នំអន្សមយក្សរបស់ខ្មែរដែលដាក់បង្ហាញនាឱកាសព្រឹត្តិការណ៍អង្គរសង្ក្រាន្តលើកទី៣ នៅខេត្តសៀមរាប ដើម្បីអបអរបុណ្យចូលឆ្នាំថ្មីប្រពៃណីជាតិខ្មែរឆ្នាំមមែនេះ បានជាប់ចំណាត់ឯតទគ្គកម្មថ្មីក្នុងសៀវភៅកំណត់ត្រាវត្ថុប្លែកៗលើពិភពលោក (Guinness World Records)។
មន្ត្រីដែលរៀបចំព្រឹត្តិការណ៍អង្គរសង្ក្រាន្តលើកទី៣ ឱ្យដឹងថា ក្នុងឆ្នាំនេះ ក្រុមសៀវភៅកំណត់ត្រាពិភពលោក ចាប់អារម្មណ៍ទៅលើរបស់ប្លែក ២យ៉ាង គឺទីមួយនំអន្សមជ្រូកយក្ស និងទី២ ក្រុមមនុស្សជាង ២.០០០នាក់ដែលប្រជុំគ្នារាំចង្វាក់ម៉ាឌីហ្សូន នៅខេត្តសៀមរាប។
មន្ត្រីផ្នែកវិនិច្ឆ័យកំណត់ត្រាវត្ថុប្លែកៗរបស់ពិភពលោក ប្រចាំប្រទេសទួរគី (Turkey) អ្នកស្រី សីដា ស៊ូបាស៊ី ជេមីគី (Seyda Subasi Gemici) បាន មកដល់ប្រទេសកម្ពុជា រយៈពេល ២ថ្ងៃហើយ ដើម្បីពិនិត្យមើលទៅលើនំអន្សមជ្រូកយក្សទម្ងន់ ៣.២៦៤គីឡូក្រាម របស់ខ្មែរ ដែលធ្វើសម្រាប់ដាក់បង្ហាញនៅក្នុងព្រឹត្តិការណ៍អង្គរសង្ក្រាន្តឆ្នាំនេះ ក្នុងបំណងចុះទៅក្នុងឯតទគ្គកម្មពិភពលោក។
កាលពីថ្ងៃច័ន្ទ ទី១៣ ខែមេសា អ្នកវិនិច្ឆ័យកំណត់ត្រាពិភពលោករូបនោះ បានធ្វើកិច្ចការជាច្រើនម៉ោង តាំងពីភ្លក់រសជាតិនំអន្សមយក្ស ការពិនិត្យមើលគុណភាព អនាម័យ រូបមន្តនៃការផលិត ព្រមទាំងថ្លឹងទម្ងន់ពិតប្រាកដផង។
មន្ត្រីទំនាក់ទំនងសាធារណៈនៃព្រឹត្តិការណ៍អង្គរសង្ក្រាន្ត គឺលោក សោម រតនា។ លោកមានប្រសាសន៍កាលពីរសៀលថ្ងៃច័ន្ទ ទី១៣ ខែមេសា ថា វាជាមោទនភាពខ្លាំងចំពោះនំអន្សមជ្រូកយក្សរបស់ខ្មែរដែលធ្វើឱ្យកំណត់ត្រាប្លែកៗរបស់ពិភពលោកចាប់អារម្មណ៍ និងធ្វើឱ្យប្រជាពលរដ្ឋខ្មែរជាច្រើនក៏មានការគាំទ្រនៅពេលដែលក្បួនដង្ហែនំនេះ ឆ្លងកាត់ផ្លូវជាច្រើនឆ្ពោះទៅដាក់តាំងនៅក្នុងបរិវេណប្រាសាទអង្គរធំ នៃព្រឹត្តិការណ៍អង្គរសង្ក្រាន្ត៖ «វាជាមោទនភាពមែនទែននៅពេលដែលកំពុងតែហែនេះ គឺបងប្អូនប្រជាពលរដ្ឋគាត់ចេញមកអបអរដោយទឹកចិត្តគាំទ្រតាមដងផ្លូវ ដើម្បីអបអរសាទរនៃការធ្វើនំអន្សមទម្ងន់ជាង ៣តោននេះ»។
សមាគមចុងភៅកម្ពុជា ដែលជាអ្នកធ្វើនំអន្សមជ្រូកយក្សមួយនេះ ឱ្យដឹងថា គេបានប្រើធាតុផ្សំជាច្រើនមុខសរុបទម្ងន់ ៤.០៤០គីឡូក្រាម ក្នុងនោះមានអង្ករដំណើរ ១តោន ខ្ទិះដូង ៤៩៩គីឡូក្រាម អំបិល ១៥គីឡូក្រាម សណ្ដែកបាយ ៤៩៩គីឡូក្រាម សាច់ជ្រូកបីជាន់ ៥០៧គីឡូក្រាម ម្រេចកំពត ៣គីឡូក្រាម ស្លឹកខ្ទឹមចិញ្ច្រាំ ១៦គីឡូក្រាម ស្លឹកចេក ៣៣៣គីឡូក្រាម និងខ្សែចំណង ៣៧៥គីឡូក្រាមជាដើម។
កាលពីវេលាម៉ោង ៤ និង ៥នាទីរសៀលថ្ងៃច័ន្ទនេះ អ្នកវិនិច្ឆ័យរបស់កំណត់ត្រាប្លែកៗនៅក្នុងពិភពលោក បានប្រកាសថា នំអន្សមជ្រូកយក្សរបស់ខ្មែរមួយនេះ បានជាប់ក្នុងឯតទគ្គកម្មថ្មីនៃពិភពលោកហើយ។
អនុប្រធានសមាគមចុងភៅកម្ពុជា លោក ឡុង បូរ៉ា មានប្រសាសន៍ថា ការដែលនំអន្សមជ្រូកយក្សរបស់ខ្មែរជាប់ក្នុងកំណត់ត្រាពិភពលោកនេះ វាគឺជានំអន្សមខ្មែរទី១ហើយដែលធ្វើឱ្យពិភពលោកបានស្គាល់៖ «ជាមោទនភាពសម្រាប់ចុងភៅរបស់ខ្ញុំទី១ ក៏ជាមោទនភាពសម្រាប់ប្រជាជនសៀមរាប ក៏ដូចជាប្រជាពលរដ្ឋខ្មែរទាំងមូលដែរ»។
មន្ត្រីរៀបចំព្រឹត្តិការណ៍អង្គរសង្ក្រាន្តឆ្នាំ២០១៥ ឱ្យដឹងថា ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរឆ្នាំមមែនេះ គេមានបំណងជំរុញឯតទគ្គកម្មចំនួន២ ទៅក្នុងសៀវភៅកំណត់ត្រាពិភពលោក គឺទី១នំអន្សមជ្រូកយក្សដែលមានទម្ងន់ ៣.២៦៤គីឡូក្រាម និងទី២ ការប្រមូលគ្នារាំចង្វាក់ម៉ាឌីហ្សូន ដែលមានមនុស្សចូលរួមចំនួន ២.០១៥នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។