ពលរដ្ឋខេត្តព្រៃវែងថា បទល្មើសនេសាទនៅបឹងស្នេហ៍និងបឹងខ្សាច់សខ្វះការបង្ក្រាប
2018.11.23
សៃយ៉ឺន ឬស្បៃមុងក្រឡាញឹករាប់រយម៉ែត្រ ត្រូវបានគេដាក់ពង្រាយលើផ្ទៃបឹងនៅចំណុចបឹងខ្សាច់ស ឬបឹងស្នេហ៍ប៉ែកខាងត្បូង ចន្លោះភូមិទីតាង៉ើយ ក្នុងឃុំរោងដំរី និងភូមិខ្សាច់ស ឃុំរក្សជ័យ ស្រុកបាភ្នំ ខេត្តព្រៃវែង។ រូបថតថ្ងៃទី២៣ ខែមករា ឆ្នាំ២០១៧។
RFA
ប្រជាពលរដ្ឋ រាយការណ៍ថា បទល្មើសនេសាទនៅតំបន់បឹងខ្សាច់ស និងតំបន់បឹងស្នេហ៍ស្ថិតក្នុងស្រុកបាភ្នំ ខេត្តព្រៃវែង នៅតែកើតមានពេញបន្ទុកដដែល ដោយសារតែអាជ្ញាធរ ខ្វះការបង្ក្រាបគ្រប់គ្រាន់។ ប៉ុន្តែអាជ្ញាធរជលផលខេត្តព្រៃវែងបដិសេធការចោទប្រកាន់របស់ពលរដ្ឋ។
ប្រជាពលរដ្ឋមូលដ្ឋានរាយការណ៍ថា អ្នកនេសាទល្មើសច្បាប់ប្រើប្រាស់ឧបករណ៍នេសាទខុសច្បាប់ឈ្មោះ សៃយ៉ឺន ឬស្បៃមុងក្រឡាល្អិត រាប់រយម៉ែត្រ នៅលើផ្ទៃបឹងខ្សាច់ស និងផ្ទៃបឹងស្នេហ៍ស្ថិតនៅ ក្នុងស្រុកបាភ្នំ ខេត្តព្រៃវែង។
ប្រជាពលរដ្ឋមួយរូបដែលធ្លាប់ចូលរួមទប់ស្កាត់បទល្មើសនេសាទ លោក ទី ផន រៀបរាប់ថា កន្លង មកបទល្មើសនេសាទ កើតមានតែនៅតំបន់បឹងខ្សាច់សមួយប៉ុណ្ណោះ ប៉ុន្តែបច្ចុប្បន្ននេះបទល្មើស នេសាទបានកើតឡើងរាលដាលដល់នៅតំបន់បឹងស្នេហ៍ដែរ។ លោកអះអាងថា បទល្មើសនេសាទ នេះកើតឡើង ព្រោះតែអាជ្ញាធរជំនាញពាក់ព័ន្ធ និងអង្គការអភិរក្សតំបន់បឹងធំៗទាំងពីរមិនសូវសហការចុះបង្ក្រាប និងទប់ស្កាត់ដូចមុន៖ «កម្មវិធីទប់ស្កាត់ដូចជាអត់មាន មើលទៅដូចចង់សាបសូន្យ ដូច្នេះភាពខ្វះចន្លោះទាំងអស់នេះ ទើបមានបទល្មើស។ ខាងអង្គការ women ក៏មិនដែលឃើញចុះទប់ស្កាត់ ដូចជាខ្វះការអប់រំផ្សព្វផ្សាយ និងខ្វះការសហការជាមួយអាជ្ញាធរទៀតដែរ»។
បឹងខ្សាច់ស និងបឹងស្នេហ៍នេះ ស្ថិតក្នុងគម្រោងអភិរក្សរបស់អង្គការនារីអភិវឌ្ឍន៍សេដ្ឋកិច្ច និងអនាម័យ ឬហៅថា អង្គការ Women និងមន្ត្រីជំនាញពាក់ព័ន្ធក្នុងខេត្តព្រៃវែង។
