ភរិយា​លោក ជា វិជ្ជា មិន​រំពឹង​ថា ទទួល​បាន​យុត្តិធម៌​ពី​របប​ដឹកនាំ​បច្ចុប្បន្ន​រក​ឃាតក​ពិត

ដោយ ខែ សុណង
2020-01-22
អ៊ីម៉ែល
មតិ
Share
បោះពុម្ព
ពិធី​គោរព​វិញ្ញាណក្ខន្ធ​ប្រធានសហជីព​សេរីកម្មករ នៃ​ព្រះរាជាណាចក្រ​កម្ពុជា លោក ជា វិជ្ជា នៅ​ទីតាំង​ស្ដូប​រូប​សំណាក នៅ​ជិត​វត្ត​លង្កា រាជធានី​ភ្នំពេញ នៅ​ថ្ងៃ​ទី២២ ខែ​មករា ឆ្នាំ​២០២០។
ពិធី​គោរព​វិញ្ញាណក្ខន្ធ​ប្រធានសហជីព​សេរីកម្មករ នៃ​ព្រះរាជាណាចក្រ​កម្ពុជា លោក ជា វិជ្ជា នៅ​ទីតាំង​ស្ដូប​រូប​សំណាក នៅ​ជិត​វត្ត​លង្កា រាជធានី​ភ្នំពេញ នៅ​ថ្ងៃ​ទី២២ ខែ​មករា ឆ្នាំ​២០២០។
RFA

ភរិយា​លោក ជា វិជ្ជា អតីត​ប្រធាន​សហជីព​សេរី​កម្មករ មិន​រំពឹង​ថា នឹង​ទទួល​បាន​យុត្តិធម៌​ពី​របប​ដឹកនាំ​បច្ចុប្បន្ន ក្នុង​ការ​វែកមុខ​រក​ឃាតក​ពិត ដែល​បាន​បាញ់សម្លាប់​ស្វាមី​នៅ​កណ្ដាល​ក្រុងភ្នំពេញ​នោះ​ទេ​។ ការ​លើក​ឡើង​នេះ នៅ​គ្រា​ដែល​ឃាតកម្ម​លើ លោក ជា វិជ្ជា អតីត​ប្រធាន​សហជីព​សេរី​កម្មករ​នៃ​ព្រះរាជាណាចក្រ​កម្ពុជា គិត​មកដល់​ថ្ងៃ​ទី​២២ ខែ​មករា ឆ្នាំ​២០២០ មាន​រយៈពេល​១៦​ឆ្នាំ​គត់ តែ​រដ្ឋាភិបាល​នៅតែ​មិន​អាច​រក​ឃាតក​ឃើញ។

ភរិយា លោក ជា វិជ្ជា គឺ​លោកស្រី ជា គឹមនី ដែល​កំពុង​រស់នៅ​ប្រទេស​ហ្វាំងឡង់ ថ្លែង​ថា លោកស្រី មិន​សង្ឃឹម​ទេ​ថា លោកស្រី​និង​កូនៗ​មាន​យុត្តិធម៌​នោះ ល្គឹកណា​របប​ក្រុងភ្នំពេញ​ដែល​ដឹកនាំ​ដោយ​គណបក្ស​ប្រជាជន​កម្ពុជា​របស់​លោក ហ៊ុន សែន នៅតែ​កាន់​ក្ដាប់​អំណាច។

ភរិយា​របស់​លោក ជា វិជ្ជា គឺ​លោកស្រី ជា គិមនី (កណ្ដាល) និង​កូន​ស្រី ដែល​មាន​សិទ្ធិ​ជ្រកកោន​នយោបាយ​នៅ​ប្រទេស​ហ្វាំងឡង់ (Finland)។ រូបថត​ឆ្នាំ​២០១៧។ Photo Provided
ភរិយា​របស់​លោក ជា វិជ្ជា គឺ​លោកស្រី ជា គិមនី (កណ្ដាល) និង​កូន​ស្រី ដែល​មាន​សិទ្ធិ​ជ្រកកោន​នយោបាយ​នៅ​ប្រទេស​ហ្វាំងឡង់ (Finland)។ រូបថត​ឆ្នាំ​២០១៧។ Photo Provided Photo Provided

