើកទ្វារឡានឲ្យ។
មន្ត្រីគណបក្សសង្គ្រោះជាតិ និងជាប្រធានគណៈកម្មការរដ្ឋសភាផ្នែកសិទិ្ធមនុស្ស លោក អេង ឆៃអ៊ាង ថ្លែងថា លោកនឹងយកញត្តិរបស់ក្រុមយុវជននេះ ដាក់ជូនប្រធានរដ្ឋសភាដើម្បីពិចារណា។
កន្លងមក គណបក្សសង្គ្រោះជាតិ ប្រើយុទ្ធសាស្ត្រ មិនឆ្លើយ មិនឆ្លង មិនឈ្លោះ តបនឹងរឿងរ៉ាវការលេចធ្លាយខ្សែអាត់។ ក្រុមយុវជននេះ គ្រោងនាំគ្នាទៅចូលរួមសន្និបាតរបស់គណបក្សសង្គ្រោះជាតិ នៅថ្ងៃទី២៦ ខែមីនា ដើម្បីព្យាយាមម្ដងទៀត ស្នើលោក កឹម សុខា ចេញមកបកស្រាយសំណុំរឿងខ្សែអាត់សំឡេង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។