មន្ត្រីក្រសួងការពារជាតិបានឲ្យដឹងថា កងទ័ពមួកខៀវកម្ពុជាចំនួន ២នាក់ ដែលកំពុងបំពេញបេសកកម្មរក្សាសន្តិភាពជ្រកក្រោមឆត្ររបស់អង្គការសហប្រជាជាតិនៅប្រទេសម៉ាលី បានរងរបួស ដោយបើករថយន្តជាន់មីនតោន។
លោក អ៊ុក ប៊ុនថន អនុប្រធាននាយកដ្ឋានបោសសំអាតគ្រាប់មីន និងកាកសំណល់អាវុធជាតិផ្ទុះសង្គ្រាមនៃមជ្ឈមណ្ឌលជាតិសម្រាប់កងរក្សាសន្តិសុខ បានឲ្យដឹងថា កងទ័ពមួកខៀវកម្ពុជា ទាំង ២រូប ដែលរងរបួសនោះ គឺក្នុងពេលបំពេញភារកិច្ចស្ថាបនាព្រលានយន្តហោះនៅប្រទេសម៉ាលី។
លោកបន្តថា គ្រោះថ្នាក់នេះគឺនៅពេលពួកគេទាំងពីរនាក់កំពុងបើកបររថយន្តស្ថាបនាព្រលានយន្តហោះមួយកន្លែងនៅប្រទេសម៉ាលី ក៏ជាន់គ្រាប់មីនតោនបង្កប់ក្នុងដី។
លោក ប៊ុនថន បញ្ជាក់ថា គ្រោះថ្នាក់នេះបានកើតឡើងកាលពីថ្ងៃទី១៨ ខែកក្កដា ឆ្នាំ២០១៤ ដោយបណ្ដាលឲ្យអ្នកបើកបររថយន្តរបួសធ្ងន់បាក់ជើងឆ្វេង និងម្នាក់ទៀតរបួសស្រាល។
កាលពីចុងខែកុម្ភៈ ឆ្នាំ២០១៤ ប្រទេសកម្ពុជា បានបញ្ជូនកងទ័ពទៅបំពេញបេសកកម្មថែរក្សាសន្តិភាពរបស់អង្គការសហប្រជាជាតិ នៅប្រទេសម៉ាលី ចំនួន ២អង្គភាពក្នុងរយៈពេលមួយឆ្នាំ។
បេសកកម្មនេះក៏បានបណ្ដាលឲ្យមានកងទ័ពមួកខៀវកម្ពុជា ចំនួន ២នាក់បានស្លាប់ កាលពីថ្ងៃទី៩ ខែមិថុនា ឆ្នាំ២០១៤៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។