លោក ទី ផន បារម្ភថា ប្រសិនបើខ្វះការទប់ស្កាត់និងបង្ក្រាប ហើយបណ្ដោយឲ្យមានការនេសាទខុសច្បាប់កាន់តែច្រើននោះ នឹងធ្វើឲ្យបាត់បង់ធនធានត្រីធម្មជាតិ ហើយប្រជាពលរដ្ឋជាង ២០ភូមិ ដែលរស់នៅព័ទ្ធជុំវិញតំបន់បឹងខ្សាច់ស និងតំបន់បឹងស្នេហ៍ មិនអាចរកនេសាទជាលក្ខណៈគ្រួសារ បានទៀតទេ ដូច្នេះពួកគេ នឹងជួបបញ្ហាប្រឈមក្នុងជីវភាព៖ «ឥឡូវនេះវាមានភាពអនាធិបតេយ្យ ហើយអ្នកដែលមានលទ្ធភាពគេរកដាក់ស្បៃវែងអ៊ីចឹងទៅ ធ្វើអោយត្រីបាត់បង់ ហើយអ្នកដែលមានជីវភាពទន់ខ្សោយរកមិនបាន នៅពេលខាងមុខ ហើយធ្វើឲ្យប៉ះពាល់ដល់បងប្អូនដែលរស់នៅជុំវិញបឹង»។
អាស៊ីសេរី មិនទាន់អាចរកប្រភពទាក់ទងមន្ត្រីអង្គការWomen បាននៅឡើយទេនៅថ្ងៃទី២១ ខែវិច្ឆិកា។ រីឯនាយខណ្ឌរដ្ឋបាលជលផលខេត្តព្រៃវែង លោក អូន ស៊ីណាត មានប្រសាសន៍ថា អាជ្ញាធរជំនាញ បានអនុវត្តតាមច្បាប់ដោយចុះបង្ក្រាបជាបន្តបន្ទាប់ ហើយក៏គ្មានបទល្មើសធ្ងន់ធ្ងរដូចការចោទប្រកាន់របស់ប្រជាពលរដ្ឋឡើយ៖ «យើងចុះទៅធ្វើទាំងអស់ហើយនឹង ប៉ុន្មានថ្ងៃនេះ ហើយយើងទប់ឈប់ថ្ងៃនេះដោយសារគេបុណ្យអុំទូក កុំអីក៏ចុះទៀតដែរ។ បទល្មើសមិនមានអីដូចអ្នកថាទេ យើងបង្ក្រាបទាន់ពេលវេលាតើ។ នៅបឹងស្នេហ៍នេះ យើងការពារបានល្អបំផុតហើយ»។
បន្ថែមពីនេះ លោក អូន ស៊ីណាត ទទួលស្គាល់ថា បទល្មើសនេសាទ នៅតែកើតមានជាហូរហែដែរ ទោះបីជាមានការបង្ក្រាបយ៉ាងណាក៏ដោយចុះ។ លោកអះអាងថា ក្នុងមួយឆ្នាំៗអាជ្ញាធរបានបង្ក្រាប បទល្មើសនេសាទរាប់រយករណី និងមានការឃាត់ខ្លួនមនុស្ស បញ្ជូនទៅតុលាការ ដើម្បីផ្ដន្ទាទោសដាក់ពន្ធនាគារថែមទៀតផង ដើម្បីអោយពួកគេរាងចាល និងគោរពច្បាប់។
ទោះយ៉ាងណាក្តី ប្រជាពលរដ្ឋមួយចំនួនទៀត នៅតែយល់ថា មូលហេតុដែលបទល្មើសនេសាទនៅ តែកើតមានបែបនេះ ព្រោះតែអាជ្ញាធរខ្វះសមត្ថភាពអនុវត្តច្បាប់ឲ្យបានតឹងរ៉ឹង ហើយអាចជាប់ពាក់ ព័ន្ធនឹងអំពើពុករលួយ ឬទទួលបានផលប្រយោជន៍ពីអ្នករកស៊ីនេសាទខុសច្បាប់ថែមទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- តុលាការដោះលែងសកម្មជនគណបក្សប្រឆាំង និយមលោក កឹម សុខា គឺលោក យឹម ស៊ីណន ឱ្យនៅក្រៅឃុំបណ្ដោះអាសន្ន
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- "លោក ហ៊ុន សែន សម្ញែងនាឡិកាដៃតម្លៃរាប់លានដុល្លារ បង្ហាញថា លោកជាមេដឹកនាំពុករលួយ"
- ជប៉ុនប្រកាសមិនបញ្ជូនអ្នកសង្កេតការណ៍សំរាប់ការបោះឆ្នោតជាតិនៅខែកក្កដាខាងមុខនេះទេ
- សង្គមស៊ីវិលប្រតិកម្មនឹងក្រសួងអប់រំដែលឱ្យសិស្សឈប់សំរាកយូរដើម្បីគាំទ្រកីឡាស៊ីហ្គេម
