ទាហានមួកខៀវកម្ពុជា១១នាក់រងរបួសដោយសារខ្យល់ព្យុះកន្ត្រាក់នៅម៉ាលី
2014.07.24
កងកម្លាំងរក្សាសន្តិភាពកម្ពុជា ក្នុងនាមអង្គការសហប្រជាជាតិដែលទៅបំពេញបេសកកម្មនៅប្រទេសស៊ូដង់ខាងត្បូង ត្រឡប់មកដល់កម្ពុជានៅថ្ងៃទី៦ ខែមេសា ឆ្នាំ២០១៣។
មន្ត្រីក្រសួងការពារជាតិ ឲ្យដឹងថា មានកងទ័ពមួកខៀវកម្ពុជា ក្នុងក្របខ័ណ្ឌ ឬជ្រកក្រោមឆត្ររបស់អង្គការសហប្រជាជាតិ ជាង ១០នាក់ទៀត បានរងរបួសក្នុងបេសកកម្មរក្សាសន្តិភាពនៅក្នុងប្រទេសម៉ាលី (Mali)។ មន្ត្រីដដែលអះអាងថា ចាប់ពីខែកុម្ភៈ ឆ្នាំ២០១៤ មកដល់ពេលនេះ មានកម្លាំងមួកខៀវកម្ពុជា ១៣នាក់រងរបួស និងស្លាប់ ២នាក់នៅប្រទេសម៉ាលី។
លោក អ៊ុក ប៊ុនថន អនុប្រធាននាយកដ្ឋានបោសសម្អាតគ្រាប់មីន និងកាកសំណល់អាវុធជាតិផ្ទុះសម័យសង្គ្រាម នៃមជ្ឈមណ្ឌលជាតិសម្រាប់កងរក្សាសន្តិសុខ ឲ្យដឹងថា កងទ័ពមួកខៀវកម្ពុជា ដែលរងរបួសនោះមានចំនួន ១១នាក់។
លោកបន្តថា គ្រោះថ្នាក់នេះកើតឡើងកាលពីយប់ថ្ងៃទី២២ ខែកក្កដា បណ្ដាលមកពីខ្យល់ព្យុះកន្ត្រាក់នៅតំបន់គីដាល់ នៃប្រទេសម៉ាលី ចំជម្រករបស់កងកម្លាំងរក្សាសន្តិភាពរបស់អង្គការសហប្រជាជាតិ ចម្រុះជាតិសាសន៍បោះជំរុំសម្រាប់ស្នាក់នៅ៖ «ឮថាគ្រោះថ្នាក់នោះ ដោយសារខ្យល់ព្យុះ ហើយបានរលាត់ដៃជើងកងកម្លាំងទាំងនោះ។ ខ្យល់ព្យុះនេះ បើគិតម៉ោងនៅស្រុកគេវិញ គឺល្ងាចថ្ងៃទី២២ ខែកក្កដា។ ប៉ុន្តែគ្រាន់តែប៉ះពាល់ដល់ជម្រកស្នាក់នៅ និងប៉ើងអស់តង់ស្នាក់នៅចំនួន ២៣តង់ ឬខ្នង ហើយអ្នករបួសមិនធ្ងន់ធ្ងរទេ»។
លោក ប៊ុនថន បន្ថែមថា ឥទ្ធិពលខ្យល់ព្យុះកន្ត្រាក់នៅប្រទេសម៉ាលី ក៏បណ្ដាលឲ្យកងកម្លាំងមួកខៀវរបស់អង្គការសហប្រជាជាតិ មកពីបណ្ដាប្រទេសច្រើនទៀតរងរបួសដូចកម្លាំងកម្ពុជា ដែរ មានដូចជា ប្រទេសឆាដ (Chad) សេណេហ្គាល់ (Senegal) ហ្គីណេ (Guinea) និងប្រទេសបង់ក្លាដេស (Bangladesh) ដោយរងរបួសធ្ងន់ស្រាលចំនួន ២០នាក់។
ទោះជាបែបណា កងទ័ពមួកខៀវកម្ពុជា ទាំង ១១នាក់ ដែលរងរបួសនោះ កំពុងជួយសង្គ្រោះ និងសម្រាកព្យាបាលនៅមន្ទីរពេទ្យក្នុងប្រទេសម៉ាលី ក្រោមជំនួយរបស់អង្គការសហប្រជាជាតិ។
ទាក់ទិនបញ្ហានេះដែរ កាលពីថ្ងៃទី១៨ ខែកក្កដា កន្លងទៅនេះ កងកម្លាំងមួកខៀវកម្ពុជា ចំនួន ២នាក់ ក៏បានរងរបួសដោយជាន់មីនតោនបង្កប់ក្នុងដី និងកងទ័ពមួកខៀវចំនួន ២នាក់ផ្សេងទៀត បានស្លាប់កាលពីថ្ងៃទី១០ ខែមិថុនា ដោយពុលអាហារ និងមានបញ្ហាផ្លូវដកដង្ហើម។
កាលពីចុងខែកុម្ភៈ ឆ្នាំ២០១៤ ប្រទេសកម្ពុជា បានបញ្ជូនកងកម្លាំងមួកខៀវ ទៅបំពេញបេសកកម្មថែរក្សាសន្តិភាពជ្រកក្រោមឆត្ររបស់អង្គការសហប្រជាជាតិ នៅប្រទេសម៉ាលី ចំនួន ២កងអង្គភាព ក្នុងរយៈពេលមួយឆ្នាំ។ ហើយបើគិតមកដល់ពេលនេះ មានកងកម្លាំងចំនួន ១៣នាក់ និងស្លាប់ ២នាក់ សរុបចំនួន ១៥នាក់។
លោកឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិ គ្រប់គ្រងកងកម្លាំងរក្សាសន្តិសុខបោសសម្អាតមីន និងកាកសំណល់សង្គ្រាមកម្ពុជា ឲ្យដឹងថា ប្រទេសកម្ពុជា បានបញ្ជូនកងរក្សាសន្តិភាពក្នុងក្របខ័ណ្ឌរបស់អង្គការសហប្រជាជាតិ ចេញក្រៅប្រទេសនៅឆ្នាំ២០០៦ ដោយមានកងរក្សាសន្តិភាព ២នាក់បានស្លាប់ និងបញ្ជូនមកកម្ពុជា វិញ។
លោកបញ្ជាក់ថា កងកម្លាំងមួកខៀវកម្ពុជា ដែលបញ្ជូនទៅបំពេញបេសកកម្មរក្សាសន្តិភាពនៅក្នុងប្រទេសម៉ាលី ធ្វើឡើងកាលពីខែកុម្ភៈ ឆ្នាំ២០១៤ ហើយមានចំនួន ៣០៩នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- ពិធីមង្គលការរបស់ពលករខ្មែរនៅប្រទេសថៃ
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- អ្នកឃ្លាំមើល ថា លោក ហ៊ុន សែន ទំនងលែងទុកចិត្តអ្នកណាក្រៅពីកូនរបស់ខ្លួនហើយ
- លោក ស ខេង ចង់ឱ្យមានការធ្វើតេស្ដរកគ្រឿងញៀនលើពលរដ្ឋចាប់ពីអាយុ១៣ឆ្នាំដល់ក្រោម៤៥ឆ្នាំ