លោកស្រី ជា គឹមនី អំពាវនាវ​ឱ្យ​ពលរដ្ឋ​ខ្មែរ​ក្រោក​ឈរឡើង​រួម​កម្លាំង​សាមគ្គី​ធ្វើការ​ផ្លាស់ប្ដូរ​អ្នកដឹកនាំ​បច្ចុប្បន្ន ដើម្បី​សិទ្ធិ​សេរីភាព ដោះស្រាយ​ការ​រំលោភ​បំពាន​នានា និង​កុំ​បែកបាក់​គ្នា ហើយ​សហគមន៍​អន្តរជាតិ​និង​បន្ត​ជួយ​គាំទ្រ​បន្ថែម​ទៀត នោះ​ពន្លឺ​យុត្តិធម៌​នឹង​មាន​សម្រាប់​គ្រប់គ្នា​ដែល​រងគ្រោះ មិន​ថា​តែ​គ្រួសារ​លោកស្រី​នោះ​ឡើយ៖ «បើសិនជា​ពន្លឺ​យុត្តិធម៌​សម្រាប់​ប្រទេស​កម្ពុជា វា​អត់​មាន​សម្រាប់​ខ្មែរ​ទេ បើសិនជា​ខ្មែរ​យើង​មានឱកាស​រួបរួម​គ្នា ឈាម​ខ្មែរ​ដូចគ្នា​វា​មាន​សម្ពាធ​ពី​អន្តរជាតិ​ជួយ​យើង​ហើយ​បើសិនជា​យើង​ស្រុះគ្នា យើង​ចាស់ៗ​យើង​អ្នករងគ្រោះ​យើង​ដឹង​ហើយ និយាយ​ទៅ​វា​ជិត​ចូល​៤០​ឆ្នាំ​ហើយ យើង​មិន​អាច​ធ្វើ​អ្វី​បាន​ផង ប៉ុន្តែ​ក្នុង​៤០​ឆ្នាំ​ហ្នឹង​យើង​គិត​មកដល់​ឆ្នាំ​២០២០ នេះ យើង​គិត​ធ្វើ​អី​មួយ​ប្ដូរ​ផ្លាស់​ឱ្យ​បាន​ល្អ​សម្រាប់​ខ្មែរ មិនមែន​ប្ដូរ​ផ្លាស់​ដើម្បី​សម្រាប់​សម្លាប់​ខ្មែរ​គ្នាឯង​ទេ ប្ដូរ ផ្លាស់​ដើម្បី​ឱ្យ​មាន​យុត្តិធម៌​សម្រាប់​ខ្មែរ​ទូទៅ​មិនមែន​សម្រាប់​តែ​គ្រួសារ​ខ្ញុំ​ទេ»

លោក ជា វិជ្ជា អតីត​ប្រធាន​សហជីព​សេរី​កម្មករ​នៃ​ព្រះរាជាណាចក្រ​កម្ពុជា ដែល​កម្មករ​ចាត់ទុកថា ជា​មេ​សហជីព​ដ៏​ក្លាហាន ត្រូវ​បាន​ខ្មាន់កាំភ្លើង​បាញ់សម្លាប់​នៅ​តូប​លក់​កាសែត កែង​របង​វត្ត​លង្កា ក្រុង​ភ្នំពេញ ខណៈ​លោក​កំពុង​អាន​កាសែត វេលា​ម៉ោង​៩​ព្រឹក កាលពី​ថ្ងៃ​ទី​២២ ខែ​មករា ឆ្នាំ​២០០៤ ក្នុង​ពេល​ដែល​ប្រទេស​កម្ពុជា កំពុង​ជួប​វិបត្តិ​នយោបាយ​រវាង​គណបក្ស​ចំនួន​៣ ដែល​ជាប់​គាំង​មិន​អាច​បង្កើត​រដ្ឋាភិបាល​បាន ក្រោយ​ពេល​បោះឆ្នោត​ឆ្នាំ​២០០៣ ដែល​គណបក្ស​ហ៊្វុនស៊ិនប៉ិច និង​គណបក្ស​គណបក្ស សម រង្ស៊ី បាន​ប្រកាស​ជំទាស់​មិន​ទទួលស្គាល់​លទ្ធផល​ឆ្នោត។

