ប៉ូលិសនៃការិយាល័យប្រឆាំងគ្រឿងញៀន ខេត្តសៀមរាប បានចាប់ខ្លួនបុរសជនជាតិបរទេស ៣នាក់ និងជនជាតិខ្មែរ ៤នាក់ទៀត ពាក់ព័ន្ធការប្រើប្រាស់ ព្រមទាំងលក់ដូរកញ្ឆា កាលពីព្រឹកថ្ងៃអង្គារ ទី១២ ខែមីនា។ ក្នុងចំណោមបុរសបរទេសទាំង ៣ ដែលប៉ូលិសបានចាប់ខ្លួននោះ គឺម្នាក់ជាជនជាតិអូស្ត្រាលី និង ២នាក់ទៀត ជាជនជាតិអ៊ីតាលី។
លោក អ៊ុំ សាអាត ជាប្រធានការិយាល័យនគរបាលប្រឆាំងគ្រឿងញៀនរបស់ស្នងការនគរបាលខេត្តសៀមរាប។ លោកបានមានប្រសាសន៍ថា កម្លាំងរបស់លោកដែលសហការជាមួយព្រះរាជអាជ្ញារងអមសាលាដំបូងខេត្តសៀមរាប បានចាប់ខ្លួនជនបរទេស និងជនជាតិខ្មែរទាំងអស់ ៧នាក់ ដោយសារពាក់ព័ន្ធការប្រើប្រាស់ និងការជួញដូរកញ្ឆា។
លោក អ៊ុំ សាអាត បញ្ជាក់ដូច្នេះ៖ «ជំហានដំបូងប្រជាពលរដ្ឋរាយការណ៍ថា អ្នកប្រើប្រាស់ហ្នឹងវាមានជាជនជាតិបរទេស។ អ៊ីចឹងកម្លាំងយើងទៅដល់ហ្នឹង គឺមានជនជាតិបរទេស ៣នាក់មែន យើងបង្ក្រាបមក។ ក៏ប៉ុន្តែចំណោមជនជាតិបរទេស ៣នាក់នោះ គឺប្រើប្រាស់តែម្នាក់ទេ ២នាក់ទៀត មិនទាន់ប្រើប្រាស់ទេ ប៉ុន្តែយើងកំពុងតែសាកសួរបន្តទៀត។ ជិះរ៉ឺម៉កម៉ូតូ ទៅផ្ទះខ្មែរម្នាក់នោះ ទៅធ្វើការប្រើប្រាស់ទីនោះតែម្ដង។ យើងឃាត់អ្នករត់រ៉ឺម៉កម៉ូតូម្នាក់ ហើយនិងម្ចាស់ផ្ទះម្នាក់ ដែលនាំភ្ញៀវឱ្យជក់ ព្រមទាំងរឹបអូសបានកញ្ជា រួមទាំងឧបករណ៍សម្រាប់ជក់។ អ៊ីចឹងគេបានឆ្លើយថា កញ្ឆាហ្នឹងទិញមកពីកន្លែងណា ហើយកម្លាំងរបស់ខ្ញុំបានចុះជាមួយព្រះរាជអាជ្ញារង ធ្វើការឆែកឆេរហាងមួយកន្លែង»។
នៅថ្ងៃដដែលនេះសមត្ថកិច្ចបានឃាត់ខ្លួនប្ដីប្រពន្ធដែលជាថៅកែហាងភីហ្សា មួយកន្លែងស្លាកយីហោ ហេបភី ភីហ្សា (Happy Pizza) ព្រមទាំងរឹបអូសបានបារី កញ្ឆាហាន់ និងកញ្ឆាក្រៀម ទម្ងន់ប្រមាណ ១គីឡូក្រាមទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។