សម្ដេច នរោត្តម សីហនុ រិះគន់​អ្នក​គាំទ្រ​លន់​នល់

ដោយ សាន សុវិទ្យ
2008.04.30

អតីត​ព្រះមហាក្សត្រ​សម្តេច នរោត្តម សីហនុ ដែល​ខណៈ​នេះ ទ្រង់​ប្រថាប់​នៅ​ខេត្ត​សៀមរាប បាន​ចារ​ក្នុង​ទំព័រ​វ៉ឹបសៃថ៍​របស់​ព្រះអង្គ www.norodomsihanouk.info ថា ពួក​លន់នល់​និយម​ទាំង​ប្រុស​ទាំង​ស្រី​​ដែល​ត្រូវ​បរាជ័យ​ដូច​ចៅហ្វាយ​អាមេរិក​របស់​ខ្លួន ៥​ឆ្នាំ ក្រោយ​រដ្ឋ​ប្រហារ​ថ្ងៃ​១៨ មីនា ១៩៧០ ហើយ​ដែល​ខណៈ​នេះ រស់នៅ​ជា​ជនភៀសខ្លួន​ចោល​ស្រុក​ចោលទេស​នៅ​សហរដ្ឋ​អាមេរិក​ នៅ​ប្រទេស​បារាំង និង​ប្រទេស​ដទៃ​ទៀត ព្រមទាំង​កូនចៅ​របស់​ពួកគេ បាន​ប្រកាស​ឲ្យ​ដឹងថា នឹង​តាម​រំខាន​ធ្វើ​យ៉ាងណា​មិន​ឲ្យ​សីហនុ អាច​រស់នៅ​បាន​យ៉ាង​សុខសាន្ត​ឡើយ បើ​ព្រះអង្គ​យាង​ទៅ​អាមេរិក  បារាំង បែលហ្ស៊ិក អាល្លឺម៉ង់ដ៍ ។ល។ គឺថា បើ​ហ៊ាន​តែ​យាងទៅ​ប្រទេស​ទាំងនោះ គឺ​ច្បាស់ជា​នឹង​មាន​ការធ្វើ​បាតុកម្ម​តវ៉ា​ប្រឆាំង​និង​ជេរ​ប្រទេច​ផ្តាសា​ព្រះអង្គ​ជាមិនខាន ។

សម្តេច នរោត្តម សីហនុ ទ្រង់​បញ្ជាក់ថា ព្រះអង្គ​គ្មាន​បំណង​ចង់​យាង​ទៅ​ប្រទេស ដែល​អស់លោក អ្នក នាង​កញ្ញា ដែល​ស្អប់​សីហនុ រស់នៅ​នោះ​ឡើយ ។

ព្រះអង្គក៏​បញ្ជាក់​ផងដែរថា ពួក​លន់នល់និយម​ទាំងប្រុស​ទាំងស្រី​ទាំងនេះ គប្បី​យល់ព្រម​ទទួល​ខុសត្រូវ​ចំពោះ​ផលវិបាក​នៃ​បរាជ័យ​ដ៏​អាម៉ាស់​របស់​ពួកខ្លួន កាលពី​ថ្ងៃទី​១៧ មេសា ១៩៧៥ បន្ទាប់ពី​​បាន​រស់នៅ ៥ឆ្នាំ យ៉ាង​គ្មាន​កិត្តិគុណ នាទីក្រុង​ភ្នំពេញ នោះមក ។

អតីត​មហាក្សត្រ ទ្រង់ចារ​ទៀតថា បើគ្មាន​គំនិត​ធ្វើ​រដ្ឋប្រហារ ១៨ មីនា ១៩៧០ ទេ​នោះ ពួកនេះ​ច្បាស់ជា​នឹង​នៅរស់​យ៉ាង​សុខសាន្ត ប្រកប​ដោយ​កិត្តិយស​និង​ទ្រព្យ​សម្បត្តិ​ស្តុកស្តម្ភ ដូចពួក​លោក​ហ៊ុន សែន ជា ស៊ីម ហេង សំរិន និង​អ្នកគាំទ្រ​គណបក្ស​ប្រជាជន​កម្ពុជា ដ៏មហា​ប្រសើរ និង​ជា​ទីគោរព​រាប់អាន​ដទៃ​ទៀត មិនមែន​ទៅរស់​ចោលស្រុក​នៅបរទេស ដូចសព្វ​ថ្ងៃនេះ​ឡើយ ៕

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។