លោក ជា វិជ្ជា ក្រៅពី​ជា​មេដឹកនាំ​សហជីព លោក​ក៏​ជា​សកម្មជន​គណបក្ស សម រង្ស៊ី ដែរ​។ លោក​តែងតែ​ដឹកនាំ​កម្មករ​ធ្វើបាតុកម្ម​ប្រឆាំង​រដ្ឋាភិបាល ដើម្បី​សិទ្ធិ​សេរីភាព និង​លទ្ធិ​ប្រជាធិបតេយ្យ​នៅ​កម្ពុជា និង​ទាមទារ​ឱ្យ​កម្មករ​ហ៊ាន​តវ៉ា​ចំពោះ​ថៅកែ​រោងចក្រ​ដើម្បី​កុំ​ឱ្យ​ជិះជាន់​កម្លាំង​ពលកម្ម​កម្មករ​ក្នុង​វិស័យ​កាត់ដេរ។

មុន​ឃាតក​បាញ់សម្លាប់ លោក ជា វិជ្ជា បាន​ទទួល​សារ​ក្នុង​ទូរស័ព្ទ​ដៃ​របស់​លោក គំរាម​ផ្ដាច់ជីវិត នៅ​ក្នុង​ខែ​កក្កដា ឆ្នាំ​២០០៣ បន្ទាប់ពី​លោក​ប្រកាស​ឱ្យ​សមាជិក​សហជីព​សេរី​កម្មករ​ទាំងអស់​គាំទ្រ​គណបក្ស សម រង្ស៉ី។ លោក​បាន​ប្ដឹង​ទៅ​ប៉ូលិស​ព្រហ្មទណ្ឌ​រាជធានី​ភ្នំពេញ ស្រប​ពេល​លោក​នៅតែ​បន្ត​សកម្មភាព​ការងារ​តស៊ូ​មតិ​ដឹកនាំ​កម្មករ​ធ្វើបាតុកម្ម​ជា​ធម្មតា​។ ប៉ុន្តែ​ប៉ូលិស ឆ្លើយ​ថា មិន​ហ៊ាន​ចាត់ការ​ទេ ព្រោះ​អ្នក​គំរាម​នោះ​ជា​មន្ត្រី​មាន​ឋានៈ​ធំ​ខ្ពស់ ហើយ​មន្ត្រី​ប៉ូលិស​រូប​នោះ បាន​ណែនាំ​ឱ្យ​លោក ជា វិជ្ជា ត្រូវ​រក​កន្លែង​មាន​សុវត្ថិភាព​។ ទោះជា​យ៉ាង​នេះ​ក្តី លោក ជា វិជ្ជា មិន​ព្រម​ចាក​ចេញពី​ប្រទេស​កម្ពុជា តាម​ការ​ស្នើសុំ​របស់​អង្គទូត​នានា​ឡើយ ព្រោះ​លោក​ចង់​តស៊ូ​ដើម្បី​ផលប្រយោជន៍​កម្មករ សិទ្ធិ​សេរីភាព និង​លទ្ធិ​ប្រជាធិបតេយ្យ​នៅ​កម្ពុជា។

