អគ្គលេខាធិការសម្ព័ន្ធសហគមន៍កសិករកម្ពុជា លោក ថេង សាវឿន អះអាងថា ដំណោះស្រាយដ៏ល្អបំផុត ដើម្បីកុំឲ្យសហគមន៍អឺរ៉ុប ដាក់គំនាបឲ្យកម្ពុជាបង់ពន្ធលើការនាំអង្ករចេញទៅទីផ្សារអឺរ៉ុបនោះ គឺលោក ហ៊ុន សែន ត្រូវតែស្ដារលទ្ធិប្រជាធិបតេយ្យ និងការគោរពសិទ្ធិមនុស្សឡើងវិញ។
ការលើកឡើងរបស់ លោក ថេង សាវឿន នេះ ក្រោយដែលក្រុមហ៊ុន នាំអង្ករចេញចំនួន ២ក្រុមហ៊ុន បានដាក់លិខិតតវ៉ា ទៅកាន់ស្ថានទូត សហគមន៍អឺរ៉ុបប្រចាំនៅកម្ពុជា និងសហគមន៍អឺរ៉ុប នៅទីក្រុងប្រ៊ុចសែល (Brussel) ប្រទេសប៊ែលហ្សិក (Belgium) ដើម្បីឲ្យពិចារណាឡើងវិញ លើគម្រោងដាក់គំនាបពន្ធដារ លើអង្ករនាំចេញរបស់កម្ពុជា។
លោក ថេង សាវឿន បន្ថែមថា ប្រសិនបើសហគមន៍អឺរ៉ុប ដកហូតប្រព័ន្ធអនុគ្រោះពន្ធ "ទំនិញគ្រប់មុខ លើកលែងគ្រឿងសព្វាវុធ ឬ EBA" ពីកម្ពុជា ក្នុងនោះរួមមាន ការនាំអង្ករចេញដែរនោះ កសិករកម្ពុជា នឹងជួបហានិភ័យខ្ពស់ ក្នុងជីវភាពរស់នៅ និងគ្មានប្រាក់សងបំណុលដល់ធនាគារ ដែលខ្ចីមកធ្វើកសិកម្មនោះឡើយ៖ «បញ្ហាទាំងអស់នេះ គួរដែលដាក់លិខិតទៅរដ្ឋាភិបាលកម្ពុជាវិញដើម្បីដោះស្រាយបញ្ហាសំណើឬតម្រូវការចាំបាច់ របស់សហគមន៍អឺរ៉ុប ។ បញ្ហាសំខាន់ លើរដ្ឋាភិបាល ប្រសិនបើមិនខ្វល់ខ្វាយគិតគូរទេ នោះបញ្ហាកសិករ គាត់អាចធ្លាក់ខ្លួនក្រីក្រទៅ ដោយសារផលិតផលលក់បានថោក ហើយមិនអាចសងប្រាក់បំណុលបាន»។
កាសែតគាំទ្ររបបលោក ហ៊ុន សែន ផ្សាយកាលពីថ្ងៃទី២៩ ខែវិច្ឆិកា ឲ្យដឹងថា ប្រធានក្រុមប្រឹក្សាភិបាលនៃសហព័ន្ធស្រូវអង្ករកម្ពុជា លោក សុខ ពុទ្ធិវុធ បានទៅជួបពិភាក្សាជាមួយតំណាងសហគមន៍អឺរ៉ុប ជុំវិញការយកពន្ធលើអង្ករនាំចេញ នៅទីស្នាក់កណ្ដាលសហគមន៍អឺរ៉ុប នាទីក្រុងប្រ៊ុចសែល ប្រទេសប៊ែលហ្សិក។
លោក សុខ ពុទ្ធិវុធ ស្នើសុំឲ្យមានសវនាការដោយផ្ទាល់មាត់ទល់មុខគ្នា ដើម្បីឲ្យមេធាវីរបស់កម្ពុជា បានបកស្រាយពន្យល់ដោយផ្ទាល់ និងធ្វើបទបង្ហាញ ដល់ភាគីគណៈកម្មាការអឺរ៉ុប ឲ្យយល់ច្បាស់ពីផលវិបាកនានា ដល់ការយកពន្ធអង្កររបស់កម្ពុជានេះ។ គម្រោងដកការលើកលែងពន្ធចំពោះអង្ករកម្ពុជានេះក្រោយពី ប្រទេសអ៊ីតាលី និងប្រទេសអេស្ប៉ាញ ដែលជាសមាជិកនៃសហភាពអឺរ៉ុប ក៏បានតវ៉ាថា អង្ករកម្ពុជាដែលនាំចូលដោយមិនមានយកពន្ធទៅ EU បានធ្វើឲ្យប៉ះពាល់ទៅដល់ទីផ្សារ និងផលិតកម្មស្រូវ នៅប្រទេសរបស់ពួកគេ។
ក្នុងរយៈពេល ១០ខែ ឆ្នាំ២០១៨នេះ កម្ពុជាបាននាំចេញអង្ករចំនួន ជាង៤៣ម៉ឺនតោន ក្នុងនោះប្រភេទអង្ករក្រអូបមានជិត ៨០% ហើយសហគមន៍អឺរ៉ុបទិញអង្កររបស់កម្ពុជាជិត ៥០%៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។