ប្រធាន​សហភាព​សហជីព​កម្ពុជា លោក រ៉ុង ឈុន ដែល​ជា​សហការី​មួយ​រូប​ធ្លាប់​ធ្វើការ​ជិត​ស្និទ្ធ​ជាមួយ​លោក ជា វិជ្ជា ថ្លែង​ថា លោក ជា វិជ្ជា បាន​លះបង់​ធំធេង​ណាស់​ដោយ​ព្រោះ​ចង់​ឃើញ​កម្មករ​កម្មការិនី​ទទួល​បាន​ប្រាក់​ឈ្នួល​សមរម្យ មាន​ជីវភាព​រស់នៅ​ថ្លៃថ្នូរ និង​មាន​សិទ្ធិ​សេរីភាព​និង​លក្ខខណ្ឌ​ការងារ​ល្អ​ប្រសើរ៖ «ចលនា​សហជីព​ដំបូង​គឺ​មាន​តែ​សហជីព​សេរី​មួយ​ទេ​បាទ​! ក្នុង​អំឡុង​ឆ្នាំ​១៩៩៨ ១៩៩៩ មក ចលនា​សហជីព​សេរី​ដែល​នាំ​មុខ​គេ​បំផុត​ហើយ​។ ពេលនោះ​ក៏​យើង​ធ្វើ​សកម្មភាព​ជួយ​កម្មករ លោក ជា វិជ្ជា យើង​ដឹង​ហើយ​សម័យ​នោះ មិន​មាន​ប្រាក់​ឈ្នួល​ប្រាក់ឧបត្ថម្ភ​មិន​មាន​ជំនួយ​អី​ធំ​ទេ ធ្វើការ​ដោយ​ស្ម័គ្រចិត្ត​ចាយ​លុយ​ហោប៉ៅ​ខ្លួនឯង លះបង់​ធំធេង​ណាស់ ខិតខំ​ធ្វើ​រហូត​ដល់​កម្មករ​មាន​ការ​យល់​ដឹង​ចេះ តស៊ូ​មតិ ចេះ​ទាមទារ​ប្រាក់​ឈ្នួល​ទាមទារ​លក្ខខណ្ឌ​ការងារ​រហូត​មានការ​ផ្លាស់ប្ដូរ​ការប្រែប្រួល​រហូត​បន្ត​បន្ទាប់មក»

(ពីឆ្វេង) លោក ប៉ាវ ស៊ីណា ប្រធាន​សម្ព័ន្ធ​សហជីព​ចលនា​កម្មករ លោក រ៉ុង ឈុន​ ប្រធាន​សហភាព​សហជីព​កម្ពុជា និង​លោក វន់ ពៅ ​ប្រធាន​សមាគម​ប្រជាធិបតេយ្យ ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ ចូលរួម​ពិធី​គោរព​វិញ្ញាណក្ខន្ធ​ប្រធានសហជីព​សេរីកម្មករ នៃ​ព្រះរាជាណាចក្រ​កម្ពុជា លោក ជា វិជ្ជា នៅ​ទីតាំង​ស្ដូប​រូប​សំណាក នៅ​ជិត​វត្ត​លង្កា រាជធានី​ភ្នំពេញ នៅ​ថ្ងៃ​ទី២២ ខែ​មករា ឆ្នាំ​២០២០។
(ពីឆ្វេង) លោក ប៉ាវ ស៊ីណា ប្រធាន​សម្ព័ន្ធ​សហជីព​ចលនា​កម្មករ លោក រ៉ុង ឈុន​ ប្រធាន​សហភាព​សហជីព​កម្ពុជា និង​លោក វន់ ពៅ ​ប្រធាន​សមាគម​ប្រជាធិបតេយ្យ ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ ចូលរួម​ពិធី​គោរព​វិញ្ញាណក្ខន្ធ​ប្រធានសហជីព​សេរីកម្មករ នៃ​ព្រះរាជាណាចក្រ​កម្ពុជា លោក ជា វិជ្ជា នៅ​ទីតាំង​ស្ដូប​រូប​សំណាក នៅ​ជិត​វត្ត​លង្កា រាជធានី​ភ្នំពេញ នៅ​ថ្ងៃ​ទី២២ ខែ​មករា ឆ្នាំ​២០២០។ RFA

ថ្វីបើ​លោក​មាន​ការ​តស៊ូ​លះបង់​ជីវិត​បែបនេះ​ក្ដី គិត​មក​ពេល​នេះ មាន​រយៈពេល ១៦​ឆ្នាំ​ហើយ ដែល​សំណុំរឿង​ឃាតកម្ម​ដ៏​កក្រើក​មួយ​នេះ នៅ​មិនទាន់​ត្រូវបាន​របប​ក្រុងភ្នំពេញ វែកមុខ​រក​ឃាតក​ឃើញ​នៅ​ឡើយ ក្រោយ​រង​ការ​រិះគន់​ថា បាន​ព្យាយាម​បង្កើត​ឃាតក​សិប្ប​និមិត្ត​នោះ​។ រដ្ឋាភិបាល លោក ហ៊ុន សែន នៅតែ​អះអាង​ថា សំណុំ​រឿង​នេះ នៅ​មិនទាន់​បិទ​បញ្ចប់​នៅឡើយ​ទេ ប៉ុន្តែ​ពី​មួយ​ឆ្នាំទៅ​មួយ​ឆ្នាំ មិន​ដែល​មាន​បង្ហាញ​ពី​ការ​វិវឌ្ឍ​នៃ​ការស៊ើបអង្កេត​ណាមួយ​ឡើយ ដែល​ប្រការ​នេះ ធ្វើ​ឱ្យ​សហគមន៍​ជាតិ និង​អន្តរជាតិ​ជឿ​ថា រដ្ឋាភិបាល​លោក ហ៊ុន សែន និយាយ​ឱ្យ​តែ​រួចពីមាត់​ប៉ុណ្ណោះ ពោល​គឺ​ពុំបាន​ធ្វើការ​ស៊ើបអង្កេត​នោះ​សោះឡើយ។

ក្រោយ​ឃាតកម្ម​លោក ជា វិជ្ជា គឺ​មាន​ប្រតិកម្ម​យ៉ាង​ខ្លាំង​ពី​សហគមន៍​ជាតិ និង​អន្តរជាតិ ទាមទារ​ឱ្យ​រដ្ឋាភិបាល​ស្វែងរក​ចាប់ខ្លួន​ឃាតក​។ ដើម្បី​ទប់​ស្ថានការណ៍​ខ្លះ នៅ​កាលណោះ សមត្ថកិច្ច​បាន​ចាប់​ឃាតក​សិប្ប​និមិត្ត គឺ​លោក ប៊ន សំណាង និង​លោក សុខ សំអឿន ដើម្បី​ឱ្យ​សាធារណជន​ស្ងប់ចិត្ត ។ ទីបំផុត​ទៅ​តុលាការ​កំពូល ក៏បាន​សម្រេចចិត្ត​ដោះលែង​អ្នក​ទាំងពីរ ក៏ប៉ុន្តែ​អំពើ​ដ៏​អយុត្តិធម៌​បាន​កើត​មាន​លើ​ជីវិត លោក ប៊ន សំណាង និង​លោក សុខ សំអឿន រួច​ទៅ​ហើយ បន្ទាប់ពី​ពួក​មន្ត្រី​ប៉ូលិស​ជាន់ខ្ពស់​ផុត​លេខ និង​តុលាការ​ឃុបឃិត​គ្នា​សម្រេច​ឃុំខ្លួន​ពួកគេ​ទាំងពីរ​ក្នុង​ពន្ធនាគារ​អស់​រយៈពេល​ជិត ៦​ឆ្នាំ។

ជុំវិញ​សំណុំ​រឿង​នេះ អ្នកនាំពាក្យ​ក្រសួង​​យុត្តិធម៌ លោក ជិន ម៉ាលីន អះអាង​ដែរ​ថា តុលាការ​នៅតែ​បើកចំហ​សំណុំ​រឿង​នេះ​ដដែល និង​បាន​បង្វិល​ឱ្យ​គណៈកម្មការ​ចម្រុះ​ដឹកនាំ​ដោយ​ក្រសួងមហាផ្ទៃ ដែល​រដ្ឋាភិបាល​បង្កើត​ឡើង បន្ត​ស៊ើបអង្កេត​បន្ថែម​ទៀត ប៉ុន្តែ​មក​ទល់​ពេល​នេះ លោក​ក៏​មិន​ដឹង​ថា មាន​លទ្ធផល​បែប​ណា​នោះ។

អាស៊ីសេរី​បាន​ព្យាយាម​ទាក់ទង​លោក ខៀវ សុភ័គ អ្នកនាំពាក្យ​ក្រសួង​មហាផ្ទៃ ជាច្រើនលើក​តែ​ទូរស័ព្ទ​ចូល​មិន​ទទួល ហើយ​ចុច​បិទ​។ ប៉ុន្តែ​លោក​តែង​តែង​អះអាង​មិន​ដាច់​ពី​មាត់​ថា សមត្ថកិច្ច​មិន​ដែល​បិទ​សំណុំរឿង​នេះ​ឡើយ។

អតីត​ស្នងការ​រាជធានី​ភ្នំពេញ លោក ហេង ពៅ ធ្លាប់​ប្រាប់​កាសែត​បរទេស មុន​ពេល​លោក ហ៊ុន សែន មិន​ទាន់​ចាប់ខ្លួន​លោក​ពី​ប្រទេស​ម៉ាឡេស៊ី នៅ​ក្នុង​ខែ​ធ្នូ ឆ្នាំ​២០០៦ ថា អតីត​អគ្គស្នងការ​នគរបាល​ជាតិ​កម្ពុជា លោក ហុក ឡងឌី បាន​បញ្ជា​ឱ្យ​លោក​ចាប់ សុខ សំអឿន និង ប៊ន សំណាង។ តែ​មន្ត្រី​លោក ហ៊ុន សែន បាន​បដិសេធ​ការ​អះអាង​របស់​លោក ហេង ពៅ នៅ​ពេល​នោះ​។

ពិធី​គោរព​វិញ្ញាណក្ខន្ធ​ប្រធានសហជីព​សេរីកម្មករ នៃ​ព្រះរាជាណាចក្រ​កម្ពុជា លោក ជា វិជ្ជា នៅ​ទីតាំង​ស្ដូប​រូប​សំណាក នៅ​ជិត​វត្ត​លង្កា រាជធានី​ភ្នំពេញ នៅ​ថ្ងៃ​ទី២២ ខែ​មករា ឆ្នាំ​២០២០។
ពិធី​គោរព​វិញ្ញាណក្ខន្ធ​ប្រធានសហជីព​សេរីកម្មករ នៃ​ព្រះរាជាណាចក្រ​កម្ពុជា លោក ជា វិជ្ជា នៅ​ទីតាំង​ស្ដូប​រូប​សំណាក នៅ​ជិត​វត្ត​លង្កា រាជធានី​ភ្នំពេញ នៅ​ថ្ងៃ​ទី២២ ខែ​មករា ឆ្នាំ​២០២០។ RFA

អនុប្រធាន​សហព័ន្ធ​សហជីព​សេរី​កម្មករ​នៃ​ព្រះរាជាណាចក្រ​កម្ពុជា លោក ម៉ាន់ សេងហាក់ ថ្លែង​ក្នុង​វេទិកា​អាស៊ីសេរី​នៅ​យប់​ថ្ងៃ​អង្គារ ទី​២១ ខែ​មករា ប្រហាក់ប្រហែល​នឹង​ភរិយា​លោក ជា វិជ្ជា ដែរ​ថា លោក​មើល​ឃើញ​ថា ថ្វីបើ​ពេលនេះ​រដ្ឋាភិបាល​គ្មាន​ឆន្ទៈ​ក្នុង​ការ​រក​យុត្តិធម៌​ដល់​គ្រួសារ​ជនរងគ្រោះ​ក្ដី លោក​នៅ​តែ​មាន​សង្ឃឹមថា យុត្តិធម៌​នឹង​នៅ​តែ​មាន​សម្រាប់​ក្រុម​គ្រួសារ​និង​លោក​ជា វិជ្ជា ជាក់​ជាមិនខាន​នៅ​ពេល​វេលា​ណាមួយ៖ «ពេលនេះ​រដ្ឋាភិបាល​គាត់​មិន​មាន​ឆន្ទៈ តែ​ក្រោយ​ទៀត​អាច​រដ្ឋាភិបាល​មាន​ឆន្ទៈ យើង​ឃើញ​ហើយ​ដូច​កាល​ជំនាន់​ដែល​គេ​សម្លាប់ លោក ជា វិជ្ជា ថ្មីៗ ព្រះករុណា​សម្ដេច​ព្រះ​នរោត្ដម បរមរតនកោដ្ឋ គាត់​ថា ឃាតក​នោះ​មិនមែន​ជា​ឃាតក​ពិត​ទេ ទីបំផុត​បាន​ប៉ុន្មាន​ឆ្នាំ​ក្រោយមក​គឺ លោក ប៊ន សំណាង លោក សុខ សំអឿន ត្រូវ​បាន​ដោះ​លែង​មែន​។ ខ្ញុំ​ក៏​មាន​ជំនឿ​អ៊ីចឹង​ដែរ​។ បច្ចុប្បន្ន​នេះ​យើង​ឃើញ​ថា រដ្ឋាភិបាល មិន​មាន​ឆន្ទៈ ប៉ុន្តែ​វា​អាច រដ្ឋាភិបាល​ថ្មី ឬ​យ៉ាងម៉េច​ទៅ​បើ​មាន​ឆន្ទៈ​គេ​អាច​រក​ឃើញ​ហើយ​។ ខ្ញុំ​មាន​ជំនឿ​អ៊ីចឹង​បាទ»

កាលពី​ថ្ងៃ​ទី​៣១ ខែ​ធ្នូ ឆ្នាំ​២០១១ លោកនាយក​រដ្ឋមន្ត្រី ហ៊ុន សែន បាន​ចុះហត្ថលេខា​ឱ្យ​សាងសង់​រូប​សំណាក​លោក ជា វិជ្ជា ឈរ​កាន់​មេ​ក្រូ​នៅ​លើ​ពយ នៃ​សួនច្បារ​ខាងលិច​វិមានឯករាជ្យ ខាងជើង​កែង​វត្ត​លង្កា ចម្ងាយ​ប្រមាណ ៥០​ម៉ែត្រ ពី​កន្លែង​ខ្មាន់កាំភ្លើង​បាញ់សម្លាប់​លោក ជា វិជ្ជា ដោយ​ត្រូវ​ដាក់​តាំង​រូបសំណាក​នោះ​ឱ្យ​ឈរ​បែរមុខ​ទៅ​ទិស​ខាងលិច។

មិន​ខុស​ពី​ឆ្នាំ​មុនៗ​ទេ នៅ​ខួប​១៦ នៃ​ឆ្នាំ​២០២០​នេះ សហព័ន្ធ​សហជីព​សេរី​កម្មករ​នៃ​ព្រះរាជាណាចក្រ​កម្ពុជា តែងតែ​ផ្ដួចផ្ដើម​ឱ្យ​មានការ​ជួបជុំ​ដាក់​កម្រងផ្កា​គោរព​វិញ្ញាណក្ខន្ធ​លោក ជា វិជ្ជា នៅ​ទីកន្លែង​តម្កល់​រូបសំណាក​លោក នៅ​ព្រឹក​ថ្ងៃ​ទី​២២ ខែ​មករា ដែល​ជា​ខួប​នៃ​ការ​បាញ់​ប្រហារ​លោក ជា វិជ្ជា។ រីឯ​សាលា​រាជធានី​មិន​អនុញ្ញាត​ឱ្យ​ពួកគេ​ហែ​ក្បួន​ទេ ដោយ​ដាក់​លក្ខខណ្ឌ​ឱ្យ​ជួបជុំ​ធ្វើ​ពិធី​សាសនា និង​ដាក់​កម្រងផ្កា រួច​បាន​ត្រឹម​ថ្លែង​សារ​ប៉ុណ្ណោះ។

ភរិយា​លោក ជា វិជ្ជា និង​កូនស្រី​ទាំងពីរ​ដែល​ធំធាត់​នៅ​ប្រទេស​ហ្វាំងឡង់ អះអាងវថា ស្រមោល​អតីតកាល​នៅតែ​តាម​លង​គ្រួសារ​លោកស្រី​ឥត​ឈប់ឈរ ភាព​ឈឺចាប់ និង​ការ​ទន្ទឹង​រង់ចាំ​យុត្តិធម៌​ក៏​នៅតែ​បន្ត ទោះបីជា​បាន​កន្លង​ផុត​១៦​ឆ្នាំ​ទៅ​ហើយ​ក្ដី